“ວັນທີ 22–28 ເດືອນເມສາ: ‘ເຕັມໄປດ້ວຍຄວາມຮັກຕໍ່ພຣະເຈົ້າ ແລະ ມະນຸດທັງປວງ.’ ໂມໄຊຢາ 1–3,” ຈົ່ງຕາມເຮົາມາ—ສຳລັບບ້ານ ແລະ ໂບດ: ພຣະຄຳພີມໍມອນ 2024 (2024)

“ວັນທີ 22–28 ເດືອນເມສາ. ໂມໄຊຢາ 1–3,” ຈົ່ງຕາມເຮົາມາ—ສຳລັບບ້ານ ແລະ ໂບດ: 2024 (2024)

Receiving the Teachings of King Benjamin [ການຮັບເອົາຄຳສອນຂອງກະສັດເບັນຢາມິນ], ໂດຍ ມາເຣຍ ອາເລຮານດຣາ ຮຽວ

ວັນທີ 22–28 ເດືອນເມສາ: “ເຕັມໄປດ້ວຍຄວາມຮັກຕໍ່ພຣະເຈົ້າ ແລະ ມະນຸດທັງປວງ”

ໂມໄຊຢາ 1–3

ເມື່ອທ່ານໄດ້ຍິນຄຳວ່າ ກະສັດ, ທ່ານອາດຄິດກ່ຽວກັບມົງກຸດ, ຜູ້ຮັບໃຊ້, ແລະ ບັນລັງ. ໃນ ໂມໄຊຢາ 1–3, ທ່ານຈະອ່ານກ່ຽວກັບກະສັດທີ່ແຕກຕ່າງຈາກກະສັດອື່ນ. ແທນທີ່ຈະໃຊ້ຊີວິດຈາກແຮງງານຂອງຜູ້ຄົນຂອງເພິ່ນ, ກະສັດເບັນຢາມິນ “ໄດ້ເຮັດວຽກງານດ້ວຍມື [ຂອງເພິ່ນ] ເອງ” (ໂມໄຊຢາ 2:14). ແທນທີ່ຈະໃຫ້ຄົນອື່ນຮັບໃຊ້ເພິ່ນ, ເພິ່ນໄດ້ຮັບໃຊ້ຜູ້ຄົນຂອງເພິ່ນ “ດ້ວຍສຸດພະລັງ, ຄວາມນຶກຄິດ, ແລະ ກຳລັງ ຊຶ່ງພຣະຜູ້ເປັນເຈົ້າໄດ້ປະທານໃຫ້ [ເພິ່ນ]” (ໂມໄຊຢາ 2:11). ກະສັດອົງນີ້ບໍ່ຢາກໃຫ້ຜູ້ຄົນຂອງເພິ່ນນະມັດສະການເພິ່ນ; ແຕ່ເພິ່ນໄດ້ສິດສອນພວກເຂົາໃຫ້ນະມັດສະການກະສັດແຫ່ງສະຫວັນຂອງພວກເຂົາ, ພຣະເຢຊູຄຣິດ. ກະສັດເບັນຢາມິນເຂົ້າໃຈວ່າ ແມ່ນ “ພຣະຜູ້ເປັນເຈົ້າອົງຊົງລິດອຳນາດຍິ່ງໃຫຍ່ຜູ້ຄອບຄອງ” (ໂມໄຊຢາ 3:5), ຜູ້ໄດ້ສະເດັດ “ມາຈາກສະຫວັນ” ແລະ ໄດ້ສະເດັດ “ອອກໄປໃນບັນດາມະນຸດ, … ເພື່ອຄວາມລອດຈະໄດ້ມາເຖິງລູກຫລານມະນຸດ ເຖິງແມ່ນໂດຍທາງສັດທາໃນພຣະນາມຂອງພຣະອົງ” (ໂມໄຊຢາ 3:5, 9).

ແນວຄິດສຳລັບການຮຽນຮູ້ຢູ່ທີ່ບ້ານ ແລະ ຢູ່ທີ່ໂບດ

ໂມໄຊຢາ 1:1–7

“ຄົ້ນຄວ້າ [ພຣະຄຳພີ] ຢ່າງພາກພຽນ.”

