“ວັນທີ 11–17 ເດືອນມີນາ: ‘ງານແປກປະຫລາດ ແລະ ອັດສະຈັນ.’ 2 ນີໄຟ 26–30,” ຈົ່ງຕາມເຮົາມາ—ສຳລັບບ້ານ ແລະ ໂບດ: ພຣະຄຳພີມໍມອນ 2024 (2024)

“ວັນທີ 11–17 ເດືອນມີນາ. 2 ນີໄຟ 26–30,” ຈົ່ງຕາມເຮົາມາ—ສຳລັບບ້ານ ແລະ ໂບດ: 2024 (2024)

He Will Lead Thee by the Hand [ພຣະອົງຈະຈູງມືທ່ານໄປ], ໂດຍ ແຊນດຣາ ແຣສຕ໌

ວັນທີ 11–17 ເດືອນມີນາ: “ງານແປກປະຫລາດ ແລະ ອັດສະຈັນ”

2 ນີໄຟ 26–30

“ຂ້າພະເຈົ້າທຳນາຍຕໍ່ພວກທ່ານກ່ຽວກັບຍຸກສຸດທ້າຍ,” ນີໄຟໄດ້ຂຽນ (2 ນີໄຟ 26:14). ໃນອີກຄຳໜຶ່ງ, ເພິ່ນໄດ້ຂຽນກ່ຽວກັບວັນເວລາຂອງເຮົາ. ແລະ ມັນມີເຫດຜົນທີ່ຕ້ອງເປັນຫ່ວງກ່ຽວກັບສິ່ງທີ່ເພິ່ນໄດ້ເຫັນ: ຜູ້ຄົນປະຕິເສດອຳນາດ ແລະ ການມະຫັດສະຈັນຂອງພຣະເຈົ້າ; ການອິດສາບັງບຽດ ແລະ ການຜິດຖຽງກັນທີ່ແຜ່ຫລາຍ. ແຕ່ນອກເໜືອໄປຈາກ “ວຽກງານແຫ່ງຄວາມມືດ” ໃນຍຸກສຸດທ້າຍ (2 ນີໄຟ 26:10, 22) ທີ່ນຳພາໂດຍຜູ້ປໍລະປັກແລ້ວ, ນີໄຟຍັງໄດ້ກ່າວເຖິງ “ງານແປກປະຫລາດ ແລະ ອັດສະຈັນ” ທີ່ນຳພາໂດຍພຣະເຈົ້າເອງ (2 ນີໄຟ 27:26). ໃຈກາງຂອງວຽກງານນັ້ນ ຈະເປັນໜັງສືເຫລັ້ມໜຶ່ງ—ຄືໜັງສືທີ່ເປີດເຜີຍຄວາມຕົວະຂອງຊາຕານ ແລະ ເຕົ້າໂຮມຄົນຊອບທຳ. ໜັງສືເຫລັ້ມນັ້ນຄື ພຣະຄຳພີມໍມອນ, ງານອັດສະຈັນຄື ວຽກງານຂອງສາດສະໜາຈັກຂອງພຣະຜູ້ເປັນເຈົ້າ ໃນຍຸກສຸດທ້າຍ, ແລະ ງານແປກປະຫລາດຄື—ໃນສ່ວນທີ່ໜ້ອຍທີ່ສຸດ—ພຣະເຈົ້າເຊື້ອເຊີນເຮົາທຸກຄົນ, ເຖິງແມ່ນໃນຄວາມອ່ອນແອຂອງເຮົາ, ໃຫ້ເຂົ້າຮ່ວມໃນການເຕົ້າໂຮມ.

ແນວຄິດສຳລັບການຮຽນຮູ້ຢູ່ທີ່ບ້ານ ແລະ ຢູ່ທີ່ໂບດ

2 ນີໄຟ 26–27; 29–30

ພຣະເຈົ້າໄດ້ຕຽມພຣະຄຳພີມໍມອນໄວ້ສຳລັບວັນເວລາຂອງເຮົາ.

