Faamagaloina, saunia e Greg Olsen. Faaaogaina ma le faatagana. www.GregOlsen.com

1–7 Aperila: Ia Faalelei ma le Atua e ala i le Togiola a Keriso

Iakopo 1–4

Na manatu sa Nifae o Nifae o lo latou “puipuiga tele” (tagai Iakopo 1:10). Sa ia puipuia foi i latou mai mea matautia faaleagaga, lapataia i latou mai le agasala ma uunaia i latou ia o mai ia Keriso. O lea la ua pa’u atu lena galuega ia Iakopo, o lē na faapaiaina e Nifae e avea ma ositaulaga ma aoao (tagai Iakopo 1:18). Sa lagona e Iakopo se tiutetauave e lapatai atu ma le lototoa ia i latou o e ua “amata ona galulue i le agasala” a o faamafanafanaina foi “le agaga ua manu’alia” o i latou o e na tiga i agasala a isi (tagai Iakopo 2:5–9). O le a faapefea ona ia faia ia mea uma? O le a ia faasino atu i latou ia Iesu Keriso—aua sa manaomia e vaega uma e lua le faamalologa a le Faaola (tagai Iakopo 4). E faapei o le savali a Nifae na tuuina atu ia te ia, o le molimau a Iakopo sa o se valaau ina “ia outou faalelei ma le [Atua] e ala i le togiola a Keriso” (Iakopo 4:11).

Manatu mo le Aoaoina i le Aiga ma i le Lotu

Iakopo 1:6–8, 15–19; 2:1–11

E i ai sa’u “feau mai le Alii.”

Ia Iakopo, o le aoao atu o le afioga a le Atua sa o se “feau mai le Alii,” o lea sa ia galue ai ma le maelega e “faalautele [lona] tofiga” (Iakopo 1:17,19). O le a le uiga ia te oe o nei fasifuaitau na faaaoga e Iakopo? Mafaufau po o le a le mea e fai e se tioata faamatamatatetele. E tuuina atu e lena mea ia te oe ni manatu? A o e mafaufau loloto i le Iakopo 1:6–8, 15–19 ma le 2:1–11, mafaufau e uiga i feau atonu o loo i ai i le Alii mo oe. O le a se mea e te lagona le musuiaina e fai e “faalautele” ai?

Tagai foi “Whom the Lord Calls, the Lord Qualifies,” i le Aoaoga a Peresitene o le Ekalesia: Thomas S. Monson (2022), 209–20; “Rise to Your Call” (vitio), Gospel Library.

Iakopo 2:12–21

“Aua le tuua lenei faamaualuga o o outou loto e faaumatia ai o outou agaga!”

Sa i ai i sa Nifae se faafitauli i le faamaualuga ma le taulai atu i oa (tagai Iakopo 2:13), ma o lena faafitauli sa le tulagaese ia i latou po o o latou aso. O faapefea ona faalauiloa e le fili le fiafia i oa i aso nei? A uma ona faitau le Iakopo 2:12–21, faamatala i au lava upu le ala e finagalo le Atua e te vaai ai i oa faalelalolagi. O se viiga e pei o le “Ona ua Maua Tele” (Viiga, nu. 124) e mafai ona tuuina mai ai ni malamalamaaga faaopoopo. O le a se mea ua e lagona ua uunaia oe e fai ona o le mea ua e aoaoina?

Iakopo 2:22–35; 3:10–12

E olioli le Atua i le ola mama.

A o e faitauina le Iakopo 2:22–35; 3:10–12, o le a se mea ua e maua e fesoasoani e te malamalama ai pe aisea e taua tele ai le ola mama i le Atua? O a nisi o taunuuga le lelei o le ola le mama—i ona po o Iakopo ma i tatou? O a faamanuiaga o le ola ai i se olaga mama?

