E Le o Lo’u Loto, A o Lou Finagalo, Ia Faia, saunia e Harry Anderson

19–25 Fepuari: “E, Le Silisiliese Na’uā o le Fuafuaga a lo Tatou Atua”

2 Nifae 6–10

A itiiti pe ua 40 tausaga talu ona tuua e le aiga o Liae ia Ierusalema. Sa latou i ai i se laueleele fou uiga ese, i le ’afa o le lalolagi e mamao ese ai mai Ierusalema. Ua maliu Liae, ma ua amata e lona aiga le mea o le a avea o se fefinauai mo seneturi le umi i le va o sa Nifae—“o e sa talitonu i lapataiga ma faaaliga a le Atua”—ma sa Lamana, o e sa le talitonu (2 Nifae 5:6). O Iakopo, le uso laitiiti o Nifae ma na faauuina nei e avea ma aoao mo sa Nifae, sa manao i le nuu o le feagaiga ia iloa o le a le faagaloina lava i latou e le Atua, o lea e le tatau lava ona latou faagaloina o Ia. O se savali lenei e mautinoa lava e tatou te manaomia i aso nei (tagai i le Mataupu Faavae ma Feagaiga 1:15–16). “Ia tatou manatua o ia, … aua e lei tuulafoaiina lava i tatou. … E maeu folafolaga a le Alii,” sa tautino atu ai Iakopo (2 Nifae 10:20–21). Faatasi ai ma na folafolaga, e leai se folafolaga e sili atu i lo se “togiola aoao e le gata” e faatoilalo ai le oti ma seoli (2 Nifae 9:7). “O le mea lea,” sa faaiu ai Iakopo, “ia fiafia o outou loto”! (2 Nifae 10:23).

Manatu mo le Aoaoina i le Aiga ma i le Lotu

2 Nifae 6–8

E alofa mutimutivale le Alii i Lona nuu ma o le a faataunuuina Ana feagaiga.

Ina ia fesoasoani i lona nuu ia malamalama o i latou o se vaega o le aiga o Isaraelu ma e mafai ona faalagolago i le Atua ma Ana folafolaga, sa sii mai ai e Iakopo ia valoaga a Isaia, o loo tusia i le 2 Nifae 6–8. O lena savali e mo oe foi, aua o le Au Paia o Aso e Gata Ai o se vaega foi o le nuu o le feagaiga a le Atua. A o e faitauina nei mataupu, mafaufau i fesili e pei o nei:

• O le a se mea ou te aoaoina e uiga i le alofa togiola o le Faaola mo au? O a upu po o fasifuaitau e sili ona faaalia lelei ai lenei alofa?

• O le a le mea ua ofo mai e le Faaola ia i latou o e saili ia te Ia?

• O le a se mea e mafai ona ou faia, ina ia ou “faatalitali” atili ai ma le faamaoni mo le Faaola ma Ana faamanuiaga folafolaina?

2 Nifae 9:1–26

Ua laveaiina aʻu e Iesu Keriso mai le agasala ma le oti.

O se tasi auala e faaloloto ai lo tatou talisapaia o Iesu Keriso o le mafaufau pe mata o le a se mea semanu e tupu ia i tatou pe ana leai o Ia. A o e faitauina le 2 Nifae 9:1–26, mafaufau e lisi pe maka i se lanu se tasi mea o le a tutupu ia i tatou e aunoa ma le Togiola a Iesu Keriso. Ona faaaoga lea o se isi lisi po o se isi lanu, e faailoa ai mea e mafai ona tatou maua e ala i le Togiola a le Faaola. E faavae i mea na e faitauina, e faapefea ona e faamatalaina pe aisea tatou te manaomia ai le Togiola a Iesu Keriso? O le a se mea na e maua ua musuia ai oe e viia le “poto o le Atua, lona alofa mutimutivale ma lona alofa tunoa”? (2 Nifae 9:8).

E le gata i le aoao atu o le mea na laveaiina mai ai i tatou e Iesu Keriso, ae sa tuuina mai foi e Iakopo ni malamalamaaga e uiga i le ala na Ia faia ai. Mafaufau e tusifaamaumau mea e te maua i le 2 Nifae 9:11–15, 20–24.

