Minerva Teichert (1888–1976), Solaaga a le Tupu o Limae ma Lona Nuu, 1949-1951, suauu i luga o le laupapa, 35 7/8 x 48 inisi. Falemataaga mo Faatufugaga a le Iunvesite a Polika Iaga, 1969.

20–26 Me: Ua Matou Osia se Feagaiga ma Ia

Mosaea 18–24

O le tala ia Alema ma lona nuu i le Mosaea 18; 23–24 o loo faaalia ai le uiga o le “o mai i le lafu a le Atua” (Mosaea 18:8). Ina ua papatisoina le nuu o Alema, sa latou osia se feagaiga ma le Atua e “auauna atu ia te ia ma tausi ana poloaiga” (Mosaea 18:10). E ui o lenei mea sa o se tautinoga patino ma le Atua, ae e aofia ai foi ma le ala latou te taulimaina ai le tasi ma le isi. Ioe, o le malaga toe foi i le Tama Faalelagi e patino, ma e leai se tasi e mafai ona tausia a tatou feagaiga mo i tatou, ae e le faapea ai o tuua na o i tatou. Tatou te manaomia le tasi ma le isi. I le avea ai o ni tagata o le Ekalesia a Keriso, ua tatou osifeagaiga e auauna atu i le Atua e ala i le fesoasoani ma auauna atu le tasi i le isi i le ala, e “tauave[ina] avega a le tasi” (Mosaea 18:8–10). Sa i ai moni lava avega a le nuu o Alema e tauave, e faapei lava foi o i tatou uma. Ma o le ala e tasi e fesoasoani ai le Alii ia i tatou e “tauave ma le faigofie [a tatou] avega” (Mosaea 24:15) o le tuuina mai lea ia i tatou o se nuu o le Au Paia o e ua folafola atu e faanoanoa faatasi ma i tatou ma faamafanafanaina i tatou, e pei lava foi ina sa tatou folafola atu e faia mo i latou.

Tagai foi “The Lord Delivers the Covenant Peoples of Alma and Limhi” (vitio), Gospel Library.

Manatu mo le Aoaoina i le Aiga ma i le Lotu

Mosaea 18:1–17

Pe a ou papatiso, ou te osia se feagaiga ma le Atua.

Mafaufau po o le a le loloto o lagona o tagata talitonu o loo faamatalaina i le Mosaea 18 e uiga ia Iesu Keriso. Sa tatau ona latou feiloai faalilolilo, i se tulaga lamatia tele, e aoao ai e uiga ia te Ia (tagai fuaiupu 3). Ma ina ua tuuina mai le avanoa e faaali atu ai la latou tautinoga e ala i le feagaiga o le papatisoga, “sa pati o latou lima i le olioli, ma alalaga mai: O le manao lea o o matou loto” (Mosaea 18:11).

O le faitauina o nei fuaiupu e mafai ona avea o se avanoa lelei e mafaufau loloto ai i le taua o au feagaiga ia te oe. A o e suesueina faapitoa le Mosaea 18:8–14 mafaufau i fesili e pei o nei:

• O le a se mea ua e aoao mai nei fuaiupu e uiga i folafolaga sa e faia i le papatisoga? O le a se mea ua folafola atu e le Atua ia te oe? (tagai fuaiupu 10, 13).

• E faapefea ona fesootai le feagaiga e auauna atu i le Atua i a tatou taumafaiga e auauna atu i le tasi ma le isi? (tagai fuaiupu 8–9).

• O le a le uiga ia te oe o le “tu atu [o se molimau] a le Atua”? (fuaiupu 9).

• E fesoasoani faapefea ia te oe le tausiga o lau feagaiga o le papatisoga ia “tutumu i le Agaga”? (Mosaea 18:14). E fesoasoani faapefea le Agaga ia te oe e tausi au feagaiga?

