1 Inaha, e tō’u mau taea’e, ’aita ānei ’outou i ha’amana’o i te tai’ora’a i te mau parau a te peropheta Zenosa, ’o tāna i parau i te ’utuāfare nō ’Īserā’ela, i te nā-’ō-ra’a ē :

2 ’A fa’aro’o mai, ’outou e te ’utuāfare nō ’Īserā’ela, ’a fa’aro’o mai i te parau nā’u nei, te hō’ē peropheta nā te Fatu.

3 Inaha ho’i, tē nā ’ō mai ra te Fatu : E fa’aau vau ia ’oe, e te ’utuāfare nō ’Īserā’ela, i te hō’ē tumu ’ōlive ’atu’atuhia, tā te hō’ē ta’ata i rave ’e i ’atu’atu i roto i tāna ra ’ō vine ; e tupu a’era te reira, e pa’ari atu ra, e ha’amata ihora i te ha’apohe.

4 ’E i muri a’era, ’ua haere atu ra te Fatu o te ’ō vine, ’e ’ua ’ite ihora ’oia ē tē ha’amata ra tāna tumu ’ōlive i te ha’apohe ; ’e ’ua parau a’era ’oia : E tope au i te reira, e ’ūtaru, ’e e ’atu’atu i te reira, penei a’e ’o te ’ōteo mai te mau ’āma’a ri’i ’āpī, ’e ’aita te reira e pohe.

5 ’E i muri a’era, ’ua tope ihora ’oia i te reira, ’ua ’ūtaru ihora i te reira, ’e ’ua ’atu’atu ihora ho’i i te reira mai te au i tāna ra parau.

6 ’E i muri a’era, ’ia hope a’era e rave rahi mahana, ’ōteo ri’i mai ra te mau ’āma’a ri’i ’e te ’āpī ra ; inaha rā, ’ua pohe ihora te ’ōmou.

7 ’E i muri a’era, ’ua ’ite atu ra te fatu o te ’ō vine i te reira, ’e ’ua parau atu ra ’oia i tōna tāvini : E ’oto vau ’ia ’ere au i teie nei tumu rā’au ; nō reira, ’a haere ’oe, ’e ’a rave mai i te mau ’āma’a o te tumu ’ōlive ’ōviri, ’e ’a ’āfa’i mai i te reira iā’u nei, ’e e ’ōfene ’ē tāua i taua mau ’āma’a rarahi ’e te ’ōriorio ra, ’e e huri taua i te reira i roto i te auahi ’ia pa’apa’a.

8 ’E inaha, tē nā ’ō mai ra te Fatu o te ’ō vine ra, e hōpoi ’ē atu vau i teie mau ’āma’a ri’i ’āpī e rave rahi, ’e e poi au i te reira i te vāhi tā’u e hina’aro ; e noa atu e pohe te a’a o teie nei tumu rā’au, e ti’a iā’u ’ia fa’aherehere i te mā’a nō te reira nā’u iho ; nō reira, e rave mai au i teie mau ’āma’a ri’i ’āpī, ’e e poi ai au i te reira i te vāhi tā’u e hina’aro.

9 ’A rave ’oe i te mau ’āma’a o te tumu ’ōlive ’ōviri ra, ’e ’a poi i te reira i te vāhi o taua mau ’āma’a mau ra ; ’e teie ’o tā’u i tāpū iho nei, e huri au i te reira i roto i te auahi ’ia pa’apa’a, ’ia ’ore te reira ’ia fa’aapiapi i tā’u ’ō vine.

10 ’E i muri a’era, ’ua rave te tāvini o te Fatu o te ’ō vine ra mai te au i te parau a te Fatu o te ’ō vine ra, ’e ’ua poi ihora ’oia i te mau ’āma’a o te tumu ’ōlive ’ōviri ra.

11 ’E ’ua fa’aue ihora te Fatu o te ’ō vine ’ia ’ūtaruhia ’e ’ia topehia ’e ’ia ’atu’atuhia te reira, i te nā-’ō-ra’a mai i tōna tāvini : E ’oto vau ’ia pohe teie nei tumu rā’au ; nō reira, i nā reira ai au penei a’e ’o te fa’aora vau i te mau a’a nō te reira ’ia ’ore te reira ’ia pohe, ’ia ti’a iā’u ’ia fa’aora i te reira nō’u.

