Jisōs ej jar ilo Getsemane

Ejjab Ankilaō, ak En Ankilaam̧, jān Harry Anderson

Pāpode 19–25: “O Ewi Jon̄an an Ļap Karōk eo an Ad Anij”

2 Nipai 6–10

Em̧oot ļo̧k 40 iiō jān tōre eo baam̧le eo an Liai raar em̧m̧akūt jān Jerusalem. Raar ruwaimāejet ilo laļ eo ekāāl, juon laļ ettoļo̧k jen Jerusalem. Liai eaar mej, im ro ineen raar jino ta eo eaar jino erom̧ etto kōn jum̧ae eo kōtaan riNipai ro—“raar tōmak ilo kakkōl ko im revelesōn ko an Anij”—im riLeman ro, ro raar jab (2 Nipai 5:6). Jekab, eo jatin Nipai im kiiō kar ekapit āinwōt juon rūkaki n̄an riNipai ro, ekar kōņaan bwe armej in bujen ro ren jeļā bwe Anij eban meļo̧kļo̧k er, kōn menin rejjab aikuj meļo̧kļo̧k E. Ej juon ennaan jej lukkuun aikuji rainin (lale Katak im Bujen Ko 1:15–16). “Jān keememej E … bwe jej jab riatajinemjen. … A reļļap kallim̧ur ko an Irooj,” Jekab ekar kwaļo̧k (2 Nipai 10:20–21). Ilubwiljin kōjeraam̧m̧an kein, ejjeļo̧k juon kallim̧ur eļapļo̧k jān “pinmuur eo ejjeļo̧k jem̧ļo̧kin” n̄an anjo̧ ioon mej im hell (2 Nipai 9:7). Jekab eaar ba, “kōn menin,” “en m̧ōņōņō buruwōmi”! (2 Nipai 10:23).

Ļōmņak ko n̄an Ekkatak ilo M̧weeo im ilo Kabun̄ in

2 Nipai 6–8

Irooj ej tūriam̧o̧ n̄an armej ro An im naaj kakūrm̧ool bujen ko An.

N̄an jipan̄ armej ro an meļeļe bwe rej m̧ōttan m̧weeo m̧ōn Israel im maron̄ lōke Anij im kallim̧ur ko An, Jekab eaar kouti kanaan ko an Aiseia, kar ļooki ilo 2 Nipai 6–8. Ennaan in ej n̄an bar kwe, kōn Armej ro Rekwojarjar ilo Raan ko Āliktata rej bar m̧ōttan armej in bujen ro an Anij. Ilo ami riiti jebta kein, ļōmņak kōn kajjitōk ko āinwōt kein ilaļ:

• Ta eo iaar ekkatak kōn pinmuur in iakwe eo an Rilo̧mo̧o̧r eo n̄an eō? Ta naan ko ak eoon ko rej kwaļo̧k em̧m̧an kōn iakwe in?

• Ta eo Rilo̧mo̧o̧r ej leļo̧k n̄an armej ro rej kappukot E?

• Ta eo imaron̄ kōm̧m̧ane n̄an tiljek ļo̧k “kōttar” Rilo̧mo̧o̧r im kōjeraam̧m̧an in kallim̧ur ko An?

pija in jemenere

2 Nipai 9:1–26

Jisōs Kraist ej lo̧mo̧o̧ren eō jān jerawiwi im mej.

Juon wāween n̄an kam̧wilaļļo̧k ad kam̧m̧oolol Jisōs Kraist ej n̄an ļōmņak kōn ta eo eaar kōm̧m̧ane n̄an kōj eļan̄n̄e en kar jab E. Ilo am̧ riit 2 Nipai 9:1–26, ļōmņak in kōlaajrake ak kōkkaļļeiki kōn juon kōļar ta eo en kar waļo̧k n̄an kōj eļan̄n̄e eban kar Pinmuur eo an Jisōs Kraist. Innām, ilo bar jet kōļar, kwomaron̄ kōkkaļļeik ta eo jemaron̄ bōke jān Pinmuur eo an Rilo̧mo̧o̧r. Pedped ioon ta eo kwaar riiti, elmen am̧ maron̄ kōmeļeļeiki etke jej aikuji Pinmuur eo an Jisōs Kraist? Ta eo kwaar loe ke eim̧weik eok n̄an nōbar kōn “jeļāļo̧kjeņ eo an Anij, tūriam̧o im jouj eo An”? 2 Nipai 9:8

Ilo kakkobaba n̄an kwaļo̧k ta eo Jisōs ekar ļo̧mo̧o̧ren kōj jāne, Jekab ekar bar letok ļōmņak in kōj wāween An kar kōm̧m̧ane. Ļōmņak in je ta eo kwoj loe ilo 2 Nipai 9:11–15, 20–24.