O le taliina o nei fesili e ono taitai atu ai oe e mafaufau loloto pe aisea e taua ai feagaiga ma sauniga i le Atua. E mafai ona e maua ni malamalamaaga i le savali a Elder Gerrit W. Gong “O Le I Ai i Feagaiga” (Liahona, Nov. 2019, 80–83) po o le savali a Peresitene Jean B. Bingham “O Feagaiga ma le Atua e Faamalosia, Puipuia, ma Saunia i Tatou mo le Mamalu e Faavavau” (Liahona, Me 2022, 66–69). Aisea e te faafetai ai mo au feagaiga? O le a sau mea o fai e tausi ai au folafolaga?

Tagai foi i Autu o le Talalelei, “Papatisoga,” Potutusi o le Talalelei; “Alma the Elder Teaches and Baptizes at the Waters of Mormon” (vitio), Gospel Library.

Ua Aoao Atu Alema le Matua ma Papatiso i le Vai o Mamona | Mosaea 15; 18

Ua talitonu Alema le Matua i le perofeta o Apinati ma aoao atu le afio mai o Iesu Keriso. E toatele ua talitonu ia Alema ma filifili e salamo ma papatiso i le Vai o Mamona.

Aoao atu upumoni mai tusitusiga paia ma perofeta o aso e gata ai. A o e aoao atu—ma aoao mai—manatua o se tasi o auala sili e faateleina ai le faatuatua ia Keriso o le taulai atu lea i tusitusiga paia ma upu a perofeta o aso e gata ai (tagai Mosaea 18:19).

Mosaea 18:17–30

Ua poloaiina e le Atua Lona nuu ia faapotopoto, faatulaga, ma ia lotogatasi.

E tau manatunatu nisi tagata, aisea tatou te manaomia ai se ekalesia? Suesue i le Mosaea 18:17–31, ma vaavaai mo le taua o le nuu o Alema o loo maua i le faapotopotoina i “le ekalesia a Keriso” (Mosaea 18:17). O a ni mea e tutusa ai o e vaaia i le Ekalesia a Iesu Keriso i ona po o Alema ma o tatou aso?

E faapefea ona e tali atu i se uo po o se tagata o le aiga e le talitonu e tatau ona i ai se ekalesia faatulagaina? Aisea e te faafetai ai i le auai i le Ekalesia a Iesu Keriso?

Mafaufau i se mea e mafai ona e faia e fesoasoani ai i tagata o lau uarota po o le paranesi “ia fili faatasi [o latou loto] i le lotogatasi ma le alofa” (Mosaea 18:21).

Tagai foi Dallin H. Oaks, “O Le Manaomia o se Ekalesia,” Liahona, Nov. 2021, 24–26; “Ia Fealofani,” Viiga, nu. 195.

Mosaea 21–24

E fesoasoani mai le Atua ia te a’u e tauave a’u avega.

Na taufai pauu atu le nuu o Limae ma le nuu o Alema i le nofopologa, e ui e eseese tulaga. O a ni mea e mafai ona e aoaoina mai i le faatusatusaina o tala o le nuu o Limae i le Mosaea 19–22 ma le nuu o Alema i le Mosaea 18; 23–24? A o e faia, vaavaai mo savali e faatatau i lou olaga. Mo se faataitaiga, o le a le uiga o le “solosolo manuia”? (Mosaea 21:16). E mafai faapefea ona e faaaogaina lenei mataupu faavae?

Mosaea 23:21–24; 24:8–17

E mafai ona ou faalagolago i le Alii.

E ui ina sa latou salamo ia latou agasala, ae sa noanoatia lava Alema ma lona nuu. O o latou aafiaga ua faaalia ai o le faalagolago i le Alii ma le ola ai i a tatou feagaiga e le aveesea ai o tatou luitau i taimi uma, ae e fesoasoani tatou te faatoilaloina ai. A o e faitauina le Mosaea 23:21–24 ma le 24:8–17, matau ia upu ma fasifuaitau e mafai ona fesoasoani ia te oe e aoao ai ia faalagolago i le Atua, tusa lava po o a ou tulaga o i ai.

Tagai foi David A. Bednar, “Tauave ma le Faigofie a Latou Avega,” Liahona, Me 2014, 87–90.