12 Nō reira, ’a haere atu ’oe ; ’a tīa’i i te tumu rā’au, e ’atu’atu i te reira mai te au i tā’u ra mau parau.

13 E tanu vau i teie i te pae ātea ’ē o tā’u ’ō vine, i te vāhi tā’u e hina’aro, ’aita tā ’oe e parau i te reira ; ’e e nā reira vau ’ia ti’a iā’u ’ia fa’aora i te mau ’āma’a mau nō taua tumu rā’au ra nā’u iho ; ’e ’oia ato’a, ’ia ha’apu’e au i te mā’a nō te reira i te tau mau ra nā’u iho ; ’e ’ua ’oto ho’i au ’ia pohe teie tumu rā’au ’e tōna ato’a ra mā’a.

14 ’E i muri a’era, ’ua haere atu ra te Fatu o te ’ō vine i tōna haere’a, ’e ’ua huna atu ra ’oia i te mau ’āma’a mau o te tumu ’ōlive ’atu’atuhia ra i te mau pae ātea ’ē roa o te ’ō vine ra, te tahi ’āma’a i te tahi pae, ’e te tahi ’āma’a i te tahi pae, mai te au i tōna ra hina’aro ’e tōna ra mana’o.

15 ’E i muri a’era, ’ia maoro te tau, ’ua parau atu ra te Fatu o te ’ō vine i tōna ra tāvini : Mai e haere taua i raro i te ’ō vine, e ’ohipa tāua i roto i te ’ō vine.

16 ’E i muri a’era, ’ua haere atu ra te Fatu o te ’ō vine e tōna ra tāvini ato’a i raro i te ’ō vine e rave i te ’ohipa. ’E i muri a’era, ’ua parau mai ra te tāvini i tōna Fatu : Inaha, ’a hi’o mai na ; a hi’o na i te tumu rā’au.

17 ’E i muri a’era, ’ua hi’o atu ra te Fatu o te ’ō vine ’e ’ua ’ite atu ra ’oia i te tumu rā’au i poihia i te mau ’āma’a o te ’ōlive ’ōviri ra ; ’e ’ua tupu te reira ’e tē fa’ahotu mai ra i te mā’a. ’E ’ua ’ite a’era ’oia ē e mea maita’i te reira ; ’e te mā’a nō te reira mai tō te mā’a mau ïa.

18 ’E ’ua parau atu ra ’oia i te tāvini : Inaha, ’ua roa’a i te mau ’āma’a o te tumu ’ōlive ’ōviri ra te pape o te a’a ra, ’e ’ua tupu taua a’a ra i te pūai rahi ; ’e nō te pūai rahi o taua a’a ra i fa’ahotu mai ai te mau ’āma’a ’ōviri ra i te mā’a mau. I teienei, ’āhiri ’aita taua i poi i teie nei mau ’āma’a, ’ua pohe taua tumu rā’au ra. ’E i teienei, inaha, e ha’apu’e au i te mā’a e rave rahi tā te tumu rā’au i fa’ahotu mai ra ; ’e e ha’apu’e au i te mā’a nō te reira nā’u iho, nō te tau au ra.

19 ’E i muri a’era, ’ua parau atu ra te Fatu o te ’ō vine i te tāvini : ’A haere mai na, e haere taua i te pae ātea ’ē o te ’ō vine nei, ’e e hi’o taua ’e ’aita ānei te mau ’āma’a mau o te tumu rā’au i fa’ahotu rahi ato’a mai i te mā’a, ’ia ti’a iā’u ia ha’apu’e i te mā’a nō te reira nā’u iho nō te tau au ra.

20 ’E i muri a’era, ’ua haere atu ra rāua i te pae tā te fatu i huna i te mau ’āma’a mau nō te tumu rā’au, ’e ’ua parau atu ra ’oia i te tāvini : ’A hi’o na i teie ; ’e ’ua ’ite a’era ’oia ē ’ua fa’ahotu mai tō te mātāmua ra e rave rahi mā’a ; ’e ’ua ’ite ato’a a’era ho’i ’oia e mea maita’i. ’E ’ua parau atu ra ’oia i te tāvini : ’A rave i te mā’a nō ni’a i te reira, ’e ’a ha’apu’e nō te tau au ra, ’ia ti’a iā’u ’ia fa’aherehere i te reira nā’u iho ; inaha ho’i, tē nā ’ō mai ra ’oia : E mea maoro tō’u ’atu’atura’a i te reira, ’e ’ua fa’ahotu mai te reira i te mau mā’a e rave rahi.

