Minerva Teichert (1888–1976), Escape of King Limhi and His People [Ang Pagpalagyo ni Haring Limhi kag sang Iya Katawhan], 1949–1951, oil sa masonite, 35 7/8 × 48 pulgada. Brigham Young University Museum of Art, 1969.

Mayo 20–26: Nagsulod Kita sa Kasugtanan upod sa Iya

Mosias 18–24

Ang kasaysayan ni Alma kag sang iya katawhan sa Mosias 18; 23–24 nagapakita kon ano ang kahulugan sang “magsulod sa panong sang Dios” (Mosias 18:8). Sang ginbunyagan ang katawhan ni Alma, naghimo sila sang kasugtanan sa Dios nga “mag-alagad sa iya kag magtuman sang iya mga kasuguan” (Mosias 18:10). Bisan pa nga isa ini ka personal nga pangako upod sa Dios, may labot man ini sa kon paano nila ginatrato ang isa kag isa. Huo, ang pagpanglakaton pabalik sa Amay nga Langitnon indibidwal, kag wala sang pwede magtuman sang aton mga kasugtanan para sa aton, pero wala ina nagakahulugan nga nagaisahanon kita. Kinahanglan naton ang kada isa. Bilang mga miyembro sang Simbahan ni Cristo, nangako kita nga mag-alagad sa Dios paagi sa pagbulig kag pagserbisyo sa isa kag isa sa dalanon, “nga [naga]pas-an sang palas-anon sang isa kag isa” (Mosias 18:8–10). Sigurado nga ang katawhan ni Alma may mga palas-anon nga kinahanglan pas-anon, pareho man sa aton tanan. Isa sa paagi nga ginabuligan kita sang Ginuo nga “madala [naton] ang aton mga lulan sing mahapos” (Mosias 24:15) amo ang paghatag sa aton sang komunidad sang mga Santos nga nagpromisa nga magkasubo upod sa aton kag magpaumpaw sa aton, pareho sang aton ginpromisa nga himuon para sa ila.

Mga Ideya sa Pagtuon sa Puluy-an kag sa Simbahan

Mosias 18:1–17

Kon bunyagan ako, nagahimo ako sang kasugtanan upod sa Dios.

Pamensara kon daw ano kadalum sang nabatyagan sang mga tumuluo nga ginlaragway sa Mosias 18 kay Jesucristo. Kinahanglan nila magtipon sa tago, nga may dako nga risgo, para magtuon parte sa Iya (tan-awa sa bersikulo 3). Kag sang mahatagan sang kahigayunan nga ipakita ang ila pangako paagi sa kasugtanan sang bunyag, “nagpinalakpak sila sang ila mga kamot tungod sang kalipay, kag nagsininggit: Amo ini ang handum sang amon mga tagipusuon” (Mosias 18:11).

Ang pagbasa sining mga bersikulo mangin maayo nga oportunidad para binagbinagon kon daw ano kaimportante sang imo nga kasugtanan sa imo. Samtang imo ginatun-an ilabi na gid ang Mosias 18:8–14, pamensara ang mga pamangkot pareho sini:

• Ano ang imo natun-an sa sining mga bersikulo parte sa mga promisa nga imo ginhimo sa tion sang bunyag? Ano ang ginpromisa sang Dios sa imo? (tan-awa sa mga bersikulo 10, 13).

• Ano ang relasyon sang kasugtanan nga magserbisyo sa Dios sa aton mga pagpaninguha nga mag-alagad sa isa kag isa? (tan-awa sa mga bersikulo 8–9).

• Ano ang buot silingon para sa imo sang “magtindog bilang [saksi] sang Dios”? (bersikulo 9).

• Paano nagabulig sa imo ang pagtuman sang imo kasugtanan sa bunyag nga “mapuno sang Espiritu”? (Mosias 18:14). Paano ang Espiritu nagabulig sa imo nga matuman ang imo kasugtanan?

