Iakopo ma Enosa, saunia e Scott Snow

15–21 Aperila: “Ua Galue Ai o Ia ia te Aʼu ia Ou Faia e Tusa ai ma Lona Finagalo”

Enosa–Upu a Mamona

E ui ina sa alu atu Enosa i le togavao e tuli manu e faamalie ai le fiaaai faaletino, ae sa iu ina nofo ai o ia iina i le ao atoa ma le po ona sa “matelaina [lona] agaga.” O lenei matelaina na taitai atu ai Enosa e “sii maualuga ae pea [lona] leo sa oo ina oo atu i le lagi.” Sa ia faamatalaina lenei aafiaga o se fagatuaga i luma o le Atua (tagai Enosa 1:2–4). Mai ia Enosa ua tatou aoao ai o le tatalo o se taumafaiga faamaoni e faalatalata atu i le Atua ma saili ia iloa Lona finagalo. A e tatalo ma lenei faanaunau, o le a sili atu ona e iloa, e pei ona sa iloa e Enosa, e faafofoga mai le Atua ia te oe, ma e manatu moni mai lava o Ia ia te oe, o e pele ia te oe, e oo lava i ou fili (tagai Enosa 1:4–17). A e iloa Lona finagalo, e sili atu ona mafai ona e faia Lona finagalo. E faapei o Mamona, atonu e te “le iloa mea uma; ae ua silafia e le Alii mea uma … ; o le mea lea, ua galue ai o ia ia te [oe] ia [e] faia e tusa ai ma lona finagalo” (Upu a Mamona 1:7).

Manatu mo le Aoaoina i le Aiga ma i le Lotu

Enosa 1:1–17

O le a faafofoga ma tali mai le Atua i a’u tatalo.

O ou aafiaga i le tatalo atonu e le maoae tele e pei o le tatalo a Enosa, ae e le faapea la e itiiti ai le aoga. O nisi nei o fesili e mafaufau i ai a o e suesueina le Enosa 1:1–17:

• O a upu o loo faamatala ai taumafaiga a Enosa a o ia tatalo?

• Na faapefea ona suia tatalo a Enosa mai fuaiupu 4 i le 11?

• O le a se mea e mafai ona ou aoaoina mai ia Enosa e mafai ona fesoasoani ia te au e faaleleia au tatalo?

Tagai foi “Enos Prays Mightily” (vitio), Gospel Library; “Le Itula o Talosaga,” Viiga, nu. 77.

Ua Tatalo Malosi Enosa | Enosa 1

Enosa 1 | Ua tatalo malosi Enosa i le Atua ma ua faamagaloina i ana agasala. Ua ia tatalo mo ona uso o Sa Nifae, faapea foi Sa Lamana. Mulmuli ane ua ia ole atu i le Alii ina ia faasaoina talafaamaumau o ona tagata.

O le faasoaina o fesili mo talanoaga. Afai o loo e aoaoina isi, mafaufau e tuu fesili e te manao e talanoaina i se nofoaga lauiloa ina ia mafai ai e tagata uma ona vaai i ai. E fesoasoani lea i tagata e mafaufau loloto ai i fesili ma tuuina atu ai nisi tali musuia.

Enosa 1:1–4

E mafai e le Alii ona fesoasoani ia te a’u e faatosina lo’u aiga mo le lelei.

Atonu o loo i ai se tasi i lou aiga e te moomoo maimau pe ana mafai ona e fesoasoani e sau ia Keriso, ae e te taumanatunatu pe o faia e au taumafaiga se eseesega. O le a se mea e mafai ona e aoao mai le Enosa 1:1–4 e uiga i le faatosinaga a Iakopo i lona atalii o Enosa? Mo se faataitaiga, o le a le uiga ia te oe o le fasifuaitau “o le faafailelega ma le apoapoaiga a le Alii”? E mafai faapefea ona e valaaulia Lana faatosinaga i totonu o lou aiga?

A o e mafaufau e uiga i lou lava aiga, mafaufau i fesili ma punaoa nei:

• E mafai faapefea ona e faatosinaina lou aiga i ni auala lelei? (tagai i le 1 Nifae 2:16–18; 3:15–21; 5:1–6; 7:20–21; Alema 36:17–20; “O Le Aiga: O Se Folafolaga i le Lalolagi”). O le a se mea e mafai ona e faia pe afai e foliga mai e le manao se tasi i lau fesoasoani pe agaleaga ia te oe?

