Mauaina o Aoaoga a le Tupu o Peniamina, saunia e Maria Alejandra Gil

22–28 Aperila: “Faatumuina i le Alofa mo le Atua ma Tagata Uma”

Mosaea 1–3

A e faalogo i le upu tupu, atonu e te mafaufau i palealii, auauna, ma nofoalii. I le Mosaea 1–3, o le a e faitau ai e uiga i se ituaiga o tupu e ese. Nai lo le ola i galuega a lona nuu, o le Tupu o Peniamina sa “galue i [ona] lava lima” (Mosaea 2:14). Nai lo le faia ia auauna atu isi ia te ia, sa ia auauna atu i lona nuu ma lona “manatu atoa, mafaufau, ma le malosi atoa ua tuu mai e le Alii ia te [ia]” (Mosaea 2:11). Sa lei manao lenei tupu i lona nuu e tapuai atu ia te ia; ae, sa ia aoaoina i latou e tapuai i lo latou Tupu Faalelagi, o Iesu Keriso. Na malamalama le Tupu o Peniamina e faapea o “le Alii Mamana Aoao o le o nofotupu” (Mosaea 3:5), o le na afio mai “i lalo mai le lagi” ma afio mai “i ona lava tagata, … ina ia mafai ona oo mai o le olataga i le fanauga a tagata e ala lava i le faatuatua i lona suafa” (Mosaea 3:5, 9).

Manatu mo le Aoaoina i le Aiga ma i le Lotu

Mosaea 1:1–7

Suesue ma le maelega i [tusitusiga paia]

I nei fuaiupu, matau le ala na faamanuiaina ai e talafaamaumau paia le nuu o le Tupu o Peniamina. E faapefea ona sili atu lou olaga ona o loo ia te oe tusitusiga paia?

Mosaea 2:10–26

Pe a ou auauna atu i isi, ua ou auauna atu foi i le Atua.

O le a sou manatu o le a se tala a le Tupu o Peniamina pe ana faapea e te fesili atu ia te ia pe aisea na ia auauna atu ai ma lona “manatu atoa, mafaufau, ma le malosi atoa”? (Mosaea 2:11). Mafaufau i lenei mea a o e faitau i le Mosaea 2:10–26. O le a le mea na aoao mai e le Tupu o Peniamina e musuia ai oe e auauna atu i isi i se auala e sili atu ona anoa? Mo se faataitaiga, o le a le uiga ia te oe o le iloa a e auauna atu i isi tagata, o loo e auauna atu foi i le Atua? (tagai Mosaea 2:17). Saili musumusuga e uiga i le auala e mafai ona e auauna atu ai i se tasi i lenei vaiaso.

E tusa lava pe tatou te iloa e tatau ona tatou auauna atu i isi, o nisi taimi tatou te feagai ai ma luitau. O le isi auala e suesue ai le Mosaea 2:10–26 o le faia lea o se lisi o upumoni na aoao mai e le Tupu o Peniamina e mafai ona fesoasoani ia te oe e faatoilalo ai luitau e ono taofia ai oe mai le auauna atu. O a ni aafiaga ua faaalia ai ia te oe o le mea na aoao mai e le Tupu o Peniamina e moni?

Sa faasoa e Peresitene Joy D. Jones se aafiaga mamana na suia ai le ala na ia vaai atu ai i le auauna atu i isi. Faitau i ai i le “Mo Ia” (Ensign po o le Liahona, Nov. 2018, 50–52), ma mafaufau i avanoa ua e maua e auauna atu ai i isi. E mafai foi ona e lisiina ni nai mea ma mafaufau loloto pe faapefea e le savali a Peresitene Jones, faatasi ai ma le Mosaea 2:17, ona faatosinaina le ala e te taulimaina ai nei avanoa. O se viiga e pei o le “Se Tagata Mativa Faanoanoa” (Viiga, nu.16) po o se vitio e pei o le “The Old Shoemaker” (Gospel Library) e mafai ona fesoasoani ia te oe e mafaufau ai i ni malamalamaaga faaopoopo.

