“ວັນທີ 25–31 ເດືອນມີນາ: ‘ພຣະອົງຈະລຸກຂຶ້ນ … ໂດຍອຳນາດແຫ່ງການປິ່ນປົວຂອງພຣະອົງ.’ ອີດສະເຕີ,” ຈົ່ງຕາມເຮົາມາ—ສຳລັບບ້ານ ແລະ ໂບດ: ພຣະຄຳພີມໍມອນ 2024 (2023)

“ວັນທີ 25–31 ເດືອນມີນາ. ອີດສະເຕີ,” ຈົ່ງຕາມເຮົາມາ—ສຳລັບບ້ານ ແລະ ໂບດ: 2024 (2023)

Christ and the Apostles [ພຣະຄຣິດກັບອັກຄະສາວົກ], ໂດຍ ແດວ ພາສັນ

ວັນທີ 25–31 ເດືອນມີນາ: “ພຣະອົງຈະລຸກຂຶ້ນ … ໂດຍອຳນາດແຫ່ງການປິ່ນປົວຂອງພຣະອົງ”

ອີດສະເຕີ

ອັກຄະສາວົກໃນສະໄໝບູຮານ ມີຄວາມກ້າຫານຫລາຍໃນປະຈັກພະຍານຂອງພວກເພິ່ນ ເຖິງພຣະເຢຊູຄຣິດ ແລະ ການຟື້ນຄືນພຣະຊົນຂອງພຣະອົງ (ເບິ່ງ ກິດຈະການ 4:33). ຫລາຍລ້ານຄົນເຊື່ອໃນພຣະເຢຊູຄຣິດ ແລະ ພະຍາຍາມຕິດຕາມພຣະອົງ ເພາະຖ້ອຍຄຳຂອງພວກເພິ່ນທີ່ມີຢູ່ໃນພຣະຄຣິສຕະທຳຄຳພີ. ແຕ່ບາງຄົນອາດສົງໄສ: ຖ້າຫາກວ່າພຣະເຢຊູຄຣິດຄື ພຣະຜູ້ຊ່ວຍໃຫ້ລອດຂອງໂລກທັງໂລກ, ແລ້ວເປັນຫຍັງພະຍານຂອງພຣະອົງຈຶ່ງມີໜ້ອຍຄົນ ທີ່ຢູ່ໃນພາກພື້ນນ້ອຍແຫ່ງໜຶ່ງເທົ່ານັ້ນ?

ພຣະຄຳພີມໍມອນເປັນພະຍານເພີ່ມເຕີມຢ່າງໜຶ່ງ ທີ່ໜ້າເຊື່ອວ່າ ພຣະເຢຊູຄຣິດເປັນພຣະຜູ້ຊ່ວຍໃຫ້ລອດຂອງໂລກ, ທີ່ “ສະແດງພຣະອົງເອງໃຫ້ປະຈັກແກ່ປະຊາຊາດທັງປວງ” (ໜ້າວິເຄາະສະບັບຂອງພຣະຄຳພີມໍມອນ) ແລະ ສະເໜີມອບຄວາມລອດໃຫ້ທຸກຄົນ ທີ່ມາຫາພຣະອົງ. ນອກເໜືອຈາກນັ້ນ, ພະຍານຢ່າງທີສອງນີ້ ກໍຍັງໃຫ້ຄວາມແຈ່ມແຈ້ງນຳອີກ ວ່າຄວາມລອດໝາຍຄວາມວ່າແນວໃດ. ດ້ວຍເຫດນີ້ ນີໄຟ, ຢາໂຄບ, ມໍມອນ, ແລະ ສາດສະດາຄົນອື່ນໆ ຈຶ່ງໄດ້ອອກແຮງງານ “ຢ່າງພາກພຽນທີ່ຈະຄວັດຂໍ້ຄວາມນີ້ໄວ້ໃນແຜ່ນຈາລຶກ”—ເພື່ອປະກາດຕໍ່ຄົນລຸ້ນຫລັງ ເພື່ອວ່າເຂົາເຈົ້າຈະ “ຮູ້ຈັກພຣະຄຣິດ, ແລະ … ມີຄວາມຫວັງໃນລັດສະໝີພາບຂອງພຣະອົງ” (ຢາໂຄບ 4:3–4). ໃນເທດສະການອີດສະເຕີນີ້, ໃຫ້ສະທ້ອນຄິດເຖິງປະຈັກພະຍານໃນພຣະຄຳພີມໍມອນ ທີ່ວ່າອຳນາດຂອງພຣະຄຣິດ ແມ່ນສຳລັບທົ່ວໄປ ແລະ ສ່ວນບຸກຄົນ—ໄຖ່ຖອນໂລກທັງໂລກ ແລະ ໄຖ່ຖອນທ່ານ.

