Atamu ma Eva, saunia e Douglas Fryer

5–11 Fepuari: “Saoloto e Filifili le Saolotoga ma le Ola e Faavavau, e ala i le Puluvaga Sili”

2 Nifae 1–2

Afai ua e iloa o le a uma lou ola, o a ni savali mulimuli e te manao e faasoa atu ia i latou e sili ona e alofa i ai? Ina ua lagona e le perofeta o Liae ua lata ina uma lona soifua, sa ia faapotopotoina faatasi lona aiga mo le taimi mulimuli. Sa ia faasoa atu ia i latou mea na faaali atu e le Atua ia te ia. Sa ia molimau atu e uiga i le Mesia. Sa ia aoao atu upumoni o le talalelei sa ia faapelepele i ai i tagata sa ia faapelepele i ai. Sa saunoa o ia e uiga i le saolotoga, usiusitai, o le Pau o Atamu ma Eva, togiola e ala ia Iesu Keriso, ma le olioli. E le o ana fanau uma na filifili e ola i mea sa ia aoao atu—e leai se tasi o i tatou e mafai ona faia na filifiliga mo e pele ia i tatou. Ae e mafai ona tatou aoao atu ma molimau atu e uiga i le Togiola, o lē e faia i tatou ia “saoloto e filifili le saolotoga ma le ola e faavavau” (tagai 2 Nifae 2:26–27).

Manatu mo le Aoaoina i le Aiga ma i le Lotu

2 Nifae 1:13–29

E mafai ona ou “Ala mai ia! ma tulai ia mai i le efuefu.”

I le 2 Nifae 1:13–29, matau upu na faaaoga e Liae e faamatala ai le tulaga faaleagaga o Lamana ma Lemuelu. O le a se mea e fesoasoani ia te oe e fagua ai mai se “moe gase” faaleagaga? O le a se mea e fesoasoani ia te oe e lulu ese ai “filifili” faaleagaga i lou olaga? Mafaufau i le molimau a Liae i le fuaiupu 15 ma lana valaaulia i le fuaiupu 23. O le a se savali a le Tama Faalelagi mo oe i nei fuaiupu?

Faaaoga mea faitino. O le faaaogaina o mea faitino o le a fesoasoani i tagata aoao e malamalama ai i upumoni o le talalelei ma manatua umi ai. A o e sauni e aoao atu mai lenei otootoga, mafaufau po o a mea faitino e mafai ona e faaaogaina. Mo se faataitaiga, atonu o se filifili pepa e mafai ona fesoasoani i tagata aoao e malamalama ai i upu a Liae i le 2 Nifae 1:13 po o le 2 Nifae 2:27.

2 Nifae 2

Ona o Iesu Keriso, ua ou “saoloto ai e filifili le saolotoga ma le ola e faavavau.”

Ua i ai nei le aiga o Liae i se laueleele fou, e tumu i avanoa fou. O filifiliga na latou faia i lenei nofoaga fou o le a taua mo lo latou manuia ma le fiafia. Atonu o le mafuaaga lea na aoao ai e Liae lona atalii o Iakopo e uiga i le faitalia, po o le gafatia e faia ai filifiliga, i le 2 Nifae 2. A o e suesueina fuaiupu 11–30, tusi i lalo tali talafeagai i fesili nei:

• Aisea e taua tele ai le faitalia i le Tama Faalelagi, e ui ina faaaoga e nisi tagata i ni auala faatiga?

• E faapefea ona taumafai le fili e faavaivai pe faatamaia lou faitalia?

• E faapefea ona fesoasoani le Faaola ia te oe e “filifili le saolotoga ma le ola e faavavau” (fuaiupu 27)?

O le isi auala lenei e aoao ai e uiga i le faitalia i le 2 Nifae 2: Vaavaai mo mea e taua mo i tatou ina ia maua ai le faitalia ma ausia ai lo tatou gafatia paia. Mo se faataitaiga:

• 2 Nifae 2:5: O se malamalama i le lelei ma le leaga; o se tulafono

• 2 Nifae 2:11, 16:

• 2 Nifae 2:16:

• 2 Nifae 2:21:

• 2 Nifae 2:6–9, 26–28:

O le a se mea o le a tupu i lo tatou faitalia pe afai e misi se tasi pe sili atu foi o nei mea?

O vaega taitasi e ono o le Mo le Malosi o le Autalavou: O Se Taiala mo le Faia o Filifiliga o loo i ai “Valaaulia” ma “Faamanuiaga Folafolaina.” Vaai i se tasi pe sili atu o nei vaega, ma filifili se faamanuiaga folafolaina ua e faamoemoe i ai i lou olaga. O le a le valaaulia e tatau ona e faatinoina ina ia maua ai lenei faamanuiaga? Mafaufau e faasoa atu i se tasi faamanuiaga ua e maua mai le mulimuli i nei valaaulia.

Tagai foi i Autu o le Talalelei, “Agency and Accountability,” Gospel Library; “Know This, That Every Soul Is Free,” Viiga, nu. 240.

2 Nifae 2:1–4, 6–25

E mafai e le Atua ona liliu o’u tofotofoga i faamanuiaga.

Na iloa e Liae o lona atalii laitiiti o Iakopo na mafatia i “puapuaga,” ma le “faanoanoa tele” i le taimi o lona laitiiti (2 Nifae 2:1). Aisea e te manatu ai o le molimau a Liae i le 2 Nifae 2:1–3, 6–25 atonu o le a taua ia Iakopo? Aisea e taua tele ai ia te oe? Vaavaai mo upu ma fasifuaitau e te mauaina e faapitoa le mamana. Na faapefea ona faapaiaina e le Atua ou puapuaga mo lou manuia? (Tagai i le 2 Nifae 2:2.)

