“ວັນທີ 1–7 ເດືອນເມສາ: ‘ຈົ່ງຄືນດີກັບພຣະເຈົ້າທາງການຊົດໃຊ້ຂອງພຣະຄຣິດ.’ ຢາໂຄບ 1–4,” ຈົ່ງຕາມເຮົາມາ—ສຳລັບບ້ານ ແລະ ໂບດ: ພຣະຄຳພີມໍມອນ 2024 (2024)
“ວັນທີ 1–7 ເດືອນເມສາ. ຢາໂຄບ 1–4,” ຈົ່ງຕາມເຮົາມາ—ສຳລັບບ້ານ ແລະ ໂບດ: 2024 (2024)
Forgiven [ຖືກໃຫ້ອະໄພ], ໂດຍ ກະເຣກ ເຄ ອໍເຊັນ. ຖືກໃຊ້ໂດຍໄດ້ຮັບອະນຸຍາດ. www.GregOlsen.com
ວັນທີ 1–7 ເດືອນເມສາ: ຈົ່ງຄືນດີກັບພຣະເຈົ້າທາງການຊົດໃຊ້ຂອງພຣະຄຣິດ
ຢາໂຄບ 1–4
ຊາວນີໄຟນັບຖືວ່າ ນີໄຟເປັນ “ຜູ້ປົກປັກຮັກສາທີ່ຍິ່ງໃຫຍ່” ຂອງພວກເຂົາ (ເບິ່ງ ຢາໂຄບ 1:10). ເພິ່ນຍັງປົກປ້ອງພວກເຂົາຈາກໄພອັນຕະລາຍທາງວິນຍານນຳອີກ, ເຕືອນພວກເຂົາຈາກບາບ ແລະ ຮຽກຮ້ອງພວກເຂົາໃຫ້ມາຫາພຣະຄຣິດ. ບັດນີ້ ວຽກງານນັ້ນໄດ້ຕົກຢູ່ທີ່ຢາໂຄບ, ຜູ້ທີ່ນີໄຟໄດ້ອຸທິດຖວາຍໃຫ້ເປັນປະໂລຫິດ ແລະ ເປັນຄູສອນ (ເບິ່ງ ຢາໂຄບ 1:18). ຢາໂຄບຮູ້ສຶກມີຄວາມຮັບຜິດຊອບທີ່ຈະຕ້ອງເຕືອນຜູ້ທີ່ “ເລີ່ມຕົ້ນອອກແຮງງານໃນບາບ” ຢ່າງກ້າຫານ ຂະນະທີ່ປອບໂຍນ “ຈິດວິນຍານທີ່ຖືກບາດເຈັບ” ຂອງຜູ້ທີ່ໄດ້ຮັບຄວາມເຈັບປວດຈາກບາບຂອງຄົນອື່ນ (ເບິ່ງ ຢາໂຄບ 2:5–9). ເພິ່ນເຮັດທັງສອງຢ່າງໄດ້ແນວໃດ? ເພິ່ນໄດ້ຊີ້ໃຫ້ພວກເຂົາໄປຫາພຣະເຢຊູຄຣິດ—ຍ້ອນວ່າທັງສອງກຸ່ມຕ້ອງການການປິ່ນປົວຈາກພຣະຜູ້ຊ່ວຍໃຫ້ລອດ (ເບິ່ງ ຢາໂຄບ 4). ເຊັ່ນດຽວກັບຂ່າວສານຂອງນີໄຟກ່ອນເພິ່ນ, ປະຈັກພະຍານຂອງຢາໂຄບເປັນການເອີ້ນໃຫ້ “ຄືນດີກັບ [ພຣະເຈົ້າ] ທາງການຊົດໃຊ້ຂອງພຣະຄຣິດ” (ຢາໂຄບ 4:11).
ແນວຄິດສຳລັບການຮຽນຮູ້ຢູ່ທີ່ບ້ານ ແລະ ຢູ່ທີ່ໂບດ
ເຮົາມີ “ວຽກງານຈາກພຣະຜູ້ເປັນເຈົ້າ.”
