“8–14 Aperila: ‘Ua Galue Faatasi le Alii ma i Tatou.’ Iakopo 5–7,” Sau, Mulimuli Mai ia te A’u—Mo Aiga ma le Ekalesia: Tusi a Mamona 2024 (2024)
“8–14 Aperila: Iakopo 5–7,” Sau, Mulimuli Mai ia te A’u—Mo le Aiga ma le Ekalesia: 2024 (2024)
Faataoto i le Laau o le Olive, saunia e Brad Teare
8–14 Aperila: Ua Galue Faatasi le Alii ma i Tatou
Iakopo 5–7
E tele naua tagata e lei faalogo lava i le talalelei a Iesu Keriso. Pe afai e i ai se taimi e te lagonaina ai le lofituina i le galuega o le faapotopotoina mai o i latou i le Ekalesia a le Alii, o le tala a Iakopo i laau olive i le Iakopo 5 o se faamanatu faamautinoa: o le tovine e a le Alii ia. Ua Ia tuuina mai ia i tatou taitoatasi sina vaega itiiti e lagolago atu ai i Lana galuega—o lo tatou aiga, o le lio o a tatou uo, o lo tatou vaega o tosinaga. Ma o nisi taimi o le tagata muamua lava tatou te fesoasoani e faapotopoto mai o i tatou lava. Ae e le tuulafoaiina lava na o i tatou i lenei galuega, aua o le Alii o le tovine e galue faatasi ma Ana auauna (tagai Iakopo 5:72). E silafia ma alofa le Atua i Ana fanau, ma o le a saunia e Ia se ala mo i latou taitoatasi e faalogo ai i Lana talalelei, e oo lava ia i latou o e sa teena o Ia i le taimi ua tuanai (tagai Iakopo 4:15–18). Ma, pe a uma le galuega, o i latou uma o e sa “filiga e galulue faatasi ma [Ia] … o le a outou maua le olioli faatasi ma [Ia] ona o le fua o [Lona] togaolive” (Iakopo 5:75).
Tagai foi “Ua Aoao Atu Iakopo e uiga i le Faapotopotoina o Isaraelu” (vitio), Potutusi o le Talalelei.
Ua Aoao Atu e Iakopo le Talafaatusa o le Laau Olive | Iakopo 5
Tala Iakopo se tagata ma lana togaolive. Ua totō e le tagata lala vao ma lala fanua o laau olive ma aveese lala e fua mai fua vao, ae tuu na o fua lelei.
Manatu mo le Aoaoina i le Aiga ma i le Lotu
O Iesu Keriso o le Alii o le togaolive.
O leIakopo 5 o se tala e i ai se uiga faafaatusa. O loo faamatala ai laau ma fua ma tagata faigaluega, ae e faatatau moni lava i fegalegaleaiga a le Atua ma Lona nuu i le talafaasolopito atoa. A o e faitauina le tala autu, mafaufau po o a ni mea o i le tala e ono faatusa i ai.
Mo se faataitaiga, afai e faatusa le togaolive i le lalolagi, ma o le laau o le olive fanua e faatusa ia Isaraelu (po o i latou o e na osi feagaiga ma le Atua; tagai Iakopo 5:3), o le a se mea e ono faatusa i ai laau olive vao? O le a le mea e faatusa i ai fua lelei ma leaga? O a nisi faatusa o e vaaia?
E ui o loo aoao mai le Iakopo 5 e uiga i malo ma seneturi o le talafaasolopito o le lalolagi, ae e faatatau foi ia te oe ma lou olaga. O a ni savali ua e maua mo oe lava i le Iakopo 5?
Atonu o le mea e sili ona taua, o le Iakopo 5 e faatatau ia Iesu Keriso. Vaavaai mo Ia a o e faitau. O le a se mea ua e aoaoina e uiga ia te Ia, mo se faataitaiga, i fuaiupu 40–41, 46–47?
Mo nisi malamalamaaga e uiga i le Iakopo 5, tagai i le ata o loo i le faaiuga o lenei otootoga.
Ua valaaulia au e le Alii e galulue faatasi ma Ia i Lona togaolive.