Tagai foi Roma 8:28; Dale G. Renlund, “Faapito’au Faaosolilivau,” Liahona, Me 2021, 41–45.

2 Nifae 2:15–29

O le Pau ma le Togiola a Iesu Keriso o ni vaega taua o le fuafuaga a le Tama Faalelagi.

E toatele tagata e talitonu o le Pa’ū ua na o se mala ma na faia e Eva ma Atamu se mea sese tumau ina ua la filifili e aai i le fua. I le 2 Nifae 2:15–28, o loo aoao mai ai e Liae upumoni faaopoopo e uiga i le Pa’ū—ma e uiga i le togiola e ala ia Keriso. A o e suesue i nei fuaiupu, fai se lisi o upumoni e uiga i mea na tutupu i le Faatoaga o Etena. O le a fesoasoani fesili e pei o nei:

• Aisea na tatau ai le Pa’ū?

• O le a le matafaioi na faia e Iesu Keriso i le faatoilaloina o aafiaga o le Pa’ū?

• E fesoasoani faapefea ia i tatou le malamalama sa’o i le Pa’ū e malamalama atili ai i lo tatou manaomia o le Togiola a Iesu Keriso?

Tagai foi Dallin H. Oaks, “O le Fuafuaga Sili o le Fiafia,” Ensign, Nov. 1993, 72–75.

Mo nisi manatu, tagai i lomiga o lenei masina o mekasini o le Liahona ma le Mo le Malosi o le Autalavou .

Aua Le Atuatuvale o Outou Loto, saunia e Howard Lyon

Manatu mo le Aoaoina o Tamaiti

2 Nifae 1:13, 15, 23

E fesoasoani Iesu Keriso ia te au e faatoilalo aafiaga o le agasala.

• Ina ia fesoasoani i lau fanau ia malamalama i le valaaulia a Liae e “lulu ese filifili” o le agasala, atonu e mafai ona outou galulue faatasi e fai se filifili mai ni fasipepa. I luga o fasipepa, e mafai e lau fanau ona fesoasoani ia te oe e tusi nisi o mea e faaosoosoina ai i tatou e Satani e fai. Ona mafai lea ona outou faitau faatasi le 2 Nifae 1:13, 15, 23 a o latou faatinoina nisi o fasifuaitau i nei fuaiupu—e aofia ai le lulu ese o le filifili pepa. E faapefea ona pei agasala o se filifili? E faapefea ona fesoasoani Iesu ia i tatou e “lulu ese filifili” o le agasala?

2 Nifae 1:20

E faamanuiaina a’u pe a ou usiusitai i poloaiga a le Atua.

• Mata e fesoasoani i lau fanau le faatusatusa o poloaiga a le Atua i seevae, pulou, totigilima, po o isi mea e puipuia ai i tatou? Atonu e mafai ona e faataga i latou e faataitai nisi o nei mea a o e talanoa e uiga i le auala e puipuia ai i tatou e poloaiga. Ona mafai lea ona e faitauina le 2 Nifae 1:20, ma faamamafa atu faapea tatou te “manuia” (e faamanuiaina pe puipuia) a o tatou tausia poloaiga. Faasoa se mea na tupu ina ua faamanuiaina ma puipuia oe i le mulimuli i poloaiga.

• Ina ia faaalia le eseesega i le va o le faamanuiaina ma le vavaeeseina mai le Atua (tagai 2 Nifae 1:20), e mafai e oe ma lau fanau ona vaai i se laau maloloina ma se laulaau po o se lala ua vavae ese mai le laau. Ona mafai lea e lau fanau ona iloilo filifiliga na faia e Nifae ma ona uso (tagai 1 Nifae 2:11–16; 3:5–7; 18:9–11). O a ni taunuuga o nei filifiliga? O a filifiliga e fesoasoani ia i tatou e tumau ai le fesootai atu i le Atua?

2 Nifae 2:11, 16, 27

Na tuuina mai e le Atua ia te au le saolotoga e filifili ai.

• Ina ia fesoasoani i lau fanau ia malamalama i mea na aoao mai e Liae e uiga i le faafeagai ma le faia o filifiliga, e mafai ona e faia se taaloga lea e te fai atu ai se upu (e pei o le malamalama) ae fai mai e lau fanau lona faafeagai (pogisa). Fesoasoani ia i latou e aoao pe aisea ua avea ai faafeagai o se vaega o le fuafuaga a le Atua a o outou faitau faatasi le 2 Nifae 2:11, 16. Taʻu i tamaiti ni tala e uiga i se tamaitiiti ua faaosoosoina e faia se filifiliga sese. E mafai e lau fanau ona faasoa mai po o le a le faafeagai o le filifiliga sese ma faatino.

• Ina ia aoao e uiga i le eseesega i le va o le “saolotoga” ma le “faatagataotauaina” (2 Nifae 2:27), e mafai e lau fanau ona tusi ni ata o se manu i se pa ma se manu i lona siosiomaga faalenatura. O le fea manu o loo saoloto? Valaaulia tamaiti e faasino i le ata saPa’ūo pe a e faitauina le upu “saoloto” i le 2 Nifae 2:27. Molimau atu e faapea ua faasaolotoina e Iesu Keriso i tatou.

• Usu faatasi se pese e pei o le “Filifili Tau o Mea Tonu” (Viiga, nu. 149). O le a se mea ua e aoaoina mai le pese e uiga i le faia o filifiliga?

Mo nisi manatu, tagai i le lomiga o lenei masina o le mekasini o le Uo .

Ua Taunuu Liae ma Lona Nuu i le Lalolagi Fou, saunia e Clark Kelley Price