Iakoba ’e Enosa, nā Scott Snow

15–21 nō ’Ēperēra : « Tē rave nei ’oia i roto iā’u ’ia rave au i tōna hina’aro »

Enosa–Te mau Parau a Moromona

Noa atu ē, ’ua haere o Enosa i roto i te uru rā’au nō te a’ua’u i te ’animara nō te ha’amāha i te po’ia i te pae tino, ’ua fa’aea ’oia i reira i te mahana tā’āto’a e tae roa atu i te pō nō te mea ’ua « hia’ai tōna vārua ». ’Ua arata’i teie po’ia ia Enosa ’ia « fa’ateitei [tōna] reo i te ra’i ». ’Ua fa’ata’a mai ’oia i teie ’ohipa ’ei tōra’a i mua i te Atua (hi’o Enosa 1:2–4). Mai roto mai ia Enosa tē ha’api’i nei tātou ē, ’ua riro te pure ’ei tauto’ora’a mau nō te ha’afātata atu i te Atua ’e nō te ’imi ’ia ’ite i tōna hina’aro. ’Ia pure ’outou mai te reira, ’ia « tae roa atura [tō ’outou reo] i te mau ra’i ra », e ’ite mai ’outou mai ia Enosa ē, tē fa’aro’o mai ra te Atua ia ’outou, ’e tē māna’ona’o mau ra ’oia ia ’outou, te feiā tā ’outou i here ’e ’oia ato’a tō ’outou mau ’enemi (hi’o Enosa 1:4–17). ’Ia ’ite ana’e ’outou i tōna hina’aro, e ineine maita’i a’e ’outou nō te rave i tōna hina’aro. Mai ia Moromona te huru, ’aita paha ’outou « i ’ite i te mau mea ato’a, ’ua ’ite rā te Fatu i te mau mea ato’a … ; [’e] tē rave nei ’oia nā roto ia [’outou] mai te au i tōna hina’aro » (Te mau Parau a Moromona 1:7).

Mana’o nō te ’apo i te ha’api’ira’a i te ’utuāfare ’e i te fare purera’a

Enosa 1:1–17

E fa’aro’o ’e e pāhono mai te Atua i tā’u mau pure.

E ’ere paha te ’ohipa i tupu nō ’outou i te mea rahi roa, i tō Enosa, ’eiaha rā ’ia iti a’e te faufa’a. Teie te tahi mau uira’a e feruri a tuatāpapa ai ’outou i te Enosa 1:1–17 :

• E aha te mau parau e tano i te mau tauto’ora’a a Enosa i te purera’a ’oia ?

• Nāhea te mau pure a Enosa i te tauira’a i te mau ’īrava 4 e tae atu i te 11 ?

• E aha tā’u e ha’api’i mai nā roto mai ia Enosa o tē nehenehe e tauturu iā’u ’ia ha’amaita’i i tā’u mau pure ?

Hi’o ato’a « Enosa Prays Mightily » (video), Vaira’a buka ’evanelia ; « Hora pure », Te mau Hīmene, no. 73.

Fa’a’ite i te mau uira’a nō te tāu’ara’a parau. Mai te mea tē ha’api’i ra ’outou ia vetahi ’ē, ’a feruri i te tu’u i te mau uira’a ’o tā ’outou e hina’aro e ’āparau i te hō’ē vāhi ti’a mau ’ia ti’a i te mau ta’ata ato’a ’ia ’ite i te reira. E tauturu te reira i te ta’ata ’ia feruri hōhonu i te mau uira’a ’e ’ia hōro’a rahi atu ā i te mau pāhonora’a fa’auruhia.

Enosa 1:1–4

E nehenehe te Fatu e tauturu iā’u ’ia fa’auru i tō’u ’utuāfare nō te maita’i.