ໃນຂໍ້ເຫລົ່ານີ້, ໃຫ້ສັງເກດເບິ່ງວິທີທີ່ບັນທຶກສັກສິດໄດ້ເປັນພອນໃຫ້ແກ່ຜູ້ຄົນຂອງກະສັດເບັນຢາມິນແນວໃດ. ຊີວິດຂອງທ່ານດີຂຶ້ນແນວໃດເພາະທ່ານມີພຣະຄຳພີ?

ໂມໄຊຢາ 2:10–26

ເມື່ອເຮົາຮັບໃຊ້ຄົນອື່ນ, ເຮົາກໍຮັບໃຊ້ພຣະເຈົ້ານັ້ນເອງ.

ທ່ານຄິດວ່າກະສັດເບັນຢາມິນຈະກ່າວແນວໃດ ຖ້າຫາກທ່ານຖາມເພິ່ນວ່າ ເປັນຫຍັງເພິ່ນຈຶ່ງຮັບໃຊ້ດ້ວຍສຸດ “ພະລັງ, ຄວາມນຶກຄິດ, ແລະ ກຳລັງຂອງເພິ່ນ”? (ໂມໄຊຢາ 2:11). ໃຫ້ໄຕ່ຕອງສິ່ງນີ້ຂະນະທີ່ທ່ານອ່ານ ໂມໄຊຢາ 2:10–26. ກະສັດເບັນຢາມິນໄດ້ສິດສອນຫຍັງແດ່ທີ່ດົນໃຈທ່ານໃຫ້ຮັບໃຊ້ຄົນອື່ນໃນວິທີທີ່ມີຄວາມໝາຍຫລາຍກວ່າເກົ່າ? ຍົກຕົວຢ່າງ, ຄຳວ່າ ເມື່ອທ່ານຮັບໃຊ້ຄົນອື່ນ, ທ່ານກໍຮັບໃຊ້ພຣະເຈົ້າຂອງທ່ານນັ້ນເອງ ໝາຍຄວາມວ່າແນວໃດຕໍ່ທ່ານ? (ເບິ່ງ ໂມໄຊຢາ 2:17). ໃຫ້ສະແຫວງຫາການດົນໃຈກ່ຽວກັບວິທີທີ່ທ່ານສາມາດຮັບໃຊ້ບາງຄົນໃນອາທິດນີ້.

ແມ່ນແຕ່ເມື່ອເຮົາຮູ້ວ່າເຮົາຄວນຮັບໃຊ້ຄົນອື່ນ, ບາງເທື່ອເຮົາກໍຍັງປະເຊີນກັບການທ້າທາຍຢູ່. ວິທີໜຶ່ງອີກໃນການສຶກສາ ໂມໄຊຢາ 2:10–26 ຄືການຂຽນຄວາມຈິງທີ່ກະສັດເບັນຢາມິນໄດ້ສິດສອນ ທີ່ສາມາດຊ່ວຍໃຫ້ທ່ານເອົາຊະນະການທ້າທາຍ ທີ່ອາດກີດກັນທ່ານຈາກການຮັບໃຊ້. ປະສົບການໃດແດ່ທີ່ສະແດງໃຫ້ທ່ານເຫັນວ່າສິ່ງທີ່ກະສັດເບັນຢາມິນໄດ້ສິດສອນເປັນຄວາມຈິງ?

ປະທານຈອຍ ດີ ໂຈນສ໌ ໄດ້ແບ່ງປັນປະສົບການທີ່ມີພະລັງ ທີ່ໄດ້ປ່ຽນແປງວິທີທີ່ເພິ່ນເບິ່ງການຮັບໃຊ້ຄົນອື່ນ. ອ່ານກ່ຽວກັບເລື່ອງນີ້ໃນ “For Him” (Ensign ຫລື Liahona, Nov. 2018, 50–52), ແລະ ຄິດກ່ຽວກັບໂອກາດທີ່ທ່ານມີເພື່ອຮັບໃຊ້ຄົນອື່ນ. ທ່ານກໍສາມາດຂຽນສອງສາມຢ່າງຕື່ມອີກ ແລະ ໄຕ່ຕອງວິທີທີ່ຂ່າວສານຂອງປະທານໂຈນສ໌, ພ້ອມທັງ ໂມໄຊຢາ 2:17, ອາດເປັນອິດທິພົນໃນວິທີທີ່ທ່ານເຂົ້າເຖິງໂອກາດເຫລົ່ານີ້ແນວໃດ. ເພງສວດດັ່ງເຊັ່ນ “ຂໍເພິ່ງພຣະທຸກຊົ່ວໂມງ” (ເພງສວດ ແລະ ເພງຂອງເດັກນ້ອຍ, 12) ຫລື ວິດີໂອດັ່ງເຊັ່ນ “The Old Shoemaker” (ຫ້ອງສະໝຸດພຣະກິດຕິຄຸນ) ອາດຊ່ວຍທ່ານຄິດຫາຄວາມຮູ້ເພີ່ມເຕີມໄດ້.

