Minerva Teichert (1888-1976), Amona i luma o le Tupu o Limae,1949-1951, suauu i luga o le laupapa, 35 15/16 x 48 inisi. Falemataaga mo Faatufugaga a le Iunvesite a Polika Iaga, 1969.

6–12 Me: “I Le Malosi o le Alii”

Mosaea 7–10

A o olioli le nuu o le Tupu o Mosaea i le “filemu faifai pea” i Saraemila (Mosaea 7:1), sa liliu atu o latou mafaufauga i se isi vaega o sa Nifae, o e na malaga ese i le tele o tausaga ua mavae e nonofo i le nuu o Liae-Nifae. Na mavae augatupulaga, ma sa lei faalogo le nuu o Mosaea mai ia i latou. O lea na faatonuina ai e Mosaea ia Amona e taitaia se vaega sailiili e o e sue sa Nifae o e sa malaga ese. Na maua e le au sailiili e faapea o nei sa Nifae, “ona o le amioleaga” (Mosaea 7:24), sa nofopologa ia sa Lamana. Peitai, i le taunuu atu o Amona ma ona uso, na faafuasei ai ona i ai le faamoemoe mo le laveaiina.

O nisi taimi tatou te pei ai o nei sa Nifae sa nofopologa, e puapuagatia ona o a tatou agasala, e taumanatunatu pe o le a faapefea ona toe maua o le filemu. O nisi taimi tatou te pei ai o Amona, e lagona le uunaia e aapa atu i isi ma iu ai ina iloa o a tatou taumafaiga na musuia ai i latou e “ea i luga [o latou] ulu, ma ia olioli, ma tuu atu lo [latou] faalagolago i le Atua” (Mosaea 7:19). Po o a lava o tatou tulaga, tatou te manaomia uma lava le salamo ma “liliu atu i le Alii ma le faamoemoe atoa o le loto,” ma le faatuatua “o le a ia … laveaiina [i tatou]” (Mosaea 7:33).

Manatu mo le Aoaoina i le Aiga ma i le Lotu

Mosaea 7:14–33

E i ai ia Iesu Keriso le mana e laveai ai a’u.

O le feiloai atu ia Amona na avatu ai i le Tupu o Limae le faamoemoe, ma sa manao o ia e pasi atu lena faamoemoe i lona nuu. Atonu e mafai foi ona avatu e ana upu ia te oe le faamoemoe. Mo le matalalaga, mafaufau e toe faamanatu le tulaga o le nuu o Limae i le Mosaea 7:20–25. Ona mafaufau loloto lea i fesili nei a o e faitauina le Mosaea 7:14–33:

• O le a le tala a Limae e faamalosia ai le faatuatua ma le faamoemoe o lona nuu ia Keriso?

• O a fasifuaitau e fesoasoani ia te oe e lagona ai le faamoemoe? (tagai fuaiupu 19, 33).

• O a ni aafiaga ua fesoasoani ia te oe e talitonu ai o le Atua e mafai ma o le a laveaiina oe?

Tagai foi “Faaola o Isaraelu,” Viiga, nu. 5.

Mosaea 7:26–27

Na foafoaina a’u i le “faatusa o le Atua.”

I le Mosaea 7:26–27, na faamatala ai e Limae nisi o upumoni na aoao atu e Apinati. O a ni upumoni e mafai ona e faailoa mai i nei fuaiupu? E faapefea e nei upumoni ona aafia ai le ala tatou te vaai atu ai i le Atua ma i tatou lava?

Tagai foi Russell M. Nelson, “O Lou Tino: O se Meaalofa Ofoofogia e Faatauaina,” Liahona, Aok. 2019, 50–55.

Mosaea 8:13–19

Ua saunia e le Alii ia perofeta, tagatavaai, ma talifaaaliga ia manuia ai le tagata.

Ina ua faalogo Limae i le molimau a Amona faapea sa faatuina mai e le Alii se tagatavaai, sa “matuai olioli [Limae] ma faafetai atu i le Atua” (Mosaea 8:19). Aisea e te manatu na faapena ai ona lagona? O le a le mea ua e aoaoina e uiga i tagatavaai mai upu a Amona i le Mosaea 8:13–19?