O “isi auauna” (Iakopo 5:70) o e na valaauina i le togaolive a le Alii e aofia ai tagata e pei o oe. O a upumoni e te mauaina i le Iakopo 5, aemaise o fuaiupu 61–62 ma le 70–75, e uiga i le galue ai i le togaolive a le Alii? O le a se mea ua e aoaoina e uiga ia te Ia e ala i le fesoasoani i Lana galuega?
A o e faitau e uiga i le “taimi mulimuli” na galue ai le Alii i Lona togaolive, o le a se mea ua musuia ai oe e auauna atu i le Alii “ma lou malosi atoa”? (Iakopo 5:71). Atonu e mafai ona e faasoa maia se aafiaga na e lagona ai le olioli a o auauna atu i le Alii o le togaolive—mo se faataitaiga, e ala i le faasoa atu o le talalelei, auauna atu i le malumalu, po o le faamalolosia o isi. Atonu e mafai ona outou sailiili i faataitaiga na faasoa mai e Elder Gary E. Stevenson i lana savali “Matagofie—Matagofie foi lona Faigofie” (Liahona, Nov. 2021, 47–50).
Na aoao mai Peresitene Russel M. Nelson: “Soo se taimi e te faia ai soo se mea e fesoasoani ai i soo se tasi—i itu uma o le veli—fai se laasaga agai i luma i le osia o feagaiga ma le Atua ma maua o latou sauniga e tatau ai o le papatisoga ma le malumalu, ua e fesoasoani e faapotopoto Isaraelu. E faigofie lava e pei o lena” (“Faamoemoeo Isaraelu” [faigalotu a le autalavou i le lalolagi atoa, 3 Iuni, 2018], ChurchofJesusChrist.org). Mafaufau e amata se lisi o manatu o mea e mafai ona e faia e fesoasoani ai e faapotopoto Isaraelu. Mai lau lisi, o le a sou lagona i le mea e finagalo le Alii e te faia i le asō i Lona togaolive? E tusa ai ma le fuaiupu 75, e faapefea ona tauia i tatou e le Alii mo le galuega i Lona togaolive?
Tagai foi “Isaraelu, Ua Valaau Mai le Atua,” Viiga, nu. 6; “Tovine o le Feagaiga Tuai” (vitio), Gospel Library; Autu o le Talalelei, “Faapotopotoina o Isaraelu,” “Valaauliaina o Tagata Uma ia Talia le Talalelei a Iesu Keriso,” “Auai i le Galuega o le Malumalu ma Talafaasolopito o Aiga,” Potutusi o le Talalelei.
Togaolive o le Feagaiga Tuai
(Iakopo 5-6) Na asia e tamaiti aoga seminare se togaolive o le Feagaiga Tuai ma aoao i le ala e tausia ai laau olive. Na latou iloa tulaga o i le tovine lea e talitutusa ma tulaga o i le tala faafaatusa a Senosa. Vaega 1, Togaolive o le Feagaiga Tuai
Aoao atu aoaoga faavae. Ia mautinoa e taulai tou talanoaga i le aoaoga faavae autu i mau. E mafai ona e faia lenei mea e ala i le faitauina faatasi o tusitusiga paia ona fefaasoaai lea o le tasi ma le isi i upumoni tou te maua, faapea foi aafiaga i le ola ai i na upumoni.
E manatua e le Alii Lona nuu i le alofa ma le alofa mutimutivale.
O se tasi uiga o le upu pipiimau o le tumau mausali i se mea mautu, vavalalata, ma le le maluelue. E faapefea e lena faauigaga ona aafia ai le ala e te malamalama ai i le Iakopo 6:4–5? I le tala i le laau o le olive, na faapefea ona faaloaloa mai e le Alii o le togaolive lona “aao o le alofa mutimutivale”? (tagai, mo se faataitaiga, Iakopo 5:47, 51, 60–61, 71–72). Na faapefea ona Ia faia lea mea mo oe?
E mafai ona ou tu malosi pe a lu’iina e isi lo’u faatuatua ia Iesu Keriso.
O le aafiaga o sa Nifae ma Serema e tele ina tupu soo i aso nei: o loo taumafai tagata e faaumatia le faatuatua ia Keriso. Na faapefea ona tali atu Iakopo ina ua osofaia lona faatuatua? O a ni mea ua e aoao mai i ana tali? O le a se mea e mafai ona e faia i le taimi nei e saunia ai mo taimi o le a lu’iina ai lou faatuatua i le Faaola?