ແນວຄິດສຳລັບການຮຽນຮູ້ຢູ່ທີ່ບ້ານ ແລະ ຢູ່ທີ່ໂບດ

ເພາະພຣະເຢຊູຄຣິດ, ເຮົາຈຶ່ງຈະໄດ້ຟື້ນຄືນຊີວິດ.

ມັນເປັນປະເພນີໃນວັນອີດສະເຕີ ທີ່ຈະໄຕ່ຕອງເຖິງການຟື້ນຄືນພຣະຊົນຂອງພຣະເຢຊູຄຣິດ, ແຕ່ຄຳວ່າ ການຟື້ນຄືນຊີວິດ ໝາຍຄວາມວ່າແນວໃດແທ້ໆ? ມີຄວາມຮູ້ຢ່າງໃດແດ່ທີ່ພຣະຄຳພີມໍມອນມີໃຫ້ ກ່ຽວກັບການຟື້ນຄືນຊີວິດ? ບາງທີເທດສະການວັນອີດສະເຕີນີ້ ທ່ານສາມາດຂຽນຄວາມຈິງກ່ຽວກັບການຟື້ນຄືນຊີວິດ ທີ່ທ່ານພົບເຫັນຢູ່ໃນ 2 ນີໄຟ 9:6–15, 22; ແອວມາ 11:41–45; 40:21–25; 3 ນີໄຟ 26:4–5.

ທ່ານກໍສາມາດບັນທຶກວ່າຄວາມຈິງເຫລົ່ານີ້ກ່ຽວກັບການຟື້ນຄືນຊີວິດເປັນອິດທິພົນໃຫ້ແກ່ການກະທຳຂອງທ່ານ ແລະ ວິທີທີ່ທ່ານດຳລົງຊີວິດແນວໃດ. ຍົກຕົວຢ່າງ, ໃຫ້ພິຈາລະນາວິທີທີ່ທ່ານຈະສຳເລັດປະໂຫຍກເຫລົ່ານີ້: ຖ້າຫາກເຮົາບໍ່ໄດ້ຮູ້ສິ່ງເຫລົ່ານີ້ … ແລະ ເພາະເຮົາຮູ້ສິ່ງເຫລົ່ານີ້ …

ເພງດັ່ງເຊັ່ນ “ພຣະຜູ້ໄຖ່ແຫ່ງອິດສະຣາເອນ” (ເພງສວດ ແລະ ເພງຂອງເດັກນ້ອຍ, 5) ສາມາດຊ່ວຍທ່ານໃຫ້ຄິດກ່ຽວກັບວ່າເປັນຫຍັງການຟື້ນຄືນພຣະຊົນຂອງພຣະຜູ້ຊ່ວຍໃຫ້ລອດຈຶ່ງສຳຄັນຕໍ່ທ່ານ. ຂະນະທີ່ທ່ານຮ້ອງ, ຟັງ, ຫລື ອ່ານເພງສວດ, ທ່ານອາດຖາມຕົວເອງວ່າ, “ຊີວິດຂອງເຮົາແຕກຕ່າງແນວໃດເພາະພຣະເຢຊູຄຣິດໄດ້ຟື້ນຄືນພຣະຊົນ?”

ຫ້ອງສະໝຸດພຣະກິດຕິຄຸນມີບ່ອນເກັບກຳ ວິດີໂອອີດສະເຕີ ທີ່ສາມາດເປັນພາກສ່ວນທີ່ມີຄວາມໝາຍຂອງການສຶກສາຂອງທ່ານໄດ້. ບາງທີທ່ານສາມາດເບິ່ງວິດີໂອເລື່ອງໜຶ່ງ ຫລື ຫລາຍກວ່ານັ້ນ ແລະ ໄຕ່ຕອງເຖິງສິ່ງທີ່ເພີ່ມຄວາມເຂົ້າໃຈ ແລະ ຄວາມຮູ້ບຸນຄຸນຂອງທ່ານເຖິງການຟື້ນຄືນພຣະຊົນຂອງພຣະຜູ້ຊ່ວຍໃຫ້ລອດ.

