12–18 Fepuari: “Sa Oo Ina Matou Ola e Tusa ma le Ala o le Fiafia”

2 Nifae 3–5

O le faitauina o le 1 Nifae, e mafai ona e maua ai le uunaiga faapea na telē atu Nifae nai lo le olaga. “Tino ese” i le faaletino ma le faaleagaga (1 Nifae 2:16), sa foliga mai e le maluelue ona o tofotofoga sa feagai ma ia. Pe o le mea sili foi lena tatou te ono manatu i ai. Ae e ui o le faatuatua o Nifae sa ofoofogia, ae o ana upu aga vaivai i le 2 Nifae 4 ua faaalia ai e oo lava i tagata sili ona faamaoni o nisi taimi e lagonaina le “leaga” ma “faigofie ona ponatia” i faaosoosoga. O iinei tatou te vaai ai i se tasi o loo taumafai, e manao ia fiafia, ae ua “oi [le] loto ona o [ana] agasala.” E mafai ona tatou fesootai i lena mea ma le naunautaiga faamoemoeina o loo mulimuli mai: “Ae ui i lea, ua ou iloa le ua ou faalagolago i ai” (tagai 2 Nifae 4:15–19).

Ao aoao Nifae ma lona nuu e ola “e tusa ma le ala o le fiafia” (2 Nifae 5:27), sa latou aoaoina foi e le faigofie ona oo mai le fiafia pe aunoa foi ma ni vaitaimi o le faanoanoa. E iu lava ina oo mai i le faalagolago i le Alii, o “le papa o [lo tatou] amiotonu” (2 Nifae 4:35).

Manatu mo le Aoaoina i le Aiga ma i le Lotu

2 Nifae 3:6–24

Sa filifilia Iosefa Samita e le Atua e toefuatai mai le talalelei.

Sa faasoa atu e Liae i lona atalii o Iosefa se valoaga na tuuina mai e Iosefa o Aikupito. O le valoaga sa faatatau i se “tagatavaai filifilia” i le lumanai, o Iosefa Samita. O le a se mea o loo tau mai e fuaiupu 6–24 o le a faia e Iosefa Samita e faamanuia ai le nuu o le Atua? Mafaufau pe ua faapefea ona “aoga tele” ia te oe galuega a Iosefa Samita. Atonu e te maua ni manatu mai vitio e uiga ia Iosefa Samita i le tuufaatasiga i le “Perofeta o le Toefuataiga” i le Potutusi o le Talalelei. Mafaufau i fesili faapenei, ma mafaufau e tusifaamaumau au tali:

• O le a se mea ua e iloa e uiga i le Tama Faalelagi ma Iesu Keriso ona o mea na aoao mai e Iosefa Samita?

• Ua faapefea ona ese lou olaga ona o mea na toefuatai mai e le Alii ia Iosefa Samita?

• O le a le tulaga e i ai lou olaga pe ana faapea e lei tupu le Toefuataiga?

O le vaega taua e tasi o le misiona a Iosefa Samita o le aumaia lea o le Tusi a Mamona. O le a se mea ua e aoaoina mai lenei mataupu i le mafuaaga e taua ai le Tusi a Mamona? Aemaise lava, e mafai ona e vaavaai mo mafuaaga i fuaiupu 7, 11–13, 18–24.

Tagai foi Faaliliuga a Iosefa Samita, Kenese 50:24–38 (i le faaopoopoga i le Tusi Paia); Autu o le Talalelei, “Joseph Smith,” Gospel Library; “Viia Le na Fetaiai ma Ieova,” Viiga, nu. 15.

Perofeta a le Alii, saunia e David Lindsley

2 Nifae 4:15–35

“Le Alii e, ua ou faalagolago ia te oe.”

Na fai mai Nifae o le a ia “tusia ai mea a lo’u agaga” (fuaiupu 15). A o e faitau i mea na ia tusia i le 2 Nifae 4:15–35, fesili ia te oe lava, “O a mea a lo’u agaga?” Mafaufau e tusi i lalo, e pei ona sa faia e Nifae, ma faasoa atu i tagata e te alofa i ai.

O le vaaia o le auala na maua ai e Nifae le mafanafana ina ua ia lagona le lofituina ma le popole e mafai ona fesoasoani ia te oe pe a i ai ni ou lagona faapena. Vaavaai i fuaiupu 15–35 mo fuaitau e aumaia ia te oe le mafanafana. E te iloa se isi tagata e ono maua le mafanafana i nei fuaitau?

Tagai foi Ronald A. Rasband, “O Mea o Lo’u Agaga,” Liahona, Nov. 2021, 39–41.

2 Nifae 5

E mafai ona ou maua le fiafia i le ola ai i le talalelei a Iesu Keriso.

O le a sou manatu i le uiga o le ia fiafia? Na tusia e Nifae e faapea, sa nonofo lona nuu “e tusa ma le ala o le fiafia” (2 Nifae 5:27). E mafai ona e vaavaai mo filifiliga na faia e Nifae ma lona nuu na fesoasoani ia i latou ia fiafia (tagai, mo se faataitaiga 2 Nifae 5:6, 10–17). O le a se mea e mafai ona fesoasoani ia te oe e fausia ai se olaga o le fiafia e pei o le nuu o Nifae?

2 Nifae 5:20–21

O le a le fetuu na oo mai i luga o sa Lamana?

I aso o Nifae o le fetuu o sa Lamana o le “vavae ese lea o i latou mai luma [o le Alii] … ona o lo latou amioletonu” (2 Nifae 5:20–21). O lona uiga na aveesea le Agaga o le Alii mai o latou olaga. Ina ua mulimuli ane talia e sa Lamana le talalelei a Iesu Keriso, “sa le toe mulimuli ia i latou le fetuu a le Atua” (Alema 23:18).

