Anti-Nephi-Lehies Bury Their Weapons of War [Mau Aniti-Nephi-Lehi e huna ra i tā rātou mau mauiha’a tama’i], nā Jody Livingston

8–14 nō Tiurai : « ’Aita roa ïa rātou i tāiva »

Alama 23–29

Tē uiui ra ānei ’oe i te tahi taime ē, e ti’a mau ānei i te ta’ata ’ia taui ? Pēnei a’e tē ha’ape’ape’a nei ’oe ē, e ti’a ānei ia ’oe ’ia upo’oti’a i ni’a i te mau mā’itira’a hape tā ’oe i rave, ’aore rā te mau peu hape tā ’oe i fa’atupu, ’aore rā tē ha’ape’ape’a ’oe mai te reira nō te tahi mau ta’ata tā ’oe i here. ’O te reira ānei ra, e nehenehe ïa i te ’ā’amu o te mau Aniti-Nephi-Lehi e tauturu ia ’oe. E mau ’enemi pāpū teie mau ta’ata nō te mau ’āti Nephi. I te fa’aotira’a te mau tamaiti a Mosia e poro i te ’evanelia ia rātou, « ’ua ’ata’ata mai ra [te ’ati Nephi] ma te tāhitohito mai ia [rātou] » E au ē, ’o te taparahi-pohe-ra’a i te ’āti Lamana te rāve’a tano a’e ’eiaha rā te fa’afāriura’a mai ia rātou. (Hi’o Alama 26:23–25.)

Terā rā ’ua taui te ’āti Lamana—nā roto i te mana fa’afāriu o Iesu Mesia. Nā mua a’e ’ua ’itehia rātou ’ei ta’ata « ’ā’au ’eta’eta ’e te taehae » (Alama 17:14), ’ua riro mai rā ’ei ta’ata « ’ua ’itea-ato’a-hia rātou nō tō rātou itoito i tā te Atua » (Alama 27:27). ’Oia mau, « ’aita roa ïa rātou i taivā » (Alama 23:6).

Tē vai ra paha tō ’oe te tahi mau mana’o ’aore rā mau ’ohipa e taui ’aore rā e « mau mauha’a tama’i nō te ’ōrurehau » e vaiiho i raro (Alama 23:7). ’Aore rā e hina’aro noa paha ’oe i te tahi ma’a itoito rahi iti a’e nō te Atua. Noa atu e aha te tauira’a tei tītauhia, e nehenehe te Alama 23–29 e hōro’a mai ia ’oe i te ti’aturira’a ē, nā roto i te mana tāra’ehara o Iesu Mesia, e tupu te hō’ē tauira’a vai maoro.

Mana’o nō te ’apo i te ha’api’ira’a i te ’utuāfare ’e i te fare purera’a

Alama 23–25 ; 27

Nā roto i tō’u fa’afāriura’a ia Iesu Mesia ’e i tāna ’evanelia, e taui tō’u orara’a.

Mai te huru ra ē, ’e’ita roa atu te āti Lamana e fāriu, terā rā, e rave rahi o rātou tei fāri’i i te mau tauira’a temeio maoti Iesu Mesia. ’Ua pi’i teie mau ’āti Lamana fa’afāriuhia ia rātou iho, te mau Aniti-Nephi-Lehi.

E nehenehe te tai’ora’a i te Alama 23–25 ; 27 e muhumuhu mai ia ’oe ’ia feruri i tō ’oe iho fa’afāriura’a. ’A ’imi e mea nāhea te mau Aniti-Nephi-Lehi i te tauira’a—e mea nāhea tō rātou fa’afāriura’ahia « i te Fatu ra » (Alama 23:6). E mea maita’i teie mau ’īrava i muri nei nō te ha’amata :

• Alama 23:6–7

• Alama 23:17–18

• Alama 24:15–21

• Alama 25:13–16

• Alama 27:26–30

’Ua nāhea Iesu Mesia ’e tāna ’evanelia i te tauira’a ia ’oe ? I nāfea tō ’oe ’itera’a ē, ’ua fātata ’oe iāna ? Nāhea ’oe e nehenehe ai e parau ē, tē fa’afāriuhia ra ’oe ia Iesu Mesia ? E aha tā te Vārua e muhumuhu mai ia ’oe ’ia rave i muri iho ?

