I le Galuega a Lou Atua, saunia Walter Rane

29 Aperila–5 Me: “O Se Liuga Tele”

Mosaea 4–6

Pe ua e faalogo i se tasi o lauga ma lagonaina ai le musuia e suia lou olaga? Atonu na e filifili, ona o mea na e faalogo i ai, ia ese teisi se olaga e ola ai—pe o se eseesega tele foi. O le lauga a le Tupu o Peniamina o se ituaiga lauga faapena, ma o upumoni sa ia aoao mai sa i ai lena ituaiga o aafiaga i tagata o e sa faalogo i ai. Sa faasoa atu e le Tupu o Peniamina i lona nuu mea na aoao atu e le agelu ia te ia—e faapea o faamanuiaga ofoofogia e mafai e ala i “le toto togiola o Keriso” (Mosaea 4:2). Ona o Lana savali, na suia ai la latou vaaiga atoa ia i latou lava (tagaiMosaea 4:2), sa suia e le Agaga o latou naunauga (tagaiMosaea 5:2), ma sa latou osifeagaiga ma le Atua o le a latou faia e le aunoa Lona finagalo (tagaiMosaea 5:5). O le ala lenei na aafia ai le nuu o le Tupu o Peniamina i ana upu. Pe o le a faapefea ona aafia ai oe?

Manatu mo le Aoaoina i le Aiga ma i le Lotu

Mosaea 4

E ala ia Iesu Keriso, e mafai ai ona ou maua ma faatumauina se faamagaloga o a’u agasala.

O nisi taimi, tusa lava pe na e lagonaina ua faamagaloina au agasala, e mafai lava ona e tauivi e tausi lena lagona ma tumau ai i luga o le ala o le amiotonu. Na aoao atu e le Tupu o Peniamina lona nuu i le ala e maua ai ma faatumauina se faamagaloga o agasala. A o e suesue i le mataupu 4 o le Mosaea, mafaufau e fai atu fesili faapenei:

Fuaiupu 1–8.O a tulaga e tuuina mai ai e le Atua se faamagaloga o au agasala? O le a se mea ua e aoaoina e uiga ia te Ia i nei fuaiupu e musuia ai oe e salamo? E mafai faapefea ona e iloa ua e salamo?

Fuaiupu 11–16.E tusa ai ma nei fuaiupu, o le a le mea e tupu i o tatou olaga pe afai tatou te faia mea ua faamatala mai i le fuaiupu 11? Pe na faapefea ona e oo, po o se tasi e te alofa i ai, i nei suiga? Faatusatusa nei suiga i suiga o loo faamatalaina i le Mosaea 3:19.

Fuaiupu 16–30.E mafai faapefea e le faasoa atu o mea ua e maua i isi ona fesoasoani ia te oe e faatumauina ai se faamagaloga o au agasala? E mafai faapefea ona e faaaogaina le fuaiupu 27 i au taumafaiga ia avea e faapei o Keriso?

E faapefea ona avea i tatou uma ma tagata aisi? E tusa ai ma nei fuaiupu, e tatau faapefea ona tatou taulimaina fanau uma a le Atua? (tagai Mosea 4:26). O ai e manaomia lau fesoasoani?

Tagai foi Becky Craven, “Tuu Ma Oe le Sui,” Liahona, Nov. 2020, 58–60.

Mosaea 4:5–10

Ou te talitonu ma faalagolago i le Atua.

O le valaaulia a le Tupu o Peniamina ia talitonu ma faalagolago i le Atua e taua i aso nei e pei ona sa i ai i aso anamua. A o e faitauina le Mosaea 4:5–10, vaavaai mo upumoni e uiga i le Atua e avatu ai ia te oe le mafuaaga e faalagolago ai ia te Ia. Matau valaaulia na tuuina mai e le Tupu o Peniamina i le fuaiupu 10. Aisea o le a faafaigofie ai e le faatuatuaina o le Atua ona faia le mea ua valaaulia e le Tupu o Peniamina?

