Alema le Itiiti o loo aoao atu sa Sorama

Alema le Itiiti o loo aoao atu sa Sorama

10–16 Iuni: “Ua Oo Ea Lenei Liuga Tele i o Outou Loto?”

Alema 5–7

Sa lei iloa e Alema ia taotoga laveai o le suiga o fatu i aso nei, lea ua suia ai se fatu ua afaina pe ua ma’i se fatu maloloina. Ae sa ia iloa e uiga i se “liuga o le loto [fatu]” faavavega (Alema 5:26)—lea e aumai ai e le Faaola ia i tatou se faafouga o le ola faaleagaga, e pei “ua toe fanauina” (tagai Alema 5:14, 49). Sa mafai ona vaai Alema o le suiga o le loto o le mea tonu lava lea sa manaomia e le toatele o sa Nifae. O nisi sa maumea a o nisi sa matitiva, o nisi sa faamaualuluga a o isi sa lotomaualalo, o nisi sa faasaua a o isi sa mafatia i sauaga (tagai Alema 4:6–15). Ae o i latou uma lava e manaomia le o mai ia Iesu Keriso ina ia faamaloloina—e faapei lava ona tatou manaomia uma. Pe o tatou saili e faatoilalo le faamaualuga pe onosaia mafatiaga, o le savali a Alema e tutusa lava: “O mai ia, ma aua le fefefe” (Alema 7:15). Tuu atu i le Faaola e suia se loto ua maaa, agasala, po o se manu’a i se loto e maualalo, mama a’ia’i, ma fou.

Manatu mo le Aoaoina i le Aiga ma i le Lotu

Alema 5:14–33

E tatau ona ou oo i ai—ma faaauau pea ona lagonaina—se suiga tele o le loto.

Sa saunoa mai Peresitene M. Russell Ballard: “E manaomia ai ona ou faaalu soo se taimi e fesili ai ia te au lava ia, ‘O a a’u mea o fai?’ … I le avea ai ma se taiala mo au i le taimi o lenei iloiloga patino faaletagata lava ia, ou te fiafia ai e faitau ma mafaufau loloto i upu vailiili o loo maua i le mataupu lona lima o le Alema” (“Toefoi Atu ma Mauaina,” Liahona, Me 2017, 64).

Mafaufau e faitau le Alema 5:14–33 e faapei o loo e faatalanoaina oe lava ma suesue lou loto. Atonu e te manao e tusi au tali i fesili. O le a se mea ua e aoaoina e uiga ia te oe lava? O le a se mea ua musuia oe e fai o se taunuuga o lau faatalanoaga?

Tagai foi Dale G. Renlund, “Taofimau i le Liliu Tele o le Loto,” Liahona, Nov. 2009, 97–99.

teineitiiti o loo tatalo i autafa o se moega

A o tatou liliu atu i le Atua, e mafai ona tatou oo i se “liuga o le loto.”

Alema 5:44–51

E mafai ona maua la’u lava molimau i le Faaola ma Ana aoaoga e ala i le Agaga Paia.

I le Alema 5, ina ua faamatala e Alema le ala na ia maua ai lana molimau i le Faaola, na te lei ta’ua lona aafiaga i le vaai atu i se agelu (tagai Mosaea 27:10–17). Na faapefea ona iloa e Alema le upumoni mo ia lava? Atonu e mafai ona e faaaogaina mea e te maua i le Alema 5:44–51 e tusi ai se “fua” mo le mauaina o se molimau ia Iesu Keriso ma Ana aoaoga. O a “mea e manaomia” (upumoni o le talalelei) ma “faatonuga” (o mea e mafai ona tatou faia e saili ai mo le upumoni) na faaaofia e Alema? O a “mea e manaomia” ma “faatonuga” e mafai ona e faaopoopo i lau fua mai i ou lava aafiaga po o isi aafiaga i tusitusiga paia?

Alema 7

“Ua ou vaai atu ua outou i ai i totonu o le ala o le amiotonu.”

