All Things Denote There Is a God (Alma and Korihor) [Ang Tanang Butang Nagpakita nga Adunay Dios (Alma ug Korihor)], ni Walter Rane

Hulyo 15–21: “Ang Hiyas sa Pulong sa Dios”

Alma 30–31

Ang mga istorya diha sa Alma 30–31 klarong nagpakita sa gahom sa mga pulong—alang sa daotan ug alang sa maayo. Ang “pag-ulog-ulog” ug ang “hilabihan ka lanog nga mga pulong” sa usa ka mini nga magtutudlo nga ginganlan og Korihor mihulga sa pagdala sa “daghan nga mga kalag ubos ngadto sa kalaglagan” (Alma 30:31, 47). Sa samang paagi, ang mga pagtulon-an sa usa ka masinupakon nga Nephite nga ginganlan og Zoram nangulo og tibuok nga pundok sa katawhan nga mahulog ngadto “sa dako nga mga kasaypanan” ug “mituis sa mga paagi sa Ginoo” (Alma 31:9, 11).

Sa pagtandi, nagbaton si Alma og dili matarog nga hugot nga pagtuo nga ang pulong sa Dios adunay “labaw nga gamhanan nga sangpotanan diha sa mga hunahuna sa mga katawhan kay sa espada, o sa bisan unsa pa” (Alma 31:5). Ang mga pulong ni Alma nagpahayag og mahangtoron nga kamatuoran ug migamit sa mga gahom ni Jesukristo sa pagpahilom ni Korihor (tan-awa sa Alma 30:39–50), ug gidapit nila ang Iyang panalangin alang niadtong mga miuban kaniya sa pagdala og balik sa mga Zoramite ngadto sa kamatuoran (tan-awa sa Alma 31:31–38). Bililhon kini nga mga ehemplo alang sa mga sumusunod ni Kristo karon sa panahon nga komon ang sayop nga mga mensahe. Makakaplag kita og kamatuoran pinaagi sa pagsalig, sama sa gihimo ni Alma, sa “hiyas sa pulong sa Dios” (Alma 31:5).

Mga Ideya alang sa Pagkat-on diha sa Panimalay ug sa Simbahan

Alma 30:6–31

Ang kaaway maningkamot sa paglingla nako pinaagi sa sayop nga mga pagtulon-an.

Diha sa Alma 30, si Korihor gitawag og “Anti-Kristo” (bersikulo 6). Ang usa ka anti-Kristo kay si bisan kinsa o bisan unsa nga dayag o sekreto nga nagsupak ni Jesukristo ug sa Iyang ebanghelyo. Hain nga mga bersikulo diha sa Alma 30:6–31 ang nagpakita nga si Korihor nahaom niini nga paghulagway? Ang pagtuon sa sayop nga mga pagtulon-an ni Korihor makatabang kanimo sa pag-ila ug pagsalikway sa susama nga mga pagtulon-an. Ang mosunod nga mga kalihokan mahimong makatabang sa imong pagtuon:

• Unsa nga mga leksiyon nga naggamit og butang ang imong mahunahunaan aron mas maayong makasabot sa kalainan tali sa mga pagtulon-an sa Manluluwas ug sa sayop nga mga imitasyon ni Satanas? Ang pipila ka ehemplo mao ang usa ka paon nga gigamit alang sa pagpangisda, peke nga kwarta, ug sayop nga mga pahinumdom [advertising]. Unsaon nimo pagkahibalo nga peke ang usa ka butang? Unsaon nimo sa pag-ila sa kamatuoran?

• Hunahunaa ang paghimo og lista sa sayop nga mga doktrina nga gitudlo ni Korihor diha sa Alma 30:6–31. Hain sa iyang mga pagtulon-an ang mahimong madanihon sa atong panahon? (tan-awa sa Alma 30:12–18, 23–28). Unsa nga kadaot ang mahimong moresulta gumikan sa pagdawat sa maong mga ideya? Unsa nga sayop nga mga mensahe ang gigamit sa mensahe karon aron sa pagsulay sa paglingla nimo karon?

• Unsa ang gibuhat ni Alma aron sa pagbatok sa mga pagtulon-an ni Korihor gamit ang kamatuoran? (tan-awa sa Alma 30:31–54). Sa unsang paagi nimo magamit kining sama nga mga baroganan sa imong kinabuhi?

