Minerva K. Teichert (1888-1976), Ammon before King Limhi [Si Amon sa atubang ni Haring Limhi], 1949-1951, oil sa masonite, 35 15/16 x 48 ka pulgada. Brigham Young University Museum of Art, 1969.

Mayo 6–12: “Sa Kusog sang Ginuo”

Mosias 7–10

Samtang ang katawhan ni Haring Mosias nagakalipay sa “dalayon nga paghidaet” sa Zarahemla (Mosias 7:1), ang ila pamensaron nagliso sa isa pa ka grupo sang mga Nefinhon, nga sa madamo nga tinuig antes naglakat para mag-estar sa duta sang Lehi-Nefi. Nagligad ang mga henerasyon, kag ang katawhan ni Mosias wala na makabati parte sa ila. Gani, ginpangabay ni Mosias si Amon nga magpanguna sang grupo para pangitaon ang mga Nefinhon nga naghalin. Natukiban sang mga nagpangita nga ang mga Nefinhon, “tungod sang kalautan” (Mosias 7:24), ginbihag sang mga Lamanhon. Pero sa pag-abot ni Amon kag sang iya kauturan, gulpi lang nga nabuhi ang paglaum nga maluwas sila.

Kon kaisa daw pareho kita sa sining mga Nefinhon, nga nagaantos tungod sang aton mga sala, nga nagapamangkot kon bala makita pa naton liwat ang paghidaet. Kon kaisa pareho kita kay Amon, nga daw ginatulod sa paglab-ot sa iban kag sa ulihi makakita nga ang aton mga pagpaninguha nakainspirar sa ila nga “ibayaw ang [ila] mga ulo, kag magkasadya, kag ibutang ang [ila] pagsalig sa Dios” (Mosias 7:19). Bisan ano pa ang aton mga sirkumstansya, kinahanglan naton tanan nga maghinulsol kag “magdangop sa Ginuo sa bug-os nga katuyuan sang tagipusuon,” nga nagatuo nga “sia … magahilway [sa aton]” (Mosias 7:33).

Mga Ideya sa Pagtuon sa Puluy-an kag sa Simbahan

Mosias 7:14–33

Si Jesucristo may gahum sa paghilway sa akon.

Ang makilala si Amon naghatag kay Haring Limhi sang paglaum, kag gusto niya nga ipasa inang paglaum sa iya katawhan. Basi ang iya mga pulong makahatag man sa imo sang paglaum. Para sa konteksto, pamensara nga rebyuhon ang sitwasyon sang katawhan ni Limhi sa Mosias 7:20–25. Dayon binagbinaga ining mga pamangkot samtang imo ginabasa ang Mosias 7:14–33:

• Ano ang ginsiling ni Limhi para pabakuron ang pagtuo kag paglaum sang iya katawhan kay Cristo?

• Ano nga mga dinalan ang nagabulig sa imo nga makabatyag sang paglaum? (tan-awa sa mga bersikulo 19, 33).

• Ano nga mga eksperiyensya ang nagbulig sa imo nga magsalig nga sarang kag pagahilwayon ka sang Dios?

Mosias 7:26–27

Gintuga ako “suno sa dagway sang Dios.”

Sa Mosias 7:26–27, ginpaathag ni Limhi ang pila sa mga kamatuoran nga gintudlo ni Abinadi. Ano nga mga kamatuoran ang imo makita sa sining mga bersikulo? Ano ang epekto sining mga kamatuoran sa imo panan-aw sa Dios kag sa imo kaugalingon?

Mosias 8:13–19

Ang Ginuo nagahatag sang mga propeta, mga manugpanan-aw, kag mga manugpahayag sang rebelasyon para sa benepisyo sang katawhan.

Sang mabatian ni Limhi ang panaksihon ni Amon nga nagbangon ang Ginuo sang manugpanan-aw, si Limhi “nagkasadya sing tuman, kag naghatag sing pasalamat sa Dios” (Mosias 8:19). Ngaa sa banta mo nga amo sadto ang iya nabatyagan? Ano ang inyo matun-an parte sa mga manugpanan-aw halin sa mga pulong ni Amon sa Mosias 8:13–19?