Sa matua maofa lava Iakopo i le fuafuaga o le togiola a le Atua lea na ia alaga atu ai, “E, le silisiliese na’uā o le fuafuaga a lo tatou Atua.” Vaai mo ana folafolaga i le 2 Nifae 9 (o le tele o loo maua i fuaiupu 8–20). O le a le mea ua e aoao mai i nei fuaiupu e uiga i le fuafuaga a le Atua? O a ni aafiaga na fesoasoani ia te oe e lagona ai nisi o mea na lagona e Iakopo? I le avea ai ma se vaega o lau tapuaiga ma suesuega, mafaufau e vaavaai mo se viiga e ono faaalia ai ou lagona e uiga ia te Ia, e pei o le “UaSili Oe” (Viiga, nu. 46).

Tagai foi “Where Justice, Love, and Mercy Meet,” “Jacob Teaches of the Resurrection” (videos), Gospel Library; Autu o le Talalelei, “Togiola a Iesu Keriso,” Potutusi o le Talalelei.

Ua Aoao Atu Iakopo i le Toetu | 2 Nifae 6: 5–11; 9

2 Nifae 6: 5–11; 9 | O Iakopo, o se perofeta o le Tusi a Mamona, ua tautala e uiga i le manaomia o se Mesia. E faapei o le Paʼū o Atamu na oo mai ai le oti i tagata, o le Toetu o le Faaola ua toetutu uma mai ai i le oti.

2 Nifae 9:7

O le Togiola a le Faaola e le gata.

O le a se mea e mafai ona e faia e malamalama atili ai i le “togiola aoao e le gata” a Iesu Keriso? (2 Nifae 9:7). Atonu e mafai ona e vaavaai i mea e foliga mai e le mafaitaulia le tele—lauvao o le mutia i se fanua, fatu o oneone i luga o se matafaga, po o fetu i le lagi. E faapefea ona le gata le Togiola a le Faaola? E faapefea foi ona patino? O a ni fasifuaitau i le 2 Nifae 9 e fesoasoani ia te oe e lagona ai lou lotofaafetai mo mea na faia e le Faaola mo oe?

2 Nifae 9:27–54

E mafai ona ou sau ia Keriso ma mulimuli i le fuafuaga a le Atua.

I le 2 Nifae 9, sa faaaoga ai e Iakopo ni fasifuaitau mamana ma eseese se lua: “le fuafuaga alofa mutimutivale a le Foafoa Silisiliese” ma “lena fuafuaga faatogafiti a le ua leaga” (2 Nifae 9:6, 28). Atonu e te tusia se ala ma faaigoa o le Fuafuaga a le Tama Faalelagi. Ona suesue lea o le 2 Nifae 9:27–52. Vaavaai mo lapataiga ma valaaulia na tuuina mai e Iakopo e fesoasoani ia i tatou e mulimuli ai i lenei fuafuaga. Tusi mea e te maua i tafatafa o le ala. E faapefea ona taumafai Satani e taitai ese i tatou mai le fuafuaga a le Atua? O le a se mea ua uunaia oe e fai e tali atu ai i nei lapataiga ma valaaulia?

2 Nifae 10:20, 23–25

O le taulaga a Iesu Keriso e mafai ona aumaia ia te au le olioli.

O le savali a Iakopo o se savali o le fiafia. “Ua ou tautala atu nei mea,” na ia faapea mai, “ina ia outou olioli ma faaea i luga o outou ulu e faavavau” (2 Nifae 9:3). A o e faitauina le 2 Nifae 10:20, 23–25, o le a se mea e te maua e faafiafia ai lou loto? O le a se mea o le a e faia e manatua ai nei mea pe a e lagonaina le lotovaivai?

Tagai foi Ioane 16:33; D. Todd Christofferson, “O Le Olioli o le Au Paia,” Liahona, Nov. 2019, 15–18; “Jacob Encourages the Nephites to Be Reconciled with God” (vitio), Gospel Library.

