Abinadi before King Noah [Si Abinadi sa atubang ni Haring Noe], ni Andrew Bosley

Mayo 13–19: “Kapawa … Nga Indi Gid Magdulom”

Mosias 11–17

Ang dalagko nga sunog nagasugod sa isa ka gamay nga igrab sang kalayo. Si Abinadi ang solo nga tawo nga nagpamatuod batok sa gamhanan nga hari kag sa iya ginharian. Ginsikway ang iya mga pulong sa dako nga bahin, kag ginsentensyahan sia nga mapatay. Pero ang iya panaksihon parte kay Jesucristo, nga amo ang “kapawa … nga indi gid magdulom” (Mosias 16:9), nagpa-igrab sang kon ano sa sulod sang lamharon nga pari nga si Alma. Inang igrab sang pagbag-o amat-amat nga nagdako samtang nagdala si Alma sang madamo nga iban pa sa paghinulsol kag pagtuo kay Jesucristo. Ang kalayo nga nagpatay kay Abinadi napalong sang ulihi, pero ang kalayo sang pagtuo nga gintuga sang iya mga pulong may dalayon nga impluwensya sa mga Nefinhon—kag sa mga tawo nga nagabasa sang iya mga pulong sa karon. Kalabanan sa aton indi makaeksperiyensya sang inagyan ni Abinadi bangud sang aton mga panaksihon, pero kita tanan may tinion nga ang pagsunod kay Jesucristo isa ka pagtilaw sang aton kaisog kag pagtuo. Ayhan ang pagtuon sang panaksihon ni Abinadi magapadako man sang kalayo sang panaksihon kag kaisog sa imo tagipusuon.

Mga Ideya sa Pagtuon sa Puluy-an kag sa Simbahan

Mosias 11–13; 17

Sarang ko tindugan si Jesucristo, bisan pa nga ako lang isa.

Samtang imo ginatun-an ang Mosias 11–13; 17, tan-awa ang mga litrato ni Abinadi sa sining outline. Ano ang imo natun-an parte sa pagtindog bilang saksi ni Cristo? Pwede mo itutok sing partikular ang imo pagtuon sa mga dinalan kag mga pamangkot pareho sini:

• Paano mo ilaragway si Noe kag ang iya katawhan? Ngaa kinahanglan gid sang kaisog para mapaambit ni Abinadi ang mensahe sang Dios sa ila? (tan-awa sa Mosias 11:1–19, 27–29; 12:9–15).

• Paano mo ilaragway si Abinadi? Ano ang naintiendihan ni Abinadi nga nakabulig sa iya nga mangin maisog sa iya testimonya? (tan-awa sa Mosias 13:2–9, 28, 33–35; 17:8–10, 20).

Sang san-o ka nakabatyag nga daw ikaw lang isa ang nagatindog sa pagpangapin sa Manluluwas kag sa Iya ebanghelyo? Paano ka Niya ginbuligan nga mabatyagan nga kaupod mo Sia? Samtang imo ini ginabinagbinag, pwede mo basahon ang panaysayon ni Eliseo kag sang iya lamharon nga suluguon sa 2 Mga Hari 6:14–17. Ano ang nagainspirar sa imo parte sa sining panaysayon?

Pwede mo man pangitaon ang mga pahina 31–33 sang Para sa Kusog sang mga Lamharon: Giya sa Paghimo sang mga Pagpili agud magpangita sang mga dinalan nga nagahatag sa imo sang kaisog para pangapinan ang kamatuoran. Ukon pwede mo man ini himuon sa mga tinaga sang isa ka himno.

Paano mo ipangabuhi ang imo natun-an kay Abinadi?    

Tan-awa man sa Mga Taga-Roma 1:16; 2 Timoteo 1:7–8.

Magtudlo paagi sa Espiritu. “Ang mabaskog nga pagpanudlo sang ebanghelyo wala lamang nagapangayo sang paghanda sang leksyon kundi sang paghanda man sang imo kaugalingon sa espirituhanon [nga] mabatian mo kag masunod ang giya sang Espiritu samtang nagatudlo ka” (Pagtudlo sa Paagi sang Manluluwas, 17).

Mosias 12:19–37

Kinahanglan ko nga ibutang sa akon tagipusuon ang pag-intiendi sang pulong sang Dios.

Pamilyar ang mga pari ni Haring Noe sa pulong sang Dios. Masambit nila ang mga dinalan sa balaan nga mga kasulatan kag nagasiling nga ginatudlo nila ang mga kasuguan. Pero, ang ila mga kabuhi daw indi apektado sang ebanghelyo sang Manluluwas. Ngaa amo sina?

Panumduma ini samtang imo ginabasa ang Mosias 12:19–37. Ano sa banta mo ang buot silingon sang idapat ang imo tagipusuon sa paghangop sang pulong sang Dios? Ano nga mga tinaga ukon mga dinalan ang nagainspirar sa imo nga maghimo sang mga pagbag-o sa imo pamaagi sa pagtuon sang ebanghelyo?

Mosias 13:11–26

Ang mga kasuguan sang Dios dapat masulat sa akon tagipusuon.

Binagbinaga ang obserbasyon ni Abinadi nga ang mga kasuguan “wala masulat sa mga tagipusuon” sang mga pari (Mosias 13:11). Ano ayhan ang buot silingon sining dinalan? Samtang imo ginabasa ang Mosias 13:11–26, pamensara kon bala ining mga kasuguan nasulat na sa imo tagipusuon.

Tan-awa man sa Jeremias 31:31–34; 2 Mga Taga-Corinto3:3.

