Apinati i luma o le Tupu o Noa, saunia e Andrew Bosley

13–19 Me: “O Se Malamalama … E Lē Mafai Lava Ona Faapouliuligia”

Mosaea 11–17

O afi tetele e mafai ona amata mai i se aloiafi se tasi. O Apinati sa na o ia le tagata na molimau tetee i se tupu malosi ma lana au faufautua. Sa teena ana upu mo le tele o le vaega, ma sa faasalaina o ia i le oti. Ae o lana molimau ia Iesu Keriso, o le “malamalama … e le mafai lava ona faapouliuligia” (Mosaea 16:9), sa sipaka ai se lagona ia Alema le ositaulaga talavou. Ma o lena sipaka o le liuga na tuputupu ae malie a o aumaia e Alema le toatele o isi e salamo ma faatuatua ia Iesu Keriso. O le afi mumu na fasiotia ai Apinati na iu ina mate, ae o le afi mumu o le faatuatua na fatuina e ana upu o le a i ai se tosinaga tumau i luga o sa Nifae—ma i luga o i latou o e faitau i ana upu i ona po nei. O le toatele o i tatou o le a le feagai lava ma mea na oo i ai Apinati ona o a tatou molimau, ae e tofu uma i tatou ma taimi ina ua mulimuli ia Iesu Keriso o se tofotofoga o lo tatou lototoa ma le faatuatua. Atonu o le suesueina o le molimau a Apinati o le a tapili ai foi le afi musaesae o molimau ma le lototoa i o tatou loto.

Tagai foi “Abinadi Testifies of Jesus Christ” (vitio), Gospel Library.

O Apinati o loo Molimau atu ia Iesu Keriso | Mosaea 11–18

Ua aoao atu le perofeta o Apinati i le Tupu o Noa ma ana faitaulaga Tulafono e Sefulu. Ua ia valoia le toe afio mai o le Alii i le lalolagi e togiola Lona nuu. Ua talitonu Alema, se tasi o faitaulaga a le tupu ia Apinati.

Manatu mo le Aoaoina i le Aiga ma i le Lotu

Mosaea 11–13; 17

E mafai ona ou tu atu mo Iesu Keriso, e tusa lava pe ou te tu na’o a’u.

A o e suesueina le Mosaea 11–13; 17, tagai i ata o Apinati i le otootoga lenei. O le a se mea ua e aoaoina e uiga i le tu atu o se molimau mo Keriso? Ae maise lava, e mafai ona e taulai atu lau suesuega i fuaitau ma fesili e pei o nei:

• E faapefea ona e faamatalaina Noa ma lona nuu? Aisea o le a manaomia ai le lototele mo Apinati e faasoa atu ai le savali a le Atua ia i latou? (tagai Mosaea 11:1–19, 27–29; 12:9–15).

• O le a faapefea ona e faamatalaina Apinati? O le a se mea na malamalama i ai Apinati na fesoasoani ia te ia e toa ai i lana molimau? (tagai Mosaea 13:2–9, 28, 33–35; 17:8–10, 20).

O anafea na e lagonaina ai e pei na e tūtūu na o oe e puipui le Faaola ma Lana talalelei? Na faapefea ona Ia fesoasoani ia te oe e lagona Lona faatasi ma oe? A o e mafaufau loloto i lenei mea, e mafai ona e faitau i le tala ia Elisaia ma lana auauna talavou i le 2 Tupu 6:14–17. O le a se mea ua faagaeetia ai oe e uiga i lenei tala?

E mafai foi ona e sailia itulau 31–33 o le Mo le Malosi o le Autalavou: O Se Taiala mo le Faia o Filifiliga e sue ai fasifuaitau e avatu ai ia te oe le lototele e puipuia ai le upumoni. Pe e mafai foi ona e faia le mea lava lea e tasi i upu o se viiga e pei o le “Fai Mea Tonu” po o le “Faamalosi ia i le Galuega Nei” (Viiga, nu. 148, 152).

