’Āparaura’a i te ea o te ferurira’a
E fa’a’ite atu vau e rave rahi mana’o tā’u i rave ’a fa’aruru ai tō’u ’utuāfare i te mau tāmatara’a.
Noa atu e, ’ua fāna’o tō mātou ’utuāfare i te mau ha’amaita’ira’a rarahi ’a haere ai mātou ma te ’oa’oa i ni’a i te ’ē’a nō te fafaura’a, ’ua fa’aruru ato’a rā mātou i te mau fifi rahi roa. Tē hina’aro nei au e fa’ati’a atu i te tahi o tō’u iho mau ’itera’a nō ni’a i te ma’i o te ferurira’a. Tē vai rā i roto te topatarira’a rahi, te ahoaho rahi, te ma’i e tāuiui noa te huru [bipolaire], te ma’i TDAH [tāu’a ’ore, fiu, ha’utiuti noa]—’e i te tahi mau taime terā e maha ma’i tā’āto’a. E fa’ati’a atu vau i teie mau ’itera’a māuiui mau ma te parau fa’ati’a a te mau ta’ata tei ro’ohia i teie ’ati.
I roto i tā’u tau tāvinira’a, ’ua fārerei au e rave rahi hānere ta’ata ’e te mau ’utuāfare tei fāri’i i teie mau ’itera’a rau. I te tahi taime, tē uiui nei au ē, te ma’i rahi e tāpo’i nei i te fenua mai tei fa’ahitihia i roto i te pāpa’iraa mo’a, e nehenehe ānei te reira e fa’aō mai i te ma’i o te ferurira’a.1 Tē tupu nei te reira na te ao nei, nā te mau fenua ato’a ’e te mau tā’ere, e ro’ohia te mau ta’ata ato’a—te feiā ’āpī, te feiā pa’ari, te feiā moni ’e te feiā veve. ’Aita te mau melo o te ’Ēkālesia i fa’aāteahia.
I te reira ato’a taime, tē ha’api’i nei tā tātou ha’api’ira’a tumu ia tātou ’ia tūtava nō te riro mai ia Iesu Mesia ’e ’ia maita’i roa i roto iāna. Tē hīmene nei tā tātou mau tamari’i, « Jésus-Christ est mon modèle [Iesu Mesia tō’u hi’ora’a] ».2 Tē tītau nei tātou ’ia maita’i roa mai te Metua i te ao ra ’e ia Iesu Mesia i maita’i roa ra.3 Nō te mea ho’i e nehenehe te ma’i o te ferurira’a e ha’ataupupu i tō tātou ferurira’a nō ni’a i te maita’i-roa-ra’a, e vai noa te reira ’ei parau huna. E nō reira, ’ua rahi roa te ’ite ’ore, te māuiui muhu ’ore ’e te hepohepo. E rave rahi o rātou tei teimaha i te mea ē, ’aita rātou e fa’atura nei i te mau ture tei ha’amauhia, ’o tē mana’o hape nei ē ’aita tō rātou e pārahira’a i roto i te ’Ēkālesia.
Nō te ’aro i teie ha’avarera’a, e mea faufa’a ’ia ha’amana’o ē « ’ua here te Fa’aora i te mau tamari’i tāta’itahi a tōna Metua. ’Ua ta’a maita’i iāna i te māuiui ’e te ’arora’a tā te mau ta’ata e rave rahi e fārerei nei, i mua i te mau fifi rau i te pae o te ferurira’a. ’Ua fa’a’oroma’i ’oia i te ‘mau māuiui ’e te mau ’ati ’e te mau huru fa’ahemara’a ato’a ra… [ma te rave] i ni’a iho iāna te mau māuiui ’e te mau ma’i o tōna mau ta’ata’.(Alama 7:11 ; tu’uhia te ha’apāpūra’a ; hi’o ato’a Hebera 4:15–16 ; 2 Nephi 9:21). Nō te mea ’ua ta’a iāna te mau ’ati ato’a, ’ua ’ite ’oia nāhea ’ia ‘fa’aora i te feiā ’oto’ (Luka 4:18 ; hi’o ato’a Isaia 49:13–16) ».4 E fa’a’ite pinepine mai te mau fifi i te hina’aro nō te tahi atu mau mauha’a ’e te pāturura’a ’e e ’ere ho’i te reira i te hape o te huru ta’ata.