21 ’E i muri a’era, ’ua parau mai ra te tāvini i tōna ra Fatu : E aha ’oe i haere mai ai i’ō nei nō te tanu i teie nei tumu rā’au, ’e ’aore rā i teie ’āma’a o te tumu rā’au ? Inaha ho’i, e vāhi ’ino roa teie nō te fenua tā’āto’a o tā ’oe ’ō vine.

22 ’E ’ua parau atu ra te Fatu o te ’ō vine iāna : ’Eiaha ’oe e a’o mai iā’u nei ; ’ua ’ite ho’i au ē, e mea ’ino te repo i’ō nei ; nō reira, ’ua parau atu vau ia ’oe ē, ’ua ’atu’atu maoro vau i te reira, ’e ’ua ’ite ho’i ’oe ē, ’ua fa’ahotu rahi mai te reira i te mā’a.

23 ’E i muri a’era, ’ua parau atu ra te Fatu o te ’ō vine i tōna tāvini : Hi’o mai na ; inaha, ’ua tanu ato’a vau i te tahi ā ’āma’a nō taua tumu rā’au ra ; ’e ’ua ’ite ho’i ’oe ē, ’ua hau teie vāhi i te ’ino i tō te mātāmua ra. ’A hi’o na rā i te tumu rā’au. E mea maoro tō’u ’atu’atura’a i te reira, ’e ’ua fa’ahotu rahi mai te reira i te mā’a ; nō reira, ’a pāfa’i i te reira, ’e ’a ha’apu’e nō te tau au ra, ’ia ti’a iā’u ’ia fa’aherehere i te reira nā’u iho.

24 ’E i muri a’era, ’ua parau fa’ahou atu ra te Fatu o te ’ō vine i tōna tāvini : Hi’o mai na, inaha ’ua tanu vau i te tahi ā ’āma’a ; inaha ’ua ’atu’atu ato’a ho’i au i te reira, ’e ’ua fa’ahotu mai te reira i te mā’a.

25 ’E ’ua parau atu ra ’oia i te tāvini : Hi’o mai na ’e ’a hi’o na i tō te hope’a. Inaha, ’ua tanu vau i teie i roto i te vāhi maita’i o te repo ; ’e ’ua ’atu’atu maoro vau i te reira, ’e ’ua fa’ahotu mai te tahi pae ana’e o teie tumu rā’au i te mā’a mau ; ’e te tahi atu pae o te tumu rā’au ’ua fa’ahotu mai ïa i te mā’a ’ōviri ; inaha, hō’ē ā tā’u ’atu’atura’a i teie tumu rā’au i te tahi atu mau tumu rā’au.

26 ’E i muri a’era, ’ua parau atu ra te Fatu o te ’ō vine i te tāvini : ’A ’ōfene ’ē i te mau ’āma’a tei ’ore i fa’ahotu mai i te mā’a maita’i, ’e ’a huri atu ia rātou i roto i te auahi.

27 Inaha rā, ’ua parau mai ra te tāvini iāna : ’Ia tope tāua i te reira, ’e ’ia ’ūtaru i te reira, ’e ’ia ’atu’atu i te reira ’e ’ia maoro iti a’e, penei a’e ’o te fa’ahotu mai te reira i te mā’a maita’i nā ’oe, ’ia ti’a ia ’oe ’ia ha’apu’e i te reira nō te tau au ra.

28 ’E i muri a’era, ’ua ’atu’atu ihora te Fatu o te ’ō vine ’e te tāvini ato’a o te Fatu o te ’ō vine ra i te mau mā’a ato’a o te ’ō vine ra.

29 ’E i muri a’era, i te ma’irira’a te hō’ē tau roa, ’e ’ua parau atu ra te Fatu o te ’ō vine i tōna tāvini : ’A haere mai na, e haere tāua i raro i te ’ō vine, ’ia ti’a ia tāua ’ia ’ohipa fa’ahou i roto i te ’ō vine ra. Inaha ho’i, teie mai nei te tau, ’e ’ua fātata roa mai te hope’a ; nō reira, ’ia ha’apu’e au i te mā’a nā’u iho nō te tau au e ti’a ai.

30 ’E i muri a’era, ’ua haere atu ra te Fatu o te ’ō vine ’e te tāvini ato’a i raro i te ’ō vine ; ’e ’ua tae atu ra rāua i te tumu rā’au i ’ōfene-’ē-hia tōna ra mau ’āma’a mau, ’e i poihia ho’i i te mau ’āma’a ’ōviri ra ; ’E inaha, ’ua ’ī roa taua tumu rā’au ra i te mau huru mā’a ato’a.