Fautuaga mo le Aoaoina o Tamaiti

Mosaea 18:7–17

Pe a ou papatiso, ou te osia se feagaiga ma le Atua.

• O se tasi o auala pito sili ona taua e fesoasoani ai i lau fanau e saunia mo le papatisoga o le aoao atu ia i latou e uiga i le feagaiga latou te osia pe a papatisoina i latou. E mafai ona faigofie lenei mea e pei o le faaali atu o le ata i le faaiuga o le otootoga o lenei vaiaso ma faitau e uiga i le feagaiga ma i latou i le Mosaea 18:9–10. Mafaufau e valaaulia se tamaitiiti ua uma ona papatiso e aoao atu lenei mea i tamaiti laiti. Atonu e fiafia lau fanau e faalogo e uiga i lou papatisoga. Ua faapefea ona faamanuiaina lou olaga i le tausia o au feagaiga ma le Atua?

• O fanau ua papatisoina e mafai ona faaaogaina soo faamanatu e uiga i feagaiga na latou osia ma faafouina i vaiaso taitasi i le faamanatuga. Atonu e mafai e lau fanau ona faatusatusa le feagaiga o le papatisoga o loo faamatalaina i le Mosaea 18:8–10 ma tatalo o le faamanatuga (tagai Mataupu Faavae ma Feagaiga 20:77, 79). E mafai faapefea ona tatou faia le faamanatuga o se taimi faapitoa, faaaloalo, e pei lava o o tatou papatisoga?

Tatou te osia se feagaiga ma le Atua pe a papatisoina i tatou.

Mosaea 18:17–28

Pe a papatisoina a’u, e avea a’u o se tagata o le Ekalesia a Iesu Keriso.

• Pe ua iloa e lau fanau le uiga o le avea ma se tasi o Le Ekalesia a Iesu Keriso o le Au Paia o Aso e Gata Ai? Mafaufau e fesoasoani ia i latou e sue ni ata e faatusa i mea na faia e tagata o le Ekalesia i le Mosaea 18:17–28. Mo se faataitaiga, o ata Faauuina i le Perisitua ma le Totogiina o le Sefuluai (Tusi Ata o le Talalelei, nu. 106,113) e ono faatusa i fuaiupu 18 ma le 27–28. Ta’u atu ia i latou pe aisea e te faafetai ai i le avea ai ma se tagata o le Ekalesia a Iesu Keriso.

• O le fesoasoani i tamaiti ia lagona le “fili faatasi o latou loto i le lotogatasi ma le alofa” (Mosaea 18:21) e fesoasoani ia i latou e tumau ai le fesootai atu i le Ekalesia i o latou olaga atoa. Mafaufau e valaaulia lau fanau e faitau le Mosaea 18:17–28. O a mea na fai e tagata o le Ekalesia a Keriso i ona po o Alema e alolofa ma auauna atu ai le tasi i le isi? E mafai faapefea ona tatou faia lenei mea i a tatou uarota, paranesi, po o nuu? O se pese e faatatau i le alofa, e pei o le “Ou te Savali ma Oe” (Tusipese a Tamaiti, 78), e mafai ona faamalosia ai lenei savali.

Mosaea 24:8–17

E mafai e le Atua ona faamāmāina a’u avega.

• O se lesona faatino faigofie e mafai ona atili manatua ai le aoaoina. Mafaufau e faatumu se taga i ni mea mamafa (e fai ma sui o avega), ma valaaulia se tamaitiiti e uu le ato. A o e faitauina ma lau fanau le Mosaea 24:8–17 , fai atu ia i latou e aveese se mea mai le taga i taimi uma latou te faalogo ai e uiga i se mea na faia e Alema ma lona nuu e saili ai le fesoasoani a le Atua i a latou avega. Ona mafai lea ona outou talanoa ma i latou e uiga i le ala e mafai ai e le Tama Faalelagi ona faamāmāina a tatou avega pe a tatou sailia Lana fesoasoani.

Mo nisi manatu, tagai i le lomiga o lenei masina o le mekasini o le Uo .

O Le Vai o Mamona, saunia e Jorge Cocco