I asō nei, tatou te lagolagoina ia uso o le Au Peresitene Sili ma le Korama a Aposetolo e Toasefululua o ni perofeta, tagatavaai, ma talifaaaliga. Ua faapefea ona avea i latou ma “manuia tele” ia te oe? (Mosaea 8:18). O a ni mea ua latou aoaoina ai oe e uiga ia Iesu Keriso?

E mafai faapefea ona e, pei o Amona, ona tautala atu ma le le fefe e uiga i le manaomia o le i ai o ni perofeta, tagatavaai, ma talifaaaliga? (tagai i le Mosaea 8:13–18). Mo se faataitaiga, o le a se mea e mafai ona e faasoa atu i lou aiga po o luga o ala o faasalalauga faaagafesootai e uiga i:

• Upumoni na toefuatai mai i o tatou aso e Iosefa Samita ma isi perofeta a le Alii (e pei o le natura o le Atua, lo tatou faasinomaga paia, po o le natura e faavavau o le aiga). O se iloiloga “O Le Toefuataiga o le Atoatoaga o le Talalelei a Iesu Keriso” po o le “O Le Aiga: O Se Folafolaga i le Lalolagi” (Gospel Library) e mafai ona fesoasoani ia te oe e mafaufau ai i nisi o nei upumoni.

• O faamanuiaga o poloaiga po o sauniga (e pei o le Upu o le Poto, o le tulafono o le legavia, po o le faamauga o aiga).

O le masina ua tea, sa tatou faalogo ai i perofeta, tagatavaai, ma talifaaaliga i le konafesi aoao. O a savali na musuia ai oe? O le a se mea o le a ese ona e faia e faavae i mea ua e aoaoina? O le a le tala a tagatavaai a le Alii e uiga i “mea o le a oo mai”? (Mosaea 8:17).

Tagai foi Gospel Topics, “Prophets,” Gospel Library.

Mosaea 9–10

E mafai ona ou faafetaia’ia o’u luitau “i le malosi o le Alii.”

Na tautino mai e Senifa o ana mea sese na tuu ai lona nuu i se tulaga faigata. Ae mulimuli ane, ina ua faia taua ma sa Lamana, sa ia fesoasoani i lona nuu e faafetaia’ia o latou luitau i le faatuatua i le Alii. A o e faitauina le Mosaea 9–10, vaavaai mo mea na faia e le nuu o Senifa e faaalia ai lo latou faatuatua. Na faapefea ona faamalolosia i latou e le Atua? Na faapefea ona Ia faamalosia oe? O le a le uiga ia te oe o le agai i luma “i le malosi o le Alii”? (Mosaea 9:17; 10:10–11).

Mosaea 10:11–17

O a’u filifiliga e mafai ona tosina ai augatupulaga.

A o e faitauina le Mosaea 10:11–17, faailoa mai pe na faapefea e faatinoga ma amioga a augatupulaga ua tuanai a sa Lamana ona aafia ai augatupulaga na mulimuli mai ai. O le a se mea o fautua mai e lenei mea e uiga i auala e ono aafia ai isi i au filifiliga—mo le lelei po o le leaga—e aofia ai tagata e lei fananau mai?

Faaaoga lesona faaitino. O lesona faatino e avea ai le aoaoina ma mea malie ma manatua pea. Atonu o se laina o tomino e mafai ona faaalia ai le ala e mafai ai e filifiliga a tagata ona aafia ai e tupuga mai ia i latou (tagai Mosaea 10:11–17).

Fautuaga mo le Aoaoina o Tamaiti

Mosaea 7:19

Sa fesoasoani le Atua i tagata i tusitusiga paia, ma e mafai ona Ia fesoasoani mai ia te aʻu.