ສຳລັບຢາໂຄບແລ້ວ, ການສິດສອນພຣະຄຳຂອງພຣະເຈົ້າ ແມ່ນ “ວຽກງານຈາກພຣະຜູ້ເປັນເຈົ້າ,” ສະນັ້ນ ເພິ່ນຈຶ່ງໄດ້ທຳງານຢ່າງພາກພຽນ ເພື່ອ “ຂະຫຍາຍໜ້າທີ່ [ຂອງເພິ່ນ]” (ຢາໂຄບ 1:17, 19). ວະລີເຫລົ່ານີ້ທີ່ຢາໂຄບໄດ້ໃຊ້ ມີຄວາມໝາຍແນວໃດຕໍ່ທ່ານ? ໃຫ້ຄິດກ່ຽວກັບວ່າແວ່ນຂະຫຍາຍເຮັດຫຍັງໄດ້ແດ່. ສິ່ງນັ້ນເຮັດໃຫ້ທ່ານມີຄວາມຄິດແນວໃດ? ຂະນະທີ່ທ່ານໄຕ່ຕອງ ຢາໂຄບ 1:6–8, 15–19 ແລະ 2:1–11, ໃຫ້ຄິດກ່ຽວກັບວຽກງານທີ່ພຣະຜູ້ເປັນເຈົ້າອາດມີສຳລັບທ່ານ. ທ່ານຮູ້ສຶກໄດ້ຮັບການດົນໃຈໃຫ້ເຮັດສິ່ງໃດເພື່ອ “ຂະຫຍາຍ” ສິ່ງເຫລົ່ານັ້ນ?
ເບິ່ງ “Whom the Lord Calls, the Lord Qualifies,” ໃນ Teachings of Presidents of the Church: Thomas S. Monson (2022), 209–20; “Rise to Your Call” (ວິດີໂອ), ຫ້ອງສະໝຸດພຣະກິດຕິຄຸນ ນຳອີກ.
“ຢ່າໃຫ້ຄວາມທະນົງໃຈອັນນີ້ມາທຳລາຍຈິດວິນຍານຂອງພວກທ່ານເລີຍ!”
ຊາວນີໄຟໄດ້ມີບັນຫາເລື່ອງຄວາມທະນົງໃຈ ແລະ ສຸມໃຈໃສ່ກັບຄວາມຮັ່ງມີ (ເບິ່ງ ຢາໂຄບ 2:13), ແລະ ບັນຫານັ້ນບໍ່ໄດ້ເກີດຂຶ້ນສະເພາະພວກເຂົາ ຫລື ໃນວັນເວລາຂອງພວກເຂົາເທົ່ານັ້ນ. ຜູ້ປໍລະປັກສົ່ງເສີມການຮັກຄວາມຮັ່ງມີໃນທຸກວັນນີ້ແນວໃດ? ຫລັງຈາກການອ່ານ ຢາໂຄບ 2:12–21, ໃຫ້ບັນຍາຍໃນຖ້ອຍຄຳຂອງທ່ານເອງ ເຖິງວິທີທີ່ພຣະເຈົ້າຕ້ອງການໃຫ້ທ່ານເບິ່ງຄວາມຮັ່ງມີທາງວັດຖຸແນວໃດ. ເພງສວດ “ຂໍເພິ່ງພຣະທຸກຊົ່ວໂມງ” (ເພງສວດ ແລະ ເພງຂອງເດັກນ້ອຍ, 12) ສາມາດໃຫ້ຄວາມຮູ້ເພີ່ມເຕີມໄດ້. ທ່ານຮູ້ສຶກໄດ້ຮັບການດົນໃຈໃຫ້ເຮັດສິ່ງໃດກ່ຽວກັບສິ່ງທີ່ທ່ານກຳລັງຮຽນຮູ້?
“ພຣະເຈົ້າພໍພຣະໄທໃນພົມມະຈັນ.
ຂະນະທີ່ທ່ານອ່ານ ຢາໂຄບ 2:22–35; 3:10–12, ທ່ານພົບເຫັນຫຍັງແດ່ທີ່ຊ່ວຍໃຫ້ທ່ານເຂົ້າໃຈວ່າ ເປັນຫຍັງພົມມະຈັນຈຶ່ງສຳຄັນຫລາຍຕໍ່ພຣະເຈົ້າ? ມີຜົນສະທ້ອນໃນທາງລົບບາງຢ່າງໃດແດ່ຂອງການຜິດສິນທຳ—ໃນວັນເວລາຂອງຢາໂຄບ ແລະ ໃນວັນເວລາຂອງເຮົາ? ແມ່ນຫຍັງຄືພອນຂອງການດຳລົງຊີວິດທີ່ບໍລິສຸດ?