ເບິ່ງ ລູກາ 24: 36–43; ກິດຈະການ 24:15; 1 ໂກຣິນໂທ 15:12–23; Reyna I. Aburto, “The Grave Has No Victory,” Liahona, May 2021, 85–86; Gospel Topics, “Resurrection,” ຫ້ອງສະໝຸດພຣະກິດຕິຄຸນ; “Death, Grieving, and Loss” ຢູ່ໃນບ່ອນເກັບກຳ “Life Help” ໃນ ຫ້ອງສະໝຸດພຣະກິດຕິຄຸນ ນຳອີກ.

ພຣະເຢຊູຄຣິດໄດ້ຮັບເອົາບາບ, ຄວາມເຈັບປວດ, ແລະ ຄວາມອ່ອນແອຂອງເຮົາໄປ.

ພຣະຄຣິສຕະທຳຄຳພີສິດສອນຢ່າງແຈ່ມແຈ້ງວ່າ ພຣະເຢຊູຄຣິດໄດ້ຊົດໃຊ້ແທນບາບຂອງເຮົາ. ພຣະຄຳພີມໍມອນຂະຫຍາຍຄວາມເຂົ້າໃຈຂອງເຮົາ ເຖິງການເສຍສະລະ ແລະ ການຮັບທຸກທໍລະມານຂອງພຣະຄຣິດ ໃນທາງທີ່ສຳຄັນ. ທ່ານສາມາດພົບເຫັນຄຳສອນເຫລົ່ານີ້ ຢູ່ໃນ ໂມໄຊຢາ 3:7; 15:5–9; ແອວມາ 7:11–13. ຫລັງຈາກທ່ານໄດ້ອ່ານຂໍ້ພຣະຄຳພີເຫລົ່ານີ້ແລ້ວ, ໃຫ້ຄິດທີ່ຈະບັນທຶກສິ່ງທີ່ທ່ານຄົ້ນພົບໄວ້ຢູ່ໃນຕາຕະລາງ ທີ່ຄືກັນກັບອັນນີ້:

ພຣະຜູ້ຊ່ວຍໃຫ້ລອດໄດ້ຮັບທຸກທໍລະມານກັບສິ່ງໃດແດ່?	ເປັນຫຍັງພຣະອົງຈຶ່ງຮັບທຸກທໍລະມານ?	ສິ່ງນີ້ໝາຍຄວາມວ່າແນວໃດຕໍ່ເຮົາ?

ນີ້ຄືອີກວິທີໜຶ່ງທີ່ຈະສຶກສາຂໍ້ພຣະຄຳພີເຫລົ່ານີ້: ຊອກຫາເພງສວດທີ່ທ່ານຮູ້ສຶກວ່າເຂົ້າກັບຂ່າວສານທີ່ຂໍ້ເຫລົ່ານີ້ສິດສອນ. ດັດຊະນີ “Scriptures” ຢູ່ທາງຫລັງປຶ້ມເພງສວດສາມາດຊ່ວຍທ່ານໄດ້. ວະລີໃດແດ່ຈາກເພງສວດ ແລະ ຂໍ້ພຣະຄຳພີເຫລົ່ານີ້ຊ່ວຍທ່ານໃຫ້ຮູ້ສຶກບຸນຄຸນຂອງການເສຍສະລະຂອງພຣະຜູ້ຊ່ວຍໃຫ້ລອດເລິກເຊິ່ງຫລາຍຂຶ້ນ?

ເບິ່ງ ເອຊາຢາ 53; ເຮັບເຣີ 4:14–16; Gérald Caussé, “A Living Witness of the Living Christ,” Liahona, May 2020, 38–40 ນຳອີກ.

ພຣະເຢຊູຄຣິດສາມາດຊຳລະລ້າງເຮົາໃຫ້ສະອາດ ແລະ ຊ່ວຍເຮັດໃຫ້ເຮົາດີພ້ອມ.