ເບິ່ງ ມັດທາຍ 25:40; “Faith Murray’s Story: Overcoming Adversity through Service,” “King Benjamin Teaches about Serving God” (ວິດີໂອ), ຫ້ອງສະໝຸດພຣະກິດຕິຄຸນ; JustServe.org; Gospel Topics, “Service,” ຫ້ອງສະໝຸດພຣະກິດຕິຄຸນ ນຳອີກ.

ຜູ້ຍິງສອງຄົນກຳລັງໂອບກອດກັນ — ເມື່ອເຮົາຮັບໃຊ້ຄົນອື່ນ, ເຮົາກໍຮັບໃຊ້ພຣະເຈົ້ານັ້ນເອງ.

ໂມໄຊຢາ 2:38–41

ຄວາມສຸກມາຈາກການຮັກສາພຣະບັນຍັດຂອງພຣະເຈົ້າ.

ທ່ານຈະບັນຍາຍຄວາມສຸກທີ່ມາຈາກການເຊື່ອຟັງພຣະເຈົ້າແນວໃດ? ມີວະລີໃດບໍໃນ ໂມໄຊຢາ 2:38–41 ທີ່ຈະຊ່ວຍທ່ານອະທິບາຍວ່າ ເປັນຫຍັງທ່ານຈຶ່ງຮັກສາພຣະບັນຍັດຂອງພຣະອົງ?

ໂມໄຊຢາ 3:1–20

ເຮົາສາມາດກາຍເປັນໄພ່ພົນຜ່ານທາງການຊົດໃຊ້ຂອງພຣະເຢຊູຄຣິດ.

ກະສັດເບັນຢາມິນ, ຄືກັນກັບສາດສະດາທຸກຄົນ, ໄດ້ເປັນພະຍານເຖິງພຣະເຢຊູຄຣິດ ເພື່ອວ່າຜູ້ຄົນຂອງເພິ່ນ “ຈະໄດ້ຮັບການປົດບາບຂອງພວກເຂົາ, ແລະ ປິຕິຍິນດີດ້ວຍຄວາມຊື່ນຊົມຢ່າງຍິ່ງ” (ໂມໄຊຢາ 3:13). ຕໍ່ໄປນີ້ແມ່ນຄຳຖາມຈຳນວນໜຶ່ງ ເພື່ອໃຫ້ໄຕ່ຕອງຂະນະທີ່ທ່ານອ່ານປະຈັກພະຍານຂອງກະສັດເບັນຢາມິນ ເຖິງພຣະຜູ້ຊ່ວຍໃຫ້ລອດ ຢູ່ໃນ ໂມໄຊຢາ 3:1–20:

ເຮົາຮຽນຮູ້ຫຍັງແດ່ຈາກຂໍ້ເຫລົ່ານີ້ ກ່ຽວກັບພຣະຜູ້ຊ່ວຍໃຫ້ລອດ ແລະ ພາລະກິດຂອງພຣະອົງ?
ເຮົາຮຽນຮູ້ຫຍັງແດ່ຈາກ ໂມໄຊຢາ 3:18–19 ກ່ຽວກັບຄວາມໝາຍຂອງການກາຍເປັນໄພ່ພົນ?
ພຣະເຢຊູຄຣິດໄດ້ຊ່ວຍໃຫ້ເຮົາເອົາຊະນະບາບ, ປ່ຽນແປງທຳມະຊາດຂອງເຮົາ, ແລະ ກາຍເປັນເໝືອນໄພ່ພົນຫລາຍຂຶ້ນໄດ້ແນວໃດ?