Na aoao mai e Elder David A. Bednar faapea ua tatou ola “i se lalolagi ua faateleina le tauemuina o le paia o le foafoaina o le ola” (“Matou Te Talitonu i le Nofomama,” Liahona, Me 2013, 41–44). E faapefea ona e fesoasoani i isi ia malamalama pe aisea e te usitai ai i le tulafono o le legavia? O se nofoaga lelei e amata ai o le faamalamalamaga lea o tulaga faatonuina a le Atua i lagona feusuai ma sootaga i le “E paia lou tino” i le Mo le Malosi o le Autalavou: O Se Taiala mo le Faia o Filifiliga (itulau 22–29). O a nisi mea e te maua i lena punaoa o le a fesoasoani ia te oe e faamalamalama ai le mafuaaga e te ola ai i le tulafono o le legavia?

E mafai ona e maua tali faaopoopo i le savali a Elder Bednar o loo faasino i luga po o le vitio “I Choose to Be Pure” (Gospel Library).

E faapefea ona ese le tulaga faatonuina a le Atua o le mama a’ia’i mai feusuaiga mai isi savali e te ono fetaiai? O a faamanuiaga o le ola ai i se olaga mama?

Tagai foi Gospel Topics, “Virtue,” Gospel Library; “Tosina Atu i le Itupa e Tasi” i le “Fesoasoani o le Olaga” Faaputuga i le Potutusi o le Talalelei.

Iakopo 4

E mafai ona ou faalelei ma le Atua e ala i le Togiola a Iesu Keriso.

Na aioi atu Iakopo i lona nuu ina “ia faalelei ma le [Atua] e ala i le togiola a Keriso” (Iakopo 4:11). O se tasi o faauigaga o le faalelei o le toefuatai lea i le faauo atu po o le ogatasi. A o e mafaufau loloto i lou lava olaga, mafaufau i se taimi atonu na e lagonaina ai le mamao mai le Tama Faalelagi. E faapefea ona fesoasoani le Faaola ia i tatou ia toefuatai lenei sootaga? O le a se fautuaga e mafai ona e maua i lenei mataupu e fesoasoani ia te oe e faalelei ai ma le Atua? (tagai fuaiupu 4–14).

O a ni malamalamaaga faaopoopo e te maua mai i le Mataio 5:23–24? E mafai faapefea ona fesoasoani le Faaola ia te oe e faalelei ma le Atua—ma isi?

Tagai foi 2 Nifae 10:24.

Iakopo 4:8–18

E mafai ona ou aloese mai le tauaso faaleagaga e ala i le taulai atu i le Faaola.

A o galue Iakopo e faaliliu atoatoa atu lona nuu i le Alii, sa ia lapataia i latou ia aua nei tauaso faaleagaga ma aua nei inoino i “upu manino” o le talalelei (tagai Iakopo 4:13–14). E tusa ai ma le Iakopo 4:8–18, o le a se mea e mafai ona tatou faia e aloese ai mai le tauaso faaleagaga?

Tagai foi Quentin L. Cook, “Vaai i Tala Atu o le Faailoga,” Liahona, Mat. 2003, 40–44.

Ina ua Ia aoao mai, sa faaaoga e le Faaola faatusatusaga i le olaga o aso uma. O faataoto a Iesu na fesoasoani i tagata e maua ai upumoni faaleagaga i o latou aafiaga masani. Taumafai e fai le mea lava lea e tasi pe a e aoao atu. Mo se faataitaiga, pe a aoao atu le Iakopo 4:8–18, e mafai ona e fesili i tagata aoao pe na fai se latou suega o mata. Na faapefea le iloiloga a le fomai i la latou vaaiga faaletino? E mafai faapefea ona tatou iloiloina la tatou vaaiga faaleagaga?

Mo nisi manatu, tagai i lomiga o lenei masina o mekasini o le Liahona ma le Mo le Malosi o le Autalavou .

Fautuaga mo le Aoaoina o Tamaiti

Iakopo 2:8

E faamalolo e le Atua le agaga ua manu’a.

