Fa’a’orera’a hara, nā Greg Olsen. Fa’a’ohipahia ma te parau fa’ati’a. www.GregOlsen.com

1-7 nō ’Ēperēra : ’Ia fa’a’āfaro ’outou ia ’outou iho i te Atua nā roto i te tāra’ehara a te Mesia

Iakoba 1–4

’Ua fa’ariro te mau ’āti Nephi ia Nephi ’ei « tīa’i maita’i » nō rātou (hi’o Iakoba 1:10). ’Ua pāruru ato’a ’oia ia rātou i te mau ’ati pae vārua, ma te fa’aara ia rātou i te hara ’e te a’ora’a ia rātou ’ia haere mai i te Mesia ra. I teienei, ’ua ma’iri taua ’ohipa ra i ni’a ia Iakoba, tā Nephi i ha’amo’a ’ia riro ’ei tahu’a ’e ’ei ha’api’i (hi’o Iakoba 1:18). ’Ua fāri’i Iakoba i te hōpoi’a ’ia fa’aara itoito i te feiā tei « ha’amata i te rave i te hara » a tāmāhanahana ato’a ai i « te vārua mamae » o te feiā tei māuiui i te hara a vetahi ’ē (hi’o Iakoba 2:5–9). Nāhea ’oia i te ravera’a i te reira ? E fa’atoro ’oia ia rātou i ni’a ia Iesu Mesia—nō te mea e hina’aro nā pupu to’opiti i te fa’aorara’a a te Fa’aora (hi’o Iakoba 4). Te poro’i a Iakoba, mai te poro’i a Nephi nā mua atu iāna, e pi’ira’a ïa ’ia « fa’a’āfaro i [te Atua] nā roto i te tāra’ehara a te Mesia » (Iakoba 4:11).

Mau mana’o nō te ha’api’ira’a mai i te ’utuāfare ’e i te fare purera’a

Iakoba 1:6–8, 15–19 ; 2:1–11

E « pi’ira’a tō’u nō ’ō mai i te Fatu ra ».

Nō Iakoba, ’ua riro te ha’api’ira’a i te parau a te Atua ’ei « pi’ira’a nō ’ō mai i te Fatu ra », nō reira ’ua fa’aitoito ’oia nō te « amo i [tōna] tōro’a » (Iakoba 1:17,19). E aha te aura’a nō ’outou teie mau pereota tā Iakoba i fa’a’ohipa ? ’A feruri na i te mea tā te hō’ē hi’o fa’arahi e rave. E hōro’a ānei te reira i te tahi mana’o ia ’outou ? ’A feruri ai ’outou i te Iakoba 1:6–8, 15–19 ’e 2:1–11, ’a feruri i te ’ohipa tā te Fatu e hina’aro nō ’outou. E aha tā ’outou e mana’o ra e rave nō te « fa’a’ohipa » i te reira ?

Hi’o ato’a « Whom the Lord Calls, the Lord Qualifies », i roto Te mau Ha’api’ira’a a te mau Peresideni o te ’Ēkālesia : Thomas S. Monson (2022), 209–20 ; « Rise to Your Call » (video), Vaira’a buka ’evanelia.

Iakoba 2:12–21

« ’Eiaha e fa’ati’a i teie nei te’ote’o o tō ’outou ’ā’au ’ia ha’amou i tō ’outou mau vārua ! »

E fifi tō te mau ’āti Nephi i te te’ote’o ’e te rōtahira’a i ni’a i te mau tao’a (hi’o Iakoba 2:13), ’e e ’ere te reira fifi i te mea ta’a ’ē nō rātou ’aore rā i tō rātou ’anotau. Nāhea te ’enemi i te fa’aitoito i te here o te mau tao’a i teie mahana ? I muri a’e i te tai’ora’a i te Iakoba 2:12–21, ’a fa’ata’a nā roto i tā ’outou iho mau parau e mea nāhea tō te Atua hina’arora’a ’ia hi’o ’outou i te tao’a mātēria. E nehenehe te hō’ē hīmene mai te « Nō te mea ’ua rahi te mau ha’amaita’ira’a » (Te mau Hīmene, n°130) e hōro’a mai i te tahi atu ā mau mana’o. E aha te mana’o i fa’auruhia mai nā roto i te mea tā ’outou e ha’api’i ra ?

