“Hunyo: ‘Naagyan Bala Ninyo Ining Dako nga Pagbag-o sa Inyo mga Tagipusuon?’ Alma 5–7,” Dali, Magsunod sa Akon—Para sa Puluy-an kag Simbahan: Libro ni Mormon 2024 (2024)
“Hunyo 10–16. Alma 5–7,” Dali, Magsunod sa Akon—Para sa Puluy-an kag Simbahan: 2024 (2024)
Si Alma nga Lamharon nga nagatudlo sa mga Zoramnon
Hunyo 10–16: “Naagyan Bala Ninyo Ining Dako nga Pagbag-o sa Inyo mga Tagipusuon?”
Alma 5–7
Wala makahibalo si Alma parte sa nagapangluwas nga operasyon nga heart transplant sa karon nga panahon, nga nagailis sang depektibo ukon balatianon nga tagipusuon sang maayo nga tagipusuon. Pero nakahibalo sia parte sa mas milagroso nga “pagbag-o sang tagipusuon” (Alma 5:26)—kon diin ang Manluluwas nagahatag sa aton sang bag-o nga espirituhanon nga kabuhi, nga daw pareho sang “nabun-ag liwat” (tan-awa sa Alma 5:14, 49). Makita ni Alma nga ining pagbag-o sang tagipusuon amo ang kinahanglan mismo sang madamo nga mga Nefinhon. Ang iban manggaranon kag ang iban imol, ang iban bugalon kag ang iban mapainubuson, ang iban manugpanghingabot kag ang iban nagaantos sang pagpanghingabot (tan-awa sa Alma 4:6–15). Pero tanan sila kinahanglan nga magkari kay Jesucristo para mag-ayo—pareho man sa aton tanan. Kon kita nagatinguha nga malampuwasan ang bugal ukon nagabatas sang mga pag-antos, pareho lang ang mensahe ni Alma: “Magkari kag indi magkahadlok” (Alma 7:15). Tugoti ang Manluluwas nga bag-uhon ang nagtig-a, makasasala, ukon napilasan nga tagipusuon sa isa nga mapainubuson, matinlo, kag bag-o.
Mga Ideya sa Pagtuon sa Puluy-an kag sa Simbahan
Kinahanglan ko nga maeksperiyensyahan—kag padayon nga mabatyagan—ang dako nga pagbag-o sang tagipusuon.
Si Pangulong M. Russell Ballard nagsiling: “Kinahanglan ko nga maghatag sang regular nga tion para pamangkuton ang akon kaugalingon, ‘Kamusta na ako?’ … Bilang giya para sa akon sa sining pag-interbyu sa kaugalingon, luyag ko basahon kag binagbinagon ang nagapangusisa nga mga pulong nga ara sa ika-lima nga kapitulo sang Alma” (“Magbalik kag Magbaton,” Liahona, Mayo 2017, 64).
Pamensara nga basahon ang Alma 5:14–33 nga daw ginainterbyu mo ang imo kaugalingon kag ginaeksamin ang imo tagipusuon. Mahimo nga gusto mo irekord ang imo nga sabat sa mga pamangkot. Ano ang imo matun-an parte sa imo kaugalingon? Ano ang ginapabatyag sa imo nga imo himuon bilang resulta sang imo interbyu?
Kon magliso kita sa Dios, makaeksperiyensya kita sang “pagbag-o sang tagipusuon.”
Mahimo ko mabaton ang akon panaksihon parte sa Manluluwas kag sa Iya mga pinanudlo paagi sa Balaan nga Espiritu.