ແອວເດີ ເດວິດ ເອ ແບ໊ດນາ ໄດ້ສິດສອນວ່າ ເຮົາມີຊີວິດຢູ່ “ໃນໂລກນີ້ ທີ່ນັບມື້ນັບເຍາະເຍີ້ຍຄວາມສັກສິດຂອງການໃຫ້ກຳເນີດ” (“We Believe in Being Chaste,” Liahona, May 2013, 41–44). ທ່ານຈະຊ່ວຍໃຫ້ຄົນອື່ນເຂົ້າໃຈວ່າ ເປັນຫຍັງທ່ານຈຶ່ງເຊື່ອຟັງກົດພົມມະຈັນໄດ້ແນວໃດ? ຈຸດເລີ່ມຕົ້ນທີ່ດີຄືການອະທິບາຍມາດຕະຖານຂອງພຣະເຈົ້າເລື່ອງຄວາມຮູ້ສຶກ ແລະ ຄວາມສຳພັນທາງເພດ ໃນ “ຮ່າງກາຍຂອງເຈົ້າສັກສິດ” ໃນປຶ້ມ ສຳລັບຄວາມເຂັ້ມແຂງຂອງຊາວໜຸ່ມ: ຄູ່ມືສຳລັບການເລືອກ (ໜ້າທີ 22–29). ທ່ານພົບເຫັນຫຍັງອີກແດ່ໃນແຫລ່ງນັ້ນທີ່ຊ່ວຍໃຫ້ທ່ານອະທິບາຍວ່າ ເປັນຫຍັງທ່ານຈຶ່ງດຳລົງຊີວິດຕາມກົດພົມມະຈັນ?
ທ່ານສາມາດພົບເຫັນຄຳຕອບເພີ່ມເຕີມໃນຂ່າວສານຂອງແອວເດີ ແບ໊ດນາ ທີ່ອ້າງເຖິງຢູ່ຂ້າງເທິງ ຫລື ໃນວິດີໂອ “I Choose to Be Pure” (ຫ້ອງສະໝຸດພຣະກິດຕິຄຸນ).
ມາດຕະຖານຂອງພຣະເຈົ້າເລື່ອງຄວາມບໍລິສຸດທາງເພດແຕກຕ່າງຈາກຂ່າວສານອື່ນໆທີ່ທ່ານເຄີຍໄດ້ຍິນແນວໃດ? ແມ່ນຫຍັງຄືພອນຂອງການດຳລົງຊີວິດທີ່ບໍລິສຸດ?
ເບິ່ງ Gospel Topics, “Virtue,” ຫ້ອງສະໝຸດພຣະກິດຕິຄຸນ; “Same-Sex Attraction” ໃນບ່ອນເກັບກຳ “Life Help” ໃນຫ້ອງສະໝຸດພຣະກິດຕິຄຸນ ນຳອີກ.
ເຮົາສາມາດຄືນດີກັບພຣະເຈົ້າ ທາງການຊົດໃຊ້ຂອງພຣະເຢຊູຄຣິດ.
ຢາໂຄບໄດ້ອ້ອນວອນຜູ້ຄົນຂອງເພິ່ນໃຫ້ “ຄືນດີກັບ [ພຣະເຈົ້າ] ທາງການຊົດໃຊ້ຂອງພຣະຄຣິດ” (ຢາໂຄບ 4:11). ນິຍາມໜຶ່ງຂອງ ການຄືນດີ ຄືການຟື້ນຟູມິດຕະພາບ ຫລື ຄວາມປອງດອງ. ຂະນະທີ່ທ່ານໄຕ່ຕອງຊີວິດຂອງທ່ານເອງ, ໃຫ້ຄິດກ່ຽວກັບຕອນທີ່ທ່ານອາດຮູ້ສຶກຢູ່ຫ່າງໄກຈາກພຣະບິດາເທິງສະຫວັນ. ພຣະຜູ້ຊ່ວຍໃຫ້ລອດຊ່ວຍທ່ານຟື້ນຟູຄວາມສຳພັນນີ້ແນວໃດ? ຄຳແນະນຳໃດແດ່ທີ່ທ່ານສາມາດພົບເຫັນໃນບົດນີ້ ທີ່ຊ່ວຍໃຫ້ທ່ານຄືນດີກັບພຣະເຈົ້າ? (ເບິ່ງ ຂໍ້ທີ 4–14).
