“ວັນທີ 15–21 ເດືອນເມສາ: ‘ພຣະອົງຈຶ່ງທຳງານໃນຂ້າພະເຈົ້າເພື່ອໃຫ້ເປັນໄປຕາມພຣະປະສົງຂອງພຣະອົງ.’ ເອໂນດ–ຄຳຂອງມໍມອນ,” ຈົ່ງຕາມເຮົາມາ—ສຳລັບບ້ານ ແລະ ໂບດ: ພຣະຄຳພີມໍມອນ 2024 (2024)

“ວັນທີ 15–21 ເດືອນເມສາ. ເອໂນດ–ຄຳຂອງມໍມອນ,” ຈົ່ງຕາມເຮົາມາ—ສຳລັບບ້ານ ແລະ ໂບດ: 2024 (2024)

Jacob and Enos [ຢາໂຄບ ແລະ ເອໂນດ], ໂດຍ ສະກາດ ສະໂນ

ວັນທີ 15–21 ເດືອນເມສາ: “ພຣະອົງຈຶ່ງທຳງານໃນຂ້າພະເຈົ້າເພື່ອໃຫ້ເປັນໄປຕາມພຣະປະສົງຂອງພຣະອົງ”

ເອໂນດ–ຄຳຂອງມໍມອນ

ເຖິງແມ່ນວ່າເອໂນດໄດ້ເຂົ້າໄປໃນປ່າເພື່ອລ່າສັດ ໃນການຕອບສະໜອງຄວາມຫິວໂຫຍທາງຮ່າງກາຍ, ແຕ່ເພິ່ນກັບຢູ່ໃນນັ້ນໝົດມື້ຈົນຄ່ຳ ຍ້ອນວ່າ “ຈິດວິນຍານຂອງເພິ່ນຫິວໂຫຍ.” ການຫິວໂຫຍນີ້ໄດ້ເຮັດໃຫ້ເອໂນດ “ເປັ່ງສຽງ [ຂອງເພິ່ນ] ຂຶ້ນເຖິງຟ້າສະຫວັນ.” ເພິ່ນໄດ້ບັນຍາຍປະສົບການນີ້ວ່າເປັນ “ການຕໍ່ສູ້” ຢູ່ຕໍ່ພຣະພັກຂອງພຣະເຈົ້າ (ເບິ່ງ ເອໂນດ 1:2–4; ເນັ້ນຄຳເນີ້ງ). ຈາກເອໂນດ ເຮົາຮຽນຮູ້ວ່າ ການອະທິຖານແມ່ນຄວາມພະຍາຍາມຢ່າງຈິງໃຈເພື່ອຈະໄດ້ຫຍັບເຂົ້າໃກ້ພຣະເຈົ້າ ແລະ ສະແຫວງຫາທີ່ຈະຮູ້ຈັກພຣະປະສົງຂອງພຣະອົງ. ເມື່ອທ່ານອະທິຖານດ້ວຍເຈດຕະນາ, ສ່ວນຫລາຍແລ້ວທ່ານຈະຄົ້ນພົບ, ດັ່ງທີ່ເອໂນດໄດ້ຄົ້ນພົບ, ວ່າພຣະເຈົ້າໄດ້ຍິນທ່ານ ແລະ ຫ່ວງໃຍທ່ານ, ຄົນທີ່ທ່ານຮັກ, ແລະ ແມ່ນແຕ່ສັດຕູຂອງທ່ານແທ້ໆ (ເບິ່ງ ເອໂນດ 1:4–17). ເມື່ອທ່ານຮູ້ຈັກພຣະປະສົງຂອງພຣະອົງ, ທ່ານຈະສາມາດເຮັດຕາມພຣະປະສົງຂອງພຣະອົງໄດ້ດີກວ່າເກົ່າ. ຄືກັນກັບມໍມອນ, ທ່ານອາດ “ບໍ່ຮູ້ຈັກໝົດທຸກເລື່ອງ; ແຕ່ວ່າພຣະຜູ້ເປັນເຈົ້າຮູ້ທຸກເລື່ອງ … ; ສະນັ້ນ, ພຣະອົງຈຶ່ງທຳງານໃນ [ທ່ານ] ເພື່ອໃຫ້ມັນເປັນໄປຕາມພຣະປະສົງຂອງພຣະອົງ” (ຄຳຂອງມໍມອນ 1:7).