Sa Alma 5, sang ginpaathag ni Alma kon paano niya naagom ang iya testimonya parte sa Manluluwas, wala niya ginsambit ang iya eksperiyensya nga nakakita sang anghel (tan-awa sa Mosias 27:10–17). Paano ni Alma nahibal-an ang kamatuoran sa iya kaugalingon? Basi pwede mo gamiton ang imo makita sa Alma 5:44–51 para magsulat sang “recipe” sa pagbaton sang testimonya parte kay Jesucristo kag sa Iya mga pinanudlo. Ano nga mga “sangkap” (mga kamatuoran sang ebanghelyo) kag “mga instruksyon” (mga butang nga pwede naton himuon sa pagpangita sang kamatuoran) ang ginlakip ni Alma? Ano nga mga “sangkap” kag “instruksyon” ang pwede mo idugang sa imo recipe halin sa imo kaugalingon nga mga eksperiyensya ukon iban pa nga mga eksperiyensya sa balaan nga mga kasulatan?
“Nasat-uman ko nga yara kamo sa mga banas sang pagkamatarong.”
Kon kaisa daw pareho kita sa katawhan sa Zarahemla, nga kinahanglan tawgon para maghinulsol (tan-awa sa Alma 5:32). Kon kaisa daw pareho man kita sa katawhan ni Gideon, nga nagatinguha sa paglakat “sa mga banas sang pagkamatarong” (Alma 7:19). Ano ang imo nakita sa mensahe ni Alma sa Gideon (sa Alma 7) nga pareho sa ginhambal niya sa Zarahemla (sa Alma 5)? Ano nga mga kinalain ang imo natalupangdan? Pangitaa ang mga butang nga gintudlo ni Alma nga makabulig sa imo nga magtiner “sa banas nga nagapadulong sa ginharian sang Dios” (Alma 7:19).
Gindala sang Manluluwas sa Iya Kaugalingon ang akon mga sala, mga kasakit, kag mga kahuyang.
Nakabatyag ka na bala nga wala sang may nakaintiendi sa imo mga kabudlayan kag mga problema? Kon amo, ang mga kamatuoran nga gintudlo ni Alma makabulig. Samtang nagabasa ka, pamalandungi kon ano ang ginatudlo sining mga bersikulo parte sa mga katuyuan sang sakripisyo sang Manluluwas. Pwede ka maghimo sang tsart nga may mga tig-ulo Ano ang gin-antos sang Manluluwas kag Ngaa Nag-antos Sia kag ilista ang imo makita sa Alma 7:7–16 (tan-awa man sa Isaias 53:3–5). May mapensaran ka bala nga partikular nga tinion nga gin-antos Niya ang pila sining mga butang? Ari ang pila ka mga halimbawa halin sa balaan nga mga kasulatan: Mateo 4:1–13; 26:55–56; 27:39–44; Marcos 14:43–46; Lucas 9:58. Ano ang imo madugang sa imo listahan halin sa sining mga bersikulo?
Isa ka butang ang magpati nga ang Manluluwas nag-antos para sa imo. Pero paano ang Iya pag-antos nagahimo sang kinalain sa imo adlaw-adlaw nga kabuhi? Ari ang pila ka balaan nga mga kasulatan nga nagapakita nga sarang ni Jesucristo magbulig ukon “magtabang” sa imo: Enos 1:5–6; Mosias 16:7–8; 21:15; 24:14–15; 3 Nefi 17:6–7; Eter 12:27–29; Doktrina kag mga Kasugtanan 121:7–10. Ano ang imo natun-an sa sining mga bersikulo? Ano ang pila ka mga pamaagi nga nagaabot Sia sa pagbulig sa imo? Sang san-o mo naeksperiyensyahan ang Iya bulig?
Magpamatuod kay Jesucristo. Pamensara ang mga paagi nga pwede mo ipaambit ang imo testimonya parte sa Manluluwas kag sa Iya pagkadios, grasya, kag pagpalangga. Pwede mo paisugon ang mga tawo nga imo ginatudloan nga magsaksi parte sa Iya paagi sa pagplastar sang mga pamangkot nga nagatulod sa ila nga maghambal kon ano ang ila nabatyagan parte sa Iya.
Para sa dugang nga mga ideya, tan-awa sa mga isyu sini nga bulan sang mga magasin nga Liahona kag Para sa Kusog sang mga Lamharon.