Tagai foi Mataio 25:40; “Faith Murray’s Story: Overcoming Adversity through Service,” “King Benjamin Teaches about Serving God” (vitio), Gospel Library; JustServe.org; Autu o le Talalelei, “Auaunaga,” Potutusi o le Talalelei.

Ua Aoao Atu le Tupu o Peniamina i le Auauna Atu i le Atua | Mosaea 2

Ua aoao e le Tupu o Peniamina le nuu o Saraemila o se tupu lelei e auauna i isi ma latou galulue faatasi. Ua ia aoao atu a latou auauna i isi, o le auauna a lea i le Atua.

Pe a ou auauna atu i isi, ua ou auauna atu foi i le Atua.

Mosaea 2:38–41

E sau le fiafia mai le tausia o poloaiga a le Atua.

E faapefea ona e faamatala le fiafia e maua mai le usiusitai i le Atua? Pe o i ai ni fasifuaitau i le Mosaea 2:38–41 o le a fesoasoani ia te oe e faamatala ai pe aisea e te tausia ai Ana poloaiga?

Mosaea 3:1–20

E mafai ona avea au ma se tagata paia e ala i le Togiola a Iesu Keriso.

O le Tupu o Peniamina, e faapei foi o perofeta uma, sa molimau mai ia Iesu Keriso ina ia “mafai e [lona nuu] ona maua le faamagaloga o a latou agasala, ma olioli i le olioli tele” (Mosaea 3:13). O nai fesili nei e mafaufau i ai a o e faitauina le molimau a le Tupu o Peniamina i le Faaola i le Mosaea 3:1–20:

• O a ni mea ou te aoaoina mai nei fuaiupu e uiga i le Faaola ma Lana misiona?

• O le a se mea ua ou aoao mai le Mosaea 3:18–19 e uiga i le avea ma se tagata paia?

• Na faapefea ona fesoasoani Iesu Keriso ia te au e faatoilalo le agasala, suia lo’u natura, ma avea atili e faapei o se tagata paia?

Mosaea 3:5–21

“O le a afio mai ai i lalo mai le lagi … le Alii Mamana Aoao.”

O le a se mea e tuuina atu e le mana faaeletise ia te oe le malosiaga e fai? O le a faapefea ona ese lou olaga e aunoa ma lena mea? O nei fesili e mafai ona fesoasoani ia te oe e mafaufau loloto ai i le mana sili atu e mafai e le Faaola ona aumaia i lou olaga.

O le agelu na faaali atu i le Tupu o Peniamina sa faasino ia Iesu Keriso o “le Alii Mamana Aoao,” o se faalagiga ua faamamafa mai ai o loo ia te Ia le mana uma. O le a se mea ua e aoaoina mai le Mosaea 3:5–21 e uiga i le ala e faaaoga ai e le Faaola lena mana? O faapefea ona e vaaia le mana o le Faaola i lou olaga ma i olaga o i latou o siomia oe? O le a le mea e mafai e Lona mana ona e faia ma avea ai? O le a faapefea ona ese lou olaga e aunoa ma lena mea?

Mo nisi manatu, tagai i lomiga o lenei masina o mekasini o le Liahona ma le Mo le Malosi o le Autalavou .

Fautuaga mo le Aoaoina o Tamaiti

Mosaea 2:11–18

Pe a ou auauna atu i isi, ua ou auauna atu i le Atua.

• O le itulau o gaoioiga o lenei vaiaso o loo i ai se palealii faigofie e mafai ona fai e lau fanau. Atonu latou te mananao e feauauai e tutu i luga o se nofoa ma faafoliga o le Tupu o Peniamina a o e faasoa atu nisi o mea na aoao atu e le Tupu o Peniamina i lona nuu, o loo maua i le Mosaea 2–3. E mafai foi ona e faasoa atu ia i latou le “Mataupu 12: O Le Tupu o Peniamina” (Tala o le Tusi a Mamona, 32–35) e avatu ai ia i latou se vaaiga aoao i aoaoga a le Tupu o Peniamina.