Jekab ekar lukkuun bwilōn̄ kōn karōk in ļo̧mo̧o̧r eo an Anij me eaar kwaļo̧ke, “O ewi jon̄an an ļap karōk eo an ad Anij.” Lale kōmeļeļe eo an ilo 2 Nipai 9 (aolepeer rej waļo̧k ilo eoon 8–20). Ta eo jej katak jān eoon kein kōn karōk eo an Anij? Ta en̄jake ko raar jipan̄ eok en̄jake jet iaan ta eo Jekab ekar en̄jake? Āinwōt m̧ōttan kabun̄jar im ekkatak ko am, ļōmņak in pukot juon al me emaron̄ kwaļo̧k elmen am̧ en̄jake kōn E, āinwōt “How Great Thou Art” (Hymns, no. 86).

Bar lale “Where Justice, Love, and Mercy Meet,” “Jacob Teaches of the Resurrection” (videos), Gospel Library; Gospel Topics, “Atonement of Jesus Christ,” Gospel Ļāibrāre

2 Nipai 9:7

Pinmuur eo an Rilo̧mo̧o̧r ejjeļo̧k jem̧ļo̧kin.

Ta kwomaron̄ kōm̧m̧ane n̄an meļeļeļo̧k “pinmuur eo ejjeļo̧k jem̧ļo̧kin” an Jisōs Kraist? 2 Nipai 9:7 Bōlen kwomaron̄ pukote men ko me ejjeļo̧k jem̧ļo̧kin ilo bōnbōn—kein m̧wijm̧wij ujooj ilo juon melaaj, bok ko ioon pārijet, ak iju ko ilan̄. Elmen an Pinmuur eo an Rilo̧mo̧o̧r ejjeļo̧k jem̧ļo̧kin? Elmen an pinmuur eo aorōk? Ta naan ko ilo 2 Nipai 9 ejipan̄ eok en̄jake kam̧m̧oolol kōn ta eo Rilo̧mo̧o̧r ekar kōm̧m̧ane n̄an eok?

2 Nipai 9:27–54

Imaron̄ itok n̄an Kraist im ļoor karōk eo an Anij.

Ilo 2 Nipai 9, Jekab ekar kōjerbale ruo naan ko rekajoor im oktakin naan ko: “karōk in tūriam̧okake eo an Rikōm̧anm̧an Eļap” im “karōk eo etamkwadik an eo enana” (2 Nipai 9:6,28). Bōlen kwomaron̄ jin̄aiki juon iaļ im jeiki ie Karōk eo an Jemedwōj Ilan̄. Innām lale 2 Nipai 9:27–52. Lali kakkōl ko im karuwainene ko me Jekab ekar litok n̄an jipan̄ kōj n̄an ļoor karōk in. Je ta eo kwoj loe iturin iaļ eo. Elmen an Setan kajjieon̄ tōlļo̧k kōj jān karōk eo an Anij? Ta eo kwaar en̄jake eim̧we n̄an kōm̧m̧an n̄an uwaake kakkōl im karuwainene eo an Jekab?

2 Nipai 10:20, 23–25

En̄taan eo an Jisōs Kraist emaron̄ bōktok n̄an eō lan̄lōn̄.

Ennaan eo an Jekab eaar juon eo ekalem̧ōņōņō. “Ij kōnono n̄an kom̧ men kein,”eaar ba, “bwe kom̧in maron̄ lan̄lōn̄, im kotak bōrami indeeo” (2 Nipai 9:3). Ilo am̧ riiti 2 Nipai 10:20, 23–25, ta eo kwoj loe me ekam̧ōņōņōik būruwōm̧? Ta eo kwonaaj kōm̧m̧ane n̄an keememej men kein n̄e kwoj inepata?

Bar lale Jon 16:33; D. Todd Christofferson, “Lan̄lōn̄ an Armej ro Rekwojarjar,” Liaona, Nob. 2019, 15–18; “Jacob Encourages the Nephites to Be Reconciled with God” (video), Gospel Ļāibrāre.