ໂມໄຊຢາ 3:5–21

“ພຣະຜູ້ເປັນເຈົ້າອົງຊົງລິດອຳນາດຍິ່ງໃຫຍ່ … ຈະສະເດັດຈາກສະຫວັນລົງມາ.”

ພະລັງງານໄຟຟ້າໃຫ້ຄວາມສາມາດແກ່ທ່ານເພື່ອເຮັດສິ່ງໃດແດ່? ຊີວິດຂອງທ່ານຈະແຕກຕ່າງແນວໃດຖ້າບໍ່ມີມັນ? ຄຳຖາມເຫລົ່ານີ້ສາມາດຊ່ວຍໃຫ້ທ່ານໄຕ່ຕອງແມ່ນແຕ່ກ່ຽວກັບພະລັງທີ່ຍິ່ງໃຫຍ່ກວ່າ ທີ່ພຣະຜູ້ຊ່ວຍໃຫ້ລອດສາມາດນຳເຂົ້າມາໃນຊີວິດຂອງທ່ານໄດ້.

ທູດສະຫວັນຜູ້ປະກົດຕົວຕໍ່ກະສັດເບັນຢາມິນໄດ້ອ້າງເຖິງພຣະເຢຊູຄຣິດວ່າເປັນ “ພຣະຜູ້ເປັນເຈົ້າອົງຊົງລິດອຳນາດຍິ່ງໃຫຍ່,” ຕຳແໜ່ງທີ່ໝາຍຄວາມວ່າພຣະອົງມີອຳນາດທັງໝົດ. ທ່ານຮຽນຮູ້ຫຍັງແດ່ຈາກ ໂມໄຊຢາ 3:5–21 ກ່ຽວກັບວິທີທີ່ພຣະຜູ້ຊ່ວຍໃຫ້ລອດໃຊ້ອຳນາດນັ້ນ? ທ່ານເຄີຍເຫັນອຳນາດຂອງພຣະຜູ້ຊ່ວຍໃຫ້ລອດໃນຊີວິດຂອງທ່ານ ແລະ ໃນຊີວິດຂອງຜູ້ຄົນທີ່ຢູ່ອ້ອມຂ້າງທ່ານບໍ? ອຳນາດຂອງພຣະອົງໃຫ້ຄວາມສາມາດແກ່ທ່ານເພື່ອເຮັດ ແລະ ກາຍເປັນສິ່ງໃດ? ຊີວິດຂອງທ່ານຈະແຕກຕ່າງແນວໃດຖ້າບໍ່ມີມັນ?

ສຳລັບແນວຄິດເພີ່ມເຕີມ, ໃຫ້ເບິ່ງວາລະສານ Liahona ແລະ For the Strength of Youth ສະບັບຂອງເດືອນນີ້.

ແນວຄິດສຳລັບການສິດສອນເດັກນ້ອຍ

ໂມໄຊຢາ 2:11–18

ເມື່ອເຮົາຮັບໃຊ້ຄົນອື່ນ, ເຮົາກໍຮັບໃຊ້ພຣະເຈົ້ານັ້ນເອງ.