E faapefea ona e faaaogaina mea sa e aoaoina mai ia Apinati? O le vitio “Dare to Stand Alone” (Gospel Library) o loo faaalia ai tulaga e mafai ona e tu atu ai mo Keriso ma Lana talalelei. O a isi faataitaiga e mafai ona e mafaufau i ai?

Lototele e Tu Na o Oe

Ua faasoa mai e Peresitene Thomas S. Monson sona aafiaga a o i ai i le Neivi, lea na tatau ai ona tu nao ia, ma faamanatu mai ia i tatou “tatou te le tutu lava nao i tatou pe a tatou tutu faatasi ma lo tatou Tama oi le Lagi.”

Tagai foi Roma 1:16; 2 Timoteo 1:7–8; “Mataupu 8: O Le Valaau mo le Lototele,” Aoaoga a Peresitene o le Ekalesia: Thomas S. Monson (2022), 135–47; Autu o le Talalelei, “Faatuatua ia Iesu Keriso,” Potutusi o le Talalelei.

Aoao atu e ala i le Agaga. “O aoaoga mamana o le talalelei e le manaomia ai le na o le saunia o se lesona ae o le saunia o oe lava faaleagaga [e] faalogo ma mulimuli i le taitaiga a le Agaga a o e aoao atu (Aoao Atu i le Ala a le Faaola, 17).

Mosaea 12:19–37

E manaomia ona ou faaaogaina lo’u loto ia malamalama i le afioga a le Atua.

Sa masani faitaulaga a le Tupu o Noa i le afioga a le Atua. E mafai ona latou sii maia fuaitau o mau ma fai mai e aoao atu poloaiga. Ae peitai, o o latou olaga sa foliga mai e le aafia i le talalelei a le Faaola. Aisea na faapea ai?

Mafaufau i lenei mea a o e faitau i le Mosaea 12:19–37. O le a sou manatu i le uiga o le faaaoga o lou loto e malamalama ai i le afioga a le Atua? O a upu po o fasifuaitau o musuia oe e faia ni suiga i le ala o e aoaoina ai le talalelei?

Mosaea 13:11–26

E tatau ona tusia poloaiga a le Atua i lo’u loto.

Mafaufau loloto i le matauga a Apinati faapea o poloaiga “ua le o tusia i latou [i] loto” o faitaulaga (Mosaea 13:11). Mata o le a le uiga o lenei fasifuaitau? A o e faitauina le Mosaea 13:11–26, mafaufau pe o tusia nei poloaiga i lou loto.

Tagai foi Ieremia 31:31–34; 2 Korinito 3:3.

Mosaea 14–15

Na puapuagatia Iesu Keriso mo a’u.

I le Mosaea 14–15, matau upu ma fuaitau o loo faamatala ai le Faaola ma mea sa Ia puapuagatia ai mo oe. O a fuaiupu o loo fesoasoani e faalolotoina ai lou alofa ma le lotofaafetai ia te Ia?

Mosaea 15:1–12

E faapefea ona avea Iesu Keriso ma Tama ma le Alo?

Sa aoao mai Apinati e faapea o le Atua le Alo—o Iesu Keriso—o le a avea ma Togiola (tagai Mosaea 15:1), e afio i le tino, ua avea o se tagata ma se Atua (fuaiupu 2–3). Na Ia gauai atoatoa atu Ia lava i le finagalo o le Atua le Tama (fuaiupu 5–9). Ona o lea, o Iesu Keriso o le Alo o le Atua ma o le sui atoatoa faalelalolagi o le Atua le Tama (tagai Ioane 14:6–10).

O Iesu Keriso foi o le Tama i le tulaga e faapea, a tatou taliaina Lana togiola, e avea i tatou ma “ana fanau” ma “suli o le malo o le Atua” (Mosaea 15:11–12). I se isi faaupuga, tatou te toefanauina faaleagaga e ala ia te Ia (tagai Mosaea 5:7).

Aisea e te lagona ai e taua le iloa o nei upumoni e uiga i le Tama Faalelagi ma Iesu Keriso? E faapefea ona faamalosia e le molimau a Apinati lou faatuatua ia i Laua?