• Ina ua feagai lona nuu ma faafitauli, sa faasoa atu e le Tupu o Limae ia tusitusiga paia e fausia ai lo latou faatuatua. Fesili atu i lau fanau e uiga i tala faatusipaia po o tagata e fesoasoani ia i latou ia maua le faatuatua. Ona mafai lea ona e faitau atu ia i latou le Mosaea 7:19 ma toe faamanatu ia tala o loo ta’ua i lenei fuaiupu (tagai “O Le Paseka” ma le “O Isaraelu i le Vao” i le Tala o le Feagaiga Tuai, 70–76). Atonu e mananao lau fanau e faatino na [tala]. Na faapefea ona fesoasoani le Alii i tagata i nei tala? E mafai faapefea ona Ia fesoasoani ia i tatou?

• Mo nisi faataitaiga o le auala e fesoasoani mai ai le Alii ia i tatou, filifili nisi o fuaiupu o le “Tala o le Tusi a Mamona” po o le “Lototele o Nifae” (Tusipese a Tamaiti, 62–63, 64–65) e usu faatasi ma lau fanau. Fesoasoani ia i latou e faailoa mai pe na faapefea ona fesoasoani le Alii i tagata i le Tusi a Mamona—ma pe mafai faapefea ona Ia fesoasoani ia i tatou.

Mosaea 8:16–18

Ua tuuina mai e le Atua ia i tatou perofeta, tagatavaai, ma talifaaaliga.

• O se tasi o auala e aoao atu ai e uiga i tagatavaai o le faatusatusa lea o i latou i mea e fesoasoani tatou te iloa lelei ai, e pei o matatioata, meavaai, po o se tioata faalapopoa. A o e faitauina le Mosaea 8:17 i lau fanau, e mafai ona tuu o latou lima i o latou mata e pei o loo latou vaavaai atu i meavaai i taimi taitasi latou te faalogo ai i le upu “tagatavaai” (tagai foi Mose 6:35–36). Talanoa ma i latou e uiga i mea e fesoasoani le Alii i perofeta e “vaai” i ai e le mafai ona tatou faia. O a ni mea ua faaali mai ia i tatou e o tatou perofeta po o tagatavaai, e pei o Iosefa Samita?

• A uma ona faitau faatasi ma lau fanau le Mosaea 8:16–18 , e mafai ona e fesoasoani ia i latou e mafaufau i ni auala e faauma ai se fuaiupu e pei O se tagatavaai e pei o se … o le e fesoasoani ia i tatou … . Mo se faataitaiga, o se tagatavaai e pei o se faailoga o le auala e faasino atu i tatou ia Iesu.

• E mafai foi ona e faia ni tulagavae pepa ma valaaulia lau fanau e tusi ai i luga ni ata o mea na fautuaina i tatou e perofeta, tagatavaai, ma talifaaaliga e fai. Tuu tulagavae i se auala faataamilo i le potu, ma tuu atu i lau fanau e savavali i luga o nei tulagavae. E mafai faapefea ona avea se tagatavaai ma “manuia tele” ia i tatou? (tagai Mosaea 8:17–18).

Mosaea 9:14–18; 10:10–11

A ou vaivai, e mafai e le Alii ona faamalosia au.

• A feagai tamaiti ma luitau, latou te lagona i nisi taimi le vaivai ma le leai o se fesoasoani. E faapefea ona e fesoasoani i lau fanau ia faalagolago i le malosi o le Alii? E mafai ona e fesili atu ia i latou po o le a le mea tatou te faia ina ia malolosi ai faaletino. O le a le uiga o le i ai o “le malolosi o tagata”? (tagai Mosaea 10:11). O le a le uiga o le i ai o “le malosi o le Alii”? (tagai Mosaea 9:17–18; 10:10). E faapefea ona tatou maua le malosi o le Alii? E mafai e lau fanau ona tusi se ata o mea e fesoasoani ia i latou ia maua le malosi o le Alii.

Mo nisi manatu, tagai i le lomiga o lenei masina o le mekasini o le Uo .

Faaaliga ia Iosefa Samita, saunia e Clark Kelley Price