31 ’E i muri a’era, ’ua tāmata ihora te Fatu o te ’ō vine i te mā’a, ē hope roa a’e te mau huru ato’a ra. ’E ’ua parau atu ra te Fatu o te ’ō vine : Inaha, e mea maoro tō taua ’atu’atura’a i teie nei tumu rā’au, ’e ’ua ha’apu’e au i te mā’a e rave rahi nā’u iho nō te tau au ra.

32 Inaha rā, i teie nei tau ’ua fa’ahotu rahi mai te reira i te mā’a, ’e ’aita roa hō’ē a’e mā’a maita’i nō te reira. ’E inaha, ’ua rau te huru o te mau mā’a ’ino ato’a ; ’e ’aita roa tā’u e faufa’a i te reira, rahi noa atu ā tā taua ’ohipa ; ’e i teienei, ’ua ’oto vau ’o te ’ere au i teie tumu rā’au.

33 ’E ’ua parau atu ra te Fatu o te ’ō vine i te tāvini : E aha tā taua e rave i teie nei tumu rā’au, ’ia fa’aherehere fa’ahou vau i te mā’a maita’i nā’u iho nei ?

34 ’E ’ua parau mai ra te tāvini i tōna Fatu : Inaha, nō te mea i poi ’oe i te mau ’āma’a o te tumu ’ōlive ’ōviri ra, ’ua tauturu ïa te reira i te mau a’a i ora ai te reira ’e ’aita i pohe ; nō reira, tē ’ite nei ïa ’oe ē tē maita’i noa ra ā te reira.

35 ’E i muri a’era, ’ua parau atu ra te Fatu o te ’ō vine i tōna tāvini : ’Aita roa tō teie tumu rā’au e faufa’a iā’u nei, ’e ’aita ato’a ho’i tō te mau a’a e faufa’a iā’u nei mai te mea e fa’ahotu noa mai te reira i te mā’a ’ino.

36 ’Āre’a rā, ’ua ’ite au ē, e mea maita’i te mau a’a, ’e ’ua fa’aherehere ho’i au i te reira nō tā’u iho ’ōpuara’a ; ’e nō tō rātou pūai rahi ’ua fa’ahotu mai te reira i te mā’a mau nā ni’a mai i te mau ’āma’a ’ōviri ra.

37 Inaha ho’i, ’ua tupu mai te mau ’āma’a ’ōviri ra, ’e ’ua hau tō rātou pūai i tō te mau a’a nōna ra ; ’e nō te mea ’ua hau te pūai o te mau ’āma’a ’ōviri i tō te mau a’a nōna ra, ’ua fa’ahotu mai te reira i te mā’a ’ino e rave rahi ; ’e nō te mea ho’i ’ua fa’ahotu mai te reira i te mā’a ’ino e rave rahi, ’ua ’ite ’oe ē, tē tupu noa ra te pohe ; ’e e ’ino vave te reira, ’e e hurihia i roto i te auahi, maori rā ’ia ’imi taua i te rāve’a nō te fa’aherehere i te reira.

38 ’E i muri a’era, ’ua parau atu ra te Fatu o te ’ō vine i tōna tāvini : E haere tāua i raro i te pae ātea ’ē o te ’ō vine, ’ia ’ite ē ’ua fa’ahotu ato’a mai ānei te mau ’āma’a mau i te mā’a ’ino.

39 ’E i muri a’era, ’ua haere atu ra rāua i raro i te pae ātea ’ē o te ’ō vine. ’E i muri a’era, ’ua ’ite a’era rāua ē, ’ua ’ino roa ato’a te mā’a o te mau ’āma’a mau ; ’oia ïa, te mātāmua ’e te piti ’e te hope’a ato’a ho’i ; ’e ’ua ’ino roa ho’i rātou ato’a ra.

40 ’E ’ua vī taua pae o te tumu rā’au tei fa’ahotu mai i te mā’a maita’i i te mā’a ’ino o te tumu rā’au hope’a ra, i ’ōriorio ai taua ’āma’a ra ’e ’ua pohe roa.

41 ’E i muri a’era, ’ua ’oto ihora te Fatu o te ’ō vine, ’e ’ua parau atu ra i te tāvini : E aha atu ā tei ti’a iā’u ’ia rave nō tā’u ’ō vine ?