Fautuaga mo le Aoaoina o Tamaiti

Mosaea 11–13; 17

E mafai ona ou tu atu mo Iesu Keriso, e tusa lava pe ou te tu na’o a’u.

• I nisi taimi i o tatou olaga, tatou te feagai uma lava ma uunaiga e faia filifiliga e tetee atu ai i lo tatou faatuatua ia Iesu Keriso. O le a se mea e mafai e lau fanau ona aoao mai ia Apinati e uiga i le tu atu o se molimau ia Iesu Keriso, e tusa lava pe le lauiloa? O le ata i lenei otootoga po o le “Mataupu 14: O Apinati ma le Tupu o Noa” (i le Tala o le Tusi a Mamona, 38–42) e mafai ona fesoasoani ia i latou e vaai faalemafaufau ai i le tala o i le Mosaea 11–13; 17. Fesili ia i latou pe o le a le mea latou te fiafia ai ia Apinati.

• Atonu e fiafia lau fanau e faatino ni vaega o le tala ia Apinati. Ona mafai lea ona latou faatinoina ni tulaga moni o le olaga e faataitai ai mea latou te ono faia pe afai e mananao isi latou te faia se mea sese. Pe e mafai foi ona latou faasoa mai ni aafiaga i se taimi na latou lototetele ai e mulimuli ia Iesu Keriso. Na faapefea ona mulimuli Apinati ia Iesu Keriso? (tagai Mosaea 13:2–9; 17:7–10). Aisea na le faia ai e le Tupu o Noa le mea sa ia iloa e sa’o? (tagai Mosaea 17:11–12).

Mosaea 12:33–36; 13:11–24

E tatau ona ou usitai i Poloaiga e Sefulu.

• Sa iloa e faitaulaga a le Tupu o Noa ia poloaiga ae latou te lei “tusia i o [latou] loto” (Mosaea 13:11). E faapefea ona e fesoasoani i lau fanau ia iloa poloaiga ma fiafia i ai? Atonu e mafai ona latou tusia poloaiga mai le Mosaea 12:33–36 ma le 13:11–24 i luga o fasi pepa na mamanuina i le fatu. A o latou faia, talanoa ma i latou po o le a le uiga o nei poloaiga ma pe faapefea ona mulimuli i ai. E mafai faapefea ona tatou tusia nei poloaiga i o tatou loto?

• E mafai foi ona outou usu faatasi se pese e faatatau i poloaiga, e pei o le “Tausi Poloaiga” (Tusipese a Tamaiti, 68). O a faamanuiaga e maua mai le tausia o poloaiga?

O tusitusiga paia e aoaoina i tatou i poloaiga a le Atua.

Mosaea 14; 16:4–9

Na auina mai e le Tama Faalelagi Iesu Keriso e toe taitai atu au ia te Ia.

• E ui o se mataupu puupuu, o le Mosaea 14 e tele ni upu ma fasifuaitau o loo faamatala ai Iesu Keriso. Atonu e mafai e oe ma lau fanau ona lisiina ao outou faitauina faatasi le mataupu. Ona mafai lea ona e talanoa e uiga i ou lagona e uiga i le Faaola a o e suesue i nei upu ma fasifuaitau.

• Ina ia aoao atu e uiga ia Iesu Keriso, na sii mai ai e Apinati le perofeta o Isaia, lea na faatusaina i tatou i mamoe na leiloloa. Atonu e mafai e lau fanau ona faasoa mai ni aafiaga ina ua leiloa se latou mea pe na leiloloa ai foi i latou lava. O a ni o latou lagona? O le a se mea na latou faia? Ona mafai lea ona outou faitau faatasi le Mosaea 14:6 ma le 16:4–9. E faapefea ona pei i tatou o mamoe ua se ese mai le Atua? E faapefea ona fesoasoani Iesu Keriso ia i tatou ia toe foi mai?

Mo nisi manatu, tagai i le lomiga o lenei masina o le mekasini o le Uo .

Sa Susulu Ona Foliga ma se Malamalama Maoae, saunia e Jeremy Winborg