“Mayo 27–Hunyo 2: ‘Gintawag Sila nga Katawhan sang Dios.’ Mosias 25–28:” Dali, Magsunod sa Akon—Para sa Puluy-an kag Simbahan: Libro ni Mormon 2024 (2024)
“Mayo 27–Hunyo 2. Mosias 25–28,” Dali, Magsunod sa Akon—Para sa Puluy-an kag Simbahan: 2024 (2024)
Conversion of Alma the Younger [Ang Pagbag-o ni Alma nga Lamharon], ni Gary L. Kapp
Mayo 27–Hunyo 2: “Gintawag Sila nga Katawhan sang Dios”
Mosias 25–28
Pagkatapos sang halos tatlo ka henerasyon sang pagpuyo sa separado nga mga lugar, nangin isa liwat ang mga Nefinhon. Ang katawhan ni Limhi, katawhan ni Alma, kag katawhan ni Mosias—bisan ang katawhan sang Zarahemla, nga indi kaliwat ni Nefi—tanan karon “gin-isip upod sa nga Nefinhon” (Mosias 25:13). Madamo sa ila gusto man nga mangin miyembro sang Simbahan sang Ginuo, pareho sang katawhan ni Alma. Gani ang tanan nga “maluyag sa pagdala sa ila mga kaugalingon sang ngalan ni Cristo” ginbunyagan, “kag gintawag sila nga katawhan sang Dios” (Mosias 25:23–24). Pagkatapos sang tinuig nga inaway kag pagkabihag, daw makaangkon na gid man sa ulihi ang mga Nefinhon sang tinion sang kalinong.
Pero wala pa magdugay, ang mga wala nagatuo nagsugod na sa pagpanghingabot sa mga Santos. Ang nagpasakit pa gid kay madamo sining mga wala nagatuo mga anak mismo sang mga nagatuo—ang “ulihing tubo” (Mosias 26:1), dala na ang mga anak nga lalaki ni Mosias kag ang isa ka anak nga lalaki ni Alma. Ang istorya nagasugid sang milagroso nga pagbisita sang isa ka anghel. Pero ang matuod nga milagro sining istorya indi ang parte sa mga anghel nga nagapakita sa salawayon nga mga kabataan. Ang pagbag-o isa ka milagro, nga bisan diin mo tan-awon, kinahanglan matabo sa tanan sa aton.
Mga Ideya sa Pagtuon sa Puluy-an kag sa Simbahan
Mabuligan ko ang iban nga magpalapit kay Jesucristo.
Ang pagkahaylo personal—indi ini mapasa nga daw palanublion sa mga kabataan. Samtang imo ginabasa ang Mosias 26:1–6, binagbinaga ang posible nga mga rason nga ang “ulihing-tubo” nagatalikod sa kamatuoran, kag talupangda ang mga konsikwensya sang ila kawala sang pagtuo. Pwede mo man pamensaron ang mga tawo nga gusto mo dalhon kay Cristo. Sa bilog mo nga pagtuon sang Mosias 25–28, mahimo nga maghutik sa imo ang Espiritu sang pwede mo himuon para buligan sila nga magpatubo sang pagtuo kay Jesucristo.
Ang matinuohon nga mga alagad sang Dios nagatinguha nga himuon ang Iya pagbuot.
Kon kaisa ginapamensar naton nga ang isa ka lider sang Simbahan pareho kay Alma nakahibalo pirme kon ano gid ang dapat buhaton. Sa Mosias 26 mabasahan naton ang parte sa problema sa Simbahan nga wala pa maagyan ni Alma. Ano ang ginhimo ni Alma sa sining sitwasyon? (tan-awa sa Mosias 26:13–14, 33–34, 38–39). Ano ang ginapanugyan sang eksperiyensya ni Alma kon paano mo atubangon ang mabudlay nga mga problema sa imo pamilya kag sa imo pagserbisyo sa Simbahan?