42 Inaha, ’ua ’ite na vau ē, ’ua ’ino te mau mā’a ato’a nō tā’u ’ō vine, maori rā ’o teie. ’E i teienei, teie tei fa’ahotu na i te mā’a maita’i, ’ua ’ino roa ato’a ïa ; ’e i teie nei, ’ua riro te mau tumu rā’au ato’a nō tā’u nei ’ō vine ’ei mea ’ino ’e ’ua ti’a roa i te reira ’ia tāpūhia i raro ’e ’ia hurihia i roto i te auahi.

43 ’E ’a hi’o na i teie tumu rā’au hope’a nei, ’ua ’ōriorio tōna ’āma’a, ’e ’ua tanu ho’i au i te reira i roto i te repo maita’i ; ’oia ïa, i te vāhi maita’i roa a’e iā’u i te tahi atu mau vāhi ato’a nō tā’u ’ō vine.

44 ’E ’ua ’ite ho’i ’oe ē, ’ua tāpū ato’a vau i tei fa’aapiapi i teie nei pae fenua, ’ia ti’a iā’u ’ia tanu i teie nei tumu rā’au i te reira vāhi.

45 ’E ’ua ’ite ho’i ’oe ē, ’ua fa’ahotu mai te tahi pae i te mā’a maita’i, ’e ’ua fa’ahotu mai ho’i te tahi pae i te mā’a ’ino ; ’e nō te mea ’aita vau i ’ōfene ’ē i te mau ’āma’a ’ino nō te reira ’e i huri i roto i te auahi, inaha, ’ua vī te ’āma’a maitata’i ia rātou ’e ’ua ’ōriorio.

46 ’E i teienei, inaha, noa atu ā ē ’ua ha’apa’o māite tāua i tā’u nei ’ō vine, ’ua ’ino tō te reira mau tumu rā’au, ’e ’aita rātou i fa’ahotu mai i te mā’a maita’i ; ’e ’ua hina’aro vau ’ia fa’aherehere i teie, ’ia ha’apu’e au i te mā’a nā’u iho nō te tau au ra. Inaha rā, ’ua riro rātou mai te tumu ’ōlive ’ōviri ra te huru, ’e ’aita tō te reira e faufa’a, maori rā ’ia tāpūhia i raro ’e ’ia hurihia i roto i te auahi ; ’e ’ua ’oto vau ’ia ’ere au i te reira.

47 ’Āre’a rā, e aha atu ā te ti’a iā’u ’ia rave i roto i tā’u ’ō vine ? ’Ua fa’aea ānei tō’u rima, ’e ’aita vau i ’atu’atu i te reira ? ’Aita roa, ’ua ’atu’atu vau i te reira, ’e ’ua ’ūtaru vau i te reira, ’e ’ua tope au i te reira, ’e ’ua tāpara ho’i au i te reira ; ’e ’ua fa’atoro atu vau i tō’u rima mai te mātāmua mai ā, ’e tē fātata mai nei te hope’a. ’E ’ua ’oto vau ’ia tāpū ’ē atu vau i te mau tumu rā’au ato’a o tā’u ’ō vine, ’e ’ia huri i te reira i roto i te auahi ’ia pau. ’O vai ïa tei fa’a’ino i tā’u nei ’ō vine ?

48 ’E i muri a’era, ’ua parau mai ra te tāvini i tōna Fatu : E ’ere ānei ïa nō te teitei roa o tā ’oe ’ō vine—’e ’aita ānei te mau a’a maitata’i i vī i te reira mau ’āma’a ? ’E nō te mea ’ua vī te reira mau a’a ra i te mau ’āma’a, inaha, ’ua rahi tō te ’āma’a tupura’a i tō te pūai o te mau a’a, i rahi ai tō rātou iho pūai. Inaha, tē parau atu nei au, e ’ere ānei teie te mea i ’ino ai te mau tumu rā’au o tā ’oe nei ’ō vine ?

49 ’E i muri a’era, ’ua parau atu ra te Fatu o te ’ō vine i te tāvini : E haere tāua e tāpū ’ē atu i te mau tumu rā’au o te ’ō vine nei ’e ’a huri atu ai ia rātou i roto i te auahi, ’ia ’ore rātou e fa’aapi i te fenua o tā’u ’ō vine, ’e ’ua pau ho’i tā’u mau rāve’a ato’a. Nāhea atu ā ho’i au i taua ’ō vine nā’u ra ?

50 ’Āre’a rā, inaha, ’ua parau mai ra te tāvini i te Fatu nō te ’ō vine : ’A fa’aherehere i te reira ’ia maoro iti a’e.