ແນວຄິດສຳລັບການຮຽນຮູ້ຢູ່ທີ່ບ້ານ ແລະ ຢູ່ທີ່ໂບດ

ເອໂນດ 1:1–17

ພຣະເຈົ້າຈະປິ່ນປົວ ແລະ ຕອບຄຳອະທິຖານຂອງເຮົາ.

ປະສົບການຂອງທ່ານກັບການອະທິຖານອາດບໍ່ຕື່ນເຕັ້ນຫລາຍກວ່າຂອງເອໂນດ, ແຕ່ມັນບໍ່ຈຳເປັນຕ້ອງມີຄວາມໝາຍໜ້ອຍກວ່າ. ຕໍ່ໄປນີ້ແມ່ນຄຳຖາມບາງຂໍ້ ເພື່ອໃຫ້ຄິດເບິ່ງໃນ ຂະນະທີ່ທ່ານສຶກສາ ເອໂນດ 1:1–17:

ຄຳໃດທີ່ບັນຍາຍເຖິງຄວາມພະຍາຍາມຂອງເອໂນດ ຂະນະທີ່ເພິ່ນອະທິຖານ?
ການອະທິຖານຂອງເອໂນດປ່ຽນແປງຈາກ ຂໍ້ທີ 4 ເຖິງ 11 ແນວໃດ?
ເຮົາຮຽນຮູ້ຫຍັງແດ່ຈາກເອໂນດ ທີ່ສາມາດຊ່ວຍໃຫ້ເຮົາປັບປຸງການອະທິຖານຂອງເຮົາ?

ເບິ່ງ “Enos Prays Mightily” (ວິດີໂອ), ຫ້ອງສະໝຸດພຣະກິດຕິຄຸນ; “ອະທິຖານຄອບຄົວ,” Hymns, 73 ນຳອີກ.

ການແບ່ງປັນຄຳຖາມສົນທະນາ. ຖ້າຫາກທ່ານສິດສອນຄົນອື່ນ, ໃຫ້ຄິດທີ່ຈະວາງຄຳຖາມທີ່ທ່ານຕ້ອງການສົນທະນາ ໄວ້ບ່ອນທີ່ທຸກຄົນສາມາດຫລຽວເຫັນໄດ້ງ່າຍ. ສິ່ງນີ້ຊ່ວຍໃຫ້ຜູ້ຄົນໄຕ່ຕອງຄຳຖາມ ແລະ ໃຫ້ຄຳຕອບທີ່ດົນໃຈໄດ້.

ເອໂນດ 1:1–4

ພຣະຜູ້ເປັນເຈົ້າສາມາດຊ່ວຍເຮົາ ກ່ຽວກັບຄວາມສຳພັນໃນຄອບຄົວຂອງເຮົາ.

ບາງທີອາດມີບາງຄົນໃນຄອບຄົວຂອງທ່ານ ທີ່ທ່ານປາດຖະໜາໃຫ້ມາຫາພຣະຄຣິດ, ແຕ່ທ່ານສົງໄສວ່າ ຄວາມພະຍາຍາມຂອງທ່ານຈະສ້າງຄວາມແຕກຕ່າງຫລືບໍ່. ທ່ານສາມາດຮຽນຮູ້ຫຍັງແດ່ຈາກ ເອໂນດ 1:1–4 ກ່ຽວກັບອິດທິພົນຂອງຢາໂຄບຕໍ່ເອໂນດລູກຊາຍຂອງເພິ່ນ? ຍົກຕົວຢ່າງ, ວະລີທີ່ວ່າ “ການລ້ຽງດູ ແລະ ການຕັກເຕືອນຂອງພຣະຜູ້ເປັນເຈົ້າ” ໝາຍຄວາມວ່າແນວໃດຕໍ່ທ່ານ? ທ່ານຈະສາມາດເຊື້ອເຊີນອິດທິພົນຂອງພຣະອົງເຂົ້າມາໃນບ້ານຂອງທ່ານໄດ້ແນວໃດ?