Iakoba 2:22–35 ; 3:10–12

Tē ’oa’oa nei te Atua i te vi’ivi’i ’ore.

’Ia tai’o ’outou i te Iakoba 2:22–35 ; 3:10–12, e aha tā ’outou e ’ite ra o tē tauturu ia ’outou ’ia māramarama nō te aha e mea faufa’a roa te vi’ivi’i ’ore nō te Atua ? E aha te tahi o te mau fa’ahope’ara’a ’ino nō te vi’ivi’i—i te ’anotau o Iakoba ’e i tō tātou nei ? E aha ïa te mau haʼamaitaʼiraʼa nō te oraraʼa i te hōʼē oraraʼa taiʼata ʼore ?

ʼUa haʼapiʼi mai o Elder David A. Bednar ē tē ora nei tātou « i roto i te hōʼē ao e vahavaha rahi nei i te huru mo’a o te fānauraʼa » (« Te ti’aturi nei mātou ē, e mea ti’a i te taʼata ʼia ora ma te viʼiviʼi ʼore, » Liahona, Mē 2013, 41–44). Nāhea ’outou i te tauturu ia vetahi ’ē ’ia māramarama nō te aha ’outou e ha’apa’o ai i te ture nō te vi’ivi’i ’ore ? Te hō’ē vāhi maita’i nō te ha’amata o te tātarara’a ïa i te mau ture a te Atua nō ni’a i te mau mana’o ’e te mau aura’a nō te ’āpenira’a i roto i « E mea mo’a tō ’outou tino » i roto i te Nō te Pūai o te Feiā ’Āpī : Hō’ē Arata’i nō te Ravera’a i te mau Mā’itira’a (’api 22–29). E aha atu ā tā ’outou e ’ite ra i roto i terā mātēria e tauturu ia ’outou ’ia fa’ata’a nō te aha ’outou e ora ai i te ture nō te vi’ivi’i ’ore ?

E nehenehe ’outou e ’ite mai i te tahi atu mau pāhonora’a i roto i te parau poro’i a Elder Bednar tei fa’ahitihia i ni’a nei ’aore rā i roto i te video « E mā’iti au ’ia vai mā noa » (Vaira’a buka ’evanelia).

E aha te ta’a-’ē-ra’a i rotopū i te ture a te Atua nō ni’a i te vi’ivi’i ’ore i te tahi atu mau poro’i tā ’outou e nehenehe e fārerei ? E aha ïa te mau haʼamaitaʼiraʼa nō te oraraʼa i te hōʼē oraraʼa taiʼata ʼore ?

Hi’o ato’a Te mau Parau tumu o te ’Evanelia, « Vi’ivi’i-’ore, » Vaira’a buka ’evanelia ; « Fa’ahina’arora’a i te hō’ē ā ’āpeni » i roto i te ha’aputura’a « Tauturu nō te orara’a » i roto i te Vaira’a buka ’evanelia.

Iakoba 4

E ti’a iā’u ’ia fa’a’āfaro i te Atua nā roto i te tāra’ehara a Iesu Mesia.

’Ua tāparu Iakoba i tōna mau ta’ata ’ia « fa’a’āfaro [i te Atua] nā roto i te tāra’ehara a te Mesia » (Iakoba 4:11). Hō’ē tātarara’a nō te fa’a’āfarora’a ’o te fa’aho’ira’a ïa i te auhoara’a ’aore rā te au-maita’i-ra’a. ’A feruri ai ’outou i tō ’outou iho orara’a, ’a feruri i te hō’ē taime ’ua ātea ’outou i te Metua i te ao ra. Nāhea te Fa’aora e tauturu ai ia ’outou ’ia fa’atupu fa’ahou i taua aura’a ra ? E aha te a’o tā ’outou e nehenehe e ’ite mai i roto i teie pene ’o tē tauturu ia ’outou ’ia fa’a’āfaro i te Atua ? (hi’o te mau ’īrava 4–14).