Mafaufau e suesue nisi o nei mau faaopoopo e fai ai se lisi o uiga o le Atua: Ieremia 32:17; 1 Ioane 4:8; 2 Nifae 9:17; Alema 32:22; Mamona 9:9; Eteru 3:12; Mataupu Faavae ma Feagaiga 19:1–3; 88:41 (tagai foi i le vitio “Christlike Attributes,” Gospel Library). E mafai ona e faaaogaina lau lisi e maua mai ai ni auala eseese e faauma ai se fuaiupu faapenei: “Ona ua ou iloa o le Atua e , e mafai ona ou faatuatuaina o Ia e .”

E faateleina lo tatou faalagolago i le Atua pe a tatou maua ni aafiaga faatasi ma Ia. I le Mosaea 4:1–3, o le a le mea na fesoasoani i le nuu o le Tupu o Peniamina e “oo mai i se malamalama o le agalelei o le Atua”? (fuaiupu 6). Mafaufau i aafiaga sa e oo i ai faatasi ma le Atua. O a ni mea ua aoao mai ia te oe e nei aafiaga e uiga ia te Ia? O a laasaga o loo e faia (pe e mafai ona e uia) e faaloloto ai lou talitonuga po o le faalagolago i le Atua?

Tagai foi Jeffrey R. Holland, “O Le Silisiliese o le Atua,” Liahona, Nov. 2003, 70–73; Autu o le Talalelei “Atua le Tama,” Potutusi o le Talalelei; “Ua Ou Mautinoa o Soifua Lo’u Tama,” Viiga, nu. 185.

Faasoaina o aafiaga paia. O nisi o aafiaga e paia pe patino tele mo le faasoa atu. Pe a valaaulia isi e faasoa mai ni aafiaga, aua le faamalosia i latou e faasoa mai pe afai latou te le mananao ai.

Mosaea 4:29--30

E tatau ona mataala i o tatou manatu, upu, ma galuega.

E le tuuina mai e le Atua ia i tatou se lisi o agasala uma o i ai. E tusa ai ma le Mosaea 4:29–30, o le a se isi mea Na te faia? Mafaufau loloto pe faapefea e ou manatu, upu, ma galuega ona aafia ai oe lava ma isi. E faapefea ona aafia ai la oulua sootaga ma le Atua? E faapefea ona e “mataala [ia te oe lava]”?

Mosaea 5:1–5

O le Agaga o le Alii e mafai ona mafua ai se suiga tele i lo’u loto.

O se mea masani mo tagata le faapea atu, “E le mafai ona ou sui. O a’u lava lena.” I se faatusatusaga, o le aafiaga o le nuu o le Tupu o Peniamina ua faaalia mai ai ia i tatou le ala e mafai ai e le Agaga ona suia moni o tatou loto. A o e faitau i le Mosaea 5:1–5, mafaufau pe na faapefea ona tupu le “suiga tele” e tau atu i le liua moni—pe mafai foi ona tupu—i lou olaga. Mafaufau e uiga i suiga maaleale, faifai malie faapea foi ma aafiaga “tetele”. E faapefea ona fesoasoani nei aafiaga ia te oe pe a e feagai ma faaosoosoga?

Tagai foi Esekielu 36:26–27; Alema 5:14; “A Change of Heart,” “The People of King Benjamin Make a Covenant” (vitio), Gospel Library.

Ua Osia e le Nuu o le Tupu o Peniamina se Feagaiga | Mosaea 5

Ua lagona e le nuu o le Tupu o Peniamina le Agaga o le Alii ma osifeagaiga ma le Atua e tauave le suafa o Keriso ma tausi Ana poloaiga. Ua ta’ua i latou o fanau a Keriso aua ua fanauina i la le Atua.

O Aao Faamalolo, saunia e Adam Abram

Mosaea 5:5–15

Ou te tauaveina i o’u lava luga le suafa o Keriso pe a ou osia feagaiga ma Ia.