N̄an ļōmņak ko reļļapļo̧k, lale ennaan eo an allōn̄ in ilo Liaona im N̄an Kōkajoorļo̧k Jodikdik Ro māākjiin.

Ļōmņak ko n̄an Katakin Ajri ro

2 Nipai 9:6–10, 19–24

Jisōs Kraist ej aō Rilo̧mo̧o̧r.

• Elmen am̧ naaj jipan̄ ajri ro nejum̧ meļeļe im en̄jake bwe rej aikuji Rilo̧mo̧o̧r Jisōs Kraist? Peij in m̧akūtkūt eo an wiik in emaron̄ jipan̄. Ej kōjerbal juon ron̄ ak juon jikin uwe. Ļōmņak in kōjerbal 2 Nipai 9:21–22 im kōnono kake ippān ajri ro nejum̧ etke kwoj kam̧m̧oolol kōn Jisōs Kraist.

• Juon wāween n̄an jipan̄ ajri ro nejum̧ meļeļe unin ad aikuji Rilo̧mo̧o̧r ej n̄an katakin er kōn Wōtļo̧k eo. Kwomaron̄ kwaļo̧k juon pijain Adam im Iv, āinwōt Etal jān Jikin Kallib Eden (Gospel Ļāibrāre), im juon pijain Jisōs Kraist ioon debwāāl eo. Kajjitōk ippān ajri ro n̄an kōmeļeļeik ta eo ej waļo̧k ilo kajjojo pija. Elmen ad āinwōt Adam im Iv? Bōlen 2 Nipai 9:6–10 emaron̄ jipan̄ er lo ta eo Jisōs Kraist ekar kōm̧m̧ane n̄an kōj. Ļōm̧ņak in kajjitōk ippān ajri ro n̄an kwaļo̧k en̄jake ko aer kōn Jisōs Kraist. Juon al āinwōt “I Feel My Savior’s Love” (Children’s Songbook, 74–75) emaron̄ jipan̄.

Katakin m̧ool jān bwebwenato ko im waanjon̄ak ko. Lalel bwe bwebwenato ko im waanjon̄ak ko kwoj kōjerbali ren kwaļo̧k m̧ool. N̄an waanjon̄ak, n̄an kōjerbal peij in m̧akūtkūt eo an wiik in, kwaļo̧k bwe Jisōs Kraist eaar itok n̄an “ro̧n̄” eo n̄an jipan̄ kōj kajjojo bun̄ten ne ilo iaļ in ilo ad tallōn̄ ņam̧ōjtak.

2 Nipai 9:20, 28–29, 42–43, 49

“Buruō ej m̧ōņōņō ilo jim̧we.”

• N̄an kōketak ajri ro nejum̧i n̄an “[m̧ōņōņō] ilo jim̧we” ak lan̄lōn̄ n̄an pokake Irooj (2 Nipai 9:49), bōlen kwomaron̄ kwaļo̧k waanjon̄ak ko me juon ajri ej kōm̧m̧an juon kālet ejim̧we ak juon kālet ebōd. Karuwaineneik ajri ro n̄an jutak n̄e kāālet eo ej bōktok lem̧ōņōņō im jijet n̄e kāālet eo ej bōktok būrom̧ōj. N̄āāt eo jaar en̄jake m̧ōņōņō kōnke jaar kōm̧m̧ane juon kāālet n̄an ļoor Jisōs Kraist?

• Em̧m̧an ippān ajri ro nejum̧ iaio̧ ippān armej (n̄e rejjan̄in kar) ro rej ļōmņak bwe kien ko an Irooj rebwebwe ak emaat aer raan. Bōlen kwe ak ajri ro nejum̧ maron̄ kōnono kake elmen kōmeļeļeiki etke jej m̧ōņōņō in kōjparok kien ko. Etke ej aorōk n̄an lōke kapilōk eo an Anij men̄e jejjab lukkuun meļeļe kake? Kōketak er n̄an lale ilo 2 Nipai 9:20, 28–29, im 42–43 n̄an jipan̄ kōn kejōkļo̧kjeņ im ekōnono kōn kajjitōk kein.

N̄an ļōmņak ko reļļapļo̧k, lale ennaan eo an allōn̄ in an eo Jera māākjiin.

Jisōs ej kōmour armej

Eaar Kōmour Elōn̄ jān Nan̄inmej ko, jān J. Kirk Richards

peij in m̧akūtkūt eo: Jisōs Kraist ej lo̧mo̧o̧ren kōj jān jerawiwi im mej