Ang pagsabat sining mga pamangkot mahimo nga magtulod sa imo nga binagbinagon kon ngaa importante ang mga kasugtanan kag mga ordinansa sa Dios. Makakita ka sang mga ideya sa mensahe ni Pangulong Jean B. Bingham “Ang mga Kasugtanan sa Dios Nagapabakod, Nagaamlig, kag Nagahanda sa Aton para sa Wala Katapusan nga Himaya” (Liahona, Mayo 2022, 66–69). Ngaa nagapasalamat ka para sa imo mga kasugtanan? Ano ang imo ginahimo para tumanon ang imo mga promisa?

Magtudlo sang kamatuoran halin sa balaan nga mga kasulatan kag sa propeta sa ulihing mga adlaw. Samtang nagatudlo ka—kag nagatuon—tandai nga isa sa pinakamaayo nga paagi para patubuon ang pagtuo kay Cristo amo ang magtutok sa balaan nga mga kasulatan kag sa mga pulong sang mga propeta sa ulihing-adlaw (tan-awa sa Mosias 18:19).

Mosias 18:17–30

Ginsugo sang Dios ang Iya katawhan nga magtipon, mag-organisar, kag mag-isa.

Ang iban nga mga tawo nagapanumdom, ngaa kinahanglan naton sang simbahan? Tan-awa sa Mosias 18:17–31, nga nagapangita sang bili nga nasalapoan sang katawhan ni Alma sa pagtipon “sa simbahan ni Cristo” (Mosias 18:17). Ano ang pagpalareho nga imo makita sa Simbahan ni Jesucristo sa panahon ni Alma kag sa aton panahon?

Paano mo sabton ang isa ka abyan ukon miyembro sang pamilya nga wala nagapati nga kinahanglanon ang organisado nga simbahan? Ngaa nagapasalamat ka nga mangin miyembro sang Simbahan ni Jesucristo?

Hunahunaa kon ano ang imo mahimo para buligan ang mga miyembro sang imo ward ukon branch nga “mabugkos sing tingob sa paghiliusa kag sa gugma” (Mosias 18:21).

Tan-awa man sa Dallin H. Oaks, “Ang Kakinahanglanon sang Simbahan,” Liahona, Nob. 2021, 24–26.

Mosias 21–24

Ginabuligan ako sang Dios nga madala ang akon mga kabudlayan.

Ang mga katawhan ni Limhi kag Alma pareho nga nahulog sa pagkabihag, sa lainlain ugaling nga mga sirkumstansya. Ano ang imo matun-an sa pagkumparar sang mga kasaysayan sang katawhan ni Limhi sa Mosias 19–22 kag katawhan ni Alma sa Mosias 18; 23–24? Samtang ginahimo mo ini, magpangita sang mga mensahe nga magamit sa imo kabuhi. Halimbawa, ano ang buot silingon sang “pag-uswag sing hinay-hinay”? (Mosias 21:16). Paano mo ipangabuhi ini nga prinsipyo?

Mosias 23:21–24; 24:8–17

Makasalig ako sa Ginuo.

Bisan pa nga naghinulsol na sila sang ila mga sala, si Alma kag ang iya katawhan ara gihapon sa pagkabihag. Ang ila eksperiyensya nagapakita nga ang pagsalig sa Ginuo kag pagpangabuhi sang aton mga kasugtanan wala pirme nagakakas sang aton mga kabudlayan, pero nagabulig ini sa aton nga malampuwasan ang mga ini. Samtang imo ginabasa ang Mosias 23:21–24 kag 24:8–17, tandai ang mga tinaga kag mga dinalan nga makabulig sa imo nga magtuon nga magsalig sa Ginuo, bisan ano pa ang imo mga sirkumstansya.

Mga Ideya para sa Pagtudlo sang mga Kabataan

Mosias 18:7–17

Kon bunyagan ako, nagahimo ako sang kasugtanan upod sa Dios.