Sama ni Alma, ang mga propeta ug apostoles sa modernong panahon makatabang kanato nga mahibalo sa kalainan tali sa kamatuoran ug sa mga bakak ni Satanas. Unsa nga tambag ang imong makit-an niini nga mga mensahe: Gary E. Stevenson, “Ayaw Paglingla Kanako” (Liahona, Nob. 2019, 93–96); Dallin H. Oaks “Ayaw Kamo Pagpalimbong” (Liahona, Nob. 2004, 43–46).

Tan-awa usab sa “Sulti, Unsa ang Kamatuoran?,” Mga Himno, nu. 170.

Korihor Confronts Alma [Korihor Nakigharong ni Alma], ni Robert T. Barrett

Alma 30:39–46

Ang tanang butang nagpamatuod sa Dios.

Daghang tawo karon ang nagtuo nga walay Dios. Unsa ang imong makita sa Alma 30:39–46 nga makatabang kanimo nga mahibalo nga ang Dios tinuod? Unsay makapugong kanato sa pagkaila Kaniya? Unsa ang uban nga mga pagpamatuod nga gihatag sa Dios kanimo nga Siya buhi?

Alma 30:56–60

Ang kaaway dili mosuporta sa iyang mga sumusunod.

Unsa ang imong makat-onan gikan sa Alma 30:56–60 mahitungod kon giunsa pagtagad sa yawa ang iyang mga sumusunod? Unsa ang imong mahimo sa pagpanalipod sa imong panimalay batok sa iyang impluwensiya?

Tan-awa usab sa Alma 36:3.

Alma 31

Ang pulong sa Dios adunay gahom sa paggiya sa katawhan ngadto sa pagkamatarong.

Ang problema sa mga Zoramite nga mibulag gikan sa mga Nephite daw ngadto sa uban sama nga nagkinahanglan kini og usa ka politikal o militar nga kasulbaran (tan-awa diha sa Alma 31:1–4). Apan nakakat-on si Alma sa pagsalig “sa hiyas sa pulong sa Dios” (Alma 31:5). Unsa ang imong makat-onan gikan sa Alma 31:5 mahitungod sa gahom sa pulong sa Dios? (tan-awa sa Mga Hebreo 4:12; 1 Nephi 15:23–24; 2 Nephi 31:20; Jacob 2:8; Helaman 3:29–30).

Samtang magtuon ka sa Alma 31, unsa ang ubang mga kamatuoran sa ebanghelyo ang imong makaplagan nga magamit sa imong mga kasinatian sa ebanghelyo? Pananglitan:

• Sa unsang paagi imong nakita ang pulong sa Dios nga migiya sa katawhan sa pagbuhat sa maayo nga mga butang? (tan-awa sa bersikulo 5).

• Itandi ang mga kinaiya, mga pagbati, ug mga buhat ni Alma kabahin sa uban (tan-awa sa mga bersikulo 34–35) ngadto niadtong sa mga Zoramite (tan-awa sa mga bersikulo 17–28). Sa unsang paagi nga mahimo ka nga mas sama ni Alma?

• Unsa ang imong nakita diha sa Alma 31:30–38 nga makatabang sa mga tawo kinsa nagmasulub-on alang sa mga sala sa uban?

Alma 31:5–6

Tungod ni Jesukristo, bisan kinsa makahimo sa pag-usab.

Tan-awa ang pundok sa mga tawo nga gidala ni Alma uban kaniya sa pagtudlo sa ebanghelyo ngadto sa mga Zoramite (tan-awa diha sa Alma 31:6). Unsa ang imong makat-onan mahitungod sa mga kinabuhi niini nga mga tawo diha sa Mosiah 27:8–37; 28:4; Alma 10:1–6; 11:21–25; 15:3–12. Unsa nga mensahe ang mahimong anaa alang kanimo diha sa ilang mga kasinatian?

Alang sa dugang nga mga ideya, tan-awa ang mga isyu karong bulana sa Liahona ug sa Alang sa Kalig-on sa mga Kabatan-onan nga mga magasin.

Mga Ideya sa Pagtudlo sa mga Anak

Alma 30

Ang Basahon ni Mormon nagpasidaan kanako batok sa sayop nga mga pagtulon-an.