51 ’E ’ua parau atu ra te Fatu : ’Oia ïa, e fa’aherehere au i te reira ’ia maoro iti a’e, nō te mea e ’oto ho’i au ’ia ’ere au i te mau tumu rā’au o tā’u ’ō vine.

52 Nō reira, e rave taua i te mau ’āma’a o teie nei mau tumu rā’au tā’u i tanu i te mau pae ātea ’ē o tā’u ’ō vine, ’e e poi tāua ia rātou i ni’a i te tumu rā’au nō reira mai rātou ra ; ’e e ’ōfene ’ē atu tāua i taua mau ’āma’a ra tei fa’ahotu mai i te mā’a ’ava’ava roa i taua tumu rā’au ra, ’e ’ia poi i te mau ’āma’a mau o taua tumu rā’au ra ’ei mono ia rātou.

53 E nā reira vau ’ia ’ore te tumu rā’au ’ia pohe, penei a’e ’o te fa’aora vau i tōna ra mau a’a nā’u iho nō tā’u iho ’ōpuara’a.

54 ’E inaha, tē ora nei ā te mau a’a o te mau ’āma’a mau o te tumu rā’au tā’u i tanu i te vāhi tā’u i hina’aro ra ; nō reira ’ia fa’aora ato’a vau i te reira nō tā’u iho ’ōpuara’a, ’e e rave mai au i te mau ’āma’a o teie nei tumu rā’au, ’e e poi au i te reira i ni’a i taua mau a’a mau ra. ’Oia ïa, e poi au i te mau ’āma’a rā’au tumu ra i ni’a ia rātou, ’ia fa’aora ato’a vau i te mau a’a nā’u iho, ’e ’ia nava’i tō rātou pūai, e fa’ahotu mai paha ïa rātou i te mā’a maita’i nā’u, ’e e noa’a ā paha te hanahana iā’u nō te mā’a o tā’u ’ō vine.

55 ’E i muri a’era, ’ua rave ihora rāua i te ’āma’a o te tumu ’ōlive mau tei riro ’ei tumu ’ōlive ’ōviri, ’e ’ua poi rāua i te reira i ni’a i te mau tumu ’ōlive mau ’o tei riro ato’a ’ei tumu ’ōlive ’ōviri.

56 ’E ’ua rave ato’a ho’i rāua i te ’āma’a o te mau tumu ’ōlive mau tei riro ’ei tumu ’ōlive ’ōviri, ’e ’ua poi rāua ia rātou i ni’a i tō rātou tumu rā’au tumu mau.

57 ’E ’ua parau atu ra te Fatu o te ’ō vine i te tāvini : ’Eiaha e ’ōfene ’ē atu i te mau ’āma’a ’ōviri o te mau tumu rā’au, maori rā ’o tei ’ava’ava roa ; ’e i roto i te reira e poi ’oe mai te au i tā’u i parau ra.

58 ’E e ’atu’atu fa’ahou tāua i te mau tumu rā’au o te ’ō vine, ’e e tope tāua i te mau ’āma’a ; ’e e ’ōfene ’ē atu tāua i te mau ’āma’a nō te mau tumu rā’au ’o tei ’ino, ’e ’ia pohe ho’i e ti’a ai, ’e ’ia huri atu i te reira i roto i te auahi.

59 E nā reira vau, penei a’e ’o te tupu tō te mau a’a pūai nō tō rātou iho maita’i ; ’e ’ia vī tō tei ’ino i tō tei maita’i, nō te tauira’a i te mau ’āma’a ra.

60 ’E nō te mea ’ua fa’aora vau i te mau ’āma’a mau ’e te mau a’a ato’a ho’i, ’e ’ua poi fa’ahou ho’i au i te mau ’āma’a mau i ni’a i tō rātou tumu rā’au tumu mau ra, ’e ’ua fa’aora ho’i i te mau a’a o tō rātou tumu rā’au tumu mau ra, penei a’e ’o te fa’ahotu fa’ahou mai te reira i te mau tumu rā’au o tā’u ’ō vine i te mā’a maita’i ; ’e ’ia ’oa’oa fa’ahou vau i te mā’a nō tā’u ’ō vine, ’e penei a’e ’o te ’oa’oa roa vau i te mea ’ua fa’aora vau i te mau a’a ’e te mau ’āma’a ato’a o taua mā’a mātāmua ra.