Hi’o ato’a David A. Bednar, « Fa’afāriuhia i te Fatu », Liahona, Novema 2012, 106–9 ; Dale G. Renlund, « Te fafau-’āueue-’ore-ra’a iāna ia Iesu Mesia », Liahona, Novema 2019, 22–25.

Alama 24:7–19 ; 26:17–22

Nō te aroha o te Atua, e fa’a’ore ’oia i tā’u mau hara ’ia tātarahapa ana’e au.

Te tauira’a tā te mau Aniti-Nephi-Lehi i fāri’i, ’ua hau atu ïa i te hō’ē noa tauira’a o te huru—’o te hō’ē fa’ahuru-’ē-ra’a rā o te ’ā’au, tei fānauhia i te fa’aro’o ia Iesu Mesia ’e te tātarahapara’a mau. E ’itehia paha ia ’oe te hō’ē parau mau nō ni’a i te tātarahapara’a i roto i te ’īrava tāta’itahi i roto i te Alama 24:7–19. E aha tā teie mau ’īrava e ha’api’i nei nō ni’a i te aroha o te Atua nō te feiā e tātarahapa ? E aha te tahi atu ā mau parau mau tā ’oe e ’apo nei i roto i te Alama 26:17–22 ?

’A feruri ’ua nāhea te Atua i te fa’a’itera’a i tōna aroha ia ’oe i roto i tō ’oe orara’a. Nāhea ’oe i te fa’a’ite i tō ’oe ’ā’au mehara iāna ?

Alama 26 ; 29

E hōro’a mai te fa’a’itera’a i te ’evanelia i te ’oa’oa iā’u.

E 24 a’e taime te ta’o ’oa’oa e ’itehia i roto i te Alama 23–29, ma te fa’ariro i teie mau pene ’ei vāhi maita’i nō te ha’api’i mai e nāhea i te fāri’i i te ’oa’oa i te orara’a—’e i te fa’a’itera’a—i te ’evanelia a te Fa’aora. E nehenehe e tuatāpapa i te Alama 26:12–22, 35–37 ; ’e 29:1–17, ma te ’imi i te mau tumu i ’oa’oa ai Amona, te mau tamaiti a Mosia, ’e ’o Alama. E aha tā ’oe e ha’api’i mai nei i roto i teie mau ’īrava ’o tē nehenehe e arata’i atu i te ’oa’oa rahi atu ā i roto i tō ’oe orara’a ?

’Ua ha’api’i mai Elder Marcus B. Nash : « Nā te fa’a’itera’a i te ’evanelia e fa’a’ama i te ’oa’oa ’e te tīa’ira’a i roto i nā vārua o te ta’ata hōro’a ’e te ta’ata fāri’i […] Te fa’a’itera’a i te ’evanelia, e ’oa’oa ïa nā ni’a i te ’oa’oa, e tīa’ira’a nā ni’a i te tīa’ira’a » (« ’A fa’ateitei i tō ’outou māramarama », Liahona, Novema 2021, 71). E aha tā ’oe i ’ite i te fa’a’itera’a i te ’evanelia ia vetahi ’ē ? E aha te mau fifi tā ’oe e fa’aruru nei ’ia ’imi ana’e ’oe ’ia fa’a’ite i te ’evanelia ? Nāhea te Metua i te ao ra e nehenehe ai e tauturu ia ’oe ’ia upo’oti’a i ni’a i teie mau fifi ?

Nō te arata’ira’a a te mau peropheta e nāhea i te fa’a’ite i te ’evanelia—’e ’ia ’ite i te ’oa’oa i te ravera’a i te reira—e nehenehe e tuatāpapa i te a’ora’a a te peresideni Dallin H. Oak « Fa’a’ite i te ’evanelia tei fa’aho’i-fa’ahou-hia mai », (Liahona, Novema 2016, 57–60). E aha te mau mana’o tauturu e ’itehia ia ’oe i roto i tāna a’ora’a ?