Mosias 14–15

Nag-antos si Jesucristo para sa akon.

Sa Mosias 14–15, talupangda ang mga tinaga kag mga dinalan nga nagalaragway sa Manluluwas kag kon ano ang Iya gin-antos para sa imo. Diin nga mga bersikulo ang nagabulig pasangkad sang imo pagpalangga kag kapasalamatan sa Iya?

Mosias 15:1–12

Paano si Jesucristo nangin pareho nga Amay kag Anak?

Gintudlo ni Abinadi nga ang Anak sang Dios—si Jesucristo—amo ang mangin Manunubos (tan-awa sa Mosias 15:1), nga magapuyo sa unod, nga mangin pareho nga tawo kag Dios (mga bersikulo 2–3). Nagpaidalom Sia sing lubos sa pagbuot sang Dios nga Amay (mga bersikulo 5–9). Bangud sini, si Jesucristo nangin pareho nga Anak sang Dios kag ang perpekto nga dutan-on nga representasyon sang Dios nga Amay (tan-awa sa Juan 14:6–10).

Si Jesucristo amo man ang Amay sa punto nga sang ginbaton naton ang Iya pagtubos, kita nangin “iya mga kaliwat” kag “manunubli sang ginharian sang Dios” (Mosias 15:11–12). Buot silingon, natawo kita liwat sa espirituhanon paagi sa Iya (tan-awa sa Mosias 5:7).

Ngaa sa pamatyag mo nga importante nga mahibal-an ining mga butang parte sa Amay nga Langitnon kag kay Jesucristo? Paano ginapabakod sang testimonya ni Abinadi ang imo pagtuo sa Ila?

Mga Ideya para sa Pagtudlo sang mga Kabataan

Mosias 11–13; 17

Sarang ko tindugan si Jesucristo, bisan pa nga ako lang isa.

• Sa pila ka punto sang aton mga kabuhi, tanan kita nagapangatubang sang presyur nga maghimo sang mga pagpili nga nagakontra sa aton pagtuo kay Jesucristo. Ano ang matun-an sang imo kabataan kay Abinadi parte sa pagtindog bilang mga saksi ni Jesucristo, bisan indi ini popular? Ang larawan sa sining outline makabulig sa ila nga mapanan-aw ang kasaysayan sa Mosias 11–13; 17. Pamangkuta sila kon ano ang ila nanamian kay Abinadi.

• Mahimo nga masadyahan ang imo kabataan sa pagdrama-drama sang mga bahin sang sugilanon ni Abinadi. Dayon pwede nila idrama-drama ang mga nagakatabo sa tunay nga kabuhi para mapraktis kon ano ang ila himuon kon gusto sang iban nga maghimo sila sang indi husto. Ukon pwede sila mag-istorya sang mga eksperiyensya sang nangin maisog sila sa pagsunod kay Jesucristo. Paano ginsunod ni Abinadi si Jesucristo? (tan-awa sa Mosias 13:2–9; 17:7–10). Ngaa wala ginhimo ni Haring Noe ang nahibal-an niya nga husto? (tan-awa sa Mosias 17:11–12).

Mosias 12:33–36; 13:11–24

Dapat ko nga tumanon ang Pulo ka Sugo.

• Nahibal-an sang mga pari ni Haring Noe ang mga kasuguan pero wala ini “masulat sa [ila] mga tagipusuon” (Mosias 13:11). Paano mo buligan ang imo kabataan nga mahibal-an ang mga kasuguan kag palanggaon ang mga ini? Basi pwede nila isulat ang mga kasuguan sa Mosias 12:33–36 kag 13:11–24 sa mga papel nga korte-tagipusuon. Samtang ginahimo nila ini, hambali upod sa ila kon ano ang buot silingon sining mga kasuguan kag kon paano sundon ang mga ini. Paano naton isulat ining mga kasuguan sa aton mga tagipusuon?

•   Ano nga mga bugay ang nagaabot halin sa pagsunod sang mga kasuguan?

Ang balaan nga mga kasulatan nagatudlo sa aton sang mga kasuguan sang Dios.

Mosias 14; 16:4–9

Ginpadala sang Amay nga Langitnon si Jesucristo para giyahan ako pabalik sa Iya.

• Bisan malip-ot lang nga kapitulo, ang Mosias 14 may pila ka mga tinaga kag mga dinalan nga nagalaragway kay Jesucristo. Basi pwede ninyo ini ilista sang imo kabataan samtang ginabasa ninyo ang kapitulo sing ululupod. Dayon pwede mo ihambal kon ano ang imo nabatyagan para sa Manluluwas samtang ginatun-an mo ining mga tinaga kag mga dinalan.

• Sa pagtudlo parte kay Jesucristo, ginsambit ni Abinadi ang propeta nga si Isaias, nga nagkumparar sa aton sa nadula nga karnero. Basi pwede nga maistorya sang imo kabataan ang ila mga eksperiyensya sang may nadula sa ila ukon sang sila mismo ang nadula. Ano ang ila nabatyagan? Ano ang ila ginhimo? Dayon pwede ninyo basahon sing ululupod ang Mosias 14:6 kag 16:4–9. Sa ano kita nangin pareho sa karnero nga nagtalang palayo sa Dios? Paano kita ginabuligan ni Jesucristo nga makabalik?

Para sa dugang nga mga ideya, tan-awa sa isyu sang Abyan nga magasin sini nga bulan.

His Face Shone with Exceeding Luster [Ang Iya Nawong Nagsilak sa Sobra nga Kaidlak], ni Jeremy Winborg