Tagai foi Jeffrey R. Holland, “O Le Tau—ma Faamanuiaga—o le Avea ma Soo,” Ensign po o le Liahona, Me 2014, 6–9; “Ua Faafitia e Serema Keriso” (vitio), Gospel Library.
Ua Faafitia e Serema Keriso | Iakopo 7
Iakopo 7 Ua talai atu Serema e tetee i le mataupu Faavae a Keriso ma fesiligia se faailoga. Ua taia o ia e le mana o le Atua ma oti ai ina ua uma ona tautau atu o ana agasala i tagata.
Mo nisi manatu, tagai i lomiga o lenei masina o mekasini o le Liahona ma le Mo le Malosi o le Autalavou .
Fautuaga mo le Aoaoina o Tamaiti
E popole le Alii mo Ona tagata.
-
E mafai faapefea ona e faasoa atu le tala o laau olive i se auala e mafai ona malamalama ai tamaiti? O se tasi o auala o le savalivali i fafo e tilotilo i se laau ma iloilo faapuupuu manatu autu o le tala. O le a le mea na faia e le Alii o le togaolive mo Ona laau? E mafai faapefea ona avea i tatou e pei o ni tagata faigaluega i le tala ma fesoasoani i isi ia lagonaina le alofa o le Faaola?
-
Na faasoa atu e Iakopo le tala o laau olive e valaaulia ai ona tagata e o mai ia Keriso. E mafai foi ona faia lea lava mea mo lau fanau. Atonu e mafai ona e aoteleina le tala i fuaiupu e pei o le Iakopo 5:3–4, 28–29, 47, ma le 70–72 (tagai foi “Old Testament Olive Vineyard” [vitio], Gospel Library). Ona mafai lea e oe po o lau fanau ona faitau le Iakopo 5:11, 41, 47, ma le 72, vaavaai mo mea o faaalia ai le tele o le popole o le Alii o le togaolive (Iesu Keriso) i laau. O le a le mea e faia e le Faaola e faaalia ai Lona popole mo i tatou?
Togaolive o le Feagaiga Tuai
(Iakopo 5-6) Na asia e tamaiti aoga seminare se togaolive o le Feagaiga Tuai ma aoao i le ala e tausia ai laau olive. Na latou iloa tulaga o i le tovine lea e talitutusa ma tulaga o i le tala faafaatusa a Senosa. Vaega 1, Togaolive o le Feagaiga Tuai
E alofa le Tama Faalelagi ia te au ma o le a faamagalo au pe a ou salamo.
-
O leIakopo 6:4–5 o loo i ai se savali taua mo i tatou pe a tatou faia ni filifiliga sese. Atonu e mafai ona e fesoasoani i lau fanau ia mauaina. O le fea upu i nei fuaiupu tatou te maua ai le faamoemoe i le alofa togiola o le Atua? O le tala a Elder Allen D. Haynie e faatatau i le faapalapalā i totonu o se lopala, i lana savali “Manatua Le Ua Tatou Faalagolago I Ai” (Liahona, Nov. 2015, 121–22) e mafai ona fesoasoani. O le a se mea ua aoao mai e lenei tala ma le Iakopo 6:4–5 ia i tatou e uiga i mea e tatau ona tatou faia ina ia faasaoina i le malo o le Atua?
E mafai ona ou tu atu mo le mea ou te iloa e moni.
-
E faapefea ona e musuia lau fanau e tutu atu mo le upumoni e pei ona sa faia e Iakopo? E mafai e lau fanau ona matamata le vitio “Mataupu 10: Iakopo ma Serema” (Potutusi o le Talalelei) ma faatino le fegalegaleaiga i le va o Iakopo ma Serema, e faaaoga ai le Iakopo 7:1–23 e fai ma taiala. Na faapefea ona tu atu Iakopo mo le mea na ia iloa e sao? Valaaulia lau fanau e faasoa mai ni aafiaga ina ua latou tutu mo le mea sao, pe faasoa atu sou aafiaga. Atonu e mafai foi ona latou usuina se pese e faaalia ai le lototele e pei o Iakopo, e pei ole “Tu mo le Mea Tonu,” Tusipese a Tamaiti, 81.
Mo nisi manatu, tagai i le lomiga o lenei masina o le mekasini o le Uo .