Te Buka a Iakoba
Te Teina o Nephi

1 Inaha ho’i, i muri a’era, ’ua hope a’era te mau matahiti e pae ’ahuru ’e ma pae mai te ’anotau i fa’aru’e ai Lehi i Ierusalema ; nō reira, ’ua hōro’a mai ra Nephi iā’u, ia Iakoba, i te hō’ē fa’auera’a nō ni’a i te mau ’api iti, ’e tei ni’a iho teie mau mea i te ’ō’otira’ahia.

2 ’E ’ua hōro’a mai ra ’oia iā’u, ia Iakoba, i te hō’ē fa’auera’a ’ia pāpa’i au i ni’a i teie nei mau ’api i te tahi mau mea iti ’o tā’u i mana’o e mea faufa’a rahi ; ’e ’eiaha vau e pāpa’i, maori rā ’ei vāhi iti noa nō ni’a i te ’ā’amu o teie nei feiā tei ma’irihia te i’oa o te mau ta’ata o Nephi.

3 ’E ’ua parau mai ho’i ’oia ē, ’ia ’ō’otihia te ’ā’amu o tōna ra mau ta’ata i ni’a i te tahi atu o tāna ra mau ’api, ’e ’ia fa’aherehere au i teie nei mau ’api ’e ’ia hōro’a atu i tō’u iho hua’ai, i terā u’i i terā u’i.

4 ’E mai te mea tē vai ra te tahi mau a’ora’a mo’a, ’e te heheura’a fa’ahiahia rahi, ’e te tohu, ’ia ’ō’oti ïa vau i te mau upo’o parau nō te reira i ni’a i teie nei mau ’api, ’e ’ia pāpa’i ho’i au i te reira mai te au i tei ti’a ra, nō te Mesia, ’e nō te maita’i o tō mātou mau ta’ata.

5 ’E nō te fa’aro’o ’e te onoono rahi, i fa’a’ite-mau-hia ai ia mātou te mau mea nō ni’a i tō mātou ra mau ta’ata, ’e te mau mea ho’i e tupu i ni’a ia rātou.

6 ’E ’ua fāri’i ato’a ho’i mātou e rave rahi mau heheura’a, ’e te vārua ho’i nō te mau tohura’a e rave rahi ; nō reira ’ua ’ite mātou i te parau nō ni’a i te Mesia ’e tōna ra bāsileia ’o tē tae mai.

7 Nō reira ’ua ’ohipa māite mātou i rotopū i tō mātou ra mau ta’ata, ’ia ti’a ia mātou ’ia fa’aitoito ia rātou ’ia haere mai i te Mesia, ’e ’ia fāri’i i te maita’i o te Atua, ’ia ō rātou i roto i tōna ra fa’aeara’a ; ’o te tapu ho’i ’oia i roto i tōna ra riri ’ū’ana ’e ’aita rātou e ō i reira, mai i te fa’ao’ō’ora’a i te mau mahana nō te fa’ahemara’a, ’a pārahi ai te mau tamari’i o ’Īserā’ela i te mēdēbara ra.

8 Nō reira, teie tō mātou hina’aro i te Atua, ’ia ti’a ia mātou ’ia fa’aitoito i te mau ta’ata ato’a ’eiaha e mārō atu i te Atua, ’eiaha e fa’atupu i tōna riri, ’ia ti’aturi rā te mau ta’ata ato’a i te Mesia, ’e ’ia feruri i tōna ra pohe, ’e ’ia fa’a’oroma’i i tōna ra sātauro ’e ’ia fa’a’oroma’i ato’a i te hāmani-’ino-ra’a o tō te ao nei ; nō reira, i itoito ai au, ’o Iakoba, i te ha’apa’ora’a i te fa’auera’a a tō’u ra tua’ana o Nephi.

9 I teienei, ’ua ruhiruhiā ihora ’o Nephi, ’e ’ua ’ite ho’i ’oia ē, ’ua fātata ’oia i te pohe ; nō reira, ’ua fa’atāhinu ihora ’oia i te hō’ē ta’ata ’ei ari’i ’e ’ei tāvana ho’i i ni’a i tōna ra mau ta’ata i teienei, mai te au i te mau fa’aterera’a a te mau ari’i ra.