ໃນ 2 ນີໄຟ 26–27, ນີໄຟໄດ້ອ້າງເຖິງ ຄຳທຳນາຍກ່ອນໜ້ານີ້ຂອງເອຊາຢາ (ເບິ່ງ ເອຊາຢາ 29) ແລະ ປຽບທຽບມັນໃສ່ກັບຜູ້ຄົນຂອງເພິ່ນ ແລະ ບັນທຶກຂອງເຂົາເຈົ້າ—ພຣະຄຳພີມໍມອນ. ເພິ່ນຮູ້ຈັກໂດຍການເປີດເຜີຍ, ແມ່ນແຕ່ກ່ອນພຣະຄຳພີມໍມອນໄດ້ຖືກຂຽນຢ່າງຮຽບຮ້ອຍ, ວ່າມັນຈະ “ມີຄຸນຄ່າຢ່າງໃຫຍ່ຫລວງຕໍ່ລູກຫລານມະນຸດ” ໃນມື້ໜຶ່ງ (2 ນີໄຟ 28:2). ເປັນຫຍັງພຣະຄຳພີມໍມອນຈຶ່ງມີຄຸນຄ່າຢ່າງໃຫຍ່ຫລວງຕໍ່ທ່ານ? ໃຫ້ຄິດກ່ຽວກັບຄຳຖາມຂໍ້ນີ້ ຂະນະທີ່ທ່ານອ່ານ 2 ນີໄຟ 29–30. ມີ “ງານອັດສະຈັນ” ໃດແດ່ (2 ນີໄຟ 27:26) ທີ່ພຣະເຈົ້າກຳລັງສຳເລັດຢູ່ໃນໂລກ ແລະ ໃນຊີວິດຂອງທ່ານ ຜ່ານທາງພຣະຄຳພີມໍມອນ?

ເບິ່ງ ໂຈເຊັບ ສະມິດ—ປະຫວັດ 1:62–65 ນຳອີກ.

2 ນີໄຟ 26:23–33

ພຣະເຢຊູຄຣິດເຊື້ອເຊີນເຮົາແຕ່ລະຄົນໃຫ້ເຂົ້າມາຫາພຣະອົງ.

ມັນມີຄວາມຈິງທີ່ງົດງາມຫລາຍຢ່າງໃຫ້ພິຈາລະນາໃນ 2 ນີໄຟ 26:23–24. ຍົກຕົວຢ່າງ, ທ່ານສາມາດຄິດກ່ຽວກັບສິ່ງທີ່ພຣະເຢຊູຄຣິດໄດ້ກະທຳ “[ເພື່ອ] ຜົນປະໂຫຍດແກ່ໂລກ”—ແລະ ເພື່ອທ່ານ. ພຣະອົງ “ພາມະນຸດທັງປວງ”—ແລະ ທ່ານ—“ມາຫາພຣະອົງ” ແນວໃດ? ທ່ານຮູ້ສຶກໄດ້ຮັບການດົນໃຈໃຫ້ເຮັດສິ່ງໃດ ເພື່ອຕອບແທນການສະແດງຄວາມຮັກຂອງພຣະອົງ?

ໃຫ້ສືບຕໍ່ອ່ານ ແລະ ຊອກຫາຄວາມຈິງກ່ຽວກັບພຣະຜູ້ຊ່ວຍໃຫ້ລອດໃນ ຂໍ້ທີ 25–33. ສັງເກດເບິ່ງ ໂດຍສະເພາະແມ່ນ ຄຳເຊື້ອເຊີນຂອງພຣະອົງ. ທ່ານຈະສະຫລຸບຂ່າວສານຂອງພຣະເຢຊູຄຣິດຕໍ່ທ່ານໃນປະໂຫຍກດຽວແນວໃດ? ເພງສວດເຊັ່ນ “ເຮົາຮ້ອງສັນເສີນນາມເຢຊູເຈົ້າ” (ເພງສວດ ແລະ ເພງຂອງເດັກນ້ອຍ, 27) ສາມາດເປີດໃຈທ່ານໃຫ້ຮັບເອົາຄວາມປະທັບໃຈເພີ່ມເຕີມໄດ້.