ສາມາດເວົ້າໄດ້ວ່າ ພຣະຄຳພີມໍມອນແມ່ນເລື່ອງລາວຂອງຜູ້ຄົນທີ່ໄດ້ປ່ຽນແປງ ເພາະການຊົດໃຊ້ຂອງພຣະເຢຊູຄຣິດ. ທ່ານສາມາດອ່ານເຖິງປະສົບການເຫລົ່ານີ້ ຢູ່ໃນ ໂມໄຊຢາ 5:1–2; 27:8–28; ແອວມາ 15:3–12; 24:7–19. ທ່ານອາດຄິດເຖິງຕົວຢ່າງອື່ນໆອີກທີ່ຈະສຶກສານຳອີກ. ທ່ານສັງເກດເຫັນຫຍັງແດ່ ທີ່ປະສົບການເຫລົ່ານີ້ ມີບາງສິ່ງທີ່ຄ້າຍຄືກັນ? ທ່ານສັງເກດເຫັນຄວາມແຕກຕ່າງຢ່າງໃດແດ່? ປະສົບການເຫລົ່ານີ້ສິດສອນທ່ານຫຍັງແດ່ກ່ຽວກັບວິທີທີ່ພຣະຜູ້ຊ່ວຍໃຫ້ລອດສາມາດປ່ຽນແປງທ່ານ?

ເບິ່ງ ແອວມາ 5:6–14; 13:11–12; 19:1–16; 22:1–26; 36:16–21; ອີເທີ 12:27; ໂມໂຣໄນ 10:32–33ນຳອີກ.

ສຳລັບແນວຄິດເພີ່ມເຕີມ, ໃຫ້ເບິ່ງວາລະສານ Liahona ແລະ For the Strength of Youth ສະບັບຂອງເດືອນນີ້.

ແນວຄິດສຳລັບການສິດສອນເດັກນ້ອຍ

ເພາະວັນອາທິດນີ້ເປັນວັນອາທິດທີຫ້າຂອງເດືອນ, ຄູສອນປະຖົມໄວຖືກຊຸກຍູ້ໃຫ້ນຳໃຊ້ກິດຈະກຳການຮຽນຮູ້ທີ່ຢູ່ໃນ “ພາກຫ້ອຍທ້າຍ ຂ: ການກະກຽມເດັກນ້ອຍໃຫ້ຢູ່ໃນເສັ້ນທາງແຫ່ງພັນທະສັນຍາຂອງພຣະເຈົ້າໄປຕະຫລອດຊີວິດ.”

ເພາະພຣະເຢຊູຄຣິດໄດ້ຟື້ນຄືນພຣະຊົນ, ເຮົາກໍຈະໄດ້ຟື້ນຄືນຊີວິດຄືກັນ.

ທ່ານສາມາດໃຊ້ “ບົດທີ 53: ພຣະເຢຊູຖືກຄຶງ” ແລະ “ບົດທີ 54: ພຣະເຢຊູໄດ້ຟື້ນຄືນພຣະຊົນ” (ຢູ່ໃນ ເລື່ອງພຣະຄຳພີໃໝ່, 136–38, 139–44) ເພື່ອບອກເລົ່າໃຫ້ລູກໆຂອງທ່ານຟັງກ່ຽວກັບການຟື້ນຄືນພຣະຊົນຂອງພຣະເຢຊູຄຣິດ. ຫລື ໃຫ້ລູກໆຂອງທ່ານເລົ່າເລື່ອງນັ້ນໃຫ້ທ່ານຟັງ, ໂດຍການໃຊ້ຮູບພາບຈາກບົດເຫລົ່ານີ້.
ການຢ້ຽມຢາມຂອງພຣະຜູ້ຊ່ວຍໃຫ້ລອດທີ່ຟື້ນຄືນພຣະຊົນຕໍ່ຜູ້ຄົນຢູ່ອາເມຣິກາ ເປັນພະຍານທີ່ມີພະລັງເຖິງການຟື້ນຄືນພຣະຊົນຂອງພຣະອົງ. ໃຫ້ຄິດທີ່ຈະເລົ່າເລື່ອງນີ້ໃຫ້ລູກໆຂອງທ່ານຟັງ, ໂດຍການໃຊ້ 3 ນີໄຟ 11; 17; ເພງ “ພຣະຄຣິດເຈົ້າຄືນຊີບວັນນີ້”; ຫລືບາດສຸດທ້າຍຂອງ “ຈາລຶກທອງຄຳ” (ເພງສວດ ແລະ ເພງຂອງເດັກນ້ອຍ, 71). ຊຸກຍູ້ລູກໆຂອງທ່ານໃຫ້ວາດພາບເຫັນວ່າ ມັນຈະເປັນແບບໃດ ທີ່ໄດ້ສຳຜັດຮອຍແຜຂອງພຣະອົງ (ເບິ່ງ 3 ນີໄຟ 11:14–15) ຫລື ໄດ້ເປັນເດັກນ້ອຍຄົນໜຶ່ງ ທີ່ພຣະອົງໄດ້ອວຍພອນ (ເບິ່ງ 3 ນີໄຟ 17:21). ແບ່ງປັນຄວາມຮູ້ສຶກຂອງພວກທ່ານນຳກັນກ່ຽວກັບພຣະເຢຊູຄຣິດ ແລະ ການຟື້ນຄືນພຣະຊົນຂອງພຣະອົງ.
ເພື່ອຊ່ວຍລູກໆຂອງທ່ານໃຫ້ຄົ້ນພົບສິ່ງທີ່ພຣະຄຳພີມໍມອນສິດສອນກ່ຽວກັບການຟື້ນຄືນຊີວິດ, ທ່ານສາມາດເຊື້ອເຊີນໃຫ້ພວກເຂົາທຳທ່າວ່າທ່ານບໍ່ຮູ້ຫຍັງເລີຍກ່ຽວກັບເລື່ອງນີ້ ແລະ ຂໍໃຫ້ພວກເຂົາອະທິບາຍໃຫ້ທ່ານຟັງ. ຊ່ວຍໃຫ້ພວກເຂົາຊອກຫາຢູ່ໃນ 2 ນີໄຟ 9:10–15; ແອວມາ 11:41–45; ແລະ ແອວມາ 40:21–23 ສຳລັບຄຳຕອບຕໍ່ຄຳຖາມຄືດັ່ງຕໍ່ໄປນີ້: ການຟື້ນຄືນຊີວິດໝາຍຄວາມວ່າແນວໃດ? ໃຜຈະໄດ້ຟື້ນຄືນຊີວິດ? ພ້ອມນີ້ໃຫ້ເຊື້ອເຊີນພວກເຂົາໃຫ້ກ່າວປະຈັກພະຍານເຖິງການຟື້ນຄືນພຣະຊົນຂອງພຣະຜູ້ຊ່ວຍໃຫ້ລອດເພື່ອເປັນພາກສ່ວນຂອງຄຳຕອບຂອງພວກເຂົາ.

