Pāpode 12–18: “Kōm ar Mour ilo Juon Wāween Elem̧ōņōņō”

2 Nipai 3–5

Riiti 1 Nipai, kwomaron̄ bōk im̧we bwe Nipai ekar juon eo ekajoor ilo mour. “Ļap ilo ānbwin” jim̧or ilo ānbwin im jetōb (1 Nipai 2:16), eaar jab ebweer kōn apan̄ ko eaar iooni. Ak en̄in ej men eo jej maron̄ antooneļo̧k. Kōn tōmak eo an Nipai ekabwilōn̄ļōn̄, naan ko an ilo 2 Nipai 4 ej kwaļo̧k bwe men̄e armej ro retiljek jet iien rej en̄jake “en̄taan” im “epidodo aer jepooļ” er kōn menin kapo ko. Ijin jej lo juon eo ej kajjieon̄, ej kōņaan m̧ōņōņō, ak “buruō ej kōrraat kōn jero̧wiwi ko [an].” Jemaron̄ keidi menin im n̄an kōjatdikdik eo edim me ej waļo̧k: “Mekarta, ijeļā ilo wōn iaar lōke” (lale 2 Nipai 4:15–19).

Ke Nipai im armej ro an raar ekkatak n̄an mour “ilo juon wāween elem̧ōņōņō” (2 Nipai 5:27), raar bar ekkatak bwe lem̧ōņōņō ejjab pidodo an waļo̧k ak ejjeļo̧k iien būrom̧ōj. Aaet em̧ool ej itok ilo lōke Irooj, “[ad] ejm̧aan in wānōk” (2 Nipai 4:35).

Ļōmņak ko n̄an Ekkatak ilo M̧weeo im ilo Kabun̄ in

2 Nipai 3:6–24

Josep Smith kar kāālet e m̧okta jān an kar jepļaaktok gospel in.

Liai ekar kwaļo̧k n̄an ļōm̧aro nejin Josep juon kanaan kar letok jān Josep in Ijipt. Kanaan in ekar kōn ilju im jekļaj “rilolo eo ejenolo̧k,” Josep Smith. Ta eo eoon 6–24 ej ba bwe Josep Smith enaaj kar kōm̧m̧ane n̄an kōjeraam̧m̧an armej ro an Anij? Ļōmņake elmen an jerbal eo an Josep Smith naaj “kanooj aorōk” n̄an eok. Kwomaron̄ bōk jet ļōmņak ko jān pija eo kōn Josep Smith ilo “Prophets of the Restoration” koļāākjen ko ilo Gospel Ļāibrāre. Ļōmņak kōn kajjitōk ko āinwōt kein, im ļōmņak in jeki uwaak ko am̧:

• Ta eo kwojeļā kake kōn Jemedwōj Ilan̄ im Jisōs Kraist kōn wōt ta eo Josep Smith ekar kwaļo̧ke?

• Elmen an mour eo am̧ oktak kōn wōt ta eo Irooj ekar kōjepļaaktok kōn Josep Smith?

• Enaaj kar kōjkan mour eo am̧ n̄e en kar jab waļo̧k Jepļaaktok in?

Juon iaan m̧ōttan ko raorōk ilo mijen eo an Josep Smith ej n̄an bōktok Bok in Mormon. Ta eo kwoj ekkatak jān jebta in etke Bok in Mormon eaorōk? Ilo m̧ool, kwomaron̄ lale un ko ilo eoon 7, 11–13, 18–24.

Bar lale Josep Smith Ukook, Jenesis 50:24–38 (ilo Baibōļ appendix); Gospel Topics, “Josep Smith,” Gospel Ļāibrāre; “Jenaj Kautej N̄ōn Eman Eo,” Al, no. 32.

Rikanaan eo an Irooj, jān David Lindsley

2 Nipai 4:15–35

“O Irooj, iaar likūt aō lōke ilo Kwe.”

