Liuaina o Alema le Itiiti, saunia e Gary L. Kapp

27 Me–2 Iuni: “Sa Ta’ua i Latou o le Nuu o le Atua”

Mosaea 25–28

Ina ua mavae le toeitiiti tolu augatupulaga o nonofo i nuu eseese, sa toe avea sa Nifae ma nuu e tasi. O le nuu o Limae, nuu o Alema, ma le nuu o Mosaea—e oo lava i le nuu o Saraemila, o e sa lei tupuga mai ia Nifae—sa “faitauina tagata uma faatasi ma sa Nifae” (Mosaea 25:13). O le toatele o i latou sa mananao foi ia avea ma tagata o le Ekalesia a le Alii, e pei ona faia e le nuu o Alema. O lea o i latou uma o e “sa manao latou te ave i o latou luga le suafa o Keriso” sa papatisoina, “ma sa ta’ua i latou o le nuu o le Atua” (Mosaea 25:23–24). Ina ua mavae tausaga o taua ma le faatagataotauaina, sa foliga mai o le a iu ina olioli sa Nifae i se vaitau o le toafilemu.

E lei leva, ae amata ona sauaina le Au Paia e i latou sa lei talitonu. O le mea e faapitoa ai le lotomomomo i lenei mea ona o le toatele o nei tagata le talitonu o fanau lava a e sa talitonu—o le “tupulaga faia’e” (Mosaea 26:1), e aofia ai atalii o Mosaea ma le atalii e toatasi o Alema. O loo faamatala mai i le tala se asiasiga faavavega a se agelu. Ae o le vavega moni o lenei tala e le na o agelu na faaali atu i atalii faalogogata. O le liuaina o se vavega lea, i se tasi itu po o se isi, e manaomia ona tupu ia i tatou uma.

Manatu mo le Aoaoina i le Aiga ma i le Lotu

Mosaea 26:1–6

E mafai ona ou fesoasoani i isi e o mai ia Iesu Keriso.

O le liua e patino—e le mafai ona tuufaasoloina e pei o se tofi i le fanau a se tagata. A o e faitauina le Mosaea 26:1–6, mafaufau loloto i mafuaaga ua pauu ese ai le “tupulaga faiae”, ma matau taunuuga o lo latou le talitonu. E mafai foi ona e mafaufau e uiga i tagata e te moomoo e mafai ona e aumaia ia Keriso. I lau suesuega atoa o le Mosaea 25–28, atonu e musumusu mai e le Agaga mea e mafai ona e faia e fesoasoani ai ia i latou e atiina ae le faatuatua ia Iesu Keriso.

Mosaea 26:6–39

E saili ia auauna faamaoni a le Atua e fai Lona finagalo.

O nisi taimi tatou te ono manatu ai o se taitai o le Ekalesia e pei o Alema e iloa i taimi uma le mea sa’o e fai. I le Mosaea 26 tatou te faitau ai i se faafitauli i le Ekalesia e lei taulimaina lava e Alema. O le a le mea na fai e Alema i lenei tulaga? (tagai i le Mosaea 26:13–14, 33–34, 38–39). O le a se mea ua fautuaina mai e le aafiaga o Alema e uiga i le ala e mafai ona tatou taulimaina ai faafitauli faigata i lou aiga po o lau auaunaga i le Ekalesia?

O le a le mea na aoao atu e le Alii ia Alema i le Mosaea 26:15–32? Matau o nisi o tali a le Alii sa lei tuusa’o atu i le fesili a Alema. O le a se mea o ta’u mai e lenei mea ia te oe e uiga i le tatalo ma le mauaina o faaaliga faaletagata lava ia?

O mataupu faavae e faavavau. Mafaufau pe faapefea ona faaaoga tala ma aoaoga i tusitusiga paia i lou olaga. Mo se faataitaiga, e mafai ona e fesili ifo ia te oe lava, “O a ni aafiaga na ou maua e pei o Alema?” po o le “O a upumoni na aoao mai e Alema e mafai ona fesoasoani ia te au?”