ຂະນະທີ່ທ່ານຄິດກ່ຽວກັບຄອບຄົວຂອງທ່ານເອງ, ໃຫ້ພິຈາລະນາຄຳຖາມ ແລະ ແຫລ່ງຂໍ້ມູນດັ່ງຕໍ່ໄປນີ້:

ທ່ານຈະສາມາດມີອິດທິພົນຕໍ່ຄອບຄົວຂອງທ່ານໃນທາງບວກໄດ້ແນວໃດ? (ເບິ່ງ 1 ນີໄຟ 2:16–18; 3:15–21; 5:1–6; 7:20–21; ແອວມາ 36:17–20; “ຄອບຄົວ: ການປະກາດຕໍ່ໂລກ”). ທ່ານຈະສາມາດເຮັດຫຍັງແດ່ ຖ້າຫາກບາງຄົນເບິ່ງຄືວ່າບໍ່ຕ້ອງການຄວາມຊ່ວຍເຫລືອຈາກທ່ານ ຫລື ເຮັດບໍ່ດີກັບທ່ານ?
ຫລັກທຳຢ່າງໃດແດ່ທີ່ທ່ານພົບເຫັນຢູ່ໃນຂໍ້ພຣະຄຳພີເຫລົ່ານີ້ ທີ່ສາມາດນຳພາຄວາມສຳພັນຂອງທ່ານກັບສະມາຊິກໃນຄອບຄົວ? ມັດທາຍ 5:21–24, 38–44; 6:14; 7:1–5; 22:36–39; 3 ນີໄຟ 18:21; ໂມໂຣໄນ 7:33; ຄຳສອນ ແລະ ພັນທະສັນຍາ 18:10–13.

ແອວເດີ ດີເດີ ແອັຟ ອຸກດອບ ໄດ້ແບ່ງປັນຄຳແນະນຳທີ່ເປັນປະໂຫຍດສຳລັບຄອບຄົວ ຢູ່ໃນ “In Praise of Those Who Save” (Ensign ຫລື Liahona, May 2016, 77–80). ຂ່າວສານຂອງເພິ່ນດົນໃຈທ່ານໃຫ້ເຮັດສິ່ງໃດ ເພື່ອເພີ່ມຄວາມເຂັ້ມແຂງໃຫ້ແກ່ຄອບຄົວຂອງທ່ານ? (ເບິ່ງ ໂດຍສະເພາະພາກສ່ວນກ້ອງຫົວຂໍ້ “Saving Our Families”).

ເບິ່ງ Gospel Topics, “Family,” ຫ້ອງສະໝຸດພຣະກິດຕິຄຸນ; “Home and Family—Through Small Things” (ວິດີໂອ), ຫ້ອງສະໝຸດພຣະກິດຕິຄຸນ ນຳອີກ.

ເອໂນດ 1:1–18

ເຮົາສາມາດໄດ້ຮັບການໃຫ້ອະໄພເມື່ອເຮົາໃຊ້ສັດທາໃນພຣະຄຣິດ.

ບາງຄັ້ງທ່ານອາດສົງໄສວ່າ ບາບຂອງທ່ານໄດ້ຖືກອະໄພໃຫ້ແລ້ວຫລືບໍ່, ເຖິງແມ່ນຫລັງຈາກທ່ານໄດ້ກັບໃຈຈາກບາບເຫລົ່ານັ້ນແລ້ວ. ທ່ານໄດ້ຮັບຄວາມຮູ້ໃດແດ່ຈາກປະສົບການຂອງເອໂນດໃນ ເອໂນດ 1:1–8? ເອໂນດໄດ້ສະແດງສັດທາຂອງເພິ່ນໃນພຣະເຢຊູຄຣິດ ກ່ອນ ແລະ ຫລັງຈາກເພິ່ນໄດ້ຮັບການໃຫ້ອະໄພແນວໃດ?

ເຈຣອມ–ອອມໄນ

ຂະນະທີ່ເຮົາພະຍາຍາມຮັກສາພຣະບັນຍັດຂອງພຣະອົງ, ພຣະເຈົ້າຈະອວຍພອນເຮົາ.

