Illustration of Alma and Amulek being delivered from prison, [Larawan ni Alma kag Amulek nga ginahilway sa prisuhan], ni Andrew Bosley

Hunyo 24–30: “Magsulod sa Kapahuwayan sang Ginuo”

Alma 13–16

Sa madamo nga paagi, ang kabuhi sa Amonihas nangin maayo para sa ila ni Amulek kag Zisrom. Si Amulek “isa ka tawo nga may indi diutay nga kabantugan,” sa tunga sang “madamo nga mga himata kag mga kaabyanan” kag “madamo nga mga manggad” (Alma 10:4). Si Zisrom isa ka abogado kag may “madamo nga kalabtanan” (Alma 10:31). Dayon nag-abot si Alma nga may imbitasyon nga maghinulsol kag “magsulod sa kapahuwayan sang Ginuo” (Alma 13:16). Para kay Amulek, Zisrom, kag sa iban pa, ang pagbaton sining imbitasyon nagakinahanglan sang sakripisyo kag nagadala pa gani sang halos indi maagwanta nga pagtilaw.

Pero siyempre wala didto natapos ang istorya. Sa Alma 13–16, matun-an naton kon ano ang nagakatabo sa ulihi sa mga tawo nga nagapati “sa gahum ni Cristo tuhoy sa kaluwasan” (Alma 15:6). Kon kaisa may kaumpawan, kon kaisa may pagpang-ayo—kag kon kaisa wala gid nagahapos ang aton kahimtangan sa kabuhi. Pero sa gihapon, “ginabaton sang Ginuo [ang Iya katawhan] para sa iya kaugalingon, sa kahimayaan” (Alma 14:11). Sa gihapon, ang Ginuo nagahatag sang “gahum, suno sa [aton] pagtuo … kay Cristo” (Alma 14:28). Kag sa gihapon, inang pagtuo nagahatag sa aton sang “paglaum nga magabaton [kita] sang kabuhi nga wala katapusan” (Alma 13:29). Samtang imo ginabasa ining mga kapitulo, pwede ka magkapyot sa kaumpawan sa sining mga promisa, kag mas maintiendihan mo man kon ano ang buot silingon ni Alma sang naghambal sia parte sa “kapahuwayan sang Ginuo” (Alma 13:16).

Mga Ideya sa Pagtuon sa Puluy-an kag sa Simbahan

Alma 13:1–19

Ang mga ordinansa sang priesthood nagatudlo sa akon kay Jesucristo para sa pagtubos.

Ang mga pulong ni Alma sa Alma 13 nagapahayag sang mabaskog nga mga kamatuoran parte sa gahum sang priesthood sang Dios kag sang katuyuan sini—ang ihanda kita nga magsulod sa “kapahuwayan sang Ginuo,” ukon kabuhi nga wala katapusan (Alma 13:16). Basi pwede mo isulat ang bisan isa lang ka kamatuoran sa kada bersikulo sa Alma 13:1–9). Ari ang pila ka mga ideya agud makasugod kamo:

Bersikulo 1.Ang priesthood ginatawag man nga “ang pagbulut-an sang Anak sang [Dios]” (tan-awa sa Doktrina kag mga Kasugtanan 107:1–4).

Bersikulo 2.Nagaordin ang Dios sang mga pari para buligan ang mga tawo nga magtulok sa Iya anak para sa pagtubos.

Ano pa ang imo nakita? Ano ang nabatyagan mo parte sa priesthood samtang ginapamensar mo sing maayo ining mga kamatuoran?

Nahunahuna mo bala ang mga ordinansa sang priesthood bilang regalo halin sa Dios para buligan ka nga “magapaabot sa iya Anak agud matubos”? (bersikulo 2; tan-awa man sa bersikulo 16). Basi pwede ka maghimo sang listahan sang mga ordinansa nga imo nabaton, pareho sang bunyag, kumpirmasyon, ang sakramento, pag-set apart para sa calling, bendisyon sang kaumpawan ukon pagpang-ayo, patriarchal blessing, kag mga ordinansa sang templo. Binagbinaga ang imo mga eksperiyensya sa mga ordinansa nga pareho sini. Pamensara ang simbolismo sini kag ang Espiritu nga imo nabatyagan. Paano ining tagsa ka ordinansa nagtudlo sa imo kay Jesucristo para sa pagtubos?