ໜ້າກິດຈະກຳຂອງອາທິດນີ້ມີຮູບມົງກຸດງ່າຍໆທີ່ລູກຂອງທ່ານສາມາດເຮັດໄດ້. ບາງທີພວກເຂົາອາດຢາກປ່ຽນຜຽນກັນຢືນຂຶ້ນເທິງເກົ້າອີ້ ຫລື ຕັ່ງເກາະ ແລະ ທຳທ່າເປັນກະສັດເບັນຢາມິນ ຂະນະທີ່ທ່ານແບ່ງປັນບາງສິ່ງທີ່ກະສັດເບັນຢາມິນໄດ້ສິດສອນຜູ້ຄົນຂອງເພິ່ນ, ມີຢູ່ໃນ ໂມໄຊຢາ 2–3. ທ່ານກໍຍັງສາມາດແບ່ງປັນ “ບົດທີ 12: ກະສັດເບັນຢາມິນ” (ເລື່ອງພຣະຄຳພີມໍມອນ, 32–35) ກັບພວກເຂົານຳອີກ ເພື່ອໃຫ້ພວກເຂົາເຫັນພາບລວມຂອງຄຳສອນຂອງກະສັດເບັນຢາມິນ.
ໂມໄຊຢາ 2:17 ອາດເປັນຂໍ້ທີ່ດີສຳລັບລູກໆຂອງທ່ານທີ່ຈະຮຽນຮູ້. ທ່ານສາມາດຊ່ວຍໃຫ້ພວກເຂົາກ່າວລຶ້ມຄືນເທື່ອລະສອງສາມຄຳ. ຫລື ທ່ານສາມາດຂຽນຂໍ້ດັ່ງກ່າວ, ທີ່ມີສອງສາມຄຳຂາດຫາຍ, ແລະ ໃຫ້ລູກໆຂອງທ່ານຊອກຫາຄຳທີ່ຂາດຫາຍເຫລົ່ານັ້ນ. ແລ້ວທ່ານສາມາດເວົ້າລົມກັບລູກໆຂອງທ່ານກ່ຽວກັບວ່າ ເປັນຫຍັງພຣະເຈົ້າຈຶ່ງຕ້ອງການໃຫ້ເຮົາຮັບໃຊ້ກັນແລະກັນ.
ທ່ານສາມາດຊ່ວຍລູກໆຂອງທ່ານຄົ້ນຄວ້າ ໂມໄຊຢາ 2:11–18 ເພື່ອຊອກຫາສິ່ງທີ່ກະສັດເບັນຢາມິນໄດ້ເຮັດ ເພື່ອຮັບໃຊ້ຄົນອື່ນ. ແລ້ວລູກໆຂອງທ່ານສາມາດຂຽນບາງວິທີທີ່ພວກເຂົາສາມາດຮັບໃຊ້ສະມາຊິກໃນຄອບຄົວ ໃສ່ໃນເຈ້ຍນ້ອຍ. ເອົາເຈ້ຍເຫລົ່ານັ້ນໃສ່ໄວ້ໃນພາຊະນະ, ດັ່ງເຊັ່ນຖົງ ຫລື ຂວດ, ເພື່ອວ່າລູກໆຂອງທ່ານຈະສາມາດຈົກເອົາໃບໜຶ່ງທຸກມື້ ແລະ ເຮັດການຮັບໃຊ້ນັ້ນໃຫ້ກັບຄົນອື່ນ.

ເດັກນ້ອຍໄດ້ຜົນປະໂຫຍດຈາກການເຮັດຊ້ຳ. ຢ່າຢ້ານທີ່ຈະເຮັດກິດຈະກຳຊ້ຳຄືນຫລາຍເທື່ອ, ໂດຍສະເພາະກັບລູກຜູ້ນ້ອຍ. ການເຮັດຊ້ຳຄືນຈະຊ່ວຍໃຫ້ລູກໆຈື່ຈຳສິ່ງທີ່ພວກເຂົາຮຽນຮູ້.

ພວກເດັກນ້ອຍກຳລັງພັບຜ້າ — ກະສັດເບັນຢາມິນໄດ້ສິດສອນວ່າ ເຮົາສາມາດຮັບໃຊ້ພຣະເຈົ້າໂດຍການຮັບໃຊ້ຄົນອື່ນ.

ໂມໄຊຢາ 2:19–25

ພອນທັງໝົດຂອງເຮົາມາຈາກພຣະບິດາເທິງສະຫວັນ.

