Adam im Iv, jān Douglas Fryer

Pāpode 5–11: “Anemkwoj n̄an Kāālet Anemkwoj im Mour Indeeo, kōn Rijojomar in Eļap”

2 Nipai 1–2

Eļan̄n̄e kwaar jeļā bwe mour eo am̧ ekar tin jem̧ļo̧k, ta ennaan ko āliktata kwon kar kwaļo̧k n̄an ro kwoj lukkuun iakwe er? Ke rikanaan Liai ekar en̄jake ke epaak an jemļo̧k mour eo an, eaar aiin baam̧le eo an ippān doon bar juon alen. Eaar kwaļo̧k n̄an er ta eo Jemedwōj Ilan̄ ekar kwaļo̧k n̄an e. Eaar kwaļo̧k naan in kam̧ool eo an kōn Messaia eo. Eaar kwaļo̧k m̧ool ko an gospel in ekar iakwe n̄an armej ro ekar iakwe. Eaar kōnono kōn anemkwoj, pokake, Wōtļo̧k eo an Adam im Iv, lo̧mo̧o̧r kōn Jisōs Kraist, im lan̄lōn̄. Ejjab aolep ro nejin rekar kāālet n̄an mour kake ta eo ekar kwaļo̧k—ejjeļo̧k iaad emaron̄ kōm̧m̧ani kāālet kein n̄an ro rejintōbōro ippād. Ak jemaron̄ katakin im kam̧ool kōn Ripinmuur eo, eo ej kōm̧m̧an bwe jen “anemkwoj n̄an kāālet anemkwoj im mour indeeo” (lale 2 Nipai 2:26–27).

Ļōmņak ko n̄an Ekkatak ilo M̧weeo im ilo Kabun̄ in

2 Nipai 1:13–29

Imaron̄ “ruj! im jerkak jān būn̄aln̄al.”

Ilo 2 Nipai 1:13–29, keememej naan ko an Liai ekar kōjerbale n̄an kōmeļeļeik mour in jetōb ko an Leman im Lemuel. Ta eo ejipan̄ eok ruj jān juon jetōbin “kiki eļap”? Ta eo ejipan̄ eok pikūrļo̧k juon jetōbin “tomede” ilo mour eo am̧? Ļōmņak kōn naan in kam̧ool eo an Liai ilo eoon 15 im karuwainene eo an ilo eoon 23. Ta ennaan eo an Jemedwōj Ilan̄ n̄an eok ilo eoon kein?

Kōjerbal kein katak ko. Kōjerbali kein katak ko enaaj jipan̄ rikatak ro meļeļe m̧ool ko ilo gospel in im to aer keememeji. Ilo am̧ keppopo n̄an katakin jān laajrak in, ļōmņaki ta kein katak ko kwomaron̄ kōjerbali. N̄an waanjon̄ak, kwomaron̄ kōjerbal jidik peba chain n̄an jipan̄ rikatak ro meļeļe naan ko an Liai ilo 2 Nipai 1:13 ak 2 Nipai 2:27.

2 Nipai 2

Kōn wōt Jisōs Kraist, Imaron̄ “anemkwoj n̄an kāālet anemkwoj im mour indeeo.”

Kiiō baam̧le eo an Liai repād ilo āneen kallim̧ur, eobrak kōn men ko rekāāl. Kāālet ko raar kōm̧m̧ani ilo jikin in enaaj aorōk n̄an em̧m̧an im m̧ōņōņō eo aer. Bōlen en̄in unin an Liai kar katakin ļeo nejin Jekab kōn anemkwoj, ak maron̄ eo n̄an kōm̧m̧ani kāālet ko, ilo 2 Nipai 2. Ilo am̧ ekkatak eoon 11–30, je uwaak ko rekkar n̄an kajjitōk kein:

• Etke anemkwoj elukkuun aorōk n̄an Jemedwōj Ilan̄, men̄e jet armej rej kōjerbale ilo juon wāween ekōmetak?

• Elmen an rikapo eo kajjieon̄ kam̧ōjņo̧ ak kakkure anemwkoj eo am̧?

• Elmen an Rilo̧mo̧o̧r eo jipan̄ eok “kāālet anemkwōj im mour indeeo” (eoon 27)?