Nipai ekar ba bwe enaaj “jeje men ko an buruō” (eoon 15). Ilo ami riiti ta eo ekar je ilo 2 Nipa 4:15–35, kajjitōkin eok make, “Ta men ko an buruwō?” Ļōmņak in jeki, āinwōt kar Nipai, im kwaļo̧ki n̄an armej ro kwoj iakwe er.

Lale elmen an Nipai kar lo aenōm̧m̧an ke eaar m̧ōņōņō im eddodo maron̄ jipan̄ eok n̄e kwoj bar en̄jake ejja en̄jake rot in. Lale ilo eoon 15–35 ennaan ko me rej bōktok n̄an eok aenōm̧m̧an. Kwojjeļā ke kajjien ro jet me remaron̄ lo aenōm̧m̧an ilo ennaan kein?

Bar lale Ronald A. Rasband, “Men ko an Būruō,” Liaona, Nob. 2021, 39–41.

2 Nipai 5

Imaron̄ lo mour lem̧ōņōņō ilo gospel eo an Jisōs Kraist.

Ta eo kwoj ļōmņak ej meļeļein n̄an m̧ōņōņō? Nipai eaar je bwe armej ro an ren mour “ilo juon wāween elem̧ōņōņō” (2 Nipai 5:27). Kwomaron̄ lali kāālet ko Nipai im armej ro an rekar kōm̧m̧ane me ekar jipan̄ er m̧ōņōņō (lale, n̄an waanjon̄ak 2 Nipai 5:6, 10–17). Ta eo emaron̄ jipan̄ eo kalōk juon m̧our elem̧ōņōņō āinwōt armej ro an Nipai?

2 Nipai 5:20–21

Ta kar lia eo me eaar itok ioon Rileman ro?

Ilo raan ko an Nipai lia eo an Rileman ro ekar bwe raar “m̧wijkōk jān im̧aan mejān [Irooj] … kōn aer nana” (2 Nipai 5:20–21). Ej meļeļein bwe Jetōb eo an Irooj ekar ilo̧k jān mour ko aer. Tokālik ke Rileman ro raar kaorōk gospel eo an Jisōs Kraist,“kalia an Anij eaar jab bar ļoor er” (Alma 23:18).

Bok in Mormon eo ej barāinwōt kwaļo̧k bwe juon kakōļļe in kil ekilmej ekar itok ioon Rileman ro ālkin an Rinipai ro kar jepeļļo̧k jān er. Kōjāllin im paotok eo an kakkōļļe in ekar jab kanooj lukkuun po lel meļeļe kake. Kakkōļļe eo ilo jino in ekar kōjeno̧lok Rileman ro jān Rinipai ro. Tokālik, ke riNipai ro im riLeman ro raar etal ilo iaļen jerawiwi im wānōk, kōkkaļļe eo eaar jino jab jejjet.

Rikanaan ro raar bar kapene ilo tōre in ad bwe kil kilmej ejjab juon kakkōļļe an jab kōņaan ak lia. Būreejtōn Russell M. Nelson ekar kwaļo̧k: “Ijeļā bwe n̄e kwonaaj jutak im̧aan Anij eban kōn kōļar in ānbwiinum̧. Em̧m̧an im jab em̧m̧an ippān Anij ej pedped ioon wūjlepļo̧k eo am̧ n̄an Anij im kien ko An im ejjab kōn kōļar in ānbwiinum̧” (“Anij En Anjo̧,” Liaona, Nob. 2020, 94).

Ilo an Nipai kar katakin, Irooj eaar “jab kabbōjrak e jān an itok Ippān, kilmeej im mouj, rilokjak im rianemkwōj, m̧aan im kōrā; … aolep rej āinwōt juon n̄an Anij” (2 Nipai 26:33).

Bar lale “Till We All Come in the Unity of the Faith” (video), Gospel Ļāibrāre.

N̄an ļōmņak ko reļļapļo̧k, lale ennaan eo an allōn̄ in ilo Liaona im N̄an Kōkajoorļo̧k Jodikdikd Ro māākjiin ko.

