’A fa’ateitei i tō ’outou māramarama
Tā’u anira’a i teie mahana, e mea ’ōhie ïa : ’a fa’a’ite i te ’evanelia. Mai terā noa, ’a fa’ateitei i te māramarama.
Tē rere ra vau i Peru ma’a matahiti i ma’iri, tē pārahi ra vau i pīha’i iho i te hō’ē ta’ata tei parau iāna ’ei ta’ata atua ’ore. ’Ua ui mai ’oia nō te aha vau e ti’aturi nei i te Atua. I roto i tā māua ’āparaura’a iti i muri mai, ’ua parau atu vau ē, tē ti’aturi ra vau i te Atua nō te mea ’ua ’ite Iosepha Semita iāna—ma te parau ato’a ē tō’u ’ite nō te Atua, nō roto ato’a mai i te mau ’ohipa pae vārua pāpū i tupu nō’u. ’Ua fa’a’ite atu vau i tō’u ti’aturira’a ē « tē fa’a’ite māite nei te mau mea ato’a ē, tē vai ra te Atua »1 ’e ’ua ani atu ra vau iāna e aha tōna mana’o nō ni’a i te fenua—teie ha’apūra’a nō te ora i roto i te aore nō te reva nui—tōna vaira’a. Tāna mau parau ’oia ho’i, e « ’ohipa tupu noa » tei tupu mai te tau i muta’a iho mai ā. I tō’u tātarara’a i te pāpū ’ore rahi ē e fa’atupu te « ’ohipa tupu noa » i te ’ohipa nehenehe ’e te nahonaho maita’i, ’ua māmū ’oia i te tahi taime, ’e ’ua parau mai ra ma te au : « Tei ia ’oe ra te rē. » ’Ua ui atu vau e tai’o ānei ’oia i te Buka a Moromona. ’Ua parau mai ’oia ē ’ē, nō reira ’ua hāpono atu vau hō’ē.
Tau matahiti i muri mai, e hoa ’āpī tā’u i mātau i te taura’a manureva nō Lagos i Nītēria. ’Ua fārerei māua i tōna hi’opo’ara’a i tā’u buka rātere. ’Ua ui atu vau iāna nō ni’a i tōna ti’aturira’a fa’aro’o, ’e ’ua parau mai ’oia i tōna fa’aro’o rahi i te Atua. ’Ua fa’a’ite atu vau i te ’oa’oa ’e te oraora o te ’evanelia a Iesu Mesia tei fa’aho’ihia mai, ma te ui atu iāna e hina’aro ānei ’oia e ha’api’i rahi atu ā nā roto i te mau misiōnare. ’Ua parau mai ’oia ’ē, ’ua ha’api’ihia ’e ’ua bāpetizohia. Hō’ē paha ’aore rā piti matahiti i muri mai, tē hāhaere ra vau i te taura’a manureva nō Liberia, fa’aro’o a’era vau i te hō’ē reo tei pi’i i tō’u i’oa. ’Uā fāriu atu vau, ’o taua taure’are’a ra e haere mai ra ma te mata ’ata’ata. ’Ua tauahi māua ma te ’oa’oa ’e ’ua parau mai ra ’oia ē, e mea itoito ’oia i roto i te Ēkālesia, ’e tē ’ohipa ra ’oia ’e te mau misiōnare nō te ha’api’i i tōna hoa tamāhine.
I teienei, ’aita vau i ’ite ’ua tai’o ānei tō’u hoa atua ’ore i te Buka a Moromona ’aore rā ’ua tomo ānei ’oia i roto i te ’Ēkālesia. ’Ua nā reira te piti o tō’u hoa. Nō rāua to’opiti rā, hō’ē ā tā’u hōpoi’a2—hō’ē ā mea tā’u i fāna’o : te fa’ateiteira’a i tō’u māramarama—e here, fa’a’ite ’e tītau manihini ma te au ’e mai terā noa.3
Te mau taea’e ’e te mau tuahine, ’ua ’ite au i te mau ha’amaita’ira’a nō te fa’a’itera’a i te ’evanelia, ’e e mea fa’ahiahia mau. Teie vetahi noa o te reira :
E hōro’a mai te fa’a’itera’a i te ’evanelia i te ’oa’oa ’e te tīa’ira’a
’Ua ’ite ’outou, ’ua ’ite tātou ’ua ora na tātou ’ei tamari’i nā te Metua i te ao ra hou ’a haere mai ai i te fenua nei4 ’e ’ua hāmanihia te fenua ’ia fāna’o te ta’ata tāta’itahi i te rāve’a ’ia noa’a te hō’ē tino, te ’ite, nō te ha’api’i ’e nō tupu i te rahi ’e nō te fāri’i i te ora mure ’ore—te orara’a o te Atua.5 I ’ite te Metua i te ao ra ē e mamae tātou ’e e hara ho’i i ni’a i te fenua nei, nō reira ’ua tono mai ’oia i tāna Tamaiti, e maoti tōna « orara’a fāito ’ore »6 ’e tāna tusia tāra’ehara tā’ōti’a ’ore7 i matara ai nō tātou te fa’aorera’a hara, te orara’a i te māuiui ’e te ora.8
E tauihia te orara’a i te ’itera’a i teie mau parau mau ! ’Ia ha’api’i te ta’ata i te ’ōpuara’a hanahana nō te orara’a, ’e ’ia māramarama ’oia ē e fa’a’ore te Mesia i te hara ’e e tauturu mai ho’i te feiā e pe’e iāna, ’e e mā’iti i te pe’e i te Mesia i roto i te pape nō te bāpetizora’a, e taui te orara’a i te maita’i—noa atu ’aita tō tātou vaira’a ’o rāpae i taui.
