Teaching True Doctrine [Pagtudlo sang Matuod nga Doktrina], ni Michael T. Malm

Hunyo 17–23: Si Jesucristo Magakari sa Pagtubos sang Iya Katawhan

Alma 8–12

Ang buluhaton sang Dios indi mapaslawan. Pero ang aton pagtinguha sa pagbulig sa Iya buluhaton kon kaisa daw nagakapaslawan—ang matabo, mahimo nga indi naton makita dayon ang mga resulta nga aton ginapaabot. Mahimo nga makabatyag kita nga daw pareho kay Alma sang nagpangwali sia sang ebanghelyo sa Amonihas—ginsikway, ginduplaan, kag gintabog. Pero sang ginhambalan sia sang anghel nga magbalik kag tilawan liwat, maisog si Alma nga “madasig nga nagbalik” (Alma 8:18) kag ginhanda sang Dios ang dalan sa iya atubang. Wala lang Sia magtigana kay Alma sang pagkaon nga kalan-on kag lugar nga maestaran, kundi ginhanda man Niya si Amulek, nga nangin kaupod nga tagpangabudlay, maisog nga tagpangapin sang ebanghelyo, kag tampad nga abyan. Kon makasugata kita sang mga kabudlayan kag pagkadismaya samtang nagaserbisyo kita sa ginharian sang Ginuo, mahimo naton panumdumon kon paano ginsuportahan sang Dios kag gintuytoyan si Alma, kag makasalig man kita nga ang Dios magasuporta kag magatuytoy man sa aton, bisan sa mabudlay nga mga sirkumstansya.

Mga Ideya sa Pagtuon sa Puluy-an kag sa Simbahan

Alma 8

Ang akon mga pagpaninguha sa pagpaambit sang ebanghelyo ni Jesucristo nagakinahanglan sang pasensya.

Nakatilaw ka na bala nga mag-istorya sang ebanghelyo ni Jesucristo sa iban, pero ginbalibaran ang imo imbitasyon? Naeksperiyensyahan man ina ni Alma. Ano ang imo matun-an sa iya sa Alma 8:13–16 parte sa pagpaambit sang ebanghelyo wala sapayan sang mga hangkat kag oposisyon? Padayona sa pagbasa sa mga bersikulo 17–32, kag magpangita sang mga dinalan nga makainspirar sa imo nga magpadayon sa pagpaambit sang ebanghelyo, bisan pa nga daw wala ka nagamadinalag-on.

Ang mga propeta kag apostoles espesyal nga mga saksi ni Cristo, gani madamo sila sang inspirado nga laygay nga mahatag parte sa pagpamatuod sa Iya. Tan-awa kon ano ang ginsiling ni Elder Dieter F. Uchtdorf sa “Pero Paano Kon Mabudlay Ini?” (isa ka seksyon sa “Pangmisyonaryo nga Buluhaton: Pagpaambit sang Kon Ano nga Ara sa Imo Tagipusuon,” Liahona, Mayo 2019, 18) Ano ang imo nabasa nga makabulig sa tawo nga nagasugod na nga pangluyahan sa pagpaambit sang ebanghelyo?

Paano mo ihambal sa malip-ot ang tanan nga natun-an mo diri sa isa ukon duha ka makapaisog nga mga dinalan parte sa pagpaambit sang ebanghelyo? Pamensara ang paghimo sang poster ukon meme nga makainspirar sa imo (kag sa iban) nga magsige sa pagtinguha.

Alma 9:14–23

Ang mga bugay sang Dios nagaabot nga may kaupod nga dako nga responsibilidad.

Samtang ginabasa ang parte sa paagi nga gintratar sang mga Nefinhon sa Amonihas ang mga alagad sang Ginuo, madali malimtan nga sila sadto nagpangabuhi sang ebanghelyo kag “tuman kapinasulabi nga katawhan sang Ginuo” (Alma 9:20). Samtang imo ginabasa ang parte sa dalagko nga mga bugay nga ginhatag sang Dios sa katawhan ni Nefi (tan-awa ilabi na gid sa Alma 9:14–23), pamensara ang dalagko nga mga bugay nga Iya ginhatag sa imo. Ano nga mga responsibilidad ang kaupod sining mga bugay? Ano ang imo ginahimo para magpadayon nga tampad sa sining mga responsibilidad?

Tan-awa man sa Doktrina kag mga Kasugtanan 50:24; 82:3; 93:39.

Alma 11–12

Ang plano sang Dios isa ka plano sang pagtubos.

Sa Alma 11–12, si Alma kag Amulek nagtawag sang plano sang Dios bilang plano sang pagtubos. Samtang imo ginabasa ining mga bersikulo, binagbinaga kon ngaa gingamit ang tinaga nga pagtubos para ilaragway ang plano sang Dios. Pamensara ang pagsulat sang malip-ot nga sumaryo sang gintudlo ni Alma kag Amulek parte sa masunod nga mga aspeto sang plano.

• Ang Pagkahulog

• Ang Manunubos

• Paghinulsol

• Kamatayon

• Pagkabanhaw

• Paghukom

Pat-ini ang epekto sang mga pulong ni Amulek sa mga tawo (tan-awa sa Alma 11:46). Paano nakaapekto sa imo ang paghibalo sang parte sa plano sang Dios?

Alma 12:8–18

Kon wala ko ginapatig-a ang akon tagipusuon, makabaton ako sang dugang pa nga pulong sang Dios.