O nisi taimi tatou te pei ai o tagata i Saraemila, o e na manaomia ona valaauina ia salamo (tagai Alema 5:32). O isi taimi e pei lava i tatou o le nuu o Kitiona, o e sa taumafai e savavali “i ala o le amiotonu” (Alema 7:19). O le a se mea e te maua i le savali a Alema i Kitiona (i le Alema 7) e talitutusa ma mea na ia fai atu ai i Saraemila (i le Alema 5)? O a ni eseesega ua e matauina? Vaavaai mo mea na aoao atu e Alema e mafai ona fesoasoani ia te oe e tumau ai i “le ala e tau atu i le malo o le Atua” (Alema 7:19).

aikona o le seminare

Alema 7:7–16

Na tauave e le Faaola i Ona lava luga a’u agasala, tiga, ma puapuaga.

Pe i ai ea se taimi na e lagonaina ai e leai se tasi e malamalama i au tauiviga po o luitau? Afai o lea, o upumoni na aoao atu e Alema e mafai ona fesoasoani. A o e faitau, mafaufau i mea ua aoao mai e nei fuaiupu e uiga i faamoemoega o le taulaga a le Faaola. E mafai ona e faia se siata ma ni ulutala O mea na puapuagatia ai le Faaola ma le Aisea na Ia puapuagatia ai ma lisi mea e te maua i le Alema 7:7–16 (tagai foi Isaia 53:3–5). E mafai ona e mafaufau i ni taimi patino na Ia puapuagatia ai i nisi o nei mea? O nisi nei o faataitaiga mai tusitusiga paia: Mataio 4:1–13; 26:55–56; 27:39–44; Mareko 14:43–46; Luka 9:58. E mafai ona e faaopoopoa se mea i lau lisi mai nei fuaiupu?

O se tasi lea o mea e talitonu ai na puapuagatia le Faaola mo oe. Ae e faapefea e Ona puapuaga ona faia se eseesega i lou olaga i aso uma? O nisi nei o mau o loo faaalia ai le ala e mafai ai e Iesu Keriso ona fesoasoani pe “fesoasoani” ia te oe: Enosa 1:5–6; Mosaea 16:7–8; 21:15; 24:14–15; 3 Nifae 17:6–7; Eteru 12:27–29; Mataupu Faavae ma Feagaiga 121:7–10. O a ni mea na e aoaoina mai i nei fuaiupu? O a nisi o auala e afio mai ai o Ia e fesoasoani ia te oe? O le a se taimi na e mauaina ai Lana fesoasoani?

O se viiga e pei o le “Ua Naunau ia te Oe” po o le “Ua Ou Iloa Lo’u Faaola” (Viiga, nu. 57, 73) e mafai ona faalolotoina ai lou talisapaia o le fesoasoani a le Faaola. O a fasifuaitau i nei viiga e faaalia ai ou lagona ia te Ia?

Tagai foi Gospel Topics, “Atonement of Jesus Christ,” Potutusi o le Talalelei; “O Lona Alofa Tunoa” (faaputuga vitio), Potutusi o le Talalelei.

Molimau atu e uiga ia Iesu Keriso. Mafaufau i ni auala e mafai ona e faasoa atu ai lau molimau i le Faaola ma Lona paia, alofa tunoa, ma le alofa. E mafai ona e uunaia tagata o loo e aoaoina e molimau atu ia te Ia e ala i le faia o fesili e uunaia ai i latou e faasoa mai o latou lagona e uiga ia te Ia.

Mo nisi manatu, tagai i lomiga o lenei masina o mekasini o le Liahona ma le Mo le Malosi o le Autalavou .

Fautuaga mo le Aoaoina o Tamaiti

Alema 5:44–48

E mafai ona ou mauaina laʻu lava molimau e ala i le Agaga Paia.