E tuahine ’oa’oa mau tā’u i fārerei i Onitsha, i Nītēria, tei parau mai ē, mai te taime mai ā ’oia i ha’api’i i te ’evanelia ’e ’ua bāpetizohia (’e e fa’a’ohipa vau i tāna mau parau i teienei), « Maita’i ana’e te mau mea nō’u. E mea ’oa’oa vau. ’Ua tāpae au i te ra’i. »9 Nā te fa’a’itera’a i te ’evanelia e fa’a’ama i te ’oa’oa ’e te tīa’ira’a i roto i nā vārua o te ta’ata hōro’a ’e te ta’ata fāri’i. Parau mau roa, « e aha atu ā ïa te rahi o tō [’outou] ’oa’oa »10 ’ia fa’a’ite ’outou i te ’evanelia ! Te fa’a’itera’a i te ’evanelia, e ’oa’oa ïa nā ni’a i te ’oa’oa, e tīa’ira’a nā ni’a i te tīa’ira’a.11
E fa’atae mai te fa’a’itera’a i te ’evanelia i te mana o te Atua i roto i tō tātou orara’a
I te bāpetizora’ahia tātou, ’ua tomo tātou i roto i te hō’ē fafaura’a ’e te Atua ’o tē ’ore roa e mo’e,12 nō te « tāvini iāna ’e [nō te] ha’apa’o i tāna ra mau fa’auera’a »,13 ’oia ato’a ïa te ti’ara’a ’ei ’ite nōna « i te mau taime ato’a ’e nō te mau mea ato’a, ’e i roto i te mau vāhi ato’a. »14 ’Ia « ’ati » tātou iāna nā roto i te ha’apa’ora’a i teie fafaura’a, e mani’i mai te mana fa’aoraora ’e te pāturu ’e te ha’amo’a nō te huru atua i roto i tō tātou orara’a mai roto mai i te Mesia, mai te hō’ē ho’i ’āma’a e fāri’i i tāna mā’a mai roto mai i te vine.15
E pāruru te fa’a’itera’a i te ’evanelia ia tātou i te fa’ahemara’a
’Ua parau te Fatu :
« ’A fa’ateitei i tō ’outou māramarama, ’ia ’ana’ana atu i tō te ao nei. Inaha, ’o vau nei te māramarama tā ’outou e fa’ateitei atu i ni’a—te mea tā ’outou i ’ite iā’u i te ravera’a…
« […] ’Ua fa’aue atu […] vau ’ia haere mai ’outou iā’u nei, ’ia ti’a ia ’outou ’ia fāfā mai ’e ’ia ’ite mata ho’i ; ’e ’ia nā reira ato’a ’outou i tō te ao nei ; ’e ’o ’oia ’o tē ’ōfati i teie nei fa’auera’a, tē fa’ati’a ra ïa ’oia iāna iho ’ia arata’ihia atu i roto i te fa’ahemara’a. »16
’Ia mā’iti tātou e ’ore e fa’ateitei i te māramarama nō te ’evanelia e he’e tātou i roto i te maru, i reira tātou e matara ai i te fa’ahemara’a. Te mea faufa’a rā, e parau mau ato’a te huritua : nā te mā’itira’a i te fa’ateitei i te māramarama nō te ’evanelia e fa’aō hope atu ā ia tātou i roto i terā māramarama ’e te pāruru tāna e fa’afāna’o mai i mua i te fa’ahemara’a. ’Auē ïa ha’amaita’ira’a fa’ahiahia i roto i teie nei ao !
E mea fa’aora te fa’a’itera’a i te ’evanelia i te māuiui
’Ua fāri’i te tuahine Tiffany Myloan i te anira’a ’ia turu i te mau misiōnare noa atu tāna iho mau ’arora’a teimaha rahi, ’e tae noa atu te fē’a’ara’a i te pae fa’aro’o. Nō parau a’e nei ’oia ē maoti tāna tāvinira’a nā muri i te mau misiōnare, ’ua fa’a’āpīhia tōna fa’aro’o ’e tōna mana’o maita’i. ’Ua nā ’ō ’oia : « E mea fa’aora mau te ’ohipa misiōnare. »17
Te ’oa’oa. Te tīa’ira’a. Te mana turu mai te Atua mai. Te pārurura’a i te fa’ahemara’a. Te orara’a mai i te māuiui. E nīni’i pauroa mai te reira—’e tē vai atu ra (te fa’aorera’a hara ato’a)18—i ni’a ia tātou mai te ra’i mai, ’ia fa’a’ite ana’e tātou i te ’evanelia.