May mga tawo nga sala nga nagapati nga ang mga ordinansa—kag ang awtoridad sang priesthood nga kinahanglan sa paghikot sang mga ini—indi kinahanglanon. Paano mo sabton ini nga ideya?

Tan-awa man sa Doktrina kag mga Kasugtanan 84:19–22.

Ang mga ordinansa sang priesthood nagabulig sa aton nga magtulok kay Jesucristo para sa pagtubos.

Alma 13

Ang Manluluwas nagaimbitar sa akon nga magsulod sa Iya kapahuwayan.

Ang imbitasyon nga “magsulod sa kapahuwayan sang Ginuo” (Alma 13:16) masami nga ginasulit sa Alma 13. Basi pwede mo pangitaon ang tagsa ka bersikulo nga may tinaga nga “pahuway” kag binagbinagon kon ano ang ginatudlo sa imo sang tagsa ka bersikulo parte sa kahulugan sang “kapahuwayan sang Ginuo.” Ano ang kinalain sini sa pisikal nga pagpahuway? Paano naton ini makita?

Alma 14

Sa tiyempo sang pag-antos, kinahanglan naton nga magsalig sa Ginuo.

Siguro nagakatingala ka, pareho sa madamo, kon ngaa nagakatabo ang malain nga mga butang sa mga tawo nga nagatinguha sa pagpangabuhi sing matarong. Mahimo nga indi mo makita ang tanan nga mga sabat sa sining mabudlay nga pamangkot sa Alma 14, pero kadamo sang pwede matun-an sa reaksyon ni Alma kag Amulek sa trahedya. Ano ang ginatudlo sa imo sang ila mga tinaga kag aksyon kon ngaa ginatugtan kon kaisa sang Ginuo nga mag-antos ang matarong nga mga tawo? Ano ayhan ang laygay nga ihatag nanday Alma kag Amulek sa aton kon makaeksperiyensya kita sang mabudlay nga mga pagtilaw?

Tan-awa man sa Mga Taga-Roma 8:35–39; 1 Pedro 4:12–14; Doktrina kag mga Kasugtanan 122:5–9; Dale G. Renlund, “Makapaakig nga Inhustisya,” Liahona, Mayo 2021, 41–45.

Magmangin handa pirme. Ang tinion sa pagtudlo nagalipas lang dayon, gani kuhaa gid ang oportunidad kon mag-abot ini. Ang isa ka trahedya sa kalibutan, halimbawa, mahimo nga mangin isa ka oportunidad sa pagpaambit sang mga prinsipyo sa Alma 14 parte sa kon ngaa ginatugtan kon kaisa sang Ginuo nga mag-antos ang mga inosente.

Alma 15:16, 18

Ang pagkadisipulo nagakinahanglan sang sakripisyo.

Mangin interesante nga ilista ang mga butang nga ginbaylo ni Amulek para sa ebanghelyo (tan-awa sa Alma 10:4–5; 15:16) kag ikumparar ini sa lista sang iya naagom (tan-awa sa Alma 15:18; 16:13–15; 34:8). Ano ang handa mo nga isakripisyo para mangin mas matinuohon nga disipulo ni Jesucristo?

Para sa dugang nga mga ideya, tan-awa sa mga isyu sini nga bulan sang mga magasin nga Liahona kag Para sa Kusog sang mga Lamharon.

Mga Ideya para sa Pagtudlo sang mga Kabataan

Tungod ini nga Domingo ikalima nga Domingo sang bulan, ang mga titser sa Primary ginapaisog nga gamiton ang aktibidades sa pagtuon sa “Appendix B: Paghanda sang Kabataan sa Bug-os-Kabuhi nga Paglakat sa Dalan sang Kasugtanan sang Dios.”

Alma 13:1–2, 16

Ang gahum sang priesthood nagabulig sa akon nga mas mahilapit kay Cristo.