• Ikonsiderar ang pagpakita og pipila ka butang (sama sa kwarta o pagkaon) ug mga dulaan nga kapareha niining mga butanga. Kini mahimong mosangpot ngadto sa usa ka panaghisgot mahitungod unsaon sa pagkahibalo sa kalainan tali sa mga butang nga tinuod ug sa mga butang nga sayop. Dayon mahimo nimong tabangan ang inyong mga anak sa pag-ila gikan sa Alma 30:12–18 sa mga bakak o sayop nga mga pagtulon-an nga gitudlo ni Korihor bahin sa Dios. Sa Alma 30:32–35, giunsa ni Alma pagtubag niadto nga mga bakak? Unsa ang atong makat-onan gikan sa iyang ehemplo?

Alma 30:44

Ang tanang butang nagpamatuod sa Dios.

• Si Alma naghisgot mahitungod kon sa unsang paagi ang mga butang nga anaa sa langit ug anaa sa yuta aron nagpamatuod nga ang Dios buhi. Kon mahimo, paglakaw-lakaw sa gawas uban sa inyong mga anak o pagbarog duol sa usa ka bentana samtang basahon nimo ang Alma 30:44. Hangyoa sila nga itudlo ang mga butang nga ilang nakita nga makatabang nila nga masayod nga tinuod ang Dios ug nga Siya nahigugma kanila. Makadrowing usab sila og mga hulagway sa mga butang nga ilang madiskobrehan (tan-awa ang pahina sa kalihokan karong semanaha).

• Samtang ikaw ug ang inyong mga anak manganta sa “Gihigugma Ako sa Langitnong Amahan” (Songbook sa mga Bata, 16–17), ipasa-pasa ang usa ka bola o laing butang. Matag karon ug unya hunonga ang musika ug hangyoa ang anak nga naggunit sa butang sa pagpakigbahin og usa ka butang nga gihimo sa Langitnong Amahan nga siya mapasalamaton.

Ang mga bata makat-on pinaagi sa mga biswal. Ang mga biswal motabang sa inyong mga anak nga mas makasabot ug makahinumdom sa mas taas nga panahon kon unsa ang gitudlo ngadto kanila. Kadaghanan sa mga kalihokan alang sa mga bata niini nga latid nagsugyot nga mogamit og mga biswal. Ikonsiderar ang pagpakita og usab sa samang mga biswal sa umaabot aron sa pagtabang sa inyong mga anak nga makahinumdom sa unsay ilang nakat-onan.

Alma 31:5

Ang pulong sa Dios gamhanan.

• Sa unsang paagi nga imong matabangan ang inyong mga anak sa pagsabot nga ang pulong sa Dios mas gamhanan kay sa “bisan unsa pa”? (Alma 31:5). Ikonsiderar ang paghangyo kanila sa paghunahuna og butang o tawo nga gamhanan, o pagpakita og mga hulagway sa pipila ka gamhanan nga mga butang. Unsa ang nakapahimo niini nga gamhanan? Basaha og dungan ang Alma 31:5, ug pangutan-a ang inyong mga anak kon unsa sa ilang hunahuna ang kahulogan niini nga bersikulo. Pagpakigbahin og kasinatian sa dihang ang pulong sa Dios adunay gamhanan nga impluwensiya diha nimo.

Alma 31:8–35

Ang Langitnong Amahan naminaw sa akong mga pag-ampo.

• I-summarize og kadiyot ang istorya bahin ni Alma ug sa mga Zoramite, gamit ang mga bersikulo gikan sa Alma 31:8–35 (tan-awa usab sa “Kapitulo 28: Ang mga Zoramite ug ang Rameumptom,” Mga Sugilanon sa ang Basahon ni Mormon, 78–80). Tabangi ang inyong mga anak sa pagtino sa mga butang nga gisulti sa mga Zoramite sa ilang pag-ampo (tan-awa sa Alma 31:15–18) samtang magtabang sila nimo sa paghimo og Rameumptom nga tore gamit ang mga bloke o mga bato. Ipasabot nga kinahanglang dili ingon ani kita mag-ampo. Samtang ikaw ug ang inyong mga anak mag-istorya kabahin unsaon gayod nato pag-ampo, ipatangtang kanila tagsa-tagsa ang mga bloke o mga bato. Tingali mahimo nilang tipigan ang usa sa mga bato duol sa ilang higdaanan isip usa ka pahinumdom nga mag-ampo matag buntag ug gabii. Mahimo nilang kalingawan sa pag-adorno ang ilang bato.

Alang sa dugang nga mga ideya, tan-awa ang isyu karong bulana sa Higala nga magasin.

Ang mga kasingkasing sa mga Zoramite “gibayaw ngadto sa dako nga pagpanghambog, diha sa ilang garbo” (Alma 31:25).