ໜັງສືເຈຣອມ ແລະ ອອມໄນ ທັງສອງບັນຍາຍຄວາມສຳພັນລະຫວ່າງຄວາມຊອບທຳ ແລະ ຄວາມຈະເລີນຮຸ່ງເຮືອງ. ທ່ານຮຽນຮູ້ຫຍັງແດ່ຈາກ ເຈຣອມ 1:7–12; ອອມໄນ 1:5–7, 12–18? ຄຳນິຍາມຂອງໂລກກ່ຽວກັບຄວາມຈະເລີນຮຸ່ງເຮືອງແຕກຕ່າງຈາກຄຳນິຍາມຂອງພຣະຜູ້ເປັນເຈົ້າແນວໃດ? ພຣະຜູ້ເປັນເຈົ້າຊ່ວຍໃຫ້ຜູ້ຄົນຂອງພຣະອົງຈະເລີນຮຸ່ງເຮືອງແນວໃດ? (ເບິ່ງ ແອວມາ 37:13; 48:15–16).

ອອມໄນ 1:25–26

“ມາຫາພຣະຄຣິດ, ຜູ້ເປັນພຣະຜູ້ບໍລິສຸດຂອງອິດສະຣາເອນ.”

ຄຳເຊື້ອເຊີນໃຫ້ “ມາຫາພຣະຄຣິດ” ປະກົດເລື້ອຍໆໃນພຣະຄຳພີມໍມອນ. ຕາມຄວາມຈິງແລ້ວ, ຈຸດປະສົງຫລັກຢ່າງໜຶ່ງຂອງໜັງສືເຫລັ້ມນີ້ຄືເພື່ອເຊື້ອເຊີນທຸກຄົນ. ຂະນະທີ່ທ່ານອ່ານ ອອມໄນ 1:25–26, ຄຳໃດ ຫລື ວະລີໃດທີ່ທ່ານພົບເຫັນ ທີ່ບັນຍາຍວິທີທີ່ພາມາຫາພຣະຄຣິດ? ທ່ານຈະເຮັດສິ່ງໃດເພື່ອຈະໄດ້ມາຫາພຣະອົງຢ່າງສົມບູນຫລາຍຂຶ້ນ?

Mormon Compiling the Plates [ມໍມອນກຳລັງຮວບຮວມແຜ່ນຈາລຶກຄຳ], ໂດຍ ໂຮເຮ ໂກໂກ

ຄຳຂອງມໍມອນ 1:1–8

ພຣະເຈົ້າຈະທຳງານຜ່ານທາງເຮົາ ເມື່ອເຮົາເຮັດຕາມການນຳພາຂອງພຣະອົງ.

ເຫດຜົນຢ່າງໜຶ່ງທີ່ພຣະຜູ້ເປັນເຈົ້າໄດ້ດົນໃຈມໍມອນໃຫ້ລວມແຜ່ນຈາລຶກນ້ອຍຂອງນີໄຟໄວ້ໃນພຣະຄຳພີມໍມອນຄື ຍ້ອນພຣະເຈົ້າຮູ້ວ່າ ການແປ 116 ໜ້າຈະສູນຫາຍໄປ (ເບິ່ງ ຄຳສອນ ແລະ ພັນທະສັນຍາ 10; Saints, volume 1, chapter 5). ເປັນຫຍັງທ່ານຈຶ່ງກະຕັນຍູທີ່ມໍມອນໄດ້ເຮັດຕາມຄຳແນະນຳຂອງພຣະຜູ້ເປັນເຈົ້າ ເພື່ອໃຫ້ລວມການຂຽນເຫລົ່ານີ້ໃສ່ນຳ (ລວມດ້ວຍ 1 ນີໄຟ ເຖິງ ອອມໄນ)? ມໍມອນມີເຫດຜົນໃດແດ່ທີ່ໄດ້ລວມໜັງສືເຫລົ່ານີ້ໄວ້ນຳ? (ເບິ່ງ ຄຳຂອງມໍມອນ 1:3–7). ທ່ານໄດ້ເຫັນພຣະເຈົ້າກະທຳວຽກງານຜ່ານທາງຕົວທ່ານ ຫລື ຄົນອື່ນໆເມື່ອໃດ?

ສຳລັບແນວຄິດເພີ່ມເຕີມ, ໃຫ້ເບິ່ງວາລະສານ Liahona ແລະ For the Strength of Youth ສະບັບຂອງເດືອນນີ້.