Hi’o ato’a « The Bush Family Story [Te ’ā’amu o te ’utuāfare Bush] », « Sharing Your Beliefs [Fa’a’ite i tō ’oe mau ti’aturira’a] », « Sharing the Gospel [Fa’a’ite i te ’evanelia] » (e mau video), Vaira’a buka ’evanelia.

E hāmani i te hō’ē tāpura nō te mau mea tā ’outou e fa’a’ite atu i te hō’ē hoa nō ni’a i te Buka a Moromona. Tāmata i te fa’a’ite i te Buka a Moromona ma te fa’a’ohipa i te fa’aaura’a rorouira o te Buka a Moromona.

’Imi i te mau hōho’a ’e te mau tumu parau. ’Ia tuatāpapa ana’e tātou i te mau pāpa’ira’a mo’a, e nehenehe e ’itehia ia tātou te mau parau mau faufa’a rahi nā roto i te ’imira’a i te mau ta’o, te mau pereota ’e te mau mana’o tei fa’ahiti-pinepine-hia. E nehenehe te reira mau mana’o tei fa’ahiti-pinepine-hia e fa’ahorohia ’aore rā e tā’amuhia i roto i tā ’oe mau pāpa’ira’a mo’a nō te fa’a’ōhie i te hi’ora’a i te reira.

Alama 26:5–7

E nehenehe e ’itehia iā’u te ha’apūra’a i roto ia Iesu Mesia ’e i tāna ’evanelia.

I te tau ’ō’otira’a, pinepine te mau mā’a e ha’aputuputuhia ’e e tā’amuhia ’ei mea e pi’ihia te ruru sītona ’e e tu’uhia i roto i te mau fare vaira’a ’o tē pi’ihia i te tahi taime te mau fare vaira’a mā’a. I roto i te Alama 26:5–7 ’a feruri e aha te fa’ahōho’ara’a o te ruru sītona, te mau fare vaira’a mā’a ’e te vero i roto i tō ’oe orara’a. Nāhea e ’itehia ai ia ’oe te hō’ē ha’apura’a i roto ia Iesu Mesia ?

Hi’o ato’a Russell M. Nelson, « Te hiero ’e tō ’outou niu pae vārua », Liahona, Novema 2021, 93–96 ; « Iesu, tō’u Fa’aora », Te mau hīmene, N°53.

Nō te tahi atu ā mana’o, ’a hi’o i te ve’a Liahona ’e Nō te pūai o te feiā ’āpī nō teie ’āva’e.

Mana’o nō te ha’api’i i te tamari’i

Alama 24:6–24

E ha’amaita’i te Fatu iā’u ’ia tūtava ana’e au i te ha’apa’o i tā’u mau fafaura’a iāna.

• Pēnei a’e e au mai tā ’oe mau tamari’i ’ia huna i tā rātou mau « mauiha’a tama’i » mai te mau Aniti-Nephi-Lehi. E nehenehe ’oe e tai’o i te tahi mau ’īrava i roto i te Alama 24:6–24 nō te ha’api’i i te mau tamari’i nō ni’a i te mau parau fafau tā te mau Aniti-Nephi-Lehi i rave nō te pe’e i te Fa’aora. I muri iho e nehenehe rātou e feruri i te hō’ē mea tā rātou e taui nō te pe’e iāna, nō te pāpa’i i te reira i ni’a i te ’api fa’a’ana’anataera’a nō teie hepetoma, ’e ’ia fa’ahua ’ō i te hō’ē ’āpo’o ’e ’ia huna i tā rātou mauiha’a tama’i.

• E nehenehe tā ’oe mau tamari’i e tai’o i te Alama 24:15–19 ma te ’imi e aha tā te mau Aniti-Nephi-Lehi i rave « ’ei fa’a’itera’a pāpū i [te] Atua. » I muri iho e nehenehe ’oe e paraparau ia rātou nāhea tā tātou mau fafaura’a e nehenehe ai e riro « ’ei fa’a’itera’a pāpū i [te] Atua » (īrava 18). ’A vaiiho i tā ’oe mau tamari’i ’ia paraparau e nāhea rātou ’ia fa’a’ite i te Atua ē, tē hina’aro nei rātou e pe’e iāna. E nehenehe te hīmenera’a i te hō’ē hīmene mai te « Je suivrai l’Evangile » (Chants pour les enfants, 72) e tauturu i te fa’auru ia rātou.