Mosaea 26:15–31

E faamagalo fua a’u e le Atua pe a ou salamo ma faamagalo atu i isi.

O le salamo ma le faamagaloga o ni autu faifai pea i le Mosaea 26–27. Vaavaai mo upu ma fasifuaitau o loo aoao mai ai e uiga i le salamo ma le faamagaloga i le Mosaea 26:22–24, 29–31; 27:23–37.

Atonu e taumanatunatu nisi tagata pe faamagalo moni i latou e le Atua. E faapefea ona e vaai faalemafaufau ia Alema le Matua o fautuaina se tagata o le Ekalesia i Saraemila o lē sa i ai lena atugaluga? O le a se mea na aoaoina e Alema mai le Alii i le Mosaea 26:15–31 e mafai ona fesoasoani i lenei tagata o le Ekalesia? (tagai foi Moronae 6:8; Mataupu Faavae ma Feagaiga 19:16–18; 58:42–43).

Mosaea 27:8–37; 28:1–4

E ala ia Iesu Keriso, e mafai ai ona ou suia mo le lelei sili atu.

Sa manino lava na manaomia e Alema le Itiiti se toefanauina faaleagaga. O ia, faatasi ai ma atalii o Mosaea, sa avea i latou ma “tagata agasala sili ona leaga” (Mosaea 28:4). Ae e lei leva ona mavae lona liuaina, sa molimau atu Alema e faapea e taua le liua—mo tagata uma: “Aua e te ofo,” na ia fai mai ai, “e ao i le fanauga uma a tagata … ona toefanauina” (Mosaea 27:25; faaopoopo le faamamafa).

A o e faitau e uiga i le aafiaga o Alema, i le Mosaea 27:8–37, mafaufau e tuu oe lava i lana tala. E mafai ona e mafaufau i ni mea e uiga ia te oe lava e manaomia ona suia? O ai, pei o le tama o Alema, atonu o loo tatalo mo oe “ma le faatuatua tele”? O a aafiaga na fesoasoani e “faatalitonu [oe] i le mana ma le pule a le Atua”? (Mosaea 27:14). O a ni “mea tetele” ua faia e le Alii mo oe po o lou aiga e tatau ona e “manatua”? (Mosaea 27:16). O le a se mea ua e aoao mai upu ma faatinoga a Alema le Itiiti i le uiga o le toefanauina? O a ni faataitaiga ua e vaai i ai?

Faaalu sina taimi e tusifaamaumau ai nisi o auala o loo fesoasoani ai le Faaola ia te oe e sui—pe toe fanauina foi—e tusa lava pe le o se mea maoae ou aafiaga pe faafuasei foi e pei o Alema. Pe o i ai se viiga e mafai ona e usuina pe faalogologo i ai e faaalia ai ou lagona, e pei o le “Ou Te Tu ma Ofo”? (Viiga, nu. 107). O ai e ono manuia mai le faalogo e uiga i ou aafiaga?

Sa faatusatusa e Elder David A. Bednar le toefanauina i le faagasologa o se kukama e avea o se piko (tagai “E Ao Ina Toe Fanau Mai Outou,” Liahona, Me 2007, 19–22). O le a se mea ua aoao mai e lenei faatusatusaga ia te oe e uiga i le liua?

Tagai foi Gospel Topics, “Become like Jesus Christ,” Gospel Library; “Ua Molimau Alema ua Fanau o Ia i la le Atua” (vitio), Potutusi o le Talalelei.

Ua Molimau Atu Alema le Itiiti Ua Toefanauina o Ia i La Le Atua | Mosaea 27; Alema 36

Ua ala mai Alema le Itiiti ma molimau atu i tagata ua soloia e le Faaola o Iesu Keriso ana agasala. Ua toefanauina o ia. Ua amata e Alema le Itiiti ona folafola atu le talalelei a Iesu Keriso ma faasoa atu lona aafiaga.

Mosaea 27:8–24

E faafofoga mai le Atua i a’u tatalo ma tali mai i ai e tusa ai ma Lona finagalo ma Lana taimi.