Ļōmņak ko n̄an Katakin Ajri ro

2 Nipai 3:6–24

Josep Smith eaar juon rikanaan.

• Ļōmņake elmen am̧ maron̄ katakin ajri ro nejum̧ kōn jerbal eo eļap me Anij ekar kadedeļo̧k kōn Josep Smith. N̄an jinoe, kwomaron̄ jipan̄ ajri ro nejum̧ pukot naan eo “rilolo” ilo 2 Nipai 3:6 im kōmeļeļeiki bwe rikanaan ro kar ņa etāer rilolo ro kōnke Jemedwōj Ilan̄ ej jipan̄ er lo men ko jejjab loi. Kwaļo̧k etke kwoj kam̧m̧oolol bwe en wōr juon rilolo ej tōl Kabun̄ in.

• Ilo Bok in Gospel Pija ewōr ie jet pija ko kwomaron̄ kōjerbali n̄an katakin kōn jerbal eo an Anij ekar kōm̧m̧ane kōn Josep Smith (lale pija 89–95). Kōtļo̧k bwe ajri ro ren kwaļo̧k ta eo rejeļā kōn pija eo. Etke Josep Smith kar ņa etan juon “rilolo eo ejenoļo̧k? Ta eo Josep Smith ekar kōm̧m̧ane me “ekanooj aorōk”? (eoon 7).

2 Nipai 4:15–35; 5

Ij iakwe “men ko an Irooj.”

• Ta eo ej kōm̧m̧an bwe jen m̧ōņōņō? Ļōmņak in riiti eoon kein ippān doon jān 2 Nipai 4 n̄an lale ta eo Nipai ekar lan̄lōn̄ kake ak kōm̧m̧an bwe en m̧ōņōņō eoon 15–16, 20–25, 34–35). Ilo ennaan eo an “Men ko an Būruō,” Elder Ronald A. Rasband ekar kwaļo̧k jiljilimjuon “men ko Irooj” me raorōk ippān (Liaona, Nob. 2021, 39–41). Bōlen kwomaron̄ etale ippān doon laajrak eo an im kōnono kōn “men ko an Irooj” me raorōk ippāmi.

• 2 Nipai 5 ebar kōmeļeļeik men ko me rekar jipan̄ Rinipai ro mour “ilo juon wāween elem̧ōņōņō” (eoon 27). Kwomaron̄ kwaļo̧k jet naan ko ak pija ko me rej pinej jenkwan men kein im jipan̄ ajri ro nejum̧ māāji n̄an eoon ko ilo jebta 5. Jet waanjon̄ak ekoba baam̧le (eoon 6), kien ko an Anij (eoon 10), jeje ko rekwojarjar (eoon 12), jerbal (eoon 15 im 17), tampeļ ko (eoon 16), im kūr ko an Kabun̄ in (eoon 26). Ekōjkan an men kein bōktok n̄an kōj m̧ōņōņō?

2 Nipai 5:15–16

Tampeļ eo ej m̧weo im̧ōn Irooj.

• Ilo ami riiti 2 Nipai 5:15–16 n̄an ajri ro nejum̧, remaron̄ katen wōt n̄e rej jipan̄ Nipai kalōk juon tampeļ. Kwomaron̄ bar kwaļo̧k n̄an er pija in em̧ ko roktak, ekoba juon tampeļ. Elmen an tampeļ ko oktak jen em̧ ko jet? Kwaļo̧k n̄an ro jet etke tampeļ eo eaorōk n̄an eok (bar lale “I Love to See the Temple,” Children’s Songbook, 95).

Jabdewōt iien emaron̄ iien katakin. Jab ļōmņak katakin baam̧le eo am̧ ej juon men kwoj kōm̧m̧ane juon katen ilo juon wiik ilo juon iien katak. Ļōmņake āinwōt men eo kwoj kōm̧m̧ane aolep iien.

N̄an ļōmņak ko reļļapļo̧k, lale ennaan eo an allōn̄ in an eo Jera māākjiin.

Tampeļ eo an Nipai, jān Michael T. Malm