10 ’Ua here roa te mau ta’ata ia Nephi, nō te mea ’ua riro ’oia ’ei pāruru maita’i nō rātou, ’e i rave na ho’i ’oia i te ’o’e a Labana nō te pāruru ia rātou, ’e ’ua ’ohipa ho’i ’oia nō tō rātou ra maita’i ē hope noa atu tōna ra pu’e mahana—

11 Nō reira, ’ua hina’aro te mau ta’ata ’ia ha’amana’o noa i tōna i’oa. ’E te feiā ’o tē fa’atere ’ei mono nōna ra, ’ua ma’irihia ïa tō rātou ra i’oa e te mau ta’ata, ’o Nephi piti, ’o Nephi toru, ’e ’ua nā reira-noa-hia, mai te au i te mau fa’aterera’a a te mau ari’i ; ’e ’ua ma’irihia tō rātou i’oa mai te reira te huru ’e te mau ta’ata, noa atu te huru o tō rātou ihora i’oa mau.

12 ’E i muri a’era, ’ua pohe ihora Nephi.

13 ’E i teienei, te mau ta’ata e ’ere i te ’āti Lamana, nō te mau ’āti Nephi ïa ; ’āre’a rā ’ua parauhia tō rātou mau i’oa te mau ’āti Nephi, te mau ’āti Iakoba, te mau ’āti Iosepha, te mau ’āti Zorama, te mau ’Āti Lamana ’āti Lemuela, ’e te mau ’āti Isema’ela.

14 ’Āre’a rā, mai teie taime atu ’aita vau, ’o Iakoba, e pi’i ia rātou i teie nei mau i’oa, e pi’i rā vau ia rātou ’o tei tītau ’ia ha’amou i te mau ta’ata o Nephi ra, e mau ’āti Lamana ; ’e e pi’i au ia rātou ’o tei fa’ahoa ia Nephi, e mau ’āti Nephi ; ’e ’aore rā te mau ta’ata o Nephi, mai te au i te mau fa’aterera’a a te mau ari’i ra.

15 ’E i teienei, i muri a’era, i raro a’e i te fa’aterera’a a te ari’i piti, ’ua ha’amata ihora te mau ta’ata o Nephi i te fa’a’eta’eta i tō rātou ’ā’au, ’e i te rave ri’i i te mau ’ohipa parauti’a ’ore, mai tā Davida i rave i tahito ra, ’e mai ia Solomona ato’a ra ho’i, ’e tāna tamaiti, i te hina’arora’a e rave rahi mau vahine ’e mau vahine tāvini.

16 ’Oia ïa, ’ua ha’amata ho’i rātou i te ’imi i te ’auro ’e te ’ārio e rave rahi, ’e ’ua ha’amata rātou i te fa’ateitei-ri’i-hia i te te’ote’o.

17 Nō reira, ’ua a’o atu vau, ’o Iakoba, ’ia rātou i teie nei mau parau, ’a ha’api’i ai au ia rātou i roto i te hiero, i muri mai i tō’u fāri’ira’a i tō’u pi’ira’a nō ’ō mai i te Fatu ra.

18 ’Ua fa’atōro’ahia na ho’i au o Iakoba, e tō’u taea’e ato’a ho’i o Iosepha, ’ei tahu’a ’e ’ei ’orometua nō teie nei mau ta’ata, e te rima o Nephi.

19 ’E ’ua fa’a’ohipa māite māua i tō māua tōro’a i te Fatu, i te amora’a i te hōpoi’a i ni’a ia māua iho, ē tae noa atu i te mau hara a te mau ta’ata i ni’a i tō māua iho upo’o mai te mea ’aita māua e ha’api’i ia rātou i te parau a te Atua ma te itoito mau ; nō reira, i ’ohipa ai māua ma tō māua pūai, ’ia ’ore tō rātou toto e tae mai i ni’a i tō māua mau ’ahu ; ’e ’ia ’ore māua e nā reira i te rave, e tae tō rātou toto i ni’a i tō māua mau ’ahu, ’e e ’ore māua e ti’a ma te pōra’o ’ore i te mahana hope’a ra.