Penei a’e tē vai ra hō’ē ta’ata i roto i tō ’outou ’utuāfare o tā ’outou e hina’aro e tauturu ’ia haere mai i te Mesia ra, tē uiui nei rā ’outou ē, tē fa’atupu ra ānei tā ’outou mau tauto’ora’a i te hō’ē ta’a-’ē-ra’a. E aha tā ’outou e nehenehe e ha’api’i mai i roto i te Enosa 1:1–4 nō ni’a i te mana o Iakoba i ni’a i tāna tamaiti o Enosa ? ’Ei hi’ora’a, e aha te aura’a nō ’outou te parau « te pa’ari ’e te a’o a te Fatu ra » ? Nāhea tātou i te tītau i tōna mana fa’auru i roto i tō tātou fare ?

’A feruri ai ’outou i tō ’outou iho ’utuāfare, ’a feruri i teie mau uira’a ’e teie mau rāve’a :

• Nāhea ’outou i te fa’auru i tō ’outou ’utuāfare nā roto i te mau rāve’a maita’i ? (hi’o 1 Nephi 2:16–18 ; 3:15–21 ; 5:1–6 ; 7:20–21 ; Alama 36:17–20 ; « Te ’Utuāfare : E Poro’i i tō te Ao nei »). E aha tā ’outou e nehenehe e rave mai te mea ē, ’aita te hō’ē ta’ata e hina’aro i tā ’outou tauturu ’aore rā ’aita ’oia e au ia ’oe ?

• E aha te mau parau tumu tā ’outou i ’ite mai i roto i te mau pāpa’ira’a mo’a i muri nei o tē nehenehe e arata’i i tō ’outou mau aura’a e te mau melo o te ’utuāfare ? Mataio 5:21–24, 38–42 ; 6:14 ; 7:1–5 ; 22:36–39 ; 3 Nephi 18:21 ; Moroni 7:33 ; Te Ha’api’ira’a Tumu ’e te mau Fafaura’a 18:10–13.

’Ua fa’a’ite mai Elder Dieter F. Uchtdorf i te parau a’o tauturu nō te mau ’utuāfare i roto « ’Ei ’ārue i te feiā e fa’aora » (Ensign ’aore rā Liahona, Mē 2016, 77–80). E aha tā tāna poro’i e fa’auru nei ia ’outou ’ia rave nō te ha’apūai i tō ’outou ’utuāfare ? (’a hi’o ta’a ’ē i te tuha’a i topahia « Te fa’aorara’a i tō tātou ’utuāfare »).

Hi’o ato’a i te mau Parau tumu o te ’evanelia, « Family », Vaira’a buka ’evanelia ; « Te fare ’e te ’utuāfare—nā roto i te mau mea iti » (video), Vaira’a buka ’evanelia.

Enosa 1:1–18

E nehenehe au e fāri’i i te fa’a’orera’a hara ’a fa’a’ohipa ai au i te fa’aro’o i te Mesia.

I te tahi taime e uiui paha ’outou ē, ’ua fa’a’orehia ānei tā ’outou mau hara, noa atu ē, ’ua tātarahapa ’outou i taua mau hara ra. E aha te mau mea tā ’outou e ’apo mai i roto i te ’ohipa i tupu nō Enosa i roto i te Enosa 1:1–8 ? Nāhea tō Enosa fa’a’itera’a i tōna fa’aro’o ia Iesu Mesia nā mua a’e ’e i muri a’e i tōna fāri’ira’a i te fa’a’orera’a hara ?

Iaroma–Omoni

’A tūtava ai au i te ha’apa’o i tāna mau fa’auera’a, e ha’amaita’i mai te Atua iā’u.

Tē fa’ata’a nei te mau buka a Iaroma ’e Omoni i te aura’a i rotopū i te parau-ti’a ’e te manuiara’a. E aha tā ’outou e ha’api’i nei i roto i te Iaroma 1:7–12 ; Omoni 1:5–7, 12–18 ? Nāhea te mau tātarara’a a te ao nei nō ni’a i te manuiara’a e ta’a ’ē ai i te tātarara’a a te Fatu ? Nāhea te Fatu i te tauturu i tōna nūnaʼa ʼia manuia ? (hi’o Alama 37:13 ; 48:15–16).