En̄in bar juon wāween n̄an ekkatak kōn anemkwoj ilo 2 Nipai 2: pukot men ko me raorōk n̄an kōj n̄an bōk anemkwoj im n̄an tōpar aorōk eo ad make ekwojarjar. N̄an waanjon̄ok:

• 2 Nipai 2:5: Juon jeļāļo̧kjeņ kōn em̧m̧an im nana; juon kien

• 2 Nipai 2:11, 16:

• 2 Nipai 2:16:

• 2 Nipai 2:21:

• 2 Nipai 2:6–9, 26–28:

Ta eo enaaj waļo̧k n̄an anemkwoj eo ad eļan̄n̄e juon ak elōn̄ iaan men kein raar jako?

Jiljino iaan jekjen ko ilo N̄an Kōkajoorļo̧k Jodikdik Ro: Juon Tōl n̄an Kōm̧m̧ani Kāālet ko ewōr “Karuwainene ko” im “Kōjeraam̧m̧an ko kar Kallim̧ur.” Pukot juon ak elōn̄ļo̧k ilo jekjen kein, im kāālet juon kōjeraam̧m̧an kar kallim̧uri kōn kōjatdikdik ilo mour eo am̧. Ta karuwainene eo kwoj aikuj kōm̧m̧ane n̄an bōk kōjeraam̧m̧an in? Ļōmņak in kwaļo̧k n̄an ro jet kōjeraam̧m̧an ko kwoj būki jān ļoor karuwainene kein.

Bar lale Gospel Topics, “Agency and Accountability,” Gospel Library; “Know This, That Every Soul Is Free,” Hymns, no. 240.

2 Nipai 2:1–4, 6–25

Anij emaron̄ ukōt apan̄ ko aō n̄an kōjeraam̧m̧an.

Liai ekar jeļā bwe ļaddik eo nejin Jekab ekar en̄taan “elōn̄ kaen̄tanaan ko” im “eļap kabbūrom̧ōjm̧ōj” ke ej ajri (2 Nipai 2:1). Etke kwoj ļōmņak naan in kam̧ool eo an Liai ilo 2 Nipai 2:1–3, 6–25 eaar aorōk n̄an Jekab? Etke eaorōk n̄an eok? Pukot naan ko im eoon ko me kwoj loe ewōr tokjeer. Elmen an Anij kar kōjeraam̧m̧an en̄taan ko am̧ n̄an jeraam̧m̧an eo am̧? (Lale 2 Nipai 2:2.)

Bar lale Rom 8:28; Dale G. Renlund, “Illu kōn Kalijōkļo̧k,” Liaona, Māe 2021, 41–45.

2 Nipai 2:15–29

Wōtlo̧k eo im Pinmuur eo an Jisōs Kraist rej m̧ōttan ko raorōk ilo karōk eo an Jemedwōj Ilan̄.

Elōn̄ armej rej tōmak bwe Wōtļo̧k eo ekar menin kabūrom̧ōjm̧ōj im bwe Iv im Adam raar kōm̧m̧ane juon bōd eļap ke raar kāālet n̄an m̧ōn̄ā leen wōjke eo. Ilo 2 Nipai 2:15–28, Liai ej katakin kobain mool eo kōn Wōtļo̧k eo—im kōn pinmuur eo ilo Kraist. Ilo am̧ lali eoon kein, kōm̧m̧ane juon laajrak in m̧ool ko kōn ta eo ekar waļo̧k ilo Jikin Kallib Eden. Kajjitōk āinwōt kein remaron̄ jipan̄:

• Etke Wōtļo̧k eo ekar aorōk?

• Ta eo Jisōs Kraist ekar kōm̧m̧an n̄an anjo̧ jen jekjek ko an Wōtļo̧k eo?

• Elmen an jejjet kōmeļeļe in Wōtlo̧k eo jipan̄ kōj meļeļeļo̧k aikuj eo ad kōn Jisōs Kraist?

Bar lale Dallin H. Oaks, “The Great Plan of Happiness,” Ensign, Nob. 1993, 72–75.

N̄an ļōmņak ko reļļapļo̧k, lale ennaan eo an allōn̄ in ilo Liaona im N̄an Kōkajoorļo̧k Jodikdik Ro māākjiin.

En Jab Inepata Būruōmi, jān Howard Lyon

Ļōmņak ko n̄an Katakin Ajri ro

2 Nipai 1:13, 15, 23

Jisōs Kraist ej jipan̄ eō anjo̧ ioon jekjek ko an jerawiwi.