• Ina ia fesoasoani i lau fanau ia malamalama i le ala e mafai ai ona faamaloloina se “agaga ua manu’a”, e mafai ona outou talanoaina faatasi le ala e manunua ai o tatou tino ma mea e fesoasoani e faamalolo ai. Atonu e mafai e tagata o le aiga ona faasoa mai i ni taimi na latou tiga ai ma mea na fesoasoani ia i latou e faamalolo ai. E mafai foi ona e faaali atu ia i latou ia fusi po o vailaau faafomai o se vaega o lenei talanoaga. Atonu e mafai ona e faasoa atu ia i latou pe na faapefea ona fesoasoani le Faaola ia te oe ina ua manaomia e lou agaga le faamalologa.

Iakopo 2:17–19

E mafai ona ou fesoasoani i isi o loʻo manaomia le fesoasoani pe a ou fefaasoaa’i ma i latou.

• O nisi o tagata i le taimi o Iakopo sa matua mauoa lava, ae latou te le mananao e faasoa atu mea na latou maua i isi. A o e faitau i aoaoga a Iakopo ia i latou i le Iakopo 2:17–19, e mafai ona e tuuina atu i lau fanau ni ata po o ni mea faitino e o faatasi ma upu po o fasifuaitau i nei fuaiupu. E mafai ona e faamalamalama atu o loo e faasoaina atu nei mea faitino ia i latou; atonu e mafai ona e valaaulia i latou e faasoa mai ni mea faitino ia te oe po o le tasi ma le isi. Talanoa e uiga i ou lagona pe a e faasoa atu. O le a se isi mea e mafai ona tatou faasoa atu i isi e fesoasoani ai ia latou lagona le fiafia?

• A uma ona faitau faatasi le Iakopo 2:17, atonu e mafai e lau fanau ona ta’u mai nisi o faamanuiaga na faasoa mai e le Tama Faalelagi ia i latou. Aisea e finagalo ai o Ia ia tatou fefaasoaa’i ma isi?

Iakopo 4:6, 10–11

E mafai ona ou faamalosia lo’u faatuatua ia Iesu Keriso.

• O le faatuatua o Iakopo ia Keriso sa matuai malosi lava sa le mafai ona luluina. Ina ia aoao lau fanau i le auala e fausia ai le faatuatua faapena, e mafai ona e fesili atu ia i latou e uiga i mea tatou te faia ina ia malolosi atili ai o tatou tino. O le a le mea e mafai ona tatou faia e faamalosia ai lo tatou faatuatua ia Iesu Keriso? Faitau faatasi le Iakopo 4:6 ma fesoasoani i tamaiti ia iloa mea na faia e Iakopo ma ona tagata ina ia “le maluelue” lo latou faatuatua.

• O se tasi auala e fesoasoani ai ia malamalama lou aiga i le uiga o le “le maluelue” i lo latou faatuatua o le su’e lea o se laau tele e latalata ane ma fai ia i latou e lulu ia lala taitasi. Ona tuu lea latou te luluina le ogalaau. Aisea e faigata atu ai ona lulu le ogalaau? O a fuaitau i le Iakopo 4:6, 10–11 o faamatala mai ai mea e mafai ona tatou faia ina ia le maluelue ai lo tatou faatuatua ia Iesu Keriso?

  

  E faapei o le ogalaau o se laau, e mafai foi ona “le maluelue” lo tatou faatuatua ia Keriso.

• Mo isi faatusatusaga e aoao ai lau fanau e uiga i le faatuatua le maluelue ia Iesu Keriso, tagai Neil L. Andersen, “O Asiosio Faaleagaga” (Liahona, Me 2014, 18–21; ma le vitio “O Asiosio Faaleagaga”) po o le “O Le Tagata Poto ma le Tagata Valea” (Tusipese a Tamaiti, 132; tagai foi Mataio 7:24–27).

O Asiosio Faaleagaga

Aua nei tuuina atu i asiosio e tosoina outou i lalo. O o outou aso nei—e tutu malolosi ai o ni soo o le Alii o Iesu Keriso.

Mo nisi manatu, tagai i le lomiga o lenei masina o le mekasini o le Uo .

O Le A Ou Auina Atu a Latou Upu (Iakopo le Aoao), saunia e Elspeth Caitlin Young