ໃຫ້ພິຈາລະນາວ່າ ຂໍ້ເຫລົ່ານີ້ ອາດມີອິດທິພົນຕໍ່ວິທີທີ່ທ່ານປະຕິສຳພັນກັບຄົນອື່ນ ແລະ ເຊື້ອເຊີນພວກເຂົາໃຫ້ມາຫາພຣະຄຣິດແນວໃດ. ທ່ານອາດພົບແນວຄິດບາງຢ່າງໃນຂ່າວສານຂອງແອວເດີ ດີ ທອດ ຄຣິສໂຕເຟີສັນ “The Doctrine of Belonging” (Liahona, Nov. 2022, 53–56).

ເບິ່ງ 3 ນີໄຟ 18:30–32; Dallin H. Oaks, “What Has Our Savior Done for Us?,” Liahona, May 2021, 75–77; Gospel Topics, “Belonging in the Church of Jesus Christ,” ຫ້ອງສະໝຸດພຣະກິດຕິຄຸນ ນຳອີກ.

ຢ່າຢ້ານຄວາມງຽບ. ຄຳຖາມທີ່ດີໃຊ້ເວລາທີ່ຈະໄດ້ຄຳຕອບ. ມັນຮຽກຮ້ອງໃຫ້ມີການຄົ້ນຫາ, ການຄິດ, ແລະ ການດົນໃຈ. ເວລາທີ່ທ່ານໃຊ້ລໍຖ້າຄຳຕອບຕໍ່ຄຳຖາມໜຶ່ງ ສາມາດເປັນຊ່ວງເວລາອັນສັກສິດແຫ່ງການໄຕ່ຕອງໄດ້. ຈົ່ງຫລີກລ້ຽງຈາກການລໍ້ລວງໃນການເຮັດໃຫ້ເວລານີ້ສິ້ນສຸດລົງໄວເກີນໄປ ໂດຍການຍ້າຍໄປຫາສິ່ງອື່ນ.

2 ນີໄຟ 28

ຊາຕານສະແຫວງຫາທີ່ຈະຫລອກລວງ.

ຄວາມຕົວະ ແລະ ຍຸດທະວິທີຫລາຍຢ່າງຂອງຊາຕານ ໄດ້ຖືກເປີດເຜີຍ ຢູ່ໃນ 2 ນີໄຟ 28. ໃຫ້ຊອກຫາມັນໃນ ຂໍ້ທີ 6, 8, 21–23, 29. ເປັນຫຍັງທ່ານຈຶ່ງຕ້ອງຮູ້ຈັກກ່ຽວກັບຄວາມຕົວະຂອງຊາຕານ? ທ່ານຈະເຮັດສິ່ງໃດ ເມື່ອຜູ້ປໍລະປັກພະຍາຍາມຫລອກລວງທ່ານ?

ລາຍການທີ່ມີຂຽນໄວ້ຢູ່ຂ້າງລຸ່ມນີ້ ແມ່ນຂໍ້ພຣະຄຳພີບາງຂໍ້ທີ່ປະຕິເສດຄວາມຕົວະຂອງຊາຕານ. ລອງເບິ່ງວ່າ ທ່ານຈະສາມາດຈັບຄູ່ຄຳສອນແທ້ໃນຂໍ້ພຣະຄຳພີເຫລົ່ານີ້ກັບຄຳສອນປອມທີ່ນີໄຟໄດ້ເຕືອນພວກເຮົາໃນ 2 ນີໄຟ 28 ໄດ້ຫລືບໍ່:

2 ນີໄຟ 2:17: ມີມານ (2 ນີໄຟ 28:22: “ເຮົາບໍ່ແມ່ນມານ ເພາະວ່າບໍ່ມີມານເລີຍ”)
ໂມໂຣໄນ 7:35–37
ຄຳສອນ ແລະ ພັນທະສັນຍາ 1:31
ຄຳສອນ ແລະ ພັນທະສັນຍາ 68:31; 82:14
ຫລັກແຫ່ງຄວາມເຊື່ອ 1:9

ເບິ່ງ Gary E. Stevenson, “Deceive Me Not,” Liahona, Nov. 2019, 93–96 ນຳອີກ.