E aha te tahi atu ā mau mana’o i noa’a mai ia ’outou i roto i te Mataio 5:23–24 ? Nāhea te Fa’aora i te tauturu ia ’outou ’ia fa’a’āfaro i te Atua—’e ia vetahi ’ē ?

Hi’o ato’a 2 Nephi 10:24.

Iakoba 4:8–18

E ti’a iā’u ’ia ’ape i te matapōra’a pae vārua nā roto i te tūtonura’a i ni’a i te Fa’aora.

Mai tā Iakoba i ’imi i te fa’afāriu hope atu ā i tōna mau ta’ata i ni’a i te Fatu, ’ua fa’aara ato’a ’oia ia rātou ’eiaha ’ia matapōhia i te pae vārua ’e ’eiaha e vahavaha i te « mau parau pāpū » o te ’evanelia (hi’o Iakoba 4:13–14). ’Ia au i tei pāpa’ihia i roto i te Iakoba 4:8–18, e aha tē ti’a ia tātou ’ia rave nō te ’ape i te matapōra’a pae vārua ?

Hi’o ato’a Quentin L. Cook, « Looking beyond the Mark [Hi’o i ni’a a’e i te tāpa’o], » Ensign, Māti 2003, 40–44.

I tōna ha’api’ira’a, ’ua fa’a’ohipa te Fa’aora i te mau fa’aaura’a i roto i te orara’a i te mau mahana ato’a. ’Ua tauturu te mau parabole a Iesu i te mau ta’ata ’ia ’ite mai i te mau parau mau pae vārua i roto i tō rātou mau ’itera’a tāhō’ē. ’A tāmata i te nā reira ato’a ’ia ha’api’i ana’e ’outou. ’Ei hi’ora’a, ’ia ha’api’i ana’e rātou i te Iakoba 4:8–18, e nehenehe tā ’outou e ani i te mau pīahi ē ’ua fāri’i ānei rātou i te hō’ē hi’opo’ara’a nō te mata. Nāhea tō te taote fāitora’a i tō rātou hi’ora’a pae tino ? Nāhea tātou e nehenehe ai e fāito i tō tātou hi’ora’a pae vārua ?

Nō te tahi atu ā mana’o, ’a hi’o i te mau ve’a Liahona ’e Nō te Pūai o te Feiā ’Āpī nō teie ’āva’e.

Mana’o nō te ha’api’i i te tamari’i

Iakoba 2:8

E fa’aora te Atua i te vārua mamae.

• Nō te tauturu i tā ’outou mau tamari’i ’ia māramarama e nāhea te hō’ē « vārua mamae » e nehenehe ai e fa’aorahia, e nehenehe ’outou e ’āparau ’āmui e nāhea tō tātou tino ’ia pēpē, ’e e aha te mea e tauturu ia rātou ’ia ora. Penei a’e e nehenehe tā ’outou mau tamari’i e paraparau nō ni’a i te mau taime a pēpē ai rātou ’e e aha te mea i tauturu ia rātou ’ia ora. E nehenehe ato’a ’outou e fa’a’ite ia rātou i te tā’amu ’aore rā i te rā’au nō teie ’āparaura’a. Penei a’e e nehenehe tā ’outou e fa’a’ite ia rātou nāhea te Fa’aora i te tauturura’a ia ’outou i te taime e hina’aro ai tō ’outou vārua i te fa’aorara’a.

Iakoba 2:17–19

E nehenehe au e tauturu i te feiā nava’i ’ore ’ia hōro’a atu vau i tā’u nei nā rātou.