ຄວາມຮູ້ເພີ່ມເຕີມໃດແດ່ທີ່ທ່ານໄດ້ຮັບຈາກ ມັດທາຍ 5:23–24? ພຣະຜູ້ຊ່ວຍໃຫ້ລອດສາມາດຊ່ວຍໃຫ້ທ່ານຄືນດີກັບພຣະເຈົ້າ—ແລະ ຄົນອື່ນແນວໃດ?
ເບິ່ງ 2 ນີໄຟ 10:24 ນຳອີກ.
ເຮົາສາມາດຫລີກລ້ຽງຈາກຄວາມມືດບອດທາງວິນຍານໄດ້ ໂດຍການສຸມໃຈໃສ່ພຣະຜູ້ຊ່ວຍໃຫ້ລອດ.
ຂະນະທີ່ຢາໂຄບໄດ້ໃຊ້ຄວາມພະຍາຍາມເພື່ອຫັນຜູ້ຄົນຂອງເພິ່ນໄປຫາພຣະຜູ້ເປັນເຈົ້າຫລາຍຂຶ້ນ, ເພິ່ນໄດ້ເຕືອນພວກເຂົາວ່າ ບໍ່ໃຫ້ບອດທາງວິນຍານ ແລະ ບໍ່ໃຫ້ກຽດຊັງ “ຄຳເວົ້າອັນແຈ່ມແຈ້ງ” ຂອງພຣະກິດຕິຄຸນ (ເບິ່ງ ຢາໂຄບ 4:13–14). ອີງຕາມ ຢາໂຄບ 4:8–18, ເຮົາສາມາດເຮັດຫຍັງແດ່ ເພື່ອຫລີກລ້ຽງຈາກຄວາມມືດບອດທາງວິນຍານ?
ເບິ່ງ Quentin L. Cook, “Looking beyond the Mark,” Ensign, Mar. 2003, 40–44 ນຳອີກ.
ເມື່ອພຣະອົງສິດສອນ, ພຣະຜູ້ຊ່ວຍໃຫ້ລອດໄດ້ໃຊ້ການປຽບທຽບກັບຊີວິດປະຈຳວັນ. ຄຳອຸປະມາຂອງພຣະເຢຊູໄດ້ຊ່ວຍໃຫ້ຜູ້ຄົນພົບເຫັນຄວາມຈິງທາງວິນຍານ ໃນປະສົບການທົ່ວໄປຂອງພວກເຂົາ. ໃຫ້ພະຍາຍາມເຮັດຄືກັນເມື່ອທ່ານສິດສອນ. ຍົກຕົວຢ່າງ, ເມື່ອສິດສອນ ຢາໂຄບ 4:8–18, ທ່ານສາມາດຖາມຜູ້ຮຽນວ່າ ເຂົາເຈົ້າເຄີຍໄດ້ໄປກວດສາຍຕາບໍ່. ທ່ານໝໍໄດ້ກວດກາເບິ່ງສາຍຕາທາງຮ່າງກາຍຂອງເຂົາເຈົ້າແນວໃດ? ເຮົາຈະກວດກາເບິ່ງສາຍຕາທາງວິນຍານຂອງເຮົາແນວໃດ?
ສຳລັບແນວຄິດເພີ່ມເຕີມ, ໃຫ້ເບິ່ງວາລະສານ Liahona ແລະ For the Strength of Youth ສະບັບຂອງເດືອນນີ້.
ແນວຄິດສຳລັບການສິດສອນເດັກນ້ອຍ
ພຣະເຈົ້າປິ່ນປົວຈິດວິນຍານທີ່ຖືກບາດເຈັບ.
