Te fa’aro’o nō te ’ohipa ’e nō te riro mai
Nā roto i te pure ’e te tuatāpapara’a pāpa’ira’a mo’a ’e te ’ohipara’a tātou e nehenehe ai e ha’amatara mai i te mau ha’amaita’ira’a o te ra’i, ’e e riro mai ’ei feiā ’āpe’e maita’i a’e nā te Fa’aora Iesu Mesia.
I muri noa mai i tōu pi’ira’ahia ’ia tāvini i roto i te pupu Hitu ’Ahuru, ’ua fārerei ta’a ē atu vau i te peresideni Russel M. Nelson nō te tahi tau minuti noa. E fārereira’a tei tārena-’ore-hia i te fare tāmā’ara’a, ’ua ’oa’oa roa ’oia i te fari’ira’a mai ia māua Elder S. Mark Palmer i tāna ’aira’amā’a nō te tāmā’a.
« E aha tē paraparau atu ’ia tāmā’a ’oe ’e te peropheta ? » ’o te mana’o ïa i ha’aputa mai i roto iā’u. ’Ua ui atu vau i te peresideni Nelson e mana’o tauturu ānei tāna ’aore rā e ’avei’a ānei tāna nō’u, inaha nō ha’amata noa nei au i to’u pi’i’ra’a. Mea ’ōhie roa ’e te pāpū tāna pahonora’a ; hi’o mai nei ’oia iā’u ’e ’ua parau atu ra : « Elder Schmeil, ’ua pi’ihia ’oe nō te ta’ata e ti’a ia ’oe ia riro mai. » ’Ua haere ē atu vau ma te feruri hōhonu i te mea tā te Fatu i hina’aro iā’u ia riro mai. I tō’u feruri-noa-ra’a, ’ua puta mai te mana’o ē tē hina’aro nei ’oia iā’u ’ia riro ’ei tāne fa’aipoipo maita’i a’e, ’e te metua tāne maita’i a’e ’e te tamaiti ’e te tāvini maita’i a’e. I reira tō’u ferurira’a ē e tupu teie mau mea ato’a ’ia ’ohipa vau nō te riro ’ei pipi maita’i a’e nā te Fa’aora ’o Iesu Mesia ra.
I roto i tā tātou ’āmuira’a rahi i mairi a’e nei ’ua parau te peresideni Nelson : « E tītauhia te itoito nō te rave i te mau mea ato’a. Te rirora’a ’ei pipi mau nā Iesu Mesia ’aita e ta’a-’ē-ra’a. »1 Tē tītau mai nei te peresideni Nelson ia tātou ’ia ’ohipa itoito nō tē riro mai ’ei pipi maita’i a’e nā Iesu Mesia. ’Ua parau mai ’oia ē, nō te riro rahi atu ā mai te Fa’aora te huru, tītauhia i te ha’apuai i tō tātou fa’aro’o ma te ui atu, ma te ’ohipa ’e ma te tuātapapa, teie ri’i noa a’e.
1. E ui atu
’Ua nā ’ō ’oia : « E ani i te tauturu i tō ’outou Metua i te ao ra, nā roto i te i’oa o Iesu Mesia. »2 Te anira’a nā roto i te pure ’o te hō’ē ïa tāviri e noa’a ai te ’ite e nāhea tātou ’ia riro ’ei pipi maita’i a’e nā Iesu Mesia.
I te pae hope’a o tāna misiōni i rotopū i te mau ’āti Nephi i America, ’ua pai’uma ’oia i ni’a i te ra’i. I muri iho, ’ua putuputu atu tāna mau pipi, « ’e ’ua tāhō’ēhia rātou nā roto i te pure ’ū’ana ’e te ha’apaera’a mā’a. ’E ’ua fa’a’ite fa’ahou atu ra Iesu iāna iho ia rātou, ’e tē pure ra rātou i te Metua nā roto i tōna ra i’oa. »3 Nō te aha ’o Iesu i fa’aite fa’ahou ai iāna i mua i tāna ra mau pipi ? Nō te mea tē pure nei rātou ; ’e tē ani nei rātou.
’E ’ua parau mai ra ’oia ē :
« ’E i teienei, tē haere nei au i te Metua. ’E ’oia mau tē parau atu nei au ia ’outou na, te mau mea ato’a tā ’outou e ani atu i te Metua i tō’u nei i’oa, e hōro’ahia mai ïa ia ’outou.
« Nō reira, ’a ani, ’e e fāri’i ’outou ; ’a pātōtō, ’e e ’īritihia mai ïa ia ’outou ; ’e ’o ’oia ’o tē ani, e fāri’i ïa ; ’e ’o ’oia ’o tē pātōtō, e ’īritihia mai ïa. »4
E tītauhia ia tātou ’ia ani ma te fa’aro’o ’ia ite i te hina’aro o te Fatu, ’e ’ia fari’i ē ’ua ’ite te Fatu i te mea maitai nō tātou.