O loo ta’ua foi e le Tusi a Mamona na oo mai se faailoga o le pa’u uliuli i luga o sa Lamana ina ua o ese sa Nifae mai ia i latou. O le natura ma foliga o lenei faailoga e le o malamalama atoatoa i ai. O le faailoga sa iloagofie ai sa Lamana mai ia sa Nifae. Mulimuli ane, ina ua taitoatasi ma oo atu sa Nifae ma sa Lamana i ni vaitau o le amioleaga ma le amiotonu, sa faapea ona le tāua ai le faailoga.

Ua faamaonia mai e perofeta i o tatou aso, o le pa’u uliuli e le o se faailoga o le le fiafia po o le fetuu faalelagi. Na tautino mai e Peresitene Russell M. Nelson: “Ou te faamautinoa outou o lo tou tutu i luma o le Atua e le o fuafuaina i le lanu o lou pa’u. O le lelei po o le lē lelei ma le Atua e faalagolago i lou tuuto atu i le Atua ma Ana poloaiga ae e lē o le lanu o lou pa’u” (“Ia Faamuamua le Atua,” Liahona, Nov. 2020, 94).

E pei ona aoao mai Nifae, o le Alii “e le teena e ia se tasi e sau ia te ia, e uliuli pe paepae, e pologa pe saoloto, o tane ma fafine; … ua tutusa tagata uma i le Atua” (2 Nifae 26:33).

Tagai foi “Till We All Come in the Unity of the Faith” (vitio), Gospel Library.

Mo nisi manatu, tagai i lomiga o lenei masina o mekasini o le Liahona ma le Mo le Malosi o le Autalavou .

Manatu mo le Aoaoina o Tamaiti

2 Nifae 3:6–24

O Iosefa Samita sa o se perofeta.

• Mafaufau pe mafai faapefea ona e aoaoina lau fanau e uiga i le galuega tele na faataunuuina e le Atua e ala mai ia Iosefa Samita. Ina ia amata, e mafai ona e fesoasoani i lau fanau e sue le upu “tagatavaai” i le 2 Nifae 3:6 ma faamalamalama atu o perofeta ua ta’ua o tagatavaai aua e fesoasoani le Tama Faalelagi ia i latou ia iloa mea e le mafai ona tatou vaai i ai. Faasoa atu pe aisea ua e faafetai ai i le i ai o se tagatavaai e taitaia le Ekalesia.

• O loo i ai i le Tusi Ata o le Talalelei ni ata e mafai ona e faaaogaina e aoao atu ai e uiga i le galuega na faia e le Atua e ala mai ia Iosefa Samita (tagai i ata 89–95). Tuu atu i lau fanau e faasoa mai mea latou te iloa e uiga i le ata. Aisea ua taʻua ai Iosefa Samita o se “tagatavaai filifilia”? O le a le mea na faia e Iosefa Samita e “aoga tele”? (fuaiupu 7).

2 Nifae 4:15–35; 5

Ou te fiafia “i mea a le Alii.”

• O le a se mea tatou te maua ai le fiafia? Mafaufau e faitau faatasi fuaiupu mai le 2 Nifae 4 e iloa ai po o le a le mea na fiafia ai Nifae pe na faafiafiaina ai o ia (tagai fuaiupu 15–16, 20–25, 34–35). I lana savali “O Mea a Lo’u Agaga,” na faasoa mai ai e Elder Ronald A. Rasband ni “mea se fitu a le Alii” e taua ia te ia (Liahona, Nov. 2021, 39–41). Atonu e mafai ona outou iloiloina faatasi lana lisi ma talanoa e uiga i “mea a le Alii” e taua ia te oe.

• I le2 Nifae 5 o loo faamatala mai ai foi mea na fesoasoani ia sa Nifae e ola ai “e tusa ma le ala o le fiafia” (fuaiupu 27). E mafai ona e tuuina atu ni upu po o ni ata e faatusa i nei mea ma fesoasoani i lau fanau e faafetaui i fuaiupu i le mataupu e 5. O nisi faataitaiga e aofia ai le aiga (fuaiupu 6), poloaiga a le Atua (fuaiupu 10), o tusitusiga paia (fuaiupu 12), galulue (fuaiupu 15 ma le 17), malumalu (fuaiupu 16), ma valaauga o le Ekalesia (fuaiupu 26). E faapefea e nei mea ona aumaia le fiafia ia i tatou?

2 Nifae 5:15–16

O le malumalu o le maota o le Alii.

• A o e faitauina le 2 Nifae 5:15–16 i lau fanau, e mafai ona latou faafoliga o loo latou fesoasoani ia Nifae e fausia se malumalu. E mafai foi ona e faaali atu ia i latou ata o fale eseese, e aofia ai se malumalu. E faapefea ona ese malumalu mai isi fale? Faasoa atu i le tasi ma le isi le mafuaaga e taua ai le malumalu ia te oe (tagai foi “Ou Te Fia Vaai i le Malumalu,” Tusipese a Tamaiti, 99).

O soo se taimi lava e mafai ona avea o se taimi e aoao atu ai. Aua e te manatu o le aoaoina o lou aiga o se mea e te faia e faatasi i le vaiaso i se taimi o se lesona aloaia. Mafaufau i ai o se mea e te faia i taimi uma.

Mo nisi manatu, tagai i le lomiga o lenei masina o le mekasini o le Uo .

O Le Malumalu o Nifae, saunia e Michael T. Malm