-
ເພື່ອຊ່ວຍໃຫ້ລູກໆຂອງທ່ານເຂົ້າໃຈເຖິງວິທີທີ່ “ຈິດວິນຍານທີ່ຖືກບາດເຈັບ” ສາມາດໄດ້ຮັບການປິ່ນປົວ, ພວກທ່ານສາມາດສົນທະນານຳກັນເຖິງວິທີທີ່ຮ່າງກາຍຂອງເຮົາໄດ້ຮັບບາດເຈັບ ແລະ ແມ່ນຫຍັງທີ່ຊ່ວຍມັນໃຫ້ຫາຍດີ. ບາງທີລູກໆຂອງທ່ານສາມາດເວົ້າລົມກ່ຽວກັບເວລາທີ່ພວກເຂົາໄດ້ຮັບບາດເຈັບ ແລະ ສິ່ງທີ່ຊ່ວຍພວກເຂົາໃຫ້ຫາຍດີ. ທ່ານກໍສາມາດສະແດງຜ້າຕິດບາດ ຫລື ຢາ ໃຫ້ພວກເຂົາເບິ່ງ ເປັນພາກສ່ວນໜຶ່ງຂອງການສົນທະນານີ້ນຳອີກ. ບາງທີທ່ານສາມາດແບ່ງປັນກັບພວກເຂົາກ່ຽວກັບວິທີທີ່ພຣະຜູ້ຊ່ວຍໃຫ້ລອດໄດ້ຊ່ວຍທ່ານ ເມື່ອວິນຍານຂອງທ່ານຕ້ອງການການປິ່ນປົວແນວໃດ.
ເຮົາສາມາດຊ່ວຍຄົນອື່ນທີ່ຂັດສົນເມື່ອເຮົາແບ່ງປັນໃຫ້ກັບເຂົາເຈົ້າ.
-
ບາງຄົນໃນວັນເວລາຂອງຢາໂຄບເປັນຄົນຮັ່ງມີຫລາຍ, ແຕ່ພວກເຂົາບໍ່ຢາກແບ່ງປັນສິ່ງທີ່ພວກເຂົາມີໃຫ້ກັບຄົນອື່ນ. ຂະນະທີ່ທ່ານອ່ານການສິດສອນຂອງຢາໂຄບຕໍ່ພວກເຂົາໃນ ຢາໂຄບ 2:17–19, ທ່ານສາມາດເອົາຮູບ ຫລື ສິ່ງຂອງໃຫ້ລູກໆຂອງທ່ານຈັບໄວ້ ອັນທີ່ກົງກັບຄຳ ຫລື ວະລີໃນຂໍ້ເຫລົ່ານີ້. ທ່ານອາດອະທິບາຍວ່າ ທ່ານໄດ້ແບ່ງປັນສິ່ງເຫລົ່ານີ້ໃຫ້ກັບພວກເຂົາ; ບາງທີທ່ານສາມາດເຊື້ອເຊີນພວກເຂົາໃຫ້ແບ່ງປັນສິ່ງຂອງໃຫ້ກັບທ່ານ ຫລື ໃຫ້ກັນແລະກັນ. ເວົ້າລົມກ່ຽວກັບວ່າທ່ານຮູ້ສຶກແນວໃດເມື່ອທ່ານແບ່ງປັນ. ມີຫຍັງອີກທີ່ທ່ານສາມາດແບ່ງປັນໃຫ້ກັບຄົນອື່ນ ເພື່ອຊ່ວຍໃຫ້ພວກເຂົາຮູ້ສຶກດີໃຈ?
-
ຫລັງຈາກການອ່ານ ຢາໂຄບ 2:17, ນຳກັນ, ບາງທີລູກໆຂອງທ່ານສາມາດບອກພອນບາງຢ່າງທີ່ພຣະບິດາເທິງສະຫວັນໄດ້ແບ່ງປັນໃຫ້ກັບພວກເຂົາ. ເປັນຫຍັງພຣະອົງຈຶ່ງຕ້ອງການໃຫ້ທ່ານແບ່ງປັນໃຫ້ກັນແລະກັນ?
ເຮົາສາມາດເພີ່ມຄວາມເຂັ້ມແຂງໃຫ້ແກ່ສັດທາຂອງເຮົາໃນພຣະເຢຊູຄຣິດ.
