1 ’E i teienei, inaha, e tō’u mau taea’e, ’ua parau a’enei au ia ’outou ē, e tohu vau, ’e inaha, teie tā’u tohura’a—Te mau mea i parauhia e taua peropheta nei e Zenosa, nō ni’a i te ’utuāfare o ’Īserā’ela, i te fa’aaura’a ia rātou i te tumu rā’au ’ōlive mau ra, e tupu mau ïa.

2 ’E i te mahana e fa’atoro fa’ahou ai ’oia i tōna rima i te piti o te taime nō te ha’aputuputu fa’ahou i tōna ra mau ta’ata, ’o te mahana ïa te reira, ’oia ïa, ’o te taime hope’a ïa e haere mai ai te mau tāvini o te Fatu nā roto i tōna mana nō te ’atu’atu ’e nō te tope i tāna ra ’ō vine ; ’e i muri noa iho i te reira ’ua fātata roa te hope’a i reira.

3 E ao ho’i tō rātou ’o tei rave itoito i te ’ohipa i roto i tāna ra ’ō vine ; ’e e ’anatemara’a rahi ho’i tō rātou ’o tē hurihia i rāpae i tō rātou ihora vahi ! ’E e ’ama ho’i te ao nei i te auahi ra.

4 E aroha rahi ho’i tō tō tātou Atua ia tātou nei, ’e ’ua ha’amana’o ho’i ’oia i te ’utuāfare o ’Īserā’ela, te mau a’a ’e te mau ’āma’a ho’i ; ’e tē fa’atoro noa nei ā ’oia i tōna rima ia rātou ē pō noa atu te mahana ; e feiā ’ā’au ’eta’eta ’e te mārō rātou ; ’āre’a ’o tē ’ore e fa’a’eta’eta i tō rātou ’ā’au, e fa’aorahia ïa i roto i te bāsileia o te Atua ra.

5 Nō reira, e tō’u mau taea’e here, tē tītau atu nei au ia ’outou na ma te parau marū, ’ia tātarahapa ’outou ’e ’ia haere mai ma te ’ōpuara’a pāpū o te ’ā’au, ’a ’ati atu ai i te Atua mai iāna e ’ati mai ia ’outou na. ’E ’a fa’atorohia mai ai tōna rima aroha ia ’outou i roto i te māramarama o te ao, ’eiaha ’outou e fa’a’eta’eta i tō ’outou ’ā’au.

6 ’Oia ïa, mai te mea e fa’aro’o ’outou i tōna reo i teie nei mahana, ’eiaha e fa’a’eta’eta i tō ’outou ’ā’au ; e aha ho’i ’outou e pohe ai ?

7 Inaha ho’i, i muri iho i tō ’outou fa’a’amura’ahia i te parau maita’i a te Atua e pō noa atu te mahana, e fa’ahotu mai ānei ïa ’outou i te mā’a ’ino, ’ia tāpūhia i raro ’e ’ia hurihia ’outou i roto i te auahi ra ?

8 Inaha, e pāto’i ānei ’outou i teie nei mau parau ? E pāto’i ānei ’outou i te mau parau a te mau peropheta ; ’e e pāto’i ānei ho’i ’outou i te mau parau ato’a i parauhia nō ni’a i te Mesia, rahi noa atu ā te ta’ata i parau nō ni’a iāna ra ; ’e e huna ānei ’outou i te parau maita’i a te Mesia, ’e te mana o te Atua, ’e te hōro’ara’a a te Vārua Maita’i, ’e e tinai ānei ho’i ’outou i te Vārua Mo’a, ’e e tāhitohito ānei ho’i i te ’ōpuara’a rahi nō te fa’aora’a ’o tei ha’apa’ohia nō ’outou na ?

9 ’Aita ānei ’outou i ’ite ē, mai te mea e rave ’outou i teie mau mea, nā te mana o te fa’aorara’a ’e te ti’afa’ahoura’a tei roto i te Mesia ra, e arata’i ia ’outou ’ia ti’a atu ma te ha’amā ’e te ’oto ri’ari’a i mua i te ha’avāra’a a te Atua ?

10 ’E mai te au i te mana nō te parauti’a ra, te parauti’a ’o tē ’ore e ti’a ’ia hunahia, e tu’uhia atu ai ’outou i roto i taua roto auahi ’e te gopheri ra, e ’ore roa tōna mau ura e pohe, ’e e pe’e noa atu ho’i tōna au auahi ē a muri noa atu, ’e taua roto auahi ’e te gopheri ra, ’o te māuiui hope ’ore ïa.

11 ’E i teienei, e tō’u mau taea’e here, ’a tātarahapa ’outou, ’e ’a tomo nā roto i te ’ūputa piriha’o, ’e ’a tāmau noa i te haere nā te ’ē’a oaoa, ē tae noa atu i te tau e roa’a ai ia ’outou te ora mure ’ore.

12 ’Ei pa’ari ho’i tō ’outou na ; e aha atu ā te ti’a iā’u ’ia parau atu ?

13 I te pae hope’a, ’a pārahi ’outou ē tae noa atu i te tau e fārerei fa’ahou ai au ia ’outou i mua i te ha’avāra’a au maita’i a te Atua ra, e tā’iri ho’i taua ha’avāra’a ra i te feiā parauti’a ’ore i te mehameha rahi ’e te mata’u rahi. ’Āmene.