61 Nō reira, ’a haere, ’a pi’i atu i te mau tāvini, ’ia ’ohipa māite tātou ma tō tātou pūai i roto i te ’ō vine, ’ia fa’aineine taua i te ’ē’a, ’e ’ia fa’atupu fa’ahou vau i te mā’a mau, te hō’ē mā’a maita’i mau ’e tei hau i te maita’i i te mau mā’a ato’a.

62 Nō reira, ’ia haere tāua e ’ohipa ma tō taua pūai i teie nei tau hope’a, inaha ho’i, tē fātata mai nei ho’i te hope’a, ’e ’o teie te taime hope’a e tope ai au i tā’u ’ō vine.

63 ’A poi na i te mau ’āma’a ; ’a ha’amata i te pae hope’a ra ’ia riro te reira ’ei mātāmua, ’e ’ia riro te mātāmua ’ei hope’a, ’e ’a ’ūtaru nā pīha’i iho i te mau tumu rā’au, i te mea tahito ’e te mea ’āpī ato’a ho’i, i tō te mātāmua ’e tō te hope’a ; i te mea hope’a ’e te mea mātāmua, ’ia hō’ē a’e tō te reira ’atu’atu-fa’ahou-ra’a-hia i te tau hope’a ra.

64 Nō reira, ’a ’ūtaru fa’ahou nā pīha’i iho ia rātou, ’a tope fa’ahou ia rātou, ’e ’a tāpara fa’ahou ia rātou nō te taime hope’a, i te mea tē fātata mai nei te hope’a. ’E mai te mea e tupu mai teie mau ’āma’a i poihia iho nei, ’e e fa’ahotu mai ho’i i te mā’a mau, ’ei reira ’oe e fa’aineine ai i te vāhi nō rātou ’ia tupu rātou.

65 ’E ’ia tupu te reira, e tāpū ’ē ’oe i te mau ’āma’a e fa’ahotu mai i te mā’a ’ava’ava, mai te au i te pūai ’e te rahi ho’i o te ’āma’a maita’i ra ; ’eiaha ’oe e tāpū ’ē i te mau ’āma’a ’ino ato’a i te taime hō’ē, ’o te hau te pūai o te mau a’a i tō tei poihia ra, ’e ’a pohe ai tei poihia, ’e ’ua ’ere ïa vau i te mau tumu rā’au nō tā’u nei ’ō vine.

66 ’E e ’oto ho’i au ’ia ’ere au i te mau tumu rā’au nō tā’u ’ō vine ; nō reira, e tāpū ’ē atu ’oe i te ’āma’a ’ino mai te au i te tupura’a o te ’āma’a maita’i, ’ia ’aifāito tō te a’a pūai ’e tō te ’āma’a ato’a ho’i, ē tae noa atu ’ua upo’oti’a te maita’i i ni’a a’e i te ’ino, ’e ’ua tāpūhia te ’ino i raro ’e ’ua hurihia i roto i te auahi, ’ia ’ore te reira ’ia fa’aapiapi i tā’u ’ō vine ; e nā reira vau i te fa’aru’e i te ’ino i rāpae’au i tā’u ’ō vine.

67 ’E e poi fa’ahou vau i te mau ’āma’a o te tumu rā’au mau i ni’a i te tumu rā’au mau ;

68 ’E e poi au i te mau ’āma’a o te tumu rā’au mau i ni’a i te mau ’āma’a mau o te tumu rā’au ra ; e nā reira vau i te tā’ati fa’ahou ia rātou, ’ia fa’ahotu mai rātou i te mā’a mau, ’e ’ia riro rātou ’ei hō’ē.

69 ’E e fa’aru’ehia te mea ’ino, ’oia ïa, i rāpae’au i te fenua tā’āto’a nō tā’u ’ō vine ; inaha ho’i, teie ana’e tā’u topera’a i tā’u ’ō vine.

70 ’E i muri a’era, ’ua tono atu ra te Fatu o te ’ō vine i tōna tāvini ; ’e ’ua haere atu ra te tāvini ’e ’ua rave ihora mai tā te Fatu i fa’aue mai iāna, ’e ’ua arata’i mai ra ’oia i te tahi atu mau tāvini ; ’e ’aita ho’i rātou i rahi.