Omoni 1:25–26

« E haere mai i te Mesia, tei Mo’a i Iseraela nei ».

Pinepine te anira’a « Haere mai i te Mesia » i te ’itehia i roto i te Buka a Moromona. ’Oia mau, hō’ē o te mau ’ōpuara’a tumu nō teie buka, o te fa’ataera’a ïa i teie anira’a i te mau ta’ata ato’a. ’Ia tai’o ’outou i te Omoni 1:25–26, e aha te mau ta’o ’aore rā te mau pereota tā ’outou e ’ite ra ’o tē fa’ata’a nei nāhea ’ia haere mai i te Mesia ra ? E aha tā ’outou e rave nō te haere hope atu ā iāna ra ?

Te putura’a Moromona i te mau ’api, nā Jorge Cocco

Te mau Parau a Moromona 1:1–8

E ʼohipa te Atua nā roto iā’u mai te mea e peʼe au i tāna arataʼiraʼa.

Hō’ē tumu i fa’auru ai te Fatu ia Moromona ’ia tu’u i te mau ’api na’ina’i a Nephi i roto i te Buka a Moromona nō te mea ïa ’ua ’ite te Atua ē, e mo’e nā 116 ’api mātāmua tei ’īritihia (hi’o Te Ha’api’ira’a Tumu ’e te mau Fafaura’a 10 ; Te Feiā Mo’a, buka 1, pene 5). Nō te aha ’outou i māuruuru ai ē ’ua pe’e Moromona i te arata’ira’a a te Fatu ’ia tu’u i teie mau pāpa’ira’a (’oia ho’i te 1 Nephi e tae atu ia Omoni) ? E aha te mau tumu Moromona i hōro’a ato’a ai nō rātou ? (hi’o Te mau Parau a Moromona 1:3–7). E aha te taime ’outou i ’ite ai i te Atua i te ’ohipara’a nā roto ia ’outou ’aore rā nā roto ia vetahi ’ē ?

Nō te tahi atu ā mana’o, ’a hi’o i te mau ve’a Liahona ’e Nō te pūai o te feiā āpī nō teie ’āva’e.

Mana’o nō te ha’api’i i te tamari’i

Enosa 1:1–5

E nehenehe au e paraparau i te Metua i te Ao ra nā roto i te pure.

• Nāhea ’outou e nehenehe ai e tauturu i tā ’outou mau tamari’i ’ia fa’ariro i tā rātou mau pure ’ei pure faufa’a a’e ? E fa’a’ite ia rātou i te hō’ē hōho’a nō Enosa e pure ra ; e vaiiho ia rātou ’ia fa’ata’a mai i te mea tā rātou e ’ite ra. Muri iho e nehenehe rātou e tāpiri i tō rātou mata ’e e feruri ē, tē paraparau ra rātou i te Metua i te Ao ra i te mata ’e te mata. E aha tā rātou e hina’aro e paraparau atu ? E aha tāna e hina’aro e parau ia rātou ?

• ’A tai’o ha’apūai ai ’outou i te Enosa 1:1–5, e nehenehe te mau tamari’iri’i e feruri ē, ’o Enosa rātou nā roto i te ha’utira’a i te a’ua’ura’a ’ānimara, te tūturira’a nō te pure ’e tē vai atu ra. E nehenehe te mau tamari’i pa’ari e fa’aro’o i te hō’ē ta’o ’aore rā te hō’ē pereota e fa’ata’a ra i te mau pure a Enosa. E aha tā teie mau parau e ha’api’i nei ia tātou nō ni’a i te mau pure a Enosa ? E fa’ati’a atu i te hō’ē taime ’a « hia’ai » ai tō ’outou vārua ’e « ’ua pi’i hua atu ra » ’outou i te Fatu (Enosa 1:4).