Alama 24:7–10 ; 26: 23–34 ; 27: 27–30

E nehenehe au e tātarahapa.

• Nō te tauturu i tā ’oe mau tamari’i ’ia ’ite e nāhea Iesu Mesia e nehenehe ai e tauturu ia tātou ’ia taui ’ia tātarahapa ana’e tātou, e nehenehe ’oe e ha’api’i ia rātou nō ni’a i te mau Aniti-Nephi-Lehi. Nō te rave i te reira, e nehenehe ’oe e tāpa’o e piti ’āu’a, te hō’ē ’o « nā mua a’e » ’e te tahi ’o « i muri a’e » I muri iho e nehenehe tā ’oe mau tamari’i e tai’o i te Alama 17:14–15 ’e 27:27–30, ’e e pāpa’i i te huru o te ’āti Lamana nā mua a’e ’e i muri a’e i te tātarahapara’a, ’e ’ia tu’u i te reira i roto i te ’āu’a ti’a. ’Ia au i te Alama 24:7–10, e aha tei tauturu ia rātou ’ia taui ? Nāhea tātou i te fa’a’ite i tō tātou māuruuru i te Atua nō tōna aroha ?

Alama 26 ; 29

E hōro’a mai Iesu Mesia i te ’oa’oa iā’u, ’e e nehenehe au e fa’a’ite i te reira ’oa’oa.

• Pēnei a’e e au mai ’oe ’e tā ’oe mau tamari’i ’ia pāpa’i i te hōho’a nō te mau mea i roto i te ’evanelia a Iesu Mesia, ’o tē hōro’a mai i te ’oa’oa ia ’outou. E fa’a’ite i tā ’oe hōho’a i tā ’oe mau tamari’i, ’e e fa’aitoito ia rātou ’ia fa’a’ite i tā rātou hōho’a i te hō’ē ta’ata nō te tauturu i te reira ta’ata ’ia ’ite ato’a i te ’oa’oa.

• E tauturu i tā ’oe mau tamari’i ’ia ’ite mai i te mau ta’o ’oa’oa ’e fa’a’oa’oa i roto i te Alama 26 ’e te 29. E aha te mea i hōro’a i te ’oa’oa ia Amona ’e ia Alama, ’aore rā te mea i fa’atupu i te ’oa’oa i roto ia rāua ? E nehenehe teie uira’a e arata’i atu i te hō’ē ’āparaura’a nō ni’a i te ’oa’oa e tae mai nā roto i te orara’a ’aore rā te fa’a’itera’a i te ’evanelia a Iesu Mesia.

Alama 27:20–30

E nehenehe au e tauturu i tō’u mau hoa ’ia ora i te ’evanelia a Iesu Mesia.

• E nehenehe tā ’oe mau tamari’i e tai’o i te Alama 27:22–23, ma te ’imi e aha tā te ’āti Nephi i rave nō te tauturu i te mau Aniti-Nephi-Lehi ’ia tāpe’a i tā rātou fafaura’a ’eiaha roa atu e ’aro fa’ahou. Nāhea e ti’a ai ia tātou ’ia tauturu i tō tātou mau hoa ’ia tāpe’a i tā rātou mau fafaura’a ? E nehenehe tā ’oe mau tamari’i e ha’uti ta’ata ora i te tahi mau ’ohipa nei. ’Ei hi’ora’a, e aha tē ti’a ia tātou ’ia parau i te hō’ē hoa ’o tē hina’aro nei e ha’avare ’e ’aore rā, e hāmani ’ino ?

Nō te tahi atu ā mana’o, ’a hi’o i te ve’a Hoa nō teie ’āva’e.

Fa’ahōho’ara’a nō te mau Aniti-Nephi-Lehi e huna ra i tā rātou mau mauiha’a tama’i, nā Dan Burr