-
ສັດທາຂອງຢາໂຄບໃນພຣະຄຣິດເຂັ້ມແຂງທີ່ສຸດ ຈົນບໍ່ອາດສະທ້ານຫວັ່ນໄຫວ. ເພື່ອສິດສອນລູກໆຂອງທ່ານເຖິງວິທີເສີມສ້າງສັດທາເຊັ່ນນັ້ນ, ທ່ານສາມາດຖາມພວກເຂົາກ່ຽວກັບສິ່ງທີ່ເຮົາເຮັດ ເພື່ອໃຫ້ຮ່າງກາຍຂອງເຮົາເຂັ້ມແຂງ. ເຮົາສາມາດເຮັດສິ່ງໃດແດ່ເພື່ອເຮັດໃຫ້ສັດທາຂອງເຮົາໃນພຣະເຢຊູຄຣິດເຂັ້ມແຂງຫລາຍຂຶ້ນ? ອ່ານ ຢາໂຄບ 4:6 ນຳກັນ ເພື່ອຊ່ວຍລູກໆຄົ້ນຫາສິ່ງທີ່ຢາໂຄບ ແລະ ຜູ້ຄົນຂອງເພິ່ນໄດ້ເຮັດ ເພື່ອເຮັດໃຫ້ສັດທາຂອງພວກເຂົາ “ບໍ່ສະທ້ານຫວັ່ນໄຫວ.”
-
ວິທີໜຶ່ງອີກທີ່ຈະຊ່ວຍໃຫ້ລູກໆຂອງທ່ານເຂົ້າໃຈ ຄຳວ່າ “ບໍ່ສະທ້ານຫວັ່ນໄຫວ” ໃນສັດທາຂອງພວກເຂົາ ແມ່ນໃຫ້ຊອກຫາຕົ້ນໄມ້ໃຫຍ່ ແລະ ຂໍໃຫ້ພວກເຂົາຈັບສັ່ນເບິ່ງຫລາຍໆງ່າ. ແລ້ວໃຫ້ພວກເຂົາລອງສັ່ນລຳຕົ້ນຂອງມັນ. ເປັນຫຍັງຈຶ່ງຍາກທີ່ຈະສັ່ນລຳຕົ້ນ? ວະລີໃດແດ່ໃນ ຢາໂຄບ 4:6, 10–11 ທີ່ບັນຍາຍສິ່ງທີ່ເຮົາສາມາດເຮັດ ເພື່ອເຮັດໃຫ້ສັດທາຂອງເຮົາໃນພຣະເຢຊູຄຣິດ ບໍ່ສະທ້ານຫວັ່ນໄຫວ?
ຄືກັນກັບລຳຕົ້ນໄມ້, ສັດທາຂອງເຮົາໃນພຣະຄຣິດ ສາມາດ “ບໍ່ສະທ້ານຫວັ່ນໄຫວ.”
-
ສຳລັບການປຽບທຽບອື່ນເພື່ອສິດສອນລູກໆຂອງທ່ານກ່ຽວກັບສັດທາທີ່ບໍ່ສະທ້ານຫວັ່ນໄຫວໃນພຣະເຢຊູຄຣິດ, ໃຫ້ເບິ່ງ Neil L. Andersen, “Spiritual Whirlwinds” (Liahona, May 2014, 18–21; ແລະ ວິດີໂອ “Spiritual Whirlwinds“) ຫລື “ກ້າເຮັດສິ່ງຖືກ” (ເພງສວດ ແລະ ເພງຂອງເດັກນ້ອຍ, 70; ເບິ່ງ ມັດທາຍ 7:24–27 ນຳອີກ).
ສຳລັບແນວຄິດເພີ່ມເຕີມ, ໃຫ້ເບິ່ງວາລະສານ Friend ສະບັບຂອງເດືອນນີ້.
I Will Send Their Words Forth (Jacob the Teacher) [ເຮົາຈະສົ່ງຄຳເວົ້າຂອງພວກເຂົາໄປ (ຢາໂຄບຜູ້ເປັນຄູສອນ)], ໂດຍ ແອວສະແປ ເຄດລິນ ຢັງ