Atonu sa e i ai i le tulaga o Alema le Matua ma se tagata o le aiga o loo faia ni filifiliga faataumaoi. O le a se mea e te maua i le Mosaea 27:8–24 e avatu ai ia te oe le faamoemoe? E mafai faapefea e nei fuaiupu ona faatosinaina au tatalo mo isi?

Mo nisi manatu, tagai i lomiga o lenei masina o mekasini o le Liahona ma le Mo le Malosi o le Autalavou .

Fautuaga mo le Aoaoina o Tamaiti

Mosaea 26:30–31

E finagalo le Alii ou te faamagalo atu.

• Ina ia fesoasoani i lau fanau ia iloa mea na aoao atu e le Alii ia Alema e uiga i le faamagaloga, e mafai ona e valaaulia i latou e faitau le Mosaea 26:29–31 ma faitau pe faafia ona faaali mai le upu “faamagalo”. O le a se mea o aoao mai e nei fuaiupu e uiga i le faamagalo atu o isi? (Tagai foi “Fesoasoani Mai Ia Te A’u Tama Pele,” Tusipese a Tamaiti, 52.

• Ina ia faamamafa atu le faataitaiga a le Faaola o le faamagaloga, e mafai ona e faaali atu se ata o Ia i luga o le satauro ma faitau faatasi le Luka 23:33–34. O le a le mea na ole atu Iesu i le Tama Faalelagi e fai mo tagata na tuuina o Ia i luga o le satauro? A uma lenei talanoaga, e mafai e lau fanau ona faatino le faamagalo atu o le tasi i le isi.

• O nisi taimi e faigata ona faamagalo i tatou lava pe a tatou faia ni mea sese. E mafai faapefea ona fesoasoani afioga a le Atua ia Alema? E mafai e lau fanau ona faafoliga o latou talanoa i se tasi e le manatu o le a faamagaloina lava o ia e le Atua. Valaaulia lau fanau e sue se mea i le Mosaea 26:22–23, 29–30 e ono fesoasoani i lena tagata.

Mosaea 27:8–37

Ua fesoasoani mai Iesu Keriso ia ou avea atili faapei o Ia.

• O le liua o Alema le Itiiti ma atalii o Mosaea e mafai ona faaali atu ai i lau fanau e faapea, faatasi ai ma le mana o le Faaola, e mafai ai e soo se tasi ona suia. E mafai e oe po o lau fanau ona faaaoga atavali i lenei otootoga, itulau o gaoioiga o lenei vaiaso, ma ni nai mau autu mai le Mosaea 27:8–37 e faamatala ai le tala (tagai foi “Mataupu 18: Ua Salamo Alema le Itiiti,” i le Tala o le Tusi a Mamona, 49–52). Tuu atu se faamamafa faapitoa i le fuaiupu 24, e aoao atu ai na salamo Alema ma sa fesoasoani Iesu Keriso ia te ia e sui. Tuu atu i lau fanau e faatino le tala pe a latou mananao ai.

Na Olioli Lona Tamā, saunia e Walter Rane

Mosaea 27:8–24

E mafai ona ou tatalo ma anapogi mo le Atua e faamanuia i latou ou te alofa i ai.

• Faitau faatasi le Mosaea 27:8–24, ma fai atu i lau fanau e faailoa le mea na faia e Alema ma ona tagata e fesoasoani ai ia Alema le Itiiti. Pe na e anapogi ea ma tatalo mo se tasi? Faasoa atu lou aafiaga i lau fanau, ma tuu atu ia i latou e faasoa mai o latou aafiaga.

• E te iloa pe iloa foi e lau fanau se tasi e manaomia le fesoasoani a le Atua? I le mulimuli ai i le faataitaiga a Alema, atonu e mafai ona outou tatalo faatasi mo lena tagata ma, afai e mafai e lau fanau, ia anapopogi foi mo i latou.

Mo nisi manatu, tagai i le lomiga o lenei masina o le mekasini o le Uo .

Ata tusi o se agelu ua faaali atu ia Alema le Itiiti, saunia e Kevin Keele