• O leMosaea 2:17 atonu o se fuaiupu lelei mo lau fanau e aoao ai. E mafai ona e fesoasoani ia i latou e toe fai mai ni nai upu i le taimi e tasi. Pe e mafai foi ona e tusia le fuaiupu i lalo, ma ni nai upu autu o loo misi, ma fai atu i lau fanau e sue ia upu o loo misi. Ona mafai lea ona outou talanoa ma lau fanau e uiga i le mafuaaga e finagalo ai le Atua ia tatou auauna atu i le tasi ma le isi.

• E mafai ona e fesoasoani i lau fanau e suesue le Mosaea 2:11–18 e saili po o le a le mea na faia e le Tupu o Peniamina e auauna atu ai. Ona mafai lea e lau fanau ona tusi i luga o ni fasipepa nisi o auala e mafai ona latou auauna atu ai i tagata o le aiga. Tuu pepa i totonu o se koneteina, e pei o se taga po o se fagu, ina ia mafai e lau fanau ona piki se pepa i aso taitasi ma fai lena faatinoga o le auauna atu mo se tasi.

E manuia tamaiti i le fai faafia. Aua le fefe e fai faafia ia gaoioiga, aemaise lava mo tamaiti laiti. O le fai faafia o le a fesoasoani i tamaiti e manatua ai mea na latou aoaoina.

Na aoao mai le Tupu o Peniamina e mafai ona tatou auauna atu i le Atua e ala i le auauna atu i isi.

Mosaea 2:19–25

O o’u faamanuiaga uma e mai le Tama Faalelagi.

• O le auaunaga a le Tupu o Peniamina i lona nuu sa musuia i lona lotofaafetai loloto i le Atua. O le a faapefea ona e musuia lagona faapena i lau fanau? E mafai ona outou faitau faatasi le Mosaea 2:21 ma amata se lisi o faamanuiaga ua tuuina mai e le Tama Faalelagi ia i tatou. Ona mafai lea ona e faaopoopo i le lisi isi faamanuiaga e mafaufau i ai tamaiti.

• O se taaloga lenei e mafai ona outou taaalo ai e fesoasoani ai i lau fanau ia iloa faamanuiaga a le Tama Faalelagi. E mafai e tamaiti ona pasi faataamilo se ata o le Faaola a o latou usuina pe faalogologo i se pese e uiga i le lotofaafetai (tagai “Lotofaafetai” i le faasino autu o le Tusipese a Tamaiti). Taofi le usuina o le pese pe taofi le musika i lea taimi ma lea taimi, ma valaaulia le o uuina le ata e faasoa atu se faamanuiaga latou te lotofaafetai ai. E tusa ai ma le Mosaea 2:22–24, e mafai faapefea ona tatou faaali atu tatou te faafetai mo o tatou faamanuiaga?

Mosaea 3:5–10, 19

O le a fesoasoani Iesu Keriso ia te au ia avea atili e faapei o Ia.

• Sa taʻu atu e se agelu i le Tupu o Peniamina ia upumoni taua e uiga i le soifuaga ma le auaunaga a Iesu Keriso. E mafai e oe ma lau fanau ona sue ni ata o nisi o mea na tutupu lea na taua i le Mosaea 3:5–10 (tagai, mo se faataitaiga, Tusiata o le Talalelei, nu. 30, 41, 42, 57,59). A o e faitauina le Mosaea 3:5–10, e mafai e lau fanau ona sii o latou lima pe a latou faalogo i se mea i fuaitau o loo faaali mai i se tasi o ata.

• Pe na i ai se taimi na fesoasoani ai lau fanau e saunia meaai e faaaoga ai se fua o se kuka? Atonu e mafai ona outou talanoa i lena aafiaga ma faaaoga le Mosaea 3:19 e fai mai ai se “fua” mo le auala e mafai ai ona avea i tatou e pei o Iesu Keriso. E faapefea ona fesoasoani Iesu ia i tatou ia avea faapei o Ia?

Mo nisi manatu, tagai i le lomiga o lenei masina o le mekasini o le Uo .

Lauga a le Tupu o Peniamina, saunia e Jeremy Winborg