Ano ang gintudlo sang Ginuo kay Alma sa Mosias 26:15–32? Pat-ini nga ang pila sa mga sabat sang Ginuo indi direkta nga sabat sa pamangkot ni Alma. Ano ang ginapanugyan sini parte sa pangamuyo kag pagbaton sang personal nga rebelasyon?
Ang mga prinsipyo wala katapusan. Pamensara kon paano ang mga istorya kag pinanudlo sa balaan nga mga kasulatan magamit sa imo kabuhi. Halimbawa, pwede mo pamangkuton ang imo kaugalingon, “Ano ang akon mga eksperiyensya nga pareho kay Alma?” ukon “Diin sa mga kamatuoran nga gintudlo ni Alma ang makabulig sa akon?”
Bukas ako nga patawaron sang Dios kon maghinulsol ako kag magpatawad sa iban.
Ang paghinulsol kag pagpatawad nagabalik-balik nga tema sa Mosias 26–27. Pangitaa ang mga tinaga kag mga dinalan nga nagatudlo parte sa paghinulsol kag pagpatawad sa Mosias 26:22–24, 29–31; 27:23–37.
Ang pila sa mga tawo mahimo maghunahuna kon bala ginpatawad sila matuod sang Dios. Paano sa banta mo laygayan ni Alma nga Tatay ang miyembro sang Simbahan sa Zarahemla nga may amo sina nga palaligban? Ano ang natun-an ni Alma sa Ginuo sa Mosias 26:15–31 nga makabulig sa sining miyembro sang Simbahan? (tan-awa man sa Moroni 6:8; Doktrina kag mga Kasugtanan 19:16–18; 58:42–43).
Paagi kay Jesucristo, sarang ako magbag-o para sa kaayuhan.
Maathag nga kinahanglan ni Alma nga Lamharon sang espirituhanon nga pagkabun-ag liwat. Sia kag ang mga anak ni Mosias amo ang “pinakatampalasan sang mga makasasala” (Mosias 28:4). Pero pagkatapos gid sang iya pagkahaylo, nagpamatuod si Alma nga ang pagbag-o kinahanglanon—para sa tanan: “Indi magkatingala,” siling niya, “nga ang tanan nga tawo … kinahanglan gid nga mabun-ag liwat” (Mosias 27:25; emphasis gindugang).
Samtang ginabasa mo ang eksperiyensya ni Alma sa Mosias 27:8–37, pamensara nga ibutang ang imo kaugalingon sa iya lugar. May mapensaran ka bala nga mga butang nga kinahanglan mo bag-uhon sa imo kaugalingon? Sin-o ayhan, pareho sa tatay ni Alma, ang magapangamuyo para sa imo “upod ang tuman kadako nga pagtuo”? Ano nga mga eksperiyensya ang nagbulig “sa pagpapati sa [imo] sang gahum kag pagbulut-an sang Dios”? (Mosias 27:14). Ano nga “dalagko nga mga butang” ang ginhimo sang Ginuo para sa imo kag sa imo pamilya nga dapat mo “dumdumon”? (Mosias 27:16). Ano ang imo matun-an sa mga pulong kag aksyon ni Alma nga Lamharon parte sa kahulugan sang mabun-ag liwat? Ano nga mga halimbawa ang imo nakita?
Hatagi sang tion nga isulat ang pila sa mga paagi nga ginabuligan ka sang Manluluwas nga magbag-o—ukon mabun-ag liwat—bisan pa nga ang imo mga eksperiyensya indi pareho ka madrama ukon kagulpi sa iya ni Alma. Sin-o ayhan ang makabenepisyo sa pagpamati sa imo mga eksperiyensya?
Nagapamati ang Dios sa akon mga pangamuyo kag magasabat sang mga ini suno sa Iya pagbuot kag tiyempo.