• Isa ka importante nga paagi para buligan ang imo kabataan sa paghanda para sa bunyag amo ang tudloan sila parte sa kasugtanan nga ila himuon kon sila bunyagan. Mahimo nga pareho lang ini kasimple sa pagpakita sang litrato sa katapusan sang outline sini nga semana kag pagbasa parte sa kasugtanan upod sa ila sa Mosias 18:9–10. Pamensara nga imbitahon ang isa ka bata nga nabunyagan na para itudlo ini sa mas magagmay nga kabataan. Mahimo nga masadyahan ang imo kabataan sa pagpamati parte sa imo nga bunyag. Paano ginbugayan ang imo kabuhi sang pagtuman sang imo mga kasugtanan sa Dios?

• Ang mga kabataan nga nabunyagan na pwede maggamit sang pirme nga pahanumdom parte sa mga kasugtanan nga ila ginhimo kag ginabag-o tagsa ka semana paagi sa sakramento. Basi pwede nga ikumparar sang imo kabataan ang kasugtanan sa bunyag nga ginlaragway sa Mosias 18:8–10 sa mga pangamuyo sa sakramento (tan-awa sa Doktrina kag mga Kasugtanan 20:77, 79). Paano naton himuon ang sakramento nga isa ka espesyal,maligdong nga tion, pareho sang aton mga bunyag?

Nagahimo kita sang kasugtanan upod sa Dios kon bunyagan kita.

Mosias 18:17–28

Kon bunyagan ako, mangin miyembro ako sang Simbahan ni Jesucristo.

• Nakahibalo bala ang imo kabataan kon ano ang buot silingon sang mangin miyembro sang Ang Simbahan ni Jesucristo sang mga Santos sa Ulihing mga Adlaw? Pamensara nga buligan sila sa pagpangita sang mga litrato nga nagasimbolo sang mga butang nga ginhimo sang mga miyembro sang Simbahan sa Mosias 18:17–28. Halimbawa, ang mga litrato sang Ordinasyon sa Priesthood kag Pagbayad sang Ika-pulo (Libro sang mga Larawan nga Pang-Ebanghelyo, num. 106, 113) pwede magsimbolo sang mga bersikulo 18 kag 27–28. Sugiri sila kon ngaa nagapasalamat ka nga mangin miyembro sang Simbahan ni Jesucristo.

• Ang pagbulig sa kabataan nga makabatyag nga “nabugkos sing tingob sa paghiliusa kag sa gugma” (Mosias 18:21) nagabulig sa ila nga magpabilin nga konektado sa Simbahan sa bilog nila nga kabuhi. Pamensara nga hagaron ang imo kabataan nga basahon ang Mosias 18:17–28. Ano ang ginhimo sang mga miyembro sang Simbahan ni Cristo sa panahon ni Alma para palanggaon kag alagaran ang kada isa? Paano naton ini himuon sa aton ward, branch, ukon komunidad?  

Mosias 24:8–17

Mahimo sang Dios nga pamag-anon ang akon mga ginapas-an.

• Ang simple nga leksyon gamit ang isa ka butang makahimo sang pagtuon nga mas madumduman. Pamensara nga sudlan ang isa ka bag sang mabug-at nga mga bagay (bilang simbolo sang mga kabudlayan) kag hagaron ang isa ka bata nga kaptan ang bag. Samtang ginabasa mo ang Mosias 24:8–17 upod sa imo kabataan, pangabaya sila nga kuhaon ang isa ka bagay sa bag tagsa nga mabatian nila ang ginhimo ni Alma kag sang iya katawhan para magpangayo sang bulig sang Dios sa ila mga kabudlayan. Pwede mo dayon hambalan upod sa ila kon paano pamag-anon sang Amay nga Langitnon ang aton mga kabudlayan kon magpangayo kita sang Iya bulig.

Para sa dugang nga mga ideya, tan-awa sa isyu sang Abyan nga magasin sini nga bulan.

The Waters of Mormon [Ang mga Tubig ni Mormon], ni Jorge Cocco