’Ei tamari’i nā te Atua, e nehenehe tātou e pure i tō tātou Metua i te Ao ra.

Enosa 1:2–16

Tē fa’aro’o nei ’e tē pāhono nei te Metua i te ao ra i tā’u mau pure.

• Nāhea e ti’a ai ia ’outou ’ia tauturu i tā ’outou mau tamari’i ’ia hāro’aro’a ē, e fa’aro’o ’e e pāhono mai te Metua i te Ao ra i tā rātou mau pure ? E ani ia rātou ’ia tāpura mai i te tahi mau mea tā rātou e pure tāmau nei. I muri iho e tauturu ia rātou ’ia ’imi e aha tā Enosa i pure i roto i te Enosa 1:2, 9, 13–14, ’e 16 (hi’o ato’a « Pene 11 : Enosa », Te mau ’ā’amu o te Buka a Moromona, 30–31).

  E aha te mau hope’ara’a o te mau pure a Enosa ? (hi’o i te mau ’īrava 6, 9, 11).

  E aha te ha’api’ira’a tā tātou e ’apo mai i roto i te ’ohipa i tupu nō Enosa nō ni’a i te ha’amaita’ira’a i tā tātou mau pure ?

• E hīmene ’āmui i te hō’ē hīmene nō ni’a i te pure, mai te « La prière d’un enfant » (Chants pour les enfants, 6–7). Penei a’e e nehenehe tā ’outou mau tamari’i e ’āfa’i i te rima i ni’a i te mau taime ato’a e fa’aro’o rātou i te ta’o « pure » ’e ’aore rā « pure », ’aore rā i te tahi atu ta’o e fa’ahitihia. E parau i tā ’outou mau tamari’i nō ni’a i te tahi mau rāve’a tā te Metua i te Ao ra i pāhono i tā ’outou mau pure.

Te mau Parau a Moromona 1:3–8

E nehenehe au e ha’amaita’i ia vetahi ’ē ’ia fa’aro’o ana’e au i te Vārua Maita’i.

• ’Ua pe’e Moromona i te arata’ira’a a te Vārua Maita’i nō te tu’u i te mau ’api na’ina’i a Nephi i roto i te Buka a Moromona. ’Ua tae mai te mau mea ato’a tā tātou i tuatāpapa i roto i te Buka a Moromona i teie matahiti nō te mea ’ua rave Moromona i te mā’itira’a ’ia fa’aro’o i te Vārua. Nāhea e ti’a ai ia ’outou ’ia tauturu i tā ’outou mau tamari’i ’ia ha’api’i mai nō ni’a i te fa’aro’ora’a i te Vārua ? ’A ani ia rātou ’ia tai’o tāta’itahi i te mau ’īrava i roto i Te mau Parau a Moromona 1:3–8. E nehenehe ’outou e paraparau nō ni’a i te mea tā rātou i ha’api’i mai nā roto mai i te ’īrava tāta’itahi. I muri iho e nehenehe tā ’outou mau tamari’i e :

  • Fa’a’ite e aha tā rātou i ha’api’i mai nā roto mai i te mau ’ā’amu i roto i te Buka a Moromona i teie matahiti (e nehenehe te mau hōho’a nō roto mai i te Mai, pe’e mai e tauturu ia rātou ’ia ha’amana’o).

  • Hīmene ʼāmui i te hōʼē hīmene nō niʼa i te Vārua Maitaʼi, mai « La petite voix douce » (Chant pour les enfants, 106).

  • ’A paraparau nō ni’a i te mau ’itera’a i reira rātou i te arata’ira’ahia e te Vārua nō te rave i te hō’ē mea tei ha’amaita’i i te tahi atu ta’ata.

Nō te tahi atu ā mana’o, ’a hi’o i te ve’a Hoa nō teie āva’e.

Tē pure ra Enosa, nā Robert T. Barrett