Sa karon nga panahon, ginasakdag naton ang Unang Pangulohan kag ang Korum sang Dose ka Apostoles bilang mga propeta, mga manugpanan-aw, kag mga manugpahayag sang rebelasyon. Paano ang mga ini nangin “dako nga benepisyo” sa imo? (Mosias 8:18). Ano ang ila gintudlo sa imo parte kay Jesucristo?

Paano mo, pareho kay Amon, ihambal sing maisog ang kakinahanglan sa mga propeta, mga manugpanan-aw, kag mga manugpahayag sang rebelasyon? (tan-awa sa Mosias 8:13–18). Halimbawa, ano ang pwede mo iistorya sa imo pamilya ukon sa social media parte sa:

• Mga kamatuoran nga ginpanumbalik sa aton panahon ni Joseph Smith kag sang iban nga mga propeta sang Ginuo (pareho sang kinaiya sang Dios, ang aton diosnon nga pagkatawo, ukon ang wala katapusan nga kinaiya sang pamilya). Ang pagrebyu sang “Ang Pagpanumbalik sang Kabug-osan sang Ebanghelyo ni Jesucristo” ukon sang “Ang Panimalay: Isa ka Proklamasyon sa Kalibutan” (Librarya sang Ebanghelyo) basi makabulig sa imo nga hunahunaon ang pila sining mga kamatuoran.

• Mga bugay sang mga kasuguan ukon ordinansa (pareho sang Pulong sang Kaalam, layi sang kaputli, ukon pagselyo sang mga pamilya).

Sang nagligad nga bulan, namati kita sa mga propeta, mga manugpanan-aw, kag mga manugpahayag sang rebelasyon sa pangkabilogan nga komperensya. Ano nga mga mensahe ang nag-inspirar sa imo? Ano ang lainon mo sa paghimo base sa imo natun-an? Ano ang ginhambal sang mga manugpanan-aw sang Ginuo parte sa “mga butang nga magaabot”? (Mosias 8:17).

Mosias 9–10

Mahimo ko atubangon ang akon mga kabudlayan “sa kusog sang Ginuo.”

Gin-ako ni Zenif nga ang iya mga kasaypanan nagbutang sa iya katawhan sa mabudlay nga kahimtangan. Pero sang ulihi, sa mga giyera batok sa mga Lamanhon, ginbuligan niya ang iya katawhan nga atubangon ang ila mga kabudlayan nga may pagtuo sa Ginuo. Samtang imo ginabasa ang Mosias 9–10, pangitaa kon ano ang ginhimo sang katawhan ni Zenif para ipakita ang ila pagtuo. Paano sila ginpabakod sang Dios? Paano ka Niya ginpabakod? Ano ang kahulugan sa imo sang maglakat “sa kusog sang Ginuo”? (Mosias 9:17; 10:10–11).

Mosias 10:11–17

Ang akon mga pagpili makaimpluwensya sang mga henerasyon.

Samtang imo ginabasa ang Mosias 10:11–17, pangitaa kon paano nakaapekto ang mga aksyon kag pamatasan sang nauna nga mga henerasyon sang mga Lamanhon sa mga henerasyon nga nagsunod. Ano ang ginasiling sini sa kon paano makaapekto ang imo mga pagpili sa iban—para sa ikaayo kag ikalain—lakip na sa mga tawo nga wala pa mabun-ag?

Maggamit sang mga leksyon gamit ang isa ka bagay. Ang mga leksyon nga nagagamit sang mga bagay nagahimo sang pagtuon nga masadya kag indi malimtan. Basi pwede mapakita sang idas sang domino kon paano makaapekto ang mga pagpili sang tawo sa ila mga kaliwat nga nagasunod (tan-awa sa Mosias 10:11–17).

Mga Ideya para sa Pagtudlo sang mga Kabataan

Mosias 7:19

Ginbuligan sang Dios ang mga tawo sa balaan nga mga kasulatan, kag mabuligan man Niya ako.

