All Things Denote There Is a God (Alma and Korihor) [Tē fa’a’ite nei te mau mea ato’a ē, tē vai nei hō’ē Atua (Alama ’e ’o Korihora)], nā Walter Rane

15–21 nō Tiurai : « Te mana nō te parau a te Atua »

Alama 30–31

Tē fa’a’ite pāpū nei te mau ’ā’amu i roto te Alama 30–31 i te mana o te mau parau—nō te ’ino ’e nō te maita’i. ’Ua ha’amata’u te mau parau « ha’avare » ’e te mau parau « tāvaimanino » a te hō’ē ha’api’i ’ino ’o Korihora te i’oa ’ia arata’i i « te mau vārua e rave rahi i raro i te pohe » (Alama 30:31, 47). ’Oia ato’a, ’ua arata’i te mau ha’api’ira’a a te ’āti Nephi taivā ra ’o Zorama i te hō’ē pupu ta’ata tā’āto’a ’ia ma’iri « i roto i te mau hapa rahi » ’e ’ia « ha’api’o rātou i te mau haere’a ’o te Fatu » (Alama 31:9, 11).

I te tahi pae, e fa’aro’o ’āueue ’ore tō Alama i te parau a te Atua « ’ua hau atu tō te reira mana i ni’a i te ’ā’au o te ta’ata i tō te ’o’e, ’e ’aore rā i tō te tahi atu mau mea ato’a » (Alama 31:5). ’Ua fa’ahiti te mau parau a Alama i te parau mau mure ’ore tei tītau i te mau mana ’o Iesu Mesia nō te ha’amāmū ia Korihora (hi’o Alama 30:39–50), ’e ’ua tītau te reira i tāna ha’amata’ira’a i ni’a i te feiā tei ’āpe’e iāna nō te fa’aho’i mai i te mau ’āti Zorama i te parau mau (hi’o Alama 31:31–38). E mau hi’ora’a faufa’a rahi teie nō te mau pipi a te Mesia i teie mahana, ’ua mātarohia ho’i te mau parau poro’i hape. E nehenehe rā e ’itehia ia tātou te parau mau nā roto i te ti’aturira’a « i te mana nō te parau a te Atua » (Alama 31:5), mai tā Alama i rave.

Mana’o nō te ’apo i te ha’api’ira’a i te ’utuāfare ’e i te fare purera’a

Alama 30:6–31

Tē tāmata nei te ’enemi i te ha’avare iā’u ma te mau ha’api’ira’a hape.

I roto te Alama 30, tē parauhia nei ’o Korihora ’ei « Aneti Mesia » (’īrava 6). Te hō’ē aneti Mesia, ’o te hō’ē ïa ta’ata ’aore rā te hō’ē mea ’o tē pāto’i hua nei ’aore rā ma te huna ia Iesu Mesia ’e i tāna ’evanelia. E aha te mau ’īrava i roto te Alama 30:6–31 e fa’a’ite nei ē, ’ua tano teie tātarara’a i ni’a ia Korihora ? E nehenehe te tuatāpapara’a i te mau ha’api’ira’a hape a Korihora e tauturu ia ’oe, ’ia ’ite ’e ’ia pāto’i i te mau ha’api’ira’a mai te reira. E nehenehe te mau ’ātivite i muri nei e tauturu i roto i tā ’oe tuatāpapara’a :

• E aha te mau ha’api’ira’a tao’a tā ’oe e nehenehe e feruri nō te māramarama maita’i a’e i te ta’a-’ē-ra’a i rotopū i te mau ha’api’ira’a a te Fa’aora ’e te mau fa’ahōho’ara’a hape a Sātane ? Tē vai ra te tahi mau hi’ora’a e mau ainu e fa’a’ohipahia nō te tāi’a, nō te moni ha’avare, ’e nō te fa’atianira’a ha’avare. Nāhea ’oe e nehenehe ai e parau ē, e mea ha’avare ānei te hō’ē mea ? Nāhea ’oe e ’ite ai i te parau mau ?