ແນວຄິດສຳລັບການສິດສອນເດັກນ້ອຍ

ເອໂນດ 1:1–5

ເຮົາສາມາດເວົ້າລົມກັບພຣະບິດາເທິງສະຫວັນຜ່ານທາງການອະທິຖານ.

ທ່ານຈະສາມາດຊ່ວຍລູກໆຂອງທ່ານເຮັດໃຫ້ການອະທິຖານຂອງພວກເຂົາມີຄວາມໝາຍຫລາຍຂຶ້ນແນວໃດ? ໃຫ້ຄິດທີ່ຈະສະແດງຮູບທີ່ເອໂນດກຳລັງອະທິຖານໃຫ້ພວກເຂົາເບິ່ງ; ປ່ອຍໃຫ້ພວກເຂົາບັນຍາຍສິ່ງທີ່ພວກເຂົາເຫັນ. ແລ້ວພວກເຂົາສາມາດຫລັບຕາ ແລະ ຈິນຕະນາການວ່າພວກເຂົາກຳລັງເວົ້າລົມກັບພຣະບິດາເທິງສະຫວັນໜ້າຕໍ່ໜ້າ. ພວກເຂົາຢາກເວົ້າກ່ຽວກັບຫຍັງ? ພຣະອົງອາດຢາກກ່າວຫຍັງກັບພວກເຂົາ?
ຂະນະທີ່ທ່ານອ່ານ ເອໂນດ 1:1–5, ລູກຜູ້ນ້ອຍສາມາດທຳທ່າເປັນເອໂນດ ໂດຍສະແດງການອອກລ່າສັດ, ຄຸເຂົ່າອະທິຖານ, ແລະ ອື່ນໆ. ລູກຜູ້ໃຫຍ່ສາມາດຕັ້ງໃຈຟັງຂໍ້ຄວາມ ຫລື ວະລີທີ່ບັນຍາຍຄຳອະທິຖານຂອງເອໂນດ. ຂໍ້ຄວາມເຫລົ່ານີ້ບອກທ່ານຫຍັງແດ່ກ່ຽວກັບຄຳອະທິຖານຂອງເອໂນດ? ແບ່ງປັນປະສົບການຕອນທີ່ຈິດວິນຍານຂອງທ່ານ “ຫິວໂຫຍ” ແລະ ທ່ານ “ອ້ອນວອນຕໍ່” ພຣະຜູ້ເປັນເຈົ້າ (ເອໂນດ 1:4).

ຄອບຄົວກຳລັງອະທິຖານ — ໃນຖານະລູກຂອງພຣະເຈົ້າ, ເຮົາສາມາດອະທິຖານຫາພຣະບິດາເທິງສະຫວັນຂອງເຮົາ.

ເອໂນດ 1:2–16

ພຣະບິດາເທິງສະຫວັນໄດ້ຍິນ ແລະ ຕອບຄຳອະທິຖານຂອງເຮົາ.

ທ່ານຈະສາມາດຊ່ວຍໃຫ້ລູກໆຂອງທ່ານເຂົ້າໃຈວ່າ ພຣະບິດາເທິງສະຫວັນຈະໄດ້ຍິນ ແລະ ຕອບຄຳອະທິຖານຂອງພວກເຂົາແນວໃດ? ໃຫ້ຄິດທີ່ຈະເຊື້ອເຊີນໃຫ້ພວກເຂົາຂຽນບາງສິ່ງທີ່ພວກເຂົາມັກອະທິຖານກ່ຽວກັບ. ແລ້ວທ່ານສາມາດຊ່ວຍໃຫ້ພວກເຂົາເຫັນສິ່ງທີ່ເອໂນດອະທິຖານກ່ຽວກັບໃນ ເອໂນດ 1:2, 9, 13–14, ແລະ 16 (ເບິ່ງ “ບົດທີ 11: ເອໂນດ,” ເລື່ອງພຣະຄຳພີມໍມອນ, 30–31).

ແມ່ນຫຍັງຄືຜົນຮັບຂອງການອະທິຖານຂອງເອໂນດ? (ເບິ່ງ ຂໍ້ທີ 6, 9, 11).