2 ນີໄຟ 28:27–31; 29

ພຣະເຈົ້າສືບຕໍ່ປະທານການເປີດເຜີຍໃຫ້ ເພື່ອນຳພາລູກໆຂອງພຣະອົງ.

ໃນຖານະໄພ່ພົນຍຸກສຸດທ້າຍ, ເຮົາໄດ້ຮັບພອນຢ່າງອຸດົມສົມບູນກັບພຣະຄຳຂອງພຣະເຈົ້າ. ແລະ, ດັ່ງທີ່ນີໄຟໄດ້ເຕືອນ, ເຮົາຈະຕ້ອງບໍ່ຮູ້ສຶກຈັກເທື່ອວ່າ “ເຮົາມີພໍແລ້ວ!” ຂະນະທີ່ທ່ານອ່ານຄຳເຕືອນໃນ 2 ນີໄຟ 28:27–31 ແລະ 2 ນີໄຟ 29, ໃຫ້ຄິດກ່ຽວກັບຄຳຖາມ ດັ່ງຕໍ່ໄປນີ້:

ພຣະເຈົ້າປະສົງໃຫ້ເຮົາຮູ້ສຶກຕໍ່ ແລະ ຕອບຮັບພຣະຄຳຂອງພຣະອົງແນວໃດ?
ເປັນຫຍັງບາງເທື່ອຜູ້ຄົນ “ໃຈຮ້າຍ” ກ່ຽວກັບການໄດ້ຮັບຄວາມຈິງຈາກພຣະເຈົ້າ ຫລາຍກວ່າເກົ່າ? (2 ນີໄຟ 28:28). ເຮົາເຄີຍຮູ້ສຶກແບບນີ້ບໍ? ຖ້າເຄີຍ, ເຮົາຈະສາມາດປ່ຽນແປງໄດ້ແນວໃດ?
ການຮັບເອົາພຣະຄຳຂອງພຣະເຈົ້າ ໝາຍຄວາມວ່າແນວໃດ? ເຮົາຈະສາມາດສະແດງໃຫ້ພຣະອົງເຫັນວ່າ ເຮົາຢາກຮັບເອົາພຣະຄຳຂອງພຣະອົງຕື່ມອີກແນວໃດ?

ສຳລັບແນວຄິດເພີ່ມເຕີມ, ໃຫ້ເບິ່ງວາລະສານ Liahona ແລະ For the Strength of Youth ສະບັບຂອງເດືອນນີ້.

ແນວຄິດສຳລັບການສິດສອນເດັກນ້ອຍ

2 ນີໄຟ 26:23–28, 33

ພຣະເຢຊູຄຣິດຢາກໃຫ້ທຸກຄົນເຂົ້າມາຫາພຣະອົງ.