• Te tahi mau ta’ata i te ’anotau o Iakoba, e mau ta’ata moni roa, ’aita rā rātou i hina’aro e hōro’a i tā rātou nā te tahi atu mau ta’ata. ’A tai’o ai ’outou i te mau ha’api’ira’a a Iakoba ia rātou i roto i te Iakoba 2:17–19, e nehenehe ’outou e hōro’a i tā ’outou mau tamari’i i te mau hōho’a ’aore rā i te mau tao’a nō te tāpe’a i te reira nā roto i te mau ta’o ’aore rā te mau pereota i roto i teie mau ’īrava. E nehenehe ’outou e fa’ata’a ē, tē fa’a’ite ra ’outou i teie mau tao’a ia rātou ; penei a’e, i muri iho, e nehenehe tā ’outou e ani ia rātou ’ia fa’a’ite mai i te mau tao’a ia ’outou ’aore rā, i te tahi ’e te tahi. ’A paraparau nō ni’a i tō ’outou mana’o ’ia fa’a’ite ana’e ’outou. E aha atu ā tā tātou e nehenehe e fa’a’ite ia vetahi ’ē nō te tauturu ia rātou ’ia ’oa’oa ?

• I muri a’e i te tai’ora’a ’āmui i te Iakoba 2:17, penei a’e e nehenehe tā ’outou mau tamari’i e fa’ahiti i te tahi mau ha’amaita’ira’a tā te Metua i te Ao ra i hōro’a mai ia rātou. Nō te aha ’oia e hina’aro ai ’ia hōro’a tātou i tā tātou nā te tahi ’e te tahi ?

Iakoba 4:6, 10–11

E nehenehe tā’u e ha’apūai i tō’u fa’aro’o ia Iesu Mesia.

• Nō te pūai rahi o te fa’aro’o o Iakoba i te Mesia, e’ita ïa e nehenehe e ’āueue. Nō te ha’api’i i tā ’outou mau tamari’i nāhea ’ia patu i te fa’aro’o mai te reira, e nehenehe ’outou e ani ia rātou i te mau mea tā tātou e rave nō te ha’apūai atu ā i tō tātou tino. E aha tā tātou e nehenehe e rave nō te ha’apūai atu ā i tō tātou fa’aro’o ia Iesu Mesia ? ’A tai’o ’āmui i te Iakoba 4:6 nō te tauturu i te mau tamari’i ’ia ’ite e aha tā Iakoba ’e tā tōna mau ta’ata i rave nō te fa’ariro i tō rātou fa’aro’o ’ei mea « ’āueue ’ore ».

• Hō’ē rāve’a nō te tauturu i tā ’outou mau tamari’i ’ia māramarama i te aura’a o te parau « ’āueue ’ore » i roto i tō rātou fa’aro’o, ’o te ’imira’a ïa i te hō’ē tumu rā’au rahi i reira, ’a ani atu ai ia rātou ’ia haere e ueue i te mau ’āma’a tāta’ihō’ē. Muri iho ’a ani ai ia rātou ’ia ueue i te tumu. Nō te aha e mea pa’ari ’ia ueue i te tumu ? E aha te mau pereota i roto i te Iakoba 4:6, 10–11 o tē fa’ata’a nei i te mea tā tātou e nehenehe e rave nō te fa’ariro i tō tātou fa’aro’o ’ei mea ’āueue ’ore ?

  

  Mai te tumu o te hō’ē tumu rā’au, e ti’a i tō tātou fa’aro’o ’ia vai « ’āueue ’ore ».

• Nō te tahi atu mau fa’aaura’a nō te ha’api’i i tā ’outou mau tamari’i nō ni’a i te fa’aro’o ’āueue ’ore ia Iesu Mesia, hi’o Neil L. Andersen, « Te mau iripo pae vārua » (Liahona, Mē 2014, 18–21 ; ’e te video « Te mau iripo pae vārua ») ’aore rā « Te ta’ata pa’ari ’e te ta’ata ma’ama’a » (Chants pour les enfants, 281; hi’o ato’a Mataio 7:24–27).

Te mau pūāhiohio pae vārua

’Eiaha e vaiiho i te mau pūāhiohio e huti ia ’outou i raro. ’O tō ’outou mahana teie—’ia ti’a pūai ’ei mau pīpī nā te Fatu ’o Iesu Mesia.

Nō te tahi atu ā mana’o, ’a hi’o i te ve’a Hoa nō teie ’āva’e.

E hāpono vau i tā rātou mau parau (Te ’orometua Iakoba), nā Elspeth Caitlin Young