• E nehenehe e hāmani i te hō’ē tāpura nō te mau ha’api’ira’a tumu ha’avare tā Korihora i ha’api’i i roto te Alama 30:6–31. E aha tāna mau ha’api’ira’a e nehenehe e riro ’ei mea hema i teie mahana ? (hi’o Alama 30:12–18, 23–28). E aha te ’ino e nehenehe e riro ’ei hope’a i te fāri’ira’a i taua mau mana’o ra ? E aha te mau parau poro’i hape tā te ’enemi e fa’a’ohipa nei nō te tāmata i te ha’avare ia ’oe i teie mahana ?

• E aha tā Alama i rave nō te pāto’i i te mau ha’api’ira’a a Korihora ma te parau mau ? (hi’o Alama 30:31–54). Nāhea ’oe e nehenehe ai e fa’a’ohipa i teie mau parau tumu i roto i tō ’oe orara’a ?

Mai ia Alama, e tauturu te mau peropheta ’e te mau ’āpōsetolo nō teie anotau, ia tātou ’ia ’ite i te ta’a-’ē-ra’a i rotopū i te parau mau ’e te mau ha’avare a Sātane. E aha te a’o tā ’oe e ’ite ra i roto i teie mau parau poro’i : Gary E. Stevenson, « ’Eiaha e ha’avare mai iā’u » (Liahona, Novema 2019, 00–00).

Hi’o ato’a ; « E aha te parau mau ? », Te mau Hīmene, N°166.

Korihor Confronts Alma [Tē ’aro nei Korihora ia Alama], nā Robert T. Barrett

Alama 30:39–46

Tē fa’a’ite pāpū nei te mau mea ato’a nō te Atua.

E rave rahi ta’ata i teie mahana e ti’aturi nei ē, ’aita e Atua. E aha tā ’oe e ’ite ra i roto te Alama 30:39–46 ’o tē tauturu ia ’oe ’ia ’ite ē, e mea mau te Atua ? E aha te mea e tāpe’a nei ia tātou ’ia ’ite iāna ? E aha te tahi atu mau fa’a’itera’a pāpū tā te Atua i hōro’a mai ia ’oe ē, tē ora nei ’oia ?

Alama 30:56–60

’Aita te ’enemi e turu nei i tāna mau pipi.

E aha tā ’oe i ha’api’i mai i roto te Alama 30:56–60 nō ni’a i te huru ravera’a a te diabolo i tāna mau pipi ? E aha tā ’oe e nehenehe e rave nō te pāruru i tō ’oe ’utuāfare i mua i tōna mana ?

Hi’o ato’a Alama 36:3.

Alama 31

E mana tō te mau parau a te Atua nō te arata’i i te mau ta’ata i te parauti’a.

’Ia hi’ohia, e au ē, tītauhia te rāve’a poritita ’aore rā te nu’u fa’ehau nō te fa’a’āfaro i te fifi nō te ta’a-’ē-ra’a te mau ’āti Zorama i te mau ’āti Nephi (hi’o Alama 31:1–4). ’Ua ha’api’i mai rā Alama ’ia ti’aturi i « te mana nō te parau a te Atua » (Alama 31:5). E aha tā ’oe e ha’api’i mai nā roto mai te Alama 31:5 nō ni’a i te mana nō te parau a te Atua ? (hi’o ato’a Hebera 4:12 ; 1 Nephi 15:23–24 ; 2 Nephi 31:20 ; Iakoba 2:8 ; Helamana 3:29–30).

’A tuatāpapa ai ’oe te Alama 31, e aha te tahi atu mau parau mau o te ’evanelia tā ’oe e nehenehe e ’ite mai e tano i te mau ’itera’a o tō ’oe orara’a ? ’Ei hi’ora’a :

• Nāhea ’oe i te ’itera’a i te parau a te Atua i te arata’ira’a i te mau ta’ata ’ia rave i te ’ohipa maita’i ? (hi’o ’īrava 5).