• N̄an jipan̄ ajri ro nejum̧ meļeļe karuwainene eo an Liai n̄an “pikūrļo̧k tomede ko” an jerawiwi, bōlen kwomaron̄ jerbal ippān doon n̄an kōm̧m̧ane juon jein jān peba ko. Ilo peba ko, ajri ro nejum̧ remaron̄ jipan̄ kwe jeki jet iaan men ko Setan ej kapo kōj n̄an kōm̧m̧ani. Innām kom̧ maron̄ riit ippān doon 2 Nipai 1:13, 15, 23 ilo aer ikkure kaki jet iaan naan ko ilo eoon eo—ekoba pikūrļo̧k peba chain eo. Elmen an jerawiwi āinwōt chain eo? Elmen an Jisōs jipan̄ eō “pikūrļo̧k tomede ko” an jerawiwi?

2 Nipai 1:20

Eļap aō jeraam̧m̧an n̄e ij pokake kien ko an Anij.

• Enaaj ke jipan̄ ajri ro nejum̧ n̄an keidi kien ko an Anij n̄an juuj ko, at ko, kuļob ko, ak men ko jet me rej kōjparok kōj? Bōlen kwomaron̄ kōtļo̧k aer kajjion̄i jet iaer ilo am̧ kōnono elmen an kien ko kōjparok kōj. Innām kwon riiti 2 Nipai 1:20, kwaļo̧k bwe jej “jeraam̧m̧an” (rej kōjeraam̧m̧an ak kōjparok) ilo ad kōjparok kien ko. Kwaļo̧k juon am̧ en̄jake ke kwar en̄jake ke kwaar jeraam̧m̧an ak kōjparok n̄an ļoor kien ko.

• N̄an kōmeļeļeik oktak eo ikōtaan jeraam̧m̧an im m̧wijkōk jān Anij (lale 2 Nipai 1:20), kwe im ajri ro nejum̧ maron̄ lale wut eo āmourrur im bōlōkin im raan me kar m̧wijitļo̧k jen wūt eo. Innām ajri ro nejum̧ remaron̄ lali kāālet ko me Nipai im ļōm̧aro jein raar kōm̧m̧ane (lale 1 Nipai 2:11–16; 3:5–7; 18:9–11). Ta tōprak ko an kāālet kein? Ta kāālet ko rejipan̄ kōj ekkeijel wōt n̄an Anij?

2 Nipai 2:11, 16, 27

Anij ekar letok n̄an n̄a anemkwōj in kāālet.

• N̄an jipan̄ ajri ro nejum̧ meļeļe ta eo Liai ekar katakin kōn jum̧ae n̄an kōm̧m̧ani kāālet ko, kwomaron̄ ikkure juon ikkure eo me kwoj ba naan eo) āinwōt meram) im ajri ro nejum̧ rej oktan (marok). Jipan̄ er jeļā etke jum̧ae ej m̧ōttan karōk eo an Anij ilo ami riit ippān doon 2 Nipai 2:11, 16. Innām kwomaron̄ kwaļo̧k bwebwenato ko kōn juon ajri eo kar kapoiki bwe en kōm̧m̧ane juon kāālet ebōd. Ajri ro remaron̄ kwaļo̧k ta jum̧ae eo kāālet eo ebōd im jerbal eo an.

• N̄an jeļā kōn oktak eo ikōtaan “anemkwoj” im “kōm̧akoko” (2 Nipai 2:27), ajri ro nejum̧ remaron̄ jin̄aik pija in menin mour ko ilo juon o̧ro̧r im juon menin mour ilo meļaaj eo. Menin mour rot eo eaenemkwoj? Karuwaineneik ajri ro n̄an jitōn̄ļo̧k pija eo ejim̧we ilo am̧ riiti naan eo “anemkwoj” ilo 2 Nipai 2:27). Kam̧ool bwe Jisōs Kraist ej kanemkwoj kōj.

• Al ippān doon juon al āinwōt “Choose the Right” (Hymns, no. 239). Ta eo jej ekkatak jān al in n̄an kōm̧m̧ani kāālet ko?

N̄an ļōmņak ko reļļapļo̧k, lale ennaan eo an allōn̄ in ilo eo Jera māākjiin.

Liai im Armej ro An Rej Tōkeakļo̧k ilo Laļ eo Ekāāl, jān Clark Kelley Price