ເພື່ອສິດສອນລູກໆຂອງທ່ານກ່ຽວກັບຄຳເຊື້ອເຊີນຂອງພຣະຜູ້ຊ່ວຍໃຫ້ລອດໃນຂໍ້ເຫລົ່ານີ້, ທ່ານອາດເວົ້າລົມກັບພວກເຂົາກ່ຽວກັບຊ່ວງເວລາທີ່ພວກເຂົາໄດ້ເຊື້ອເຊີນຜູ້ຄົນໃຫ້ມາຮ່ວມງານພິເສດ, ເຊັ່ນ ງານກິນລ້ຽງວັນເກີດ. ແລ້ວພວກທ່ານສາມາດອ່ານ 2 ນີໄຟ 26:23–28 ນຳກັນ ແລະ ຊອກຫາສິ່ງທີ່ພຣະເຢຊູກຳລັງເຊື້ອເຊີນໃຫ້ເຮົາເຮັດ. ລູກໆຂອງທ່ານອາດຢາກເຮັດບັດເຊີນໃຫ້ໃຜບາງຄົນເຂົ້າມາຫາພຣະເຢຊູຄຣິດ. ຊຸກຍູ້ໃຫ້ພວກເຂົາໃຊ້ວະລີຈາກຂໍ້ເຫລົ່ານີ້ໃນຄຳເຊີນຂອງພວກເຂົາ.
ຮູບແຕ້ມຢູ່ທ້າຍໂຄງຮ່າງນີ້ ສະແດງໃຫ້ເຫັນເຖິງຜູ້ຄົນຈາກຫລາກຫລາຍພູມຖານ. ບາງເທື່ອລູກໆຂອງທ່ານສາມາດເບິ່ງຮູບນີ້ ຂະນະທີ່ທ່ານອ່ານ 2 ນີໄຟ 26:33. ທ່ານສາມາດລຶ້ມຄືນວະລີທີ່ວ່າ “ພຣະເຢຊູຈະເຊື້ອເຊີນເຂົາທັງໝົດໃຫ້ເຂົ້າມາຫາພຣະອົງ” ຂະນະທີ່ລູກໆຂອງທ່ານຊີ້ໃສ່ແຕ່ລະຄົນຢູ່ໃນຮູບ—ແລ້ວກໍຊີ້ໃສ່ຕົວເຂົາເອງ. ເຮົາຈະເຂົ້າມາຫາພຣະເຢຊູໄດ້ແນວໃດ?
ເພງກ່ຽວກັບການຮັກທຸກຄົນ, ເຊັ່ນ “ປັນຍາ ແລະ ຄວາມຮັກຍິ່ງໃຫຍ່” (ເພງສວດ ແລະ ເພງຂອງເດັກນ້ອຍ, 20), ອາດສາມາດຊ່ວຍທ່ານສິດສອນຂ່າວສານຂອງ 2 ນີໄຟ 26:33 ໄດ້.

2 ນີໄຟ 28:2; 29:7–11; 30:3–6

ພຣະຄຳພີມໍມອນແມ່ນພອນຢ່າງໜຶ່ງ.

ເພື່ອຊ່ວຍໃຫ້ລູກໆຂອງທ່ານຮູ້ສຶກວ່າ ພຣະຄຳພີມໍມອນແມ່ນ “ມີຄຸນຄ່າຢ່າງໃຫຍ່ຫລວງ” (2 ນີໄຟ 28:2), ທ່ານສາມາດຫໍ່ພຣະຄຳພີມໍມອນຫົວໜຶ່ງໃຫ້ເປັນຄືກັນກັບຂອງຂວັນ ແລະ ໃຫ້ພວກເຂົາເດົາເບິ່ງວ່າແມ່ນຫຍັງຢູ່ທາງໃນ. ພວກເຂົາສາມາດຊອກຫາຮ່ອງຮອຍໄດ້ໃນ 2 ນີໄຟ 30:2–6. ບອກລູກໆຂອງທ່ານວ່າ ເປັນຫຍັງພຣະຄຳພີມໍມອນຈຶ່ງມີຄຸນຄ່າຢ່າງໃຫຍ່ຫລວງຕໍ່ທ່ານ, ແລະ ໃຫ້ພວກເຂົາແບ່ງປັນຄວາມຮູ້ສຶກຂອງພວກເຂົາເຊັ່ນກັນ.
ໃຫ້ຄິດທີ່ຈະຂໍໃຫ້ລູກໆຂອງທ່ານຈິນຕະນາການເບິ່ງວ່າມີໝູ່ຄົນໜຶ່ງເວົ້າວ່າ, “ຂ້ອຍບໍ່ຈຳເປັນຕ້ອງອ່ານພຣະຄຳພີມໍມອນ. ຂ້ອຍມີພຣະຄຣິສຕະທຳຄຳພີແລ້ວ.” ເຮົາຈະສາມາດເວົ້າຫຍັງຕໍ່ໝູ່ຂອງເຮົາໄດ້ແດ່? ອ່ານ 2 ນີໄຟ 29:7–11 ນຳກັນ ເພື່ອຮຽນຮູ້ວ່າ ເປັນຫຍັງພຣະເຈົ້າຈຶ່ງປະສົງໃຫ້ເຮົາມີປຶ້ມທັງສອງຫົວ.