Mga Ideya para sa Pagtudlo sang mga Kabataan
Sarang ko mabaton ang akon kaugalingon nga testimonya paagi sa Balaan nga Espiritu.
-
Para buligan ang imo kabataan nga makahibalo kon paano patubuon ang ila kaugalingon nga testimonya, pwede mo ipakita sa ila ang litrato sa idalom kag pamangkuton sila kon paano naton ginabuligan ang bata nga mga sapat nga magdako. Dayon iangot ini sa paghalong sang aton mga testimonya. Ano nga pag-atipan ang ginakinahanglan sang aton mga testimonya? Paano naton mahibal-an kon nagatubo ini?
Kon batunon naton ang ebanghelyo, daw pareho ini sang pagsugod sang bag-o nga kabuhi.
-
Paano naagom ni Alma ang mabaskog niya nga testimonya kay Jesucristo? Pwede mo basahon ang Alma 5:44–46 upod sa imo kabataan para pangitaon ang mga sabat sa sining pamangkot. Basi pwede nga magsulat ang imo kabataan sang plano nga maghimo sang isa ka butang sini nga semana para pabakuron ang ila testimonya.
Gindala sang Manluluwas sa Iya Kaugalingon ang akon mga sala, mga kasakit, kag mga kahuyang.
-
Paano mo buligan ang imo kabataan nga maintiendihan ang Alma 7:10–13 para mahibal-an nila nga nagaulikid si Jesucristo sa ila kag makabulig sa ila? Basi pwede mo sila pangabayon nga mag-istorya sang eksperiyensya sang nagmasakit sila ukon ginsakitan ukon may iban pa nga problema nga nagpasubo sa ila. Paano sila ginbuligan sang iban nga maghaganhagan ang pamatyag? Magpamatuod nga ang Manluluwas nag-antos man sina nga mga butang, kag isugid ang tion nga ginpaumpawan ka Niya kag ginbuligan.
-
Samtang ginabasa mo kag sang imo kabataan ang Alma 7:11–13, pangitaa ang mga butang nga gin-antos ni Jesucristo para sa aton. Hagara ang imo kabataan nga gamiton ang mga tinaga kag dinalan nga ila nakita para tapuson ining dinalan: “Gin-antos ni Jesus ang para mabuligan Niya ako.” Paano nagabulig sa aton ang paghibalo nga naintiendihan ni Jesus ang aton mga kabudlayan? Paano naton mabaton ang Iya bulig? Ipaambit ang imo testimonya kay Jesucristo.
Ang pagsunod kay Jesucristo nagabulig sa akon nga magpabilin sa tadlong nga banas pabalik sa Amay nga Langitnon.
-
Patuloka ang imo kabataan sa espeho samtang ginabasa mo ang Alma 5:14 (tan-awa man sa pahina para sa kahiwatan sini nga semana). Ano ang buot silingon sang pag-angkon sang imahe sang Manluluwas sa aton dagway?
-
Paano mo gamiton ang paglaragway ni Alma sang dalan pabalik sa Amay nga Langitnon agud buligan ang imo kabataan nga makatuon sa paghimo sang husto nga mga pagpili? Pwede mo basahon sa ila ang Alma 7:19–20 kag ipadrama-drama sa ila ang paglakat sa “tiko nga mga banas” kag paglakat sa tadlong nga banas. Buligi sila nga magpanumdom sang mga pagpili nga makabulig sa aton nga magpabilin sa banas kag iban nga mga pagpili nga nagapahalin sa aton sa banas. Pwede man kamo magtan-aw sing ululupod sang mga litrato ni Jesus kag hambalan ang mga butang nga Iya ginhimo para ipakita sa aton ang banas pabalik sa Amay nga Langitnon.
Para sa dugang nga mga ideya, tan-awa sa isyu sang Abyan nga magasin sini nga bulan.
Our Advocate [Ang Aton Mananabang], ni Jay Bryant Ward