ເຮົາຮຽນຮູ້ຫຍັງແດ່ຈາກປະສົບການຂອງເອໂນດກ່ຽວກັບວິທີປັບປຸງການອະທິຖານຂອງເຮົາ?
ຮ້ອງເພງກ່ຽວກັບການອະທິຖານນຳກັນ, ດັ່ງເຊັ່ນ “ອະທິຖານແລ້ວບໍ່” (ເພງສວດ ແລະ ເພງຂອງເດັກນ້ອຍ, 52). ບາງທີລູກໆຂອງທ່ານສາມາດຍົກມືຂຶ້ນທຸກເທື່ອທີ່ພວກເຂົາໄດ້ຍິນຄຳວ່າ “ອະທິຖານ” ຫລື “ການອະທິຖານ” ຫລື ຄຳອື່ນທີ່ກ່າວຊ້ຳໆ. ບອກລູກໆຂອງທ່ານກ່ຽວກັບບາງວິທີທີ່ພຣະບິດາເທິງສະຫວັນໄດ້ຕອບຄຳອະທິຖານຂອງທ່ານ.

ຄຳຂອງມໍມອນ 1:3–8

ເຮົາສາມາດເປັນພອນໃຫ້ແກ່ຄົນອື່ນເມື່ອເຮົາເຊື່ອຟັງພຣະວິນຍານບໍລິສຸດ.

ມໍມອນໄດ້ເຮັດຕາມການນຳພາຂອງພຣະວິນຍານບໍລິສຸດ ເພື່ອໃຫ້ລວມແຜ່ນຈາລຶກນ້ອຍຂອງນີໄຟໄວ້ໃນພຣະຄຳພີມໍມອນ. ທຸກສິ່ງທີ່ເຮົາໄດ້ສຶກສາຢູ່ໃນພຣະຄຳພີມໍມອນມາໃນປີນີ້ ໄດ້ມາສູ່ເຮົາຍ້ອນມໍມອນໄດ້ເລືອກເຊື່ອຟັງຕາມພຣະວິນຍານ. ທ່ານຈະສາມາດຊ່ວຍໃຫ້ລູກໆຂອງທ່ານຮຽນຮູ້ກ່ຽວກັບການເຊື່ອຟັງພຣະວິນຍານໄດ້ແນວໃດ? ເຊື້ອເຊີນພວກເຂົາໃຫ້ປ່ຽນຜຽນກັນອ່ານຂໍ້ຕ່າງໆຈາກ ຄຳຂອງມໍມອນ 1:3–8. ພວກທ່ານສາມາດເວົ້າລົມກ່ຽວກັບສິ່ງທີ່ພວກເຂົາຮຽນຮູ້ຈາກແຕ່ລະຂໍ້. ແລ້ວລູກໆຂອງທ່ານສາມາດ:
- ແບ່ງປັນສິ່ງທີ່ພວກເຂົາໄດ້ຮຽນຮູ້ຈາກເລື່ອງລາວໃນພຣະຄຳພີມໍມອນປີນີ້ (ຮູບພາບຈາກປຶ້ມ ຈົ່ງຕາມເຮົາມາ ສາມາດຊ່ວຍໃຫ້ພວກເຂົາຈື່ຈຳໄດ້).
- ຮ້ອງເພງກ່ຽວກັບພຣະວິນຍານບໍລິສຸດນຳກັນ, ດັ່ງເຊັ່ນ “ພຣະວິນຍານພຣະເຈົ້າ” (ເພງສວດ ແລະ ເພງຂອງເດັກນ້ອຍ, 30).
- ເວົ້າລົມກ່ຽວກັບປະຈັກພະຍານ ຊຶ່ງໃນນັ້ນພວກເຂົາຖືກນຳພາໂດຍພຣະວິນຍານເພື່ອເຮັດບາງສິ່ງທີ່ເປັນພອນໃຫ້ແກ່ຄົນອື່ນ.

ສຳລັບແນວຄິດເພີ່ມເຕີມ, ໃຫ້ເບິ່ງວາລະສານ Friend ສະບັບຂອງເດືອນນີ້.

Enos Praying [ເອໂນດກຳລັງອະທິຖານ], ໂດຍ ຣໍເບີດ ທີ ແບແຣັດ

ໜ້າກິດຈະກຳ: ເຮົາສາມາດເວົ້າລົມກັບພຣະບິດາເທິງສະຫວັນໄດ້ຜ່ານທາງການອະທິຖານ