ພຣະເຢຊູຄຣິດຮູ້ວິທີທີ່ຈະປອບໂຍນເຮົາ.

ໂມໄຊຢາ 3:7 ແລະ ແອວມາ 7:11 ບັນຍາຍເຖິງສິ່ງທີ່ພຣະຜູ້ຊ່ວຍໃຫ້ລອດໄດ້ທົນຕໍ່ທີ່ເປັນພາກສ່ວນຂອງການຊົດໃຊ້ຂອງພຣະອົງ. ທ່ານອາດໄດ້ອ່ານຂໍ້ເຫລົ່ານີ້ໃຫ້ລູກໆຂອງທ່ານຟັງ ແລະ ຂໍໃຫ້ພວກເຂົາຟັງເພື່ອຫາຖ້ອຍຄຳທີ່ບອກພວກເຂົາເຖິງສິ່ງທີ່ພຣະເຢຊູໄດ້ທົນທຸກທໍລະມານແທນເຮົາ. ແລ້ວທ່ານກໍສາມາດອ່ານ ແອວມາ 7:12 ເພື່ອຊອກຫາວ່າເປັນຫຍັງພຣະອົງຈຶ່ງໄດ້ທົນທຸກທໍລະມານກັບມັນ. ໃຫ້ເປັນພະຍານວ່າ ພຣະເຢຊູຄຣິດໄດ້ຮູ້ສຶກເຖິງຄວາມເຈັບປວດ ແລະ ຄວາມເຈັບປ່ວຍຂອງເຮົາທັງໝົດ ເພື່ອວ່າພຣະອົງຈະສາມາດປອບໂຍນເຮົາແນວໃດ.
ລູກໆຂອງທ່ານມີເພງສວດ ຫລື ເພງທີ່ມັກຊອບທີ່ສຸດບໍກ່ຽວກັບພຣະເຢຊູຄຣິດ ແລະ ການຊົດໃຊ້ຂອງພຣະອົງ? ພວກທ່ານສາມາດຮ້ອງເພງນັ້ນນຳກັນ—ຫລື ຮຽນເພງໃໝ່. ເວົ້າລົມກ່ຽວກັບຖ້ອຍຄຳ ຫລື ວະລີຢູ່ໃນເນື້ອເພງ ທີ່ສິດສອນທ່ານກ່ຽວກັບຄວາມປອບໂຍນ ແລະ ສັນຕິສຸກທີ່ພຣະຜູ້ຊ່ວຍໃຫ້ລອດສະເໜີມອບໃຫ້ເຮົາ.