O le a se mea ua e aoao mai le Mosaea 5:7–9 i le uiga o le tauave i ou lava luga o le suafa o Keriso? O a mea o aoao mai e tatalo o le faamanatuga (tagaiMoronae 4–5) e uiga i lenei mea? E mafai faapefea ona e faaali atu o oe e “a” le Faaola ia?

Tagai foi D. Todd Christofferson, “Aisea i le Ala o Feagaiga,” Liahona, Me 2021, 116–19.

Fautuaga mo le Aoaoina o Tamaiti

Mosaea 4:1--3, 10

O le salamo na te aumaia le olioli.

• Ina ia aoao atu e uiga i le olioli o le salamo, atonu e mafai ona e tuu atu i lau fanau e faapiipii o latou lima po o le faapalapala ma matau o latou lagona pe a uma ona fufulu. Ona mafai lea ona e faatusatusaina lena mea i le ala na lagonaina ai e tagata i le Mosaea 4:1–3 a o lei faamagaloina a latou agasala ma ina ua uma foi ona faamagaloina. Faasoa atu lau molimau i le mana o le Faaola e faamama ai i tatou faaleagaga.

• Pe o iloa e lau fanau pe faapefea ona salamo atoatoa ma faamaoni? Fesoasoani ia i latou e saili mea na faia e le nuu o le Tupu o Peniamina i le Mosaea 4:1–3, 10. E mafai foi ona latou iloiloina le “Salamo, Salamo” i le Taiala i Tusitusiga Paia. E faapefea ona avanoa le salamo ona o Iesu Keriso?

Mosaea 4:12–26

E musuia au e le talalelei a Iesu Keriso e taulimaina isi i le alofa ma le agalelei.

• O le auauna atu i isi e maua ai e i tatou lagona lelei. Atonu e mafai e lau fanau ona talanoa i se taimi na latou alolofa ai pe auauna atu ai i se tasi ma le lagona na latou maua i lena aafiaga. O a ni mafuaaga atonu e le mananao ai tagata e auauna atu i isi? O le a se mea e mafai ona tatou fai atu i se tasi e valaaulia ai i latou e fesoasoani i tagata o loo manaomia le fesoasoani? Vaavaai mo manatu i le Mosaea 4:16–26.

• Na aoao mai le Tupu o Peniamina afai tatou te o mai ia Keriso ma maua se faamagaloga o a tatou agasala, o le a “faatumuina i le alofa o le Atua” i tatou (Mosaea 4:12). O lenei mea e taitai atu ai i tatou ia alolofa ma agalelei atu i isi. E mafai e oe ma lau fanau ona sailiili i le Mosaea 4:13–16, 26 (po o se pese e pei o le “Ou Te Savali ma Oe,” Tusipese a Tamaiti, 78) ma sue fuaitau o loo faamatala ai le ala e mafai ai ona tatou auauna atu i isi. Ona mafai lea ona latou faatinoina nei mea pe tusi ni ata o na mea ma mate mai fuaitau a le tasi ma le isi. E faapefea ona tatou faaalia le alofa ma le agalelei i le fale, i le aʻoga, po o le lotu?

Na aoao i tatou e Iesu Keriso ina ia agalelei atu i isi.

Mosaea 5:5–15

A ou osia feagaiga ma le Atua, ou te tauaveina i oʻu lava luga le suafa o Keriso.

• Atonu e fiafia lau fanau e fatu ni pine e faaalia ai le suafa “Iesu Keriso” ma faamau i luga ane o latou fatafata (tagai i le itulau o gaoioiga o lenei vaiaso). A o latou faia lea mea, e mafai ona e faitau atu ia i latou le Mosaea 5:12 ma talanoa pe faapefea e le osia o feagaiga, po o folafolaga, faatasi ma le Atua ona pei o le i ai o le suafa o Keriso o loo “tusia pea i o [tatou] loto.”

Mo nisi manatu, tagai i le lomiga o lenei masina o le mekasini o le Uo .

I Lana Tausiga E Le Aunoa, saunia e Greg K. Olsen