• Isa ka paagi para buligan ang imo kabataan nga makita kon paano kita ginatudlo sang gahum sang priesthood kay Cristo amo ang pagpakita sa ila sang mga litrato sang mga paagi nga ginagamit ang gahum sang priesthood (tan-awa sa Libro sang mga Larawan nga Pang-Ebanghelyo, num. 103–110). Pwede ka buligan sang imo kabataan nga magpanumdom sang mga paagi nga gingamit ni Jesus ang Iya gahum (tan-awa halimbawa, sa Mateo 26:26–28; Marcos 5:22–24, 35–43; Libro sang mga Larawan nga Pang-Ebanghelyo, num. 38–41). Dayon pwede ninyo basahon ang Alma 13:2 sing ululupod kag hambalan kon paano nagabulig sa aton ang gahum sang priesthood nga “magpaabot sa Anak sang [Dios]” kag mangin mas pareho sa Iya.

  
  

• Ngaa ginhatagan kita sang Dios sang mga ordinansa sang priesthood? Buligi ang imo kabataan nga magpangita sang sabat sa Alma 13:16. Kon kinahanglan nila sang bulig para mahibal-an kon ano ang ordinansa, may mga lista sa Libro sang Pangkabilogan nga Pagsulundan, 18.1 kag 18.2. Basi pwede ninyo hambalan sang imo kabataan ang inyo nga eksperiyensya sa pagbaton sining mga ordinansa. Paano ini nagabulig sa aton nga “magpaabot [kay Jesucristo] para sa kapatawaran sang [aton] mga sala”?

Alma 13:10–12

Sarang ako himuon ni Jesucristo nga matinlo.

• Pagkatapos nga basahon ining mga bersikulo sing ululupod, pamensara ang mga paagi para buligan ang imo kabataan nga mapanan-aw kon ano ang ginatudlo sang mga ini. Basi may butang nga pwede ninyo limpyuhan nga ululupod. Ano ang aton nabatyagan kon mahigko kita? Ano ang aton nabatyagan kon matinlo na kita liwat? Sa ano nagapareho ining mga pamatyagon sa aton nabatyagan kon kita nakasala kag dayon naghinulsol kag nangin matinlo paagi sa Pagbayad-Sala sang Manluluwas?

Alma 14:18–29

Ginapabakod ako sang Amay nga Langitnon kon may pagtuo ako kay Jesucristo.

• Ang pahina para sa kahiwatan sini nga semana makabulig sa imo—ukon sa imo kabataan—nga isaysay ang istorya sa Alma 14:18–29. Ipatalupangod nga si Alma kag Amulek ginhatagan sang kusog tungod sang ila “pagtuo nga [yara] kay Cristo” (Alma 14:26). Pwede man ninyo hambalan ang tion nga ginhatagan ka sang Dios sang kusog “suno sa [imo] pagtuo.” Paano kita mangin pareho ka matinuohon kay Alma kag Amulek?

  Chapter 22: Alma’s Mission to Ammonihah

Alma 15:3–12

Sarang ni Jesucristo bag-uhon ang mga tagipusuon.

• Ang pagbag-o sang tagipusuon ni Zisrom paagi kay Jesucristo makainspirar. Pamensara nga rebyuhon upod sa imo kabataan kon ano ang ila natun-an sang nagligad nga semana parte kay Zisrom. Dayon pwede ninyo basahon sing ululupod ang Alma 15:3–12 para diskubrehon kon paano sia nagbag-o. Ano ang matun-an naton sa eksperiyensya ni Zisrom parte sa gahum sang Ginuo?

  Zeezrom Is Healed and Baptized | Alma 15

  Zeezrom escapes from the leaders of Ammonihah and becomes very sick. Zeezrom thinks Alma the younger and Amulek have died because of his wickedness. Alma and Amulek heal Zeezrom, and he is baptized.

Para sa dugang nga mga ideya, tan-awa sa isyu sang Abyan nga magasin sini nga bulan.

Alma and Amulek in Prison [Si Alma kag Amulek sa Prisuhan], ni Gary L. Kapp