E fa’a’ite atu vau e rave rahi mana’o tā’u i rave ’a fa’aruru ai tō’u ’utuāfare i te mau tāmatara’a.
’A tahi, e ’oto e rave rahi ta’ata nā muri ia tātou ; e’ita rātou e ha’avā ia tātou. Nō te huru tāuiui ’ū’ana, te ahoaho ’e te topari rahi, ’ua ho’i mai tā māua tamaiti na te misiōni mai i muri noa e maha hepetoma. ’Ua fifi māua tōna nā metua, i te fa’atītī’aifaro i te ’ino’ino ’e te ’oto nō te mea ’ua pure māua ’ia manuïa ’oia. Mai te mau metua ato’a, tē hina’aro nei tātou i tā tātou mau tamari’i ’ia maita’i rahi ’e ’ia ’oa’oa. E riro te hō’ē misiōni ’ei ta’ahira’a faufa’a roa nō tā māua tamaiti. ’Ua uiui ato’a mātou e aha pai tā te tahi atu mau ta’ata e mana’o ra.
’Aita māua i ’ite, ’ua riro te ho’ira’a mai o tā māua tamaiti ’ei ’ohipa ha’amou roa nōna. ’A hi’o mai na, ’ua here ’oia i te Fatu ’e ’ua hina’aro e tāvini, ’e ’aita rā i ti’a iāna nō te mau tumu, e mea fifi roa nōna ’ia māramarama. ’Aita i maoro roa tei roto ’oia i te hō’ē taime hepohepo rahi i te ’arora’a i te hara hōhonu. ’Aita ’oia iho i ’ite ’ua fāri’ihia ’oia, ’ua teiaha rā i te pae vārua. ’Ua ha’apu’e ’oia iāna iho i te mau mana’o tāmau nō te pohe.
’A ora ai ’oia i roto i teie huru orara’a pāpū ’ore, ’ua ti’aturi tā māua tamaiti ē, hō’ē noa iho ’ohipa e toe ra i te ’ōnohira’a iāna. Aua’e te Vārua Maita’i ’e e rave rahi melahi i nā pae e piti o te pāruru nō te fa’aora iāna.
’A ’aro noa ai ’oia nō tōna ora ’e i te roara’a o taua tau fifi roa ra, ’ua tūtava tō mātou ’utuāfare, te feiā fa’atere nō te pāroita, te mau melo ’e te mau hoa nō te pāturu ’e nō te aupuru ia mātou.
’Aita roa vau i ’ite a’enei i te nīni’ira’a rahi a’e o te here. ’Aita roa vau i ’ite a’enei i te aura’a nō te tāmāhanahanara’a i te mau ta’ata e hina’aro i te tāmāhanahanara’a ma te pūai rahi a’e ’e te hōhonu. E māuruuru tāmau noa tō mātou ’utuāfare nō teie here rahi.
E’ita tā’u e nehenehe e fa’ata’a atu i te mau temeio e rave rahi tei ’āpe’e mai i teie mau ’ohipa i tupu. ’Aua’e ’ua ora mai tā māua tamaiti, ’ua tītauhia rā e rave rahi taime ’e te rapa’āura’a, te rāve’a nō te fa’aorara’a ’e te pae vārua, ’ia nehenehe iāna ’ia ora roa mai ’e ’ia fāri’i ē ’ua herehia ’oia, e faufa’a tōna ’e e hina’arohia ’oia.
’Ua ’ite au ē, ’aita te mau ’ati mai teie te huru e fa’aoti mai tō mātou. Tē ’oto nei au nō te feiā ’ua mo’e ’oi’oi e rave rahi ta’ata tei herehia e rātou ’e tē vai nei rātou ma te mana’o pe’ape’a ’e te mau uira’a pāhono-’ore-hia.