2. E ’ohipa
Te ’ohipara’a ’o te tahi atu ïa tāviri faufa’a rahi nō te riro mai ’ei pipi maita’i a’e nā Iesu Mesia. ’Ia ’ohipa ana’e tātou, e riro ’oia i te arata’i ia tātou mai te ’avei’a nō tātou i ni’a i te ’ē’a. ’Ua pāpū iā’u ē ’ua ’imi ’o Nephi i te ’arata’ira’a a te Fatu e nāhea ’oia e noa’a ai iāna te mau ’api veo ia Labana ra, ’e inaha ’ua rave rātou tōna mau taea’e e piti taime ’aore i manuia. Terā rā tē ’ohipa ra rātou, ’e tē arata’i ra te Fatu ia rātou i ni’a i te ’ē’a. I te hōpe’a, ’ua manuia ’o Nephi i te torura’a o te taime. ’Ua fa’a’ite ’oia : « ’Ua arata’ihia vau e te Vārua, ’e ’aore au i ’ite nā mua roa i te mau mea tā’u e ti’a ’ia rave. »5
Mai te reira te ’ohipa a te Fatu ’ia fa’aitoito tātou ’e ’ia ’ohipa ho’i noa atu ē ’aore tātou e ta’a maitai nei e aha te mea e tītauhia ia tātou e rave. ’Ua parau te Fatu ia Nephi e aha te mea e rave : ’a haere e rave mai i te mau ’api. Terā rā ’aita ’oia i parau atu ia Nephi e nāhea oia. ’Ua vaiiho ’oia e nā Nephi e hi’o atu ’e ’ia ’imi i te tauturu a te Fatu—’e teie te huru te Fatu e ’ohipa pinepine i roto i tō tātou orara’a. Mai te mea e ’ohipa tātou ma te fa’aro’o, e arata’i te Fatu ia tātou ma te hōro’a mai i te ’avei’a.
3. E tuatāpapa
I roto i te 3 Nephi, ’ua fa’a’ite te mau pipi i te Fa’aora ē tei roto te nūna’a i te mārōra’a nō te tōpara’a i’oa o te ’Ēkalesia. ’Ei pāhonora’a, ’ua ha’api’i atu te Fa’aora i te tahi parau tumu faufa’a roa i ui ai ’oia ē : « ’Aita ānei rātou i tai’o i te mau pāpa’ira’a mo’a ? »6 Te tuātapapara’a ’o te tahi atu ïa tāviri faufa’a rahi nō te riro mai ’ei pipi maita’i a’e nā Iesu Mesia. Tē ’āpipiti nei te pure ’e te tuātapapara’a pāpa’ira’a mo’a. E ’ohipa ’āmui nei rāua nō tō tātou maitai. ’O te rēni te reira tā te Fatu i ha’amau. « ’A rave i te fa’a’amu’a i te mau parau a te Mesia ; inaha ho’i, e fa’a’ite te mau parau a te Mesia ia ’outou i te mau mea tā ’outou e ti’a ’ia rave. »7
’Ua ha’api’i ato’a te Fa’aora ē ’eiaha noa ’ia tuatāpapa i te mau pāpa’ira’a mo’a, ’ia ha’api’i ato’a rā i te ta’ata mai roto mai ia rātou, mai tāna i fa’aite i te mau ’āti Nephi : « ’E i teienei, i muri a’era, ’ia oti a’era tā Iesu tātarara’a atu i te mau pāpa’ira’a mo’a pā’āto’a ’ei hō’ē, ’e ’o tā rātou ho’i i pāpa’i, ’ua fa’aue atu ra ’oia ia rātou ’ia ha’api’i atu i te mau mea ’o tāna i tātara atu ia rātou. »8
Teie hō’ē tumu e mea faufa’a tō Nephi ho’ira’a e ti’i i te mau ’api veo : tītauhia te mau pāpa’ira’a mo’a nō tōna ’utuāfare ’eiaha noa nō te tauturu ia rātou i roto i teie tere tō rātou i te fenua i parauhia, terā rā nō te tauturu ia rātou ’ia ha’api’i i tā rātou mau tamari’i. E tītau-ato’a-hia ia tātou ’ia ’imi i te arata’ira’a i roto i te mau pāpa’ira’a mo’a nō tō tātou tere, ’e e tītauhia ’ia ha’api’i mai roto atu i te reira i roto i tō tātou ’utuāfare ’e tā tātou mau pi’ira’a i roto i te ’Ēkālesia.