• Fa’aau i te huru, te mau mana’o, ’e te mau ’ohipa a Alama nā ni’a ia vetahi ’ē (hi’o te mau ’īrava 34–35) ’e i tō te mau ’āti Zorama (hi’o te mau ’īrava 17–28). Nāhea ’oe i te riro rahi atu ā mai ia Alama ?

• E aha tā ’oe e ’ite nei i roto te Alama 31:30–38, ’o tē nehenehe e tauturu i te feiā e ’oto nei nō te mau hara a vetahi ’ē ?

Alama 31:5–6

Maoti Iesu Mesia, e nehenehe te mau ta’ata ato’a e taui.

’A hi’o na i te pupu ta’ata tā Alama i ’āfa’i nā muri iāna, nō te ha’api’i i te ’evanelia i te ’āti Zorama (hi’o Alama 31:6). E aha tā ’oe i ha’api’i mai nō ni’a i te orara’a o teie mau ta’ata i roto te Mosia 27:8–37 ; 28:4 ; Alama 10:1–6 ; 11:21–25 ; 15:3–12. E aha ïa te poro’i e vai ra nō ’oe i roto i tō rātou mau ’itera’a ?

Nō te tahi atu ā mana’o, ’a hi’o i te ve’a Liahona ’e Nō te pūai o te feiā ’āpī nō teie ’āva’e.

Mana’o nō te ha’api’i i te tamari’i

Alama 30

Tē fa’aara mai nei te Buka a Moromona iā’u i te mau ha’api’ira’a hape.

• E nehenehe e fa’a’ite i te tahi mau mea (mai te moni ’aore rā, te mā’a) ’e te mau fa’ahōho’ara’a tao’a ha’uti nō te reira mau mea. E nehenehe te reira e arata’i atu i te hō’ē ’āparaura’a e nāhea ’ia ’ite i te ta’a-’ē-ra’a, i rotopū i te mau mea mau ’e te mau mea ha’avare. I muri iho, e nehenehe ’oe e tauturu i tā ’oe mau tamari’i ’ia ’imi i roto te Alama 30:12–18 i te mau ha’avare ’aore rā, te mau ha’api’ira’a hape tā Korihora i ha’api’i nō ni’a i te Atua. I roto te Alama 30:32–35, nāhea tō Alama pāhonora’a i te reira mau ha’avare ? E aha tā tātou i ha’api’i mai nā roto mai i tōna hi’ora’a ?

Alama 30:44

Tē fa’a’ite pāpū nei te mau mea ato’a nō te Atua.

• ’Ua paraparau Alama nāhea te mau mea i roto i te ra’i ’e i ni’a i te fenua nei i te fa’a’ite pāpū ē, tē ora nei te Atua. Mai te mea e nehenehe, ’a hahaere nā rāpae ’e te mau tamari’i ’aore rā, ’a ti’a i te pae ha’amāramarama ’a tai’o ai ’oe te Alama 30:44. E ani ia rātou ’ia fa’atoro i ni’a i te mau mea tā rātou e ’ite ra ’o tē tauturu ia rātou ’ia ’ite ē, tē vai mau nei te Atua ’e tē here nei ’oia ia rātou. E nehenehe ato’a rātou e pāpa’i hōho’a i te mau mea tā rātou i ’ite mai (hi’o te ’api fa’a’ana’anataera’a nō teie hepetoma).

• ’A hīmene ’oe ’e tā ’oe mau tamari’i « Mon Père céleste m’aime » (Chants pour les enfants, 16–17), ’a hōro’a i te tahi ’e te tahi i te hō’ē pōpō ’aore rā i te tahi atu mea. ’A tūpohe i te pehe i te tahi taime ’e ’a ui i te tamari’i e tāpe’a ra i te tao’a, ’ia fa’a’ite mai i te hō’ē ’ohipa tā te Metua i te ao ra i hāmani ’o tāna e māuruuru nei.