Mahimo nga naagyan mo na nga mabutang sa sitwasyon ni Alma nga Tatay nga ang miyembro sang pamilya nagahimo sang makaguba nga mga pagpili. Ano ang imo makita sa Mosias 27:8–24 nga nagahatag sa imo sang paglaum? Paano ayhan makaimpluwensya ining mga bersikulo sa imo mga pangamuyo para sa iban?
Para sa dugang nga mga ideya, tan-awa sa mga isyu sini nga bulan sang mga magasin nga Liahona kag Para sa Kusog sang mga Lamharon.
Mga Ideya para sa Pagtudlo sang mga Kabataan
Gusto sang Ginuo nga magpatawad ako.
-
Para buligan ang imo kabataan nga madiskubrehan kon ano ang gintudlo sang Ginuo kay Alma parte sa pagpatawad, pwede mo sila hagaron nga basahon ang Mosias 26:29–31 kag isipon kon kapila maggwa ang tinaga nga “patawaron”. Ano ang ginatudlo sining mga bersikulo parte sa pagpatawad sa iban?
-
Para ipatalupangod ang ehemplo sang Manluluwas sang pagpatawad, pwede mo ipakita ang Iya litrato nga ara sa krus kag basahon sing ululupod ang Lucas 23:33–34. Ano ang ginpangabay ni Jesus nga himuon sang Amay nga Langitnon sa mga tawo nga naglansang sa Iya sa krus? Pagkatapos sining paghambalanay, pwede ang imo kabataan mag-role-play nga ginapatawad ang isa kag isa.
-
Kon kaisa mabudlay nga patawaron ang aton mga kaugalingon kon makahimo kita sang mga sayop. Paano makabulig ang mga pulong sang Dios kay Alma? Pwede ang imo kabataan magdrama-drama nga kuno abi nagaistorya sa tawo nga wala nagapati nga patawaron pa sila sang Dios. Hagara ang imo kabataan nga magpangita sang kon ano ang ara sa Mosias 26:22–23, 29–30 nga mahimo makabulig sa sina nga tawo.
Ginabuligan ako ni Jesucristo nga mangin mas pareho sa Iya.
-
Ang pagbag-o ni Alma nga Lamharon kag sang mga anak ni Mosias magapakita sa imo kabataan nga, upod sang gahum sang Manluluwas, pwede magbag-o ang bisan sin-o. Pwede nga gamiton nimo ukon sang imo kabataan ang mga larawan sa sining outline, ang pahina para sa kahiwatan sini nga semana, kag ang pila ka mayor nga balaan nga kasulatan sa Mosias 27:8–37 para isugid ining istorya. Hatagi sang espesyal nga pagtalupangod ang bersikulo 24, agud itudlo nga naghinulsol si Alma kag ginbuligan sia ni Jesucristo nga magbag-o. Tugoti ang imo kabataan nga idrama-drama ang istorya kon gusto nila.
His Father Rejoiced [Ang Iya Amay Nagkasadya], ni Walter Rane
Makapangamuyo ako kag makapuasa para bugayan sang Dios ang mga tawo nga palangga ko.
-
Basaha sing ululupod ang Mosias 27:8–24, kag pangabaya ang imo kabataan nga ihambal kon ano ang ginhimo ni Alma kag sang iya katawhan para buligan si Alma nga Lamharon. Nakatilaw ka na bala nga magpuasa kag magpangamuyo para sa isa ka tawo? Isugid ang imo eksperiyensya sa imo kabataan, kag tugoti sila nga magsugid man sang ila eksperiyensya.
-
May kilala ka bala ukon ang imo kabataan nga nagakinahanglan sang bulig sang Dios? Nga ginasunod ang ehemplo ni Alma, basi pwede kamo magpangamuyo sing ululupod para sa sina nga tawo, kag kon makasarang ang imo kabataan, magpuasa man para sa ila.
Para sa dugang nga mga ideya, tan-awa sa isyu sang Abyan nga magasin sini nga bulan.
Illustration of an angel appearing to Alma the Younger [Larawan sang anghel nga nagapakita kay Alma nga Lamharon], ni Kevin Keele