4. E ’ohipa nō te riro mai
E rave rahi taime, e’ita te pāhonora’a i te mau pure e tae mai i reira ra. Terā rā ’ia pāpū tō tātou fa’aro’o nō te haere noa i mua, nō te ’ohipa ma te parauti’a, ’e nō te onoono māite mai ia Nephi i tōna ’imira’a i te mau rave’a ato’a ’ia noa’a iāna te mau ’api veo. E fa’aite mai te Fatu ia tātou i te tahi tuha’a iti i te taime hō’ē ; ’ia tuatāpapa tātou i te pāpa’ira’a mo’a, ’e horo’a mai te Fatu i te mau pāhonora’a ’e ’aore rā, te pūai ’ia tūtava noa tātou i terā mahana, i terā hepetoma ’e ’ia tāmau noa i te tūtavara’a. ’Ua parau ’o Elder Richard G. Scott : « ’A māuruuru i te mea ē i te tahi taime e vaiiho te Atua ia ’outou ’ia fa’aruru noa i te fifi nō te hō’ē taime roa hou taua pahonora’a e tae mai ai. Nā te reira e fa’arahi i tō ’outou fa’aro’o e e fa’atupu i tō ’outou huru. »9
Nā roto i te pure ’e te tuatāpapara’a pāpa’ira’a mo’a, ’ua hōro’a mai te Fatu i te pūai nō’u ’ia ’ohipa ’e ’ia fa’aoroma’i i terā mahana ’āpī, ’e terā hepetoma ’āpī, ’e ’ia tāmau fa’ahou ā. E rave rahi taime ’aita te pāhonora’a i tae mai i reira ra. E mau uira’a tā’u ’aita ā i pāhonohia mai, terā rā, tē tāmau noa nei au i te ui ’e i te tuatāpapa, ’e tē ’oa’oa nei au ē tē tāmau noa nei te Fatu i te hōro’a mai i te pūai nō te ’ohipa, ’a tīa’i noa ai i tā’u mau pahonora’a.
’Ua a’o ato’a ’o Elder Richard G. Scott : « ’Ia rave ana’e ’outou i te ’ohipa mai te au i tō ’outou ’ite nō ni’a i te mau mea, ’e ’aita rā ’outou i pāpū roa e aha ra tē rave, maoti te fa’a’ohipara’a i te fa’aro’o, e arata’ihia ’outou ’ia ’ite i te mau rāve’a ’o tē ’ore roa e noa’a ia ’outou nā roto i te tahi rave’a ē atu. »10
Te rirora’a ’ei ta’ata ’āpe’e maita’i a’e i te Fa’aora ia Iesu Mesia, e tere nō te orara’a tā’āto’a ïa, e fāito ta’a ē tā tātou tāta’itahi, e vitiviti ta’a ’ē. E mea ti’a ia tātou ’ia ha’amana’o noa ē, e ’ere teie i te ha’atū’aro, tei ’ō nei tātou nō te fa’atupu i te here ’e te tauturu te tahi i te tahi. E tītauhia tā tātou ’ohipa e ti’a ai i te Fa’aora ’ia ’ohipa nā muri ia tātou i roto i tō tātou orara’a.
’Ua parau te Fatu ia Sidney Rigdon, i te nā-’ō-ra’a ē : « ’Ua hi’o atu vau ia ’oe ’e i tā ’oe ra mau ’ohipa. ’Ua fa’aro’o vau i tā ’oe ra mau pure, ’e ’ua fa’aineine ho’i ia ’oe nō te hō’ē ’ohipa rahi a’e. »11 Tē parau pāpū nei au ē tē fa’aro’o nei ’e tē pāhono nei te Fatu i tā tātou mau pure, ’ua ’ite ’oia ia tātou ; e ’ohipa rahi roa tāna nō tātou tāta’itahi. Nā roto i te pure ’e te tuatāpapara’a pāpa’ira’a mo’a ’e te ’ohipara’a tātou e nehenehe ai e ha’amatara mai i te mau ha’amaita’ira’a o te ra’i, ’e e riro mai ’ei feiā ’āpe’e maita’i a’e nā te Fa’aora Iesu Mesia.
’Ua ha’api’i te peresideni Dallin H. Oaks ē « te ha’avāraʼa hopeʼa e ʼere noa ïa i te hi’opo’araʼa nō te tāʼāto’araʼa o te mau ’ohipa maita’i ʼe te ʼino—tā tātou i rave. ’O te hō’ē rā ’itera’a nō te hope’ara’a nō tā tātou mau ’ohipa ’e te mau mana’o—te ta’ata ’ua riro mai tātou. »12
Tē maururu nei au nō te mau peropheta, te mau hi’o, ’e te mau heheu parau ; ’o rātou ho’i tō tātou mau tīa’i i ni’a i te pare. Tē ite nei rātou i te mau mea ’ite-’ore-hia e tātou. Tē parau pāpū nei au ē nā roto i tā rātou mau parau, e nehenehe ïa tātou e riro ’ei feiā ’āpe’e maita’i a’e i tō tātou Fa’aora ia Iesu Mesia ma te tāpae i tō tātou fāito pūai. Tē parau pāpū nei au ē, tē ora nei te Mesia ’e ’ua ’ite ’oia ia tātou tāta’itahi. ’O teie tāna ’Ēkālesia. Nā roto i te i’oa mo’a o Iesu Mesia, ’āmene.