• O a mataupu faavae e te maua i mau nei e mafai ona taiala ai au sootaga ma tagata o le aiga? Mataio 5:21–24, 38–44; 6:14; 7:1–5; 22:36–39; 3 Nifae 18:21; Moronae 7:33; Mataupu Faavae ma Feagaiga 18:10–13.

Sa faasoa mai e Elder Dieter F. Uchtdorf se fautuaga aoga mo aiga i le “I Le Viia o i Latou o E Laveai” (Ensign po o le Liahona, Me 2016, 77–80). O le a se mea ua musuia oe e lana savali e fai e faamalosia ai lou aiga? (tagai faapitoa lava i le vaega ua faaautuina “Laveaiina o o Tatou Aiga”).

Tagai foi Gospel Topics, “Family,” Gospel Library; “Home and Family—Through Small Things” (vitio), Gospel Library.

Aiga ma le Auaiga - E Ala i Mea Iti

O le luiina ai e lo latou epikopo, na iloa ai e ni talavou se toatolu le mea e manaomia ina ia faia ai o latou fale o se nofoaga paia.

Enosa 1:1–18

E mafai ona ou maua le faamagaloga a o ou faatinoina le faatuatua ia Keriso.

E i ai taimi atonu e te mafaufau ai pe ua faamagaloina au agasala, e tusa lava pe ua uma ona e salamo i na agasala. O a ni malamalamaaga ua e maua mai le aafiaga o Enosa i le Enosa 1:1–8? Na faapefea ona faaalia e Enosa lona faatuatua ia Iesu Keriso a o lei mauaina ma ina ua ia mauaina le faamagaloga?

Iaroma–Ominae

A o ou taumafai e tausi Ana poloaiga, o le a faamanuia au e le Atua.

O tusi a Iaroma ma Ominae o loo faamatala uma mai ai le sootaga i le va o le amiotonu ma le manuia. O le a se mea ua e aoaoina mai le Iaroma 1:7–12; Ominae 1:5–7, 12–18? E faapefea ona ese faauigaga faalelalolagi o le manuia mai le faauigaga a le Alii? O faapefea ona fesoasoani le Alii i Lona nuu ia manuia? (tagai Alema 37:13; 48:15–16).

Ominae 1:25–26

“O mai i le Atua, le Paia e Toatasi o Isaraelu.”

O le valaaulia “O Mai ia Keriso” e tele taimi e faaali mai ai i le Tusi a Mamona. O le mea moni, o se tasi o faamoemoega autu o le tusi o le tuuina atu lea o lenei valaaulia i tagata uma. A o e faitauina le Ominae 1:25–26, o a upu po o fasifuaitau e te maua e faamatala ai le ala e o mai ai ia Keriso? O le a se mea o le a e faia e sau atoatoa atili ai ia te Ia?

O Mamona o loo Tuufaatasia Papatusi, saunia e Jorge Cocco

Upu a Mamona 1:1–8

O le a galue le Atua e ala ia te au ao ou mulimuli i Lana taitaiga.

O se tasi o mafuaaga na musuia ai e le Alii ia Mamona e faaaofia ai papatusi laiti a Nifae i le Tusi a Mamona ona sa silafia e le Atua o itulau muamua e 116 na faaliliuina o le a leiloloa (tagai Mataupu Faavae ma Feagaiga 10; Au Paia, voluma 1, mataupu 5). Aisea e te faafetai ai sa mulimuli Mamona i faatonuga a le Alii e faaaofia ai nei tusitusiga (e aofia ai le 1 Nifae e oo i le Ominae)? O a mafuaaga na tuuina mai e Mamona mo le faaaofia ai? (tagai Upu a Mamona 1:3–7). O anafea na e vaaia ai o galue le Atua e ala atu ia te oe po o isi?

Mo nisi manatu, tagai i lomiga o lenei masina o mekasini o le Liahona ma le Mo le Malosi o le Autalavou .