• Sang ara sa ital-ital ang iya katawhan, ginpaambit ni Haring Limhi ang balaan nga mga kasulatan para patubuon ang ila pagtuo. Pamangkuta ang imo kabataan parte sa mga istorya ukon karakter sa balaan nga kasulatan nga nakabulig sa ila nga magtuo. Dayon pwede mo basahon ang Mosias 7:19 sa ila kag rebyuhon ang mga istorya nga namitlang sa sining bersikulo (tan-awa sa “Ang Pascua (Passover)” kag “Ang mga Israelnon sa Kamingawan” sa Mga Sugilanon sa Daan nga Katipan, 70–76). Basi gusto sang imo kabataan nga idrama-drama nila ini. Paano ginbuligan sang Ginuo ang mga tawo sa sining mga istorya? Paano Niya kita buligan?

•   Buligi sila nga makita kon paano ginbuligan sang Ginuo ang mga tawo sa Libro ni Mormon—kag kon paano Niya kita buligan.

Mosias 8:16–18

Ginhatagan kita sang Dios sang mga propeta, mga manugpanan-aw, kag mga manugpahayag sang rebelasyon.

• Isa ka paagi nga magtudlo parte sa mga manugpanan-aw amo ang pagkumparar sa ila sa mga butang nga nagabulig sa aton nga mas makakita, pareho sang antipara, teleskopyo, ukon microscope. Dayon samtang ginabasa mo ang Mosias 8:17 sa imo kabataan, pwede nila ibutang sa ila mga mata ang ila mga kamot nga daw nagatulok sila sa teleskopyo tagsa nga mabatian nila ang tinaga nga “manugpanan-aw” (tan-awa man sa Moises 6:35–36). Hambali upod sa ila ang mga butang nga “ginapakita” sang Ginuo sa mga propeta nga indi naton makita. Ano ang ginpahayag sa aton sang aton mga propeta ukon mga manugpanan-aw, pareho kay Joseph Smith?

• Pagkatapos nga basahon ang Mosias 8:16–18 upod sa imo kabataan, pwede mo sila buligan sa pagpanumdom sang mga paagi nga kompletuhon ang dinalan pareho sang Ang manugpanan-aw pareho sa … nga nagabulig sa aton nga … . Halimbawa, ang manugpanan-aw daw pareho sang tanda sa trapiko nga nagatudlo sa aton padulong kay Jesus.

• Pwede man kamo maghimo sang papel nga mga agi sang tiil kag hagaron ang imo kabataan nga drowingan ini sang mga butang nga ginlaygay sa aton sang mga propeta, mga manugpanan-aw, kag mga manugpahayag sang rebelasyon nga aton himuon. Ibutang ang mga agi sang tiil sa isa ka banas sa palibot sang kuwarto, kag tugoti ang imo kabataan nga maglakat nga nagalapak sa sining mga agi sang tiil. Paano ang manugpanan-aw mangin “dako nga benepisyo” sa aton? (tan-awa sa Mosias 8:17–18).

Mosias 9:14–18; 10:10–11

Kon maluya ako, sarang ako pabakuron sang Ginuo.

• Kon ang kabataan nagapangatubang sang mga kabudlayan, pamatyag nila kon kaisa maluya kag wala sing mahimo. Paano mo buligan ang imo kabataan nga magsalig sa kusog sang Ginuo? Pwede mo sila pamangkuton kon ano ang aton ginahimo para magkusog sa pisikal. Ano ang buot silingon sang mag-angkon sang “kusog sang tawo”? (tan-awa sa Mosias 10:11). Ano ang buot silingon sang mag-angkon sang “kusog sang Ginuo,”? (tan-awa sa Mosias 9:17–18; 10:10). Paano naton mabaton ang kusog sang Ginuo? Pwede man idrowing sang imo kabataan ang litrato sang mga butang nga nagabulig sa ila nga mabaton ang kusog sang Ginuo.

Para sa dugang nga mga ideya, tan-awa sa isyu sang Abyan nga magasin sini nga bulan.

Vision to Joseph Smith [Palanan-awon kay Joseph Smith], ni Clark Kelley Price