Tā’u hi’ora’a i muri iho, ’oia ho’i e mea fifi roa nō te mau metua ’ia ’ite i te mau ’arora’a a tā rātou mau tamari’i, e ti’a rā ia tātou ’ia ha’api’i ia tātou iho. Nāhea tātou ’ia ’ite i te ta’a-’ē-ra’a i rotopū i te mau tāfifira’a e tū’āti nei i te tupura’a mau ’e te mau tāpa’o o te ma’i ? ’Ei mau metua, e hōpoi’a mo’a nā tātou ’ia tauturu i tā tātou mau tamari’i ’ia fa’aruru i te mau fifi o te orara’a ; teie rā, e mea iti roa o tātou e ta’ata ’aravihi i te pae nō te ea o te ferurira’a. Nō reira, e ti’a ia tātou ’ia aupuru i tā tātou mau tamari’i nā roto i te tauturura’a ia rātou ’ia ha’api’i mai i te fāri’i noa i tā rātou mau tauto’ora’a pāpū ’a tūtava ai rātou i te pāhono i te mau tītaura’a tano. ’Ua ’ite tātou tāta’itahi nā roto i tō tātou iho mau paruparu, ’ua riro te tupura’a i te pae vārua ’ei rāve’a tāmau.
’Ua ta’a ia tātou i teienei ē « ’aita e rā’au rahi ’e te ’ōhie ’o tē hōro’a mai i te au maita’i i te pae ’āehuehu ’e i te pae ferurira’a. E fārerei tātou i te mau taime pe’ape’a ’e te ahoaho nō te mea tē ora nei tātou i roto i te hō’ē ao tahuti ’e te hō’ē tino tāhuti. Hau atu, e rave rahi ’ohipa e nehenehe e arata’i atu i te ma’i o te ferurira’a. Noa atu te huru o te maita’i o tō tātou ferurira’a ’e i te pae ’āehuehu, e mea maita’i a’e ’ia tūtonu i ni’a i te haerera’a i mua ’eiaha rā i te fa’atumura’a i ni’a i tō tātou mau paruparu ».5
Nō māua tā’u vahine, hō’ē noa mea tei tauturu noa ia māua maori rā te vai fātatara’a i te Fatu. ’Ia hi’ohia i muri iho, tē ’ite nei māua i teienei nāhea te Fatu ma te fa’aoroma’i i te ha’api’ira’a ia māua i roto i te mau tau pāpū ’ore rahi. ’Ua arata’i tōna māramarama ia māua te ta’ahira’a i muri mai i te ta’ahira’a i roto i te mau hora pōiri roa. ’Ua tauturu te Fatu ia māua ’ia ’ite i te faufa’a o te hō’ē vārua ta’ata i roto i te fa’anahora’a mure ’ore, i te tahi atu ’ohipa ’aore rā manuiara’a ato’a o te ao nei.
Fa’ahou ā, te ha’api’ira’a ia tātou iho nō ni’a i te ma’i o te ferurira’a, e fa’aineine ia tātou i te tauturu ia vetahi ’ē i roto i te ’ati ’e ia tātou iho. E tauturu te tāu’ara’a parau matara ’e te ha’avare ’ore i te tahi ’e te tahi i teie tumu parau faufa’a rahi nō te fāri’i i te arara’a e tītauhia. ’Inaha, e nā mua a’e te ha’amāramaramara’a i te fa’aurura’a ’e te heheura’a. Pinepine roa teie mau fifi ’ite-’ore-hia i te tupu i ni’a e rau huru ta’ata, ’e ’ia fārerei ana’e tātou i te reira, e riro te reira i te teimaha roa.
Te ’ohipa mātāmua roa e ti’a ia tātou ’ia ha’api’i mai maori rā e mea pāpū maita’i, ’aita tātou i vai ’ōtahi noa. Tē ani manihini nei au ia ’outou ’ia tuatāpapa i te tumu parau nō te ea i te pae ferurira’a i roto i te tuha’a Tauturu Orara’a o te fa’anahora’a Vaira’a Buka ’Evanelia. E arata’i te ha’api’ira’a mai i te hāro’aro’ara’a rahi a’e, te fāri’ira’a rahi a’e, te aroha ’e te here rahi a’e. E nehenehe te reira e fa’aiti mai i te ’ati, ma te tauturura’a ia tātou ’ia fa’ananea ’e ’ia fa’atere i te mau tītaura’a maita’i ’e te mau aura’a maita’i.