ການຮັບໃຊ້ຂອງກະສັດເບັນຢາມິນຕໍ່ຜູ້ຄົນຂອງເພິ່ນດົນໃຈໂດຍຄວາມກະຕັນຍູອັນເລິກເຊິ່ງຂອງເພິ່ນຕໍ່ພຣະເຈົ້າ. ທ່ານຈະດົນໃຈຄວາມຮູ້ສຶກທີ່ຄ້າຍຄືກັນນັ້ນໃນລູກໆຂອງທ່ານໄດ້ແນວໃດ? ພວກທ່ານສາມາດອ່ານ ໂມໄຊຢາ 2:21 ນຳກັນ ແລະ ເລີ່ມຂຽນພອນຕ່າງໆທີ່ພຣະບິດາເທິງສະຫວັນໄດ້ປະທານໃຫ້ແກ່ເຮົາ. ແລ້ວບາງທີທ່ານສາມາດຕື່ມພອນສອງສາມຢ່າງທີ່ລູກໆຂອງທ່ານຄິດອອກໃສ່ນຳ.
ຕໍ່ໄປນີ້ແມ່ນເກມທີ່ພວກທ່ານສາມາດຫລິ້ນ ເພື່ອຊ່ວຍໃຫ້ລູກໆຂອງທ່ານຮັບຮູ້ພອນຂອງພຣະບິດາເທິງສະຫວັນ. ລູກໆສາມາດສົ່ງຕໍ່ຮູບພຣະຜູ້ຊ່ວຍໃຫ້ລອດໃຫ້ກັນ ຂະນະທີ່ພວກເຂົາຮ້ອງເພງ ຫລື ຟັງເພງກ່ຽວກັບຄວາມກະຕັນຍູ (ເບິ່ງ “Gratitude” ໃນດັດຊະນີຂອງ Children’s Songbook). ຢຸດຮ້ອງເພງ ຫລື ຢຸດເພງເປັນບາງຄັ້ງ, ແລະ ເຊື້ອເຊີນຜູ້ທີ່ຈັບຮູບໃຫ້ເວົ້າກ່ຽວກັບພອນທີ່ເຂົາມີຄວາມກະຕັນຍູຕໍ່. ອີງຕາມ ໂມໄຊຢາ 2:22–24, ເຮົາຈະສະແດງໃຫ້ເຫັນວ່າເຮົາຂອບພຣະຄຸນສຳລັບພອນຂອງເຮົາແນວໃດ?

ໂມໄຊຢາ 3:5–10, 19

ພຣະເຢຊູຄຣິດຈະຊ່ວຍໃຫ້ເຮົາກາຍເປັນເໝືອນດັ່ງພຣະອົງຫລາຍຂຶ້ນ.

ທູດອົງໜຶ່ງໄດ້ບອກກະສັດເບັນຢາມິນເຖິງຄວາມຈິງທີ່ສຳຄັນກ່ຽວກັບຊີວິດ ແລະ ການປະຕິບັດສາດສະໜາກິດຂອງພຣະເຢຊູຄຣິດ. ບາງທີທ່ານ ແລະ ລູກໆຂອງທ່ານສາມາດຊອກຫາຮູບພາບບາງຢ່າງກ່ຽວກັບເຫດການທີ່ກ່າວເຖິງຢູ່ໃນ ໂມໄຊຢາ 3:5–10 (ເບິ່ງ, ຕົວຢ່າງເຊັ່ນ, ປຶ້ມຮູບພຣະກິດຕິຄຸນ, ເລກທີ 30, 41, 42, 57, 59). ຂະນະທີ່ທ່ານອ່ານ ໂມໄຊຢາ 3:5–10, ລູກໆຂອງທ່ານສາມາດຍົກມືຂຶ້ນ ເມື່ອພວກເຂົາໄດ້ຍິນບາງສິ່ງໃນຂໍ້ພຣະຄຳພີທີ່ປະກົດໃນຮູບພາບໃດໜຶ່ງ.
ລູກໆຂອງທ່ານເຄີຍຊ່ວຍເຮັດອາຫານຕາມຕຳລາບໍ? ບາງທີທ່ານສາມາດເວົ້າລົມກັນກ່ຽວກັບປະສົບການນັ້ນ ແລະ ໃຊ້ ໂມໄຊຢາ 3:19 ເພື່ອປະກອບເປັນ “ຕຳລາ” ສຳລັບວິທີທີ່ເຮົາຈະສາມາດກາຍເປັນເໝືອນດັ່ງພຣະເຢຊູຄຣິດ. ພຣະເຢຊູຊ່ວຍໃຫ້ເຮົາກາຍເປັນເໝືອນດັ່ງພຣະອົງແນວໃດ?

ສຳລັບແນວຄິດເພີ່ມເຕີມ, ໃຫ້ເບິ່ງວາລະສານ Friend ສະບັບຂອງເດືອນນີ້.

ກະສັດເບັນຢາມິນກຳລັງສັ່ງສອນຜູ້ຄົນຂອງເພິ່ນ — King Benjamin’s Address [ການປາໄສຂອງກະສັດເບັນຢາມິນ], ໂດຍ ແຈຣາມີ ວິນບອກ

ໜ້າກິດຈະກຳ: ເມື່ອເຮົາຮັບໃຊ້ຄົນອື່ນ, ເຮົາກໍຮັບໃຊ້ພຣະເຈົ້ານັ້ນເອງ