E ha’api’i mai te mau tamari’i nā roto i te mau rāve’a ’ite-mata-hia. E tauturu te mau rāve’a ’ite-mata-hia i tā ’oe mau tamari’i, ’ia māramarama maitai a’e ’e ’ia ha’amana’o maoro a’e i te mea tei ha’api’ihia ia rātou. Te hōro’a nei te rahira’a o te mau ’ātivite nā te mau tamari’i i roto i teie arata’i ha’api’ira’a, i te mau rāve’a ’ite-mata-hia nō te fa’aohipa. ’A feruri i te fa’a’ite-fa’ahou-ra’a i te reira ā mau rāve’a ’ite-mata-hia i te mau mahana i muri nei, nō te tauturu i tā ’oe mau tamari’i ’ia ha’amana’o i te mea tā rātou i ha’api’i mai.

Alama 31:5

E mana rahi tō te parau a te Atua.

• Nāhea e ti’a ai ia ’oe ’ia tauturu i tā ’oe mau tamari’i ’ia hāro’aro’a ē, e mea pūai a’e te parau a te Atua i « te tahi atu mau mea ato’a » ? (Alama 31:5). E nehenehe e ani ia rātou ’ia feruri i te hō’ē mea ’aore rā i te hō’ē ta’ata mana, ’aore rā e fa’a’ite i te mau hōho’a o te tahi mau mea mana rahi. E aha te mea i fa’ariro ia rātou ’ei mea pūai ? E tai’o ’āmui te Alama 31:5 ’e e ani i tā ’oe mau tamari’i e aha tō rātou mana’o i te aura’a o teie ’īrava. E fa’a’ite atu i te hō’ē ’itera’a nō te hō’ē taime ’a fa’atupu ai te parau a te Atua i te hō’ē fa’aurura’a pūai i ni’a ia ’oe.

Alama 31:8–35

Tē fa’aro’o nei te Metua i te ao ra i tā’u mau pure.

• E ha’apoto poto noa i te ’ā’amu ’o Alama ’e ’o te ’āti Zorama, ma te fa’a’ohipa i te mau ’īrava i roto te Alama 31:8–35 (hi’o ato’a « Pene 28 : Te ’āti Zorama ’e te Rameumepitoma », Te mau ’ā’amu o te Buka a Moromona, 78–80). E tauturu i tā ’oe mau tamari’i ’ia ’imi i te mau mea tā te ’āti Zorama i parau i roto i tā rātou pure (hi’o Alama 31:15–18) ’a tauturu ai rātou ia ’oe i te patura’a i te hō’ē pare Rameumepitoma i te mau tāpū rā’au ’aore rā, i te mau ’ōfa’i. ’A fa’ata’a ē, e ’ere mai terā tātou ’ia pure. ’A paraparau ai ’oe ’e tā ’oe mau tamari’i nō ni’a i te huru e ti’a ia tātou ’ia pure, ’a vaiiho ia rātou ’ia tātara i te mau tāpū rā’au ’aore rā i te mau ’ōfa’i hō’ē i te taime hō’ē. Penei a’e e nehenehe rātou e tāpe’a i te hō’ē o te mau ’ōfa’i i pīha’i iho i tō rātou ro’i, ’ei fa’aha’amana’ora’a ’ia pure i te mau po’ipo’i ’e te mau pō ato’a. E nehenehe ato’a rātou e fa’anehenehe i tā rātou ’ōfa’i.

Nō te tahi atu ā mana’o, ’a hi’o i te ve’a Hoa nō teie ’āva’e.

’Ua « fa’ateiteihia te ’ā’au o te ’āti Zorama i te fa’aahaaha rahi i roto i tō rātou ra te’ote’o » (Alama 31:25).