Ang pila ka tawo mahimo nga nagapamangkot kon ngaa wala ginapahibalo sang Amay nga Langitnon sa aton ang tanan nga mga butang. Sa Alma 12:9–14, ginpaathag ni Alma ang isa ka posible nga rason. Ining mga pamangkot makabulig sa imo nga binagbinagon kon ano ang iya gintudlo:

• Ano ang kahulugan sang patig-ahon ang imo tagipusuon? Ano ang mga resulta sang pagpatig-a sang tagipusuon? (tan-awa man sa Alma 8:9–11; 9:5, 30–31; kag 10:6, 25).

• Ano ang sarang mo himuon para lisuon ang imo tagipusuon sa Dios? (tan-awa sa Jeremias 24:7; Alma 16:16; Helaman 3:35).

• Ano ang pwede mo himuon para masiguro nga ang pulong sang Dios “makita sa [imo]”? (Alma 12:13). Kon ara sa imo ang pulong sang Dios, ano ang epekto sini sa imo “mga pulong,” “mga binuhatan,” kag “mga panghunahuna”? (Alma 12:14).

Ano ang ginatudlo sang eksperiyensya ni Amulek sa imo parte sa mga bugay sang may mahumok nga tagipusuon? (tan-awa sa Alma 10:1–11).

Para sa dugang nga mga ideya, tan-awa sa mga isyu sini nga bulan sang mga magasin nga Liahona kag Para sa Kusog sang mga Lamharon.

Mga Ideya para sa Pagtudlo sang mga Kabataan

Alma 8–10

Sarang ko ipaambit ang ebanghelyo ni Jesucristo.

• Ang pahina para sa kahiwatan sini nga semana makabulig sa imo sa paghambal sa malip-ot sang mga hitabo sa Alma 8–10 sa imo kabataan. Basi gusto mo sila buligan nga pangitaon ang mga prinsipyo nga naghimo sa ila ni Alma kag Amulek nga mga maayo nga misyonero. Halimbawa, wala sila nagpangampo (tan-awa sa Alma 8:8–13), nagpamatuod sila kay Cristo (tan-awa sa Alma 9:26–27), kag nagbuligay sila (tan-awa sa Alma 10:12).

•   Agdaha sila nga ilista ang mga ideya nga makita nila kag ang mga tawo nga pwede nila istoryahan sang ebanghelyo. Basi gani pwede mo man ipadrama-drama sa ila kon ano ang pwede nila ihambal ukon himuon.

Paisoga ang partisipasyon. Samtang nagahanda ka sa pagtudlo, imbes nga magplano sang inughambal, pamangkuta ang imo kaugalingon, “Ano ang himuon sang kabataan para makatuon?” Ang mga kabataan mas makatuon kag mas makadumdom sang malawig kon aktibo sila nga nagapartisipar.

Alma 11–12

Ang plano sang Dios isa ka plano sang pagtubos.

• Basi pwede nga magdrowing ang imo kabataan sang litrato nga nagarepresentar sang mga prinsipyo sang plano sang pagtubos, pareho sang Pagkahulog ni Adan kag Eva, ang Pagbayad-Sala ni Jesucristo, paghinulsol, kamatayon, pagkabanhaw, kag paghukom. Dayon pwede mo sila buligan nga pareson ang ila mga litrato sa mga bersikulo sa Alma 11–12 nga nagatudlo parte sining mga prinsipyo.

Alma 8:18–22

Sarang ako mangin maayo nga abyan.

• Pwede mo hagaron ang isa ka bata nga kuno abi sia si Amulek kag ang isa pa gid nga kuno abi si Alma samtang ginasaysay mo ang sugilanon sa Alma 8:18–22. Paano nangin maayo nga abyan si Amulek kay Alma? Dayon pwede iistorya sang imo kabataan kon paano nangin abyan ang isa ka tawo sa ila kag kon ano ang ila nabatyagan sa sina nga eksperiyensya.

• Basi pwede kamo maghimo sang puzzle parte sa pag-inabyanay: magpangita ukon magdrowing sang litrato nga nagarepresentar sang pag-abyanay kag guntingon ini nga daw puzzle. Sa likod sang tagsa ka parte, isulat ang pwede naton himuon para mangin maayo nga abyan, lakip na ang mga butang nga ginhimo nanday Alma kag Amulek. Pwede magbulos-bulos ang imo kabataan sa pagpili sang parte kag idugang ini sa puzzle samtang ginabasa mo kon ano ang nasulat sa likod. Sin-o ang nagakinahanglan sang aton pagkaabyan?

Sarang kita mangin maayo nga abyan sa iban.

Alma 11:43–44

Tungod kay Jesucristo, mabanhaw ako.

• Pamensara ang isa ka leksyon nga nagagamit sang bagay pareho sini para itudlo ang Pagkabanhaw: ang imo kamot pwede magsimbolo sang imo espiritu, kag ang gwantes pwede magrepresentar sang imo lawas. Ipagwa ang imo kamot sa gwantes para ipakita nga ang aton mga espiritu kag mga lawas magaseparar sa kamatayon. Dayon ibalik ang imo kamot sa gwantes para ipakita nga ang aton mga espiritu kag mga lawas magabalikay liwat sa Pagkabanhaw. Dayon pabusla ang imo kabataan sa pagsuksok kag pagkakas sang gwantes samtang ginabasa mo ang Alma 11:43 sa ila. I-display ang litrato sang nabanhaw nga Manluluwas (tan-awa sa Libro sang mga Larawan nga Pang-Ebanghelyo, num. 59), kag magpamatuod nga ginpatigayon ni Jesucristo nga ang tanan mabanhaw.

Para sa dugang nga mga ideya, tan-awa sa isyu sang Abyan nga magasin sini nga bulan.

Illustration of Alma eating with Amulek [Larawan ni Alma nga nagakaon upod si Amulek], ni Dan Burr