I teienei, te fāriura’a i ni’a i tā tātou fāna’ora’a rahi
Te mau taea’e ’e te mau tuahine, e rave rahi ta’ata « i rotopū i te mau ha’apa’ora’a ato’a, te mau [māmāiā], ’e te mau huru ’ēkālesia […] ’o tei fa’a’erehia i te parau mau nō te mea ’aita rātou i ’ite i te vāhi te reira e ’itehia mai ai. »19 ’Aita te tītaura’a e fa’ateitei i te māramarama i rahi roa a’enei i roto i te tua’ā’ai o te ta’ata nei mai teie nei. ’E ’aita te parau mau i matara rahi a’enei.
’Ua pa’ari ’o Jimmy Ton i roto i te ha’apa’ora’a Buda, ē ’ua māere ’oia i te hō’ē ’utuāfare tei fa’a’ite i tōna orara’a i ni’a i te YouTube. I tōna ’itera’a ē e mau melo rātou nō Te ’Ēkālesia a Iesu Mesia i te Feiā Mo’a i te mau Mahana Hope’a nei, ’ua tuatāpapa ’oia i tōna pae i te ’evanelia i ni’a i te natirara, ’ua tai’o i te Buka a Moromona i ni’a i te mauha’a putu parau uira, ’e ’ua bāpetizohia i muri iho i tōna fārereira’a i te mau misiōnare i te ha’api’ira’a tuatoru.20 E misiōnare rave tāmau ’o Elder Ton i teienei.
’Oia ’e tōna mau hoa misiōnare ’ati a’e i te ao nei, ’o rātou te nu’u a te Fatu—mai te parau a tō tātou peropheta.21 Tē patu nei teie mau misiōnare i te peu a tō te ao nei : tē parau ra te mau tītorotorora’a ē, tē fāriu ’ē ra te u’i Z i te Atua,22 tē fa’afāriu nei rā tō tātou mau taure’are’a fa’ehau,23 te mau taea’e ’e te mau tuahine, i te mau ta’ata i te Atua. ’E tē rahi noa atu ra te mau melo nō te ’Ēkālesia e tāhō’ē nei i te mau misiōnare nō te fa’a’ite i te ’evanelia, nō te tauturu e rave rahi atu ā hoa ’ia haere mai i te Mesia i tāna ’Ēkālesia.
’Ua tauturu tō tātou feiā mo’a nō Liberia i te mau hoa e 507 ’ia tomo i roto i te pape nō te bāpetizora’a, i te roara’a o nā ’āva’e e 10 ’aita e misiōnare rave tāmau i tō rātou fenua. I te fa’aro’ora’a te hō’ē o te mau peresideni titi fa’ahiahia i reira ē e ho’i mai te mau misiōnare rave tāmau, ’ua nā ’ō ’oia : « Maita’i roa, e tauturu mai rātou i tā mātou ’ohipa. »
’Ua tano ’oia : te ha’aputuputura’a i tō Iseraela—te tumu rahi roa ’ino i ni’a i teie fenua nei24—’o tā tātou ïa hōpoi’a ’e te fafaura’a. ’E teie ’o tō tātou tau ! Tā’u anira’a i teie mahana : ’a fa’a’ite i te ’evanelia. Mai terā noa, ’a fa’ateitei i te māramarama. ’A pure nō te tauturu a te ra’i ’e ’a pe’e i te muhumuhura’a pae vārua. ’A fa’a’ite i tō ’outou orara’a ma te au ’e mai te reira noa, ’a tītau manihini i te tahi atu ta’ata ’ia haere mai e hi’o, ’ia haere mai e tauturu ’e ’ia haere mai nō te ’ite i te tā’amura’a.25 ’Ei reira ’a ’oa’oa i te fāri’ira’a, ’outou ’e te feiā herehia, i te mau ha’amaita’ira’a i parauhia.
’Ua ’ite au ē, nā roto i te Mesia teie mau parau ’oa’oa e porohia ai i te ’ā’au marū ; nā roto i te Mesia te feiā ’ā’au ’oto e fa’aorahia ai ; nā roto i te Mesia te ora e parauhia ai i te tītī ; ’e nā roto i te Mesia, ’e te Mesia noa, te feiā heva e hōro’ahia ai te ’una’una ’ei mono i te rehu auahi.26 Nō reira te tītaura’a rahi e fa’a’ite atu i teie mau mea !27
Tē parau pāpū nei au ē ’o Iesu Mesia te tumu ’e te fa’aotira’a nō tō tātou fa’aro’o.28 Nāna e fa’aoti, nāna e fa’ahope, i tā tātou fa’a’ohipara’a i te fa’aro’o—noa atu ā e ’ere i te fāito maita’i roa—nō te fa’ateitei i te māramarama o te ’evanelia. E fa’atupu ’oia i te mau temeio i roto i tō ’outou orara’a ’e i roto i te orara’a o te feiā ato’a tāna e ha’aputuputu, e Atua temeio ho’i ’oia.29 I te i’oa maēre rahi nō Iesu Mesia, ’āmene.