ພຣະຄຣິດກຳລັງອະທິຖານຢູ່ໃນສວນເຄັດເຊມາເນ — Gethsemane [ເຄັດເຊມາເນ], ໂດຍ ໄມໂກ ທີ ມອມ

ພຣະເຢຊູຄຣິດສາມາດຊຳລະລ້າງເຮົາໃຫ້ສະອາດ ແລະ ຊ່ວຍເຮົາໃຫ້ປ່ຽນແປງ.

ພຣະຄຳພີມໍມອນໃຫ້ຕົວຢ່າງຢ່າງຫລວງຫລາຍເຖິງຜູ້ຄົນທີ່ຖືກປ່ຽນແປງ ເພາະການຊົດໃຊ້ຂອງພຣະເຢຊູຄຣິດ. ບາງທີລູກໆຂອງທ່ານສາມາດເລືອກບຸກຄົນໃດໜຶ່ງເພື່ອຮຽນຮູ້ກ່ຽວກັບ, ດັ່ງເຊັ່ນ ເອໂນດ (ເບິ່ງ ເອໂນດ 1:2–8), ແອວມາຜູ້ລູກ (ເບິ່ງ ໂມໄຊຢາ 27:8–24), ຫລື ຊາວອານໄທ-ນີໄຟ-ລີໄຮ (ເບິ່ງ ແອວມາ 24:7–19). ບຸກຄົນ ຫລື ກຸ່ມນີ້ໄດ້ປ່ຽນແປງແນວໃດ ເພາະການຊົດໃຊ້ຂອງພຣະເຢຊູຄຣິດ? ເຮົາຈະເຮັດຕາມຕົວຢ່າງຂອງເຂົາເຈົ້າໄດ້ແນວໃດ?
ທ່ານ ແລະ ລູກໆຂອງທ່ານສາມາດປຽບທຽບບາງສິ່ງທີ່ສະອາດ ກັບບາງສິ່ງທີ່ເປື້ອນ ແລະ ເວົ້າລົມກັນກ່ຽວກັບວ່າ ສິ່ງທີ່ເປື້ອນຖືກເຮັດໃຫ້ສະອາດແນວໃດ. ອ່ານ ແອວມາ 13:11–13 ນຳກັນ. ພຣະເຢຊູໄດ້ກະທຳສິ່ງໃດເພື່ອວ່າເຮົາຈະສາມາດຖືກເຮັດໃຫ້ສະອາດໄດ້ຈາກບາບຂອງເຮົາ? ສິ່ງນີ້ເຮັດໃຫ້ເຮົາຮູ້ສຶກແນວໃດກ່ຽວກັບບາບ? ມັນເຮັດໃຫ້ເຮົາຮູ້ສຶກແນວໃດກ່ຽວກັບພຣະຜູ້ຊ່ວຍໃຫ້ລອດ?

ສຳລັບແນວຄິດເພີ່ມເຕີມ, ໃຫ້ເບິ່ງວາລະສານ Friend ສະບັບຂອງເດືອນນີ້.

ດຳລົງຊີວິດຢ່າງມີຄ່າຄວນສຳລັບການຊີ້ນຳຂອງພຣະວິນຍານ. ພຣະວິນຍານເປັນຄູສອນທີ່ແທ້ຈິງ. ຂະນະທີ່ທ່ານສະແຫວງຫາການນຳພາຂອງພຣະອົງ ແລະ ດຳລົງຊີວິດຢ່າງມີຄ່າຄວນ, ພຣະອົງຈະປະທານຄວາມຄິດ ແລະ ຄວາມປະທັບໃຈກ່ຽວກັບວິທີທີ່ຈະສະໜອງຄວາມຕ້ອງການຂອງຜູ້ຄົນທີ່ທ່ານສິດສອນໃຫ້ແກ່ທ່ານ.

ພຣະຄຣິດກຳລັງທັກທາຍຊາວນີໄຟ — ຮູບພາບພຣະຄຣິດກັບຊາວນີໄຟ, ໂດຍ ເບັນ ຊໍວອດ

ໜ້າກິດຈະກຳ: ສາດສະດາໃນພຣະຄຳພີມໍມອນໄດ້ຮູ້ວ່າພຣະເຢຊູຄຣິດຈະສະເດັດມາ