1 I teienei inaha, i muri a’era, ’ua ha’api’i rahi atu vau, ’o Iakoba, i tō’u ra mau ta’ata nā roto i te parau, (’aita e ti’a iā’u ’ia pāpa’i, maori rā, e ma’a parau iti o tā’u mau parau, nō te mea, e mea rave ’atā te ’ō’otira’a i tā mātou mau parau i ni’a iho i te mau ’api metalo nei) ’e ’ua ’ite mātou ē, e mea ti’a roa ’ia vai māite te mau mea i pāpa’ihia i ni’a i te mau ’api.

2 ’O te mau mea rā tā mātou e pāpa’i i ni’a i te tahi atu ā mea, maori rā i ni’a i te mau ’api metalo, e mou ïa ’e e mo’e roa atu ; ’ua ti’a rā ia mātou ’ia pāpa’i i te tahi mau parau iti i ni’a i te mau ’api, ’o tā mātou e hōro’a atu i tā mātou mau tamari’i, ’e i tō mātou mau taea’e here, i te māramarama iti i tō mātou huru, ’e te huru ho’i o tō rātou ra metua—

3 I teienei tē ’oa’oa nei mātou i te reira ; ’e tē ’ohipa nei ho’i mātou ma te itoito ’ia ’ō’oti i teie nei mau parau i ni’a i te mau ’api, ma te ti’aturi e fāri’i tō mātou mau taea’e here ’e tā mātou mau tamari’i i te reira ma te ’ā’au ’oao’a, ’e ’ia ’imi ho’i i tei ni’a i te reira, ’ia ti’a ia rātou ’ia ha’api’i ma te ’oa’oa e ’eiaha ma te ’oto, ’eiaha ho’i ma te vahavaha, i te mau mea nō ni’a i tō rātou ra nā metua mātāmua.

4 ’E teie ho’i te tumu ’ua pāpa’i mātou i teie nei mau mea, ’ia ’ite rātou ē, ’ua ’ite mātou i te parau nō te Mesia, ’e tē vai nei tō mātou ti’aturira’a nō ni’a i tōna ra hanahana e rave rahi hānere matahiti hou tōna ra taera’a mai ; ’e e ’ere ’o mātou ana’e tei ti’aturi i tōna ra hanahana, te mau peropheta mo’a pā’āto’a rā ho’i nā mua atu ia mātou nei.

5 Inaha, ’ua ti’aturi rātou i te Mesia, ’e ’ua ha’amori ho’i i te Metua i tōna ra i’oa ; ’e tē ha’amori ato’a nei ho’i mātou i te Metua i tōna ra i’oa. ’E teie ho’i te tumu i ha’apa’o ai mātou i te ture a Mose, tē fa’aarata’i nei te reira i tō mātou nei vārua iāna ra ; ’e nō reira i ha’amo’ahia ai te reira ’ei parauti’a nā mātou, mai tei ha’apa’o-ato’a-hia ia Aberahama i te mēdēbara, ’a ha’apa’o ai ’oia i te mau fa’auera’a a te Atua nō te pūpūra’a atu i tāna ra tamaiti ia Isaaka, ’o te taipe ïa nō te Atua ’e tāna ra Tamaiti fānau tahi.

6 Nō reira, ’ua ’imi mātou i tā te mau peropheta ra, ’e tei ia mātou te mau heheura’a e rave rahi ’e te vārua nō te tohu ; ’e nō te mea, tē vai ra teie mau ’itera’a pāpū ia mātou nei, ’ua roa’a ïa ia mātou te ti’aturi, ’e ’ua riro tō mātou fa’aro’o ’ei mea ’āueue ’ore, ’e ’ua ti’a ato’a ho’i ia mātou ’ia fa’aue nā roto i te i’oa o Iesu, ’e e fa’aro’o mai te mau tumu rā’au ia mātou, ’e te mau mou’a, ’e te mau ’are miti.

7 ’Āre’a rā, ’ua fa’a’ite mai te Fatu te Atua ia mātou i tō mātou paruparu, ’ia ’ite mātou ē, nā roto i tōna ra maita’i ’e tōna ra ho’i mau aroha rahi i te mau tamari’i a te ta’ata nei, i ti’a ai ia mātou ’ia rave i taua mau mea nei.

8 Inaha, e mea fa’ahiahia ’e e mea māere te mau ’ohipa a te Fatu. ’Aita roa e ti’a ’ia ’imi i te mau hōhonura’a nō te mau parau ’aro nāna ra ; ’e ’aita roa ho’i e ti’a i te ta’ata ’ia ’imi pāpū i tāna ato’a ra mau rāve’a. ’E ’aita ho’i e ta’ata tei ’ite i tōna mau haere’a, maori rā ’ia heheuhia mai ïa iāna ra ; nō reira, e tō’u mau taea’e, ’eiaha ’outou e vahavaha i te mau heheura’a a te Atua ra.