• Ina ia fesoasoani i lau fanau e aoao e faaleleia a latou lava molimau, e mafai ona e faaali atu ia i latou le ata o loo i lalo ma fesili atu ia i latou pe faapefea ona tatou fesoasoani i manu vaefa pepe ia ola. Ona mafai lea ona e faamatala atu lenei mea i le tausia lelei o a tatou molimau. O le a le tausiga e manaomia e a tatou molimau? E faapefea ona tatou iloa o loo tuputupu ae?

  tamaiti e toalua ma ni manu vaefa pepe

  Pe a tatou taliaina le talalelei, e pei lava o le amataina o se olaga fou.

• Na faapefea ona maua e Alema lana molimau malosi ia Iesu Keriso? E mafai ona e faitauina faatasi ma lau fanau le Alema 5:44–46 e sue ai tali i lenei fesili. Atonu e mafai e lau fanau ona tusi i lalo se fuafuaga e fai ai se mea se tasi i lenei vaiaso e faamalosia ai a latou molimau.

Alema 7:10–13

Na tauave e le Faaola i Ona lava luga a’u agasala, tiga, ma puapuaga.

• E mafai faapefea ona e fesoasoani i lau fanau ia malamalama i le Alema 7:10–13 ina ia mafai ona latou iloa e popole Iesu Keriso ia i latou ma e mafai ona fesoasoani ia i latou? Atonu e mafai ona e fai atu ia i latou e faasoa mai se aafiaga ina ua latou mamaʻi pe tiga pe i ai se isi faafitauli na mafua ai ona latou faanoanoa. Na faapefea ona fesoasoani isi ia i latou ia maua se lagona lelei? Tuu atu lau molimau na puapuagatia foi le Faaola i na mea, ma talanoa e uiga i se taimi na Ia faamafanafanaina ai ma fesoasoani ia te oe.

• A o e faitauina ma lau fanau le Alema 7:11–13, vaavaai mo mea na puapuagatia ai Iesu Keriso mo i tatou. Valaaulia lau fanau e faaaoga upu ma fasifuaitau na latou maua e faauma ai le fuaiupu lenei: “Na puapuagatia Iesu ina ia mafai ona Ia fesoasoani mai ia te au.” E faapefea ona fesoasoani ia i tatou le iloa e malamalama Iesu i o tatou tauiviga? E faapefea ona tatou maua Lana fesoasoani? Faasoa atu lau molimau ia Iesu Keriso.

Alema 5:14; 7:19–20

O le mulimuli ia Iesu Keriso e faatumauina ai au i luga o le ala sa’o e toe foi atu ai i le Tama Faalelagi.

• Tuu atu i lau fanau e tilotilo i se faaata a o e faitauina le Alema 5:14 (tagai foi i le itulau o gaoioiga o lenei vaiaso). O le a le uiga o le i ai o foliga o le Faaola i o tatou mata?

• E mafai faapefea ona e faaaogaina le faamatalaga a Alema i le ala e toe foi atu ai i le Tama Faalelagi e fesoasoani ai i lau fanau ia iloa fai filifiliga lelei? E mafai ona e faitau atu le Alema 7:19–20 ia i latou ma tuu atu ia i latou e faatino le savavali i “ala piopio” ma le savavali i se ala sa’o. Fesoasoani ia i latou e mafaufau i filifiliga e fesoasoani ia i tatou e tumau ai i luga o le ala ma isi filifiliga e aveesea ai i tatou mai le ala. E mafai foi ona e tilotilo faatasi i ata o Iesu ma talanoa e uiga i mea sa Ia faia e faaali mai ai ia i tatou le ala e toe foi atu ai i le Tama Faalelagi. O se pese e pei o le “O Loo Ou Taumafai e Avea e Pei o Iesu” (Tusipese a Tamaiti, 40–41) e mafai ona maua ai ni nai manatu.

Mo nisi manatu, tagai i le lomiga o lenei masina o le mekasini o le Uo .

O Iesu o loo laei i se ofu talaloa mumu

O Lo Tatou Fautua, saunia e Jay Bryant Ward

itulau o gaoioiga: E mafai ona ou maua foliga o le Faaola i o’u mata