Ua Faamalosiau e Iakopo sa Nifae e Faalelei ma le Atua | 2 Nifae 10:3-25.

2 Nifae 10:3-25 | O Iakopo, o se perofeta o le Tusi a Mamona, ua valoia Iesu Keriso ma faamalosi atu i tagata sa Nifae ia manatua lo latou Faaola, ia salamo, ma ia faalelei ma le Atua.

Mo nisi manatu, tagai i lomiga o lenei masina o mekasini o le Liahona ma le Mo le Malosi o le Autalavou .

Manatu mo le Aoaoina o Tamaiti

2 Nifae 9:6–10, 19–24

O Iesu Keriso o lo’u Faaola.

• E faapefea ona e fesoasoani i lau fanau ia malamalama ma lagona latou te manaomia le Faaola o Iesu Keriso? E mafai foi ona fesoasoani le itulau o gaoioiga mo lenei vaiaso. E faaaoga ai se talafaatusa faigofie o se lua ma se apefa’i. Mafaufau e faaaoga le 2 Nifae 9:21–22 e talanoa ai ma lau fanau e uiga i le mafuaaga e te faafetai ai mo Iesu Keriso.

• O se tasi o auala e fesoasoani ai i lau fanau ia malamalama pe aisea tatou te manaomia ai le Faaola o le aoao atu lea o i latou e uiga i le Pa’ū. E mafai ona e faaali atu se ata o Atamu ma Eva, e pei o le Tuua o le Faatoaga o Etena (Potutusi o le Talalelei), ma se ata o Iesu Keriso i luga o le satauro. Valaaulia tamaiti e faamatala mai le mea lea o loo tupu i ata taitasi. E faapefea ona pei i tatou o Atamu ma Eva? Atonu o le 2 Nifae 9:6–10 e mafai ona fesoasoani ia i latou e iloa ai mea na faia e Iesu Keriso mo i tatou. Mafaufau e valaaulia tamaiti e faasoa mai o latou lagona e uiga ia Iesu Keriso. O se pese e pei o le “Le Alofa o Lo’u Faaola” (Tusipese a Tamaiti, 42–43) e mafai ona fesoasoani.

Aoao atu upumoni i tala ma faataitaiga. Ia mautinoa o tala ma faataitaiga e te faaaogaina e aoao atu ai upumoni. Mo se faataitaiga, a faaaoga le itulau o gaoioiga o lenei vaiaso, aoao atu na afio mai Iesu Keriso i le “lua” e fesoasoani ia i tatou i laasaga taitasi o le ala a o tatou feaei i fafo.

2 Nifae 9:20, 28–29, 42–43, 49

“Ua fiafia loʼu loto i le amiotonu.”

• Ina ia uunaia lau fanau e “[fiafia] i le amiotonu” po o le usitai ma le olioli i le Alii (2 Nifae 9:49), atonu e te faasoa atu ni faataitaiga lea e faia ai e se tamaitiiti se filifiliga lelei po o se filifiliga leaga. Valaaulia tamaiti e tutu i luga pe a aumaia e le filifiliga le fiafia ma nonofo i lalo pe a aumaia e le filifiliga le faanoanoa. O anafea na tatou lagona ai le fiafia ona sa tatou faia se filifiliga e mulimuli ia Iesu Keriso?

• Atonu o le a fegalegaleai lau fanau ma tagata (pe afai latou te lei faia) o e manatu o poloaiga a le Alii e faavalevalea pe ua le o toe mnaomia. Atonu e mafai ona tou talanoa ma lau fanau e uiga i le auala e faamatala ai pe aisea ua tatou fiafia ai e tausi poloaiga. Aisea e taua ai le talitonu i fautuaga a le Atua e tusa lava pe tatou te le o malamalama atoatoa i ai? E mafai ona e uunaia i latou e vaai i le 2 Nifae 9:20, 28–29, ma le 42–43 mo se fesoasoani i le mafaufau i ai ma talanoaina nei fesili.

Mo nisi manatu, tagai i le lomiga o lenei masina o le mekasini o le Uo .

Sa Ia Faamaloloina le Tele o Faama’i Eseese, saunia e J.Kirk Richards