Fautuaga mo le Aoaoina o Tamaiti

Enosa 1:1–5

E mafai ona ou talanoa atu i le Tama Faalelagi e ala i le tatalo.

• E mafai faapefea ona e fesoasoani i lau fanau ia anoa atili a latou tatalo? Mafaufau e faaali atu ia i latou se ata o Enosa o loo tatalo; tuu atu ia i latou e faamatala mai mea ua latou vaaia. Ona mafai lea ona moeiini o latou mata ma vaai faalemafaufau o loo latou talanoa faafesagaʻi ma le Tama Faalelagi. O le a se mea latou te fia talanoa ai? Mata o le a se mea e finagalo o Ia e ta’u atu ia i latou?

• A’o e faitauina leotele le Enosa 1:1–5, e mafai e tamaiti laiti ona faafoliga o i latou o Enosa i le faatinoina o le tulimanu, tootuli e tatalo, ma isi. E mafai e tamaiti matutua ona faalogo mo se upu po o se fasifuaitau o loo faamatalaina ai tatalo a Enosa. O le a se mea o aoao mai e nei upu e uiga i tatalo a Enosa? Faasoa atu se aafiaga ina ua “matelaina” lou agaga ma na e “tagi atu” i le Alii (Enosa 1:4).

I le avea ai ma fanau a le Atua, e mafai ona tatou tatalo i lo tatou Tama Faalelagi.

Enosa 1:2–16

E faafofoga ma tali mai le Tama Faalelagi i a’u tatalo.

• E mafai faapefea ona e fesoasoani i lau fanau ia malamalama o le a faafofoga ma tali mai le Tama Faalelagi ia latou tatalo? Mafaufau e valaaulia i latou e lisi nisi o mea e masani ona latou tatalo ai. Ona mafai lea ona e fesoasoani ia i latou e saili mea na tatalo ai Enosa i le Enosa 1:2, 9, 13–14, ma le 16 (tagai foi “Mataupu 11: Enosa,” Tala o le Tusi a Mamona, 30–31).

  O a taunuuga o tatalo a Enosa? (tagai fuaiupu 6, 9, 11).

  O le a se mea ua tatou aoao mai le aafiaga o Enosa e uiga i le auala e faaleleia ai a tatou tatalo?

• Usu faatasi se pese e faatatau i le tatalo, e pei o le “O le Tatalo A Le Tamaitiiti” (Tusipese a Tamaiti, 6–7). Atonu e mafai e lau fanau ona sii o latou lima i taimi uma latou te faalogo ai i le upu “tatalo” po o se isi upu o taʼu soo. Taʼu atu i lau fanau nisi o auala ua tali mai ai e le Tama Faalelagi au tatalo.

Upu a Mamona 1:3–8

E mafai ona ou faamanuiaina isi pe a ou faalogo i le Agaga Paia.

• Sa mulimuli Mamona i le taitaiga a le Agaga Paia e faaaofia ai papatusi laiti a Nifae i le Tusi a Mamona. O mea uma na tatou suesueina i le Tusi a Mamona i lenei tausaga ua mafai ona oo mai ia i tatou ona sa faia e Mamona le filifiliga e faalogo i le Agaga. E mafai faapefea ona e fesoasoani i lau fanau e aoao e faalogo i le Agaga? Valaaulia i latou e feauauai i le faitauina o fuaiupu mai le Upu a Mamona 1:3–8. E mafai ona outou talanoa e uiga i mea ua latou aoaoina mai fuaiupu taitasi. Ona mafai lea e lau fanau ona:

  • Faasoa atu mea na latou aoaoina mai tala i le Tusi a Mamona i lenei tausaga (o ata mai le Sau, Mulimuli Mai ia te A’u e mafai ona fesoasoani latou te manatua ai).

  • Usu faatasi se pese e uiga i le Agaga Paia, e pei o le “The Still Small Voice” (Children’s Songbook,, 106–7).

  • Talanoa e uiga i aafiaga na taialaina ai i latou e le Agaga e faia se mea na faamanuiaina ai se isi tagata.

Mo nisi manatu, tagai i le lomiga o lenei masina o le mekasini o le Uo .

Enosa o loo Tatalo, saunia e Robert T. Barrett