2 ນີໄຟ 28:30–31

ພຣະບິດາເທິງສະຫວັນສິດສອນເຮົາເທື່ອລະໜ້ອຍ.

ບາງທີທ່ານສາມາດຄິດກ່ຽວກັບບົດຮຽນທີ່ໃຊ້ສິ່ງຂອງ ທີ່ຈະຊ່ວຍໃຫ້ລູກໆຂອງທ່ານເຂົ້າໃຈວ່າ ການຮຽນ “ເປັນບັນທັດ” ນັ້ນໝາຍຄວາມວ່າແນວໃດ. ຍົກຕົວຢ່າງ, ພວກເຂົາສາມາດຕໍ່ຈິກຊໍ ຫລື ສ້າງອັນໃດອັນໜຶ່ງດ້ວຍທ່ອນໄມ້, ເທື່ອລະອັນ. ຫລື ທ່ານສາມາດສອນທັກສະໜຶ່ງໃຫ້ພວກເຂົາເທື່ອລະຂັ້ນຕອນ, ເຊັ່ນການມັດໂບ ຫລື ການແຕ້ມຮູບ. ແລ້ວພວກທ່ານກໍສາມາດອ່ານ 2 ນີໄຟ 28:30 ແລະ ສົນທະນາກ່ຽວກັບວ່າ ພຣະບິດາເທິງສະຫວັນສິດສອນຄວາມຈິງໃຫ້ແກ່ເຮົາເທື່ອລະຢ່າງແນວໃດ.
ອີກແນວຄິດໜຶ່ງສາມາດເປັນການເລືອກວະລີໜຶ່ງຈາກ 2 ນີໄຟ 28:30 ແລະ ປ່ຽນຜຽນກັນຂຽນມັນ, ເທື່ອລະຄຳ. ສິ່ງນີ້ເປັນຄືກັນກັບວິທີທີ່ພຣະເຈົ້າປະທານຄວາມຈິງໃຫ້ແກ່ເຮົາແນວໃດ? ເປັນຫຍັງພຣະເຈົ້າຈຶ່ງເປີດເຜີຍຄວາມຈິງຕໍ່ເຮົາ “ເປັນບັນທັດ, ເປັນຂໍ້ເລັກໆໜ້ອຍໆ, ນີ້ໜ້ອຍໜຶ່ງ ແລະ ນັ້ນໜ້ອຍໜຶ່ງ” ແທນທີ່ຈະມອບໃຫ້ໝົດບາດດຽວ? ເຮົາຈະສາມາດສະແດງໃຫ້ພຣະອົງເຫັນວ່າ ເຮົາຢາກຮັບເອົາຄວາມຈິງຈາກພຣະອົງຕື່ມອີກໄດ້ແນວໃດ?

ສຳລັບແນວຄິດເພີ່ມເຕີມ, ໃຫ້ເບິ່ງວາລະສານ Friend ສະບັບຂອງເດືອນນີ້.

ພຣະເຢຊູຄຣິດຢູ່ໃນທ່າມກາງຝູງຊົນ — Christ in the Midst [ພຣະຄຣິດຢູ່ໃນທ່າມກາງ], ໂດຍ ຈູດິດ ເອ ແມ