9 Inaha ho’i, nā roto i te mana o tāna ra parau i tae mai ai te ta’ata i ni’a i te fenua nei, tei hāmanihia e te mana o tāna ra parau. Nō reira, mai te mea ē ’ua ti’a i te Atua ’ia parau, ’e ’ua tupu ihora teie nei ao, ’e ’ia parau, ’e ’ua oti ihora te ta’ata i te hāmanihia, inaha, e aha e ’ore e ti’a ai ’ia fa’aue i te fenua, ’e te mau ’ohipa i hāmanihia e tōna ra rima i ni’a i te fenua nei, mai tei au i tōna ra mana’o ’e tōna ra hina’aro ho’i ?

10 Nō reira, e tō’u mau taea’e, ’eiaha ’outou e tītau ia a’o atu i te Fatu, ’ia fāri’i mai rā i te a’ora’a nō ’ō mai iāna ra. Inaha ho’i, ’ua ’ite na ho’i ’outou iho ē, tē a’o mai ra ’oia ma te pa’ari, ’e ma te parauti’a, ’e ma te aroha rahi, i ni’a iho i tāna ato’a ra mau ’ohipa.

11 Nō reira, e tō’u mau taea’e here, ’ia fa’a’āfaro ’outou ia ’outou iho iāna nā roto i te tāra’ehara a te Mesia, tāna ra Tamaiti fānau tahi, ’ia roa’a ia ’outou te ti’afa’ahoura’a, mai te au i te mana o te ti’afa’ahoura’a i roto i te Mesia ra, ’e ’ia pūpūhia ho’i ’outou ’ei oho mātāmua nō te Mesia i te Atua, ma te fāri’i i te fa’aro’o, e ma te fāri’i ho’i i te ti’aturira’a pāpū i te hanahana nā roto iāna ra, hou ’oia e fa’a’ite mai ai iāna iho i te tino nei.

12 ’E i teienei, e au mau here ē, ’eiaha ’outou e māere i te mea ’ua parau atu vau i teie nei mau mea ia ’outou ; e aha ho’i e ’ore e parau ai nō ni’a i te tāra’ehara a te Mesia, ’e ’ia fāri’i i te ’ite ti’a nō ni’a iāna ra, ’e te ’ite ho’i nō ni’a i te ti’afa’ahoura’a ’e te ao a muri atu ?

13 Inaha, e tō’u mau taea’e, ’o tei tohu ra, ’ia tohu ïa ’oia i tei au i te ’ite o te ta’ata nei ; tē parau mai ra te Vārua i te parau mau ’e ’aita ’oia e ha’avare. Nō reira, tē parau ra ’oia i te huru mau o te mau mea e vai nei, ’e te huru mau ho’i o te mau mea e vai a muri a’e ; nō reira, ’ua fa’a’ite-pāpū-hia mai teie nei mau mea ia tātou nei, nō te fa’aorara’a o tō tātou mau vārua. Inaha rā, e ’ere tātou ana’e ra tei ’ite i teie nei mau mea ; ’ua parau ato’a atu ho’i te Atua i te reira i te mau peropheta i tahito ra.

14 Inaha rā, e feiā ’ā’au ’eta’eta ho’i te mau ’āti Iuda ; ’e ’ua vahavaha rātou i te mau parau pāpū, ’e ’ua taparahi ho’i rātou i te mau peropheta, ’e ’ua tītau ho’i i te mau mea ’aore i ti’a ia rātou ’ia ’ite. Nō reira, nō tō rātou matapō, ’o tei tae i ni’a ia rātou nō te tītaura’a i te mau mea ’aore i ti’a ia rātou ’ia rave ra, ’ia ma’iri rātou e ti’a ai ; ’ua rave ’ē ho’i te Atua i tāna ra mea pāpū mai ia rātou ra, ’e ’ua hōro’a atu ia rātou i te mau mea e rave rahi tei ’ore i hāro’aro’ahia e rātou, nō te mea ’ua hina’aro rātou i te reira. ’E nō te mea ’ua hina’aro rātou i te reira, ’ua nā reira te Atua, ’ia turori rātou.

15 ’E i teienei, tē arata’i-noa-hia nei au, ’o Iakoba, e te Vārua ’ia tohu ; ’e ’ua ’ite ho’i au nā roto i te mau ’ohipa a te Vārua i roto iā’u nei ē, nō te turorira’a o te ’āti Iuda e pāto’i ai rātou i te ’ōfa’i tei au ’ia tu’uhia i raro, ’ia ti’a ia rātou ’ia patu i te hō’ē niu ’āueue ’ore i ni’a iho.

16 Inaha rā, mai te au i te mau pāpa’ira’a mo’a, e riro teie nei ’ōfa’i ’ei niu rahi ’e te fa’ahope’a, ’e te ’āueue ’ore ho’i, ’e i ni’a iho i te reira e ti’a ai i te mau ’āti Iuda ’ia patu.

17 ’E i teienei, e au mau here, nāhea e ti’a ai ia rātou, tei pāto’i i te niu mau, ’ia patu i ni’a iho i te reira, ’e ’ia riro mai taua ’ōfa’i ra ’ei ’ōfa’i tihi nō rātou ?

18 Inaha, e tō’u mau taea’e here, e ha’amāramarama atu vau i teie nei parau ’aro ia ’outou na ; ’ia ’ore au e riro noa atu i te ’āueue-’ē-hia i tō’u nei ha’apa’o maita’i i te Vārua, ’e ’ia turori ho’i i tō’u onoono-rahi-ra’a ia ’outou.