71 ’E ’ua parau atu ra te Fatu o te ’ō vine ia rātou : ’A haere ’outou, ’e ’a ’ohipa i roto i te ’ō vine, ma tō ’outou pūai. Inaha ho’i, ’o te taime hope’a teie e ’atu’atu ai au i tā’u ’ō vine ; nō te mea tē fātata roa mai nei ho’i te hope’a, ’e tē fātata mai nei te tau ; ’e ’ia ’ohipa ’outou ma tō ’outou pūai ’e ’o vau ato’a, e noa’a te ’oa’oa ia ’outou i te mā’a ’o tā’u e ha’apu’e nā’u iho i te tau e fātata roa mai nei.

72 ’E i muri a’era, ’ua haere atu ra te mau tāvini e ’ohipa ihora ma tō rātou pūai ; ’e ’ua ’ohipa ato’a ho’i te Fatu o te ’ō vine i pīha’i iho ia rātou ; ’e ’ua ha’apa’o rātou i te mau fa’auera’a a te Fatu nō te ’ō vine i te mau mea ato’a.

73 ’E ’ua tupu fa’ahou mai ra te mā’a mau i roto i te ’ō vine ; ’e ’ua tupu ato’a te mau ’āma’a mau ma te ruperupe maita’i ho’i ; ’e te mau ’āma’a ’ōviri ra, ’ua ’ōfene-’ē-hia ’e ’ua fa’aru’ehia ; ’e ’ua tāpe’a ihora rātou i te a’a ’e te ni’ara’a ’ia ’aifāito noa mai te au i tō rātou ra pūai.

74 ’E ’ua nā reira rātou i te ’ohipara’a ma te itoito, mai te au i te mau fa’auera’a a te Fatu nō te ’ō vine ra, ē tae noa atu ’ua fa’aru’ehia tei ’ino i rāpae’au i te ’ō vine, ’e ’ua fa’aherehere te Fatu i te mau tumu rā’au, ’e ’ua fa’ahotu fa’ahou mai i te mā’a mau ; ’e ’ua riro te reira mai te tino hō’ē ; ’e ’ua ’aifāito te huru o te mau mā’a ; ’e ’ua fa’aherehere ho’i te Fatu nō te ’ō vine nāna iho i te mā’a mau, ’o tei maita’i roa iāna mai te mātāmua mai ā.

75 ’E i muri a’era, ’ua ’ite a’era te Fatu nō te ’ō vine ē, e mea maita’i tōna mā’a, ’e ’aita tāna ’ō vine i ’ino, ’ua pi’i atu ra ’oia i tōna mau tāvini, ’e ’ua parau atu ra ia rātou : Inaha, ’o te taime hope’a teie tā tātou e ’atu’atu i tā’u nei ’ō vine ; ’e ’ua ’ite ho’i ’outou ē, ’ua rave au mai te au i tō’u hina’aro ; ’e ’ua fa’aherehere au i te mā’a mau, ’e e mea maita’i ïa te reira, ’oia ïa, mai tei te mātāmua ra. ’E e ao tō ’outou ; nō te mea ’ua itoito ’outou i te ’ohipara’a i pīha’i iho iā’u i roto i tā’u ’ō vine, ’e ’ua ha’apa’o ’outou i tā’u mau fa’auera’a, ’e ’ua fa’atupu fa’ahou ’outou i te mā’a mau iā’u, ’ia ’ore ā tā’u ’ō vine ’ia ’ino ’e ’ia fa’aru’ehia tei ’ino, inaha, e noa’a te ’oa’oa ia ’outou i pīha’i iho iā’u nei, nō te mā’a o tā’u ’ō vine.

76 Inaha ho’i, e mea maoro te tau e ha’apu’e ai au i te mā’a nō tā’u ’ō vine nā’u iho, nō te tau i fātata roa mai ; ’e nō te taime hope’a teie tā’u e ’atu’atu i tā’u nei ’ō vine, ’e tā’u e tope, ’e tā’u e ’ūtaru nā pīha’i iho, ’e tā’u e tāpara i te reira ; nō reira e ha’apu’e ai au nā’u iho i te mā’a, nō te hō’ē tau maoro, mai te au i tā’u i parau ra.

77 ’E ’ia tae mai te tau e tupu fa’ahou mai ai te mā’a ’ino i roto i tā’u ’ō vine, ’ei reira vau e fa’ati’a ai ’ia ha’apu’ehia te maita’i ’e te ’ino ato’a ; ’e e fa’aherehere au i te maita’i nā’u iho, ’e e fa’aru’e atu vau i te ’ino i tōna iho vāhi. ’E i reira e tae mai ai te tau ’e te hope’a ; ’e e fa’ati’a vau ’ia tūtu’ihia tā’u ’ō vine i te auahi.