Tā’u mana’o hope’a : E ti’a ia tātou ’ia vai ara i ni’a i te tahi ’e te tahi. E ti’a ia tātou ’ia here te tahi i te tahi ’e ’ia fa’aiti mai i te ha’avā—’ia ’ore ana’e iho ā rā tā tātou mau tīa’ira’a e tupu ’oi’oi mai. E ti’a ia tātou ’ia tauturu i tā tātou mau tamari’i ’e i te feiā ’āpī ’ia ’ite i te here o Iesu Mesia i roto i tō rātou orara’a, ’ia fifi ana’e iho ā rā rātou i te ’ite rātou iho i te here nō rātou iho. ’Ua a’o mai Elder Orson F. Whitney, tei tāvini na ’ei melo nō te pupu nō te Tino ’Ahuru Ma Piti ’āpōsetolo i te mau metua e nāhea ’ia tauturu i te mau tamari’i e fifi rā : « ’A pure nō tā ’outou … mau tamari’i ; ’ia tāpe’a māite mai ia rātou ma te fa’aro’o ».6
Pinepine au i te feruri i te aura’a nō te tāpe’a māite mai ia rātou ma te fa’aro’o. Tē mana’o nei au tei roto i te reira te mau ’ohipa ’ōhie nō te here, te marū, te hāmani maita’i ’e te fa’atura. Tē aura’a, te fa’ati’ara’a ïa ia rātou ’ia fa’ananea mai te au i tō rātou vitiviti ’e te fa’a’ite-pāpū-ra’a nō te tauturu ia rātou ’ia fāri’i i te here o te Fa’aora. E tītau te reira ia tātou ’ia feruri rahi atu ā ia rātou ’e ’ia iti mai nō ni’a ia tātou iho ’e ia vetahi ’ē. Tē aura’a rahi rā e paraparau iti a’e ’e e fa’aro’o rahi atu ā. E ti’a ia tātou ’ia here ia rātou, ’ia ha’apūai ia rātou, ’e ’ia ’ārue pinepine ia rātou i roto i tā rātou mau tauto’ora’a nō te manuia ’e ’ia vai ha’apa’o maita’i i te Atua. ’E te hope’a, e mea ti’a ia tātou ’ia rave i te mau mea ato’a tā tātou e nehenehe nō te fa’aea piri noa ia rātou—mai tā tātou e vai fātata noa i te Atua.
Nō te feiā ato’a e fa’aruru nei i te ma’i o te ferurira’a, ’a tāpe’a māite i tā ’outou mau fafaura’a, noa atu ē ’aita ’outou e ’ite ra i te here o te Atua i teie taime. ’A rave i te mau mea ato’a tā ’outou e nehenehe e rave ’e i muri iho « ’a fa’aea hau noa … nō te ’ite i te fa’aorara’a o te Atua, ’e ’ia heheuhia mai tōna ra rima ».7
Tē fa’a’ite pāpū nei au ē, ’o Iesu Mesia tō tātou Fa’aora. ’Ua ’ite maita’i ’oia ia tātou. ’Ua here ’oia ia tātou ’e tē ara nei ’oia i ni’a ia tātou. I roto i te mau tāmatara’a o tō mātou ’utuāfare, ’ua ha’api’i mai au ’ua vai fātata roa mai ’oia. E parau mau tāna mau parau fafau :
’Eiaha e fē’a’a, ē feiā mo’a ē,
’O vau te Atua, te tumu e ora ai.
Nā’u e fa’ati’a, nā’u e tauturu…
Mai tō’u nei parauti’a, tō’u rima mana.
Ma te ’ite ē mea pa’ari tō tātou niu, e mata nā tātou i te fa’a’ite ma te ’oa’oa rahi :
Te vārua tei tūru’i i ni’a ia Iesu nō te fa’afa’aea
I mua i tōna mau ’enemi, e’ita vau, e’ita e ti’a iā’u ’ia fa’aru’e.
Noa atu ē ’ua tītauhia te tā’āto’ara’a o hade…
’Aita roa atu, e’ita roa atu vau e fa’aru’e iāna !8
I te i’oa ’o Iesu Mesia, ’āmene.