Fa’ahōhonu i tō tātou fa’afāriura’a ia Iesu Mesia
Te mau pāpa’ira’a ’e tō tātou ’ite nō ni’a i te Atua, e mau hōro’a ïa—e mau hōro’a ho’i pinepine roa tātou i te tāu’a ’ore. Poihere ana’e i teie mau ha’amaita’ira’a.
Māuruuru e te taea’e Nielson nō tā ’oe a’ora’a nehenehe. Terā mau tei hina’arohia.
E au mau taea’e, e mau tuahine here, ’ua ha’api’i iho nei te peresideni Russell M. Nelson ia tātou : « E tītauhia te tūtavara’a nō te rave i te mea maita’i ato’a. Te rirora’a ’ei pipi mau nā Iesu Mesia ’aita ïa e ta’a-’ē-ra’a. E tītauhia te tūtavara’a nō te fa’arahi i tō ’outou fa’aro’o ’e te ti’aturira’a iāna. » Te hō’ē o te mau fa’aitoitora’a tāna i hōro’a mai ia tātou nō te fa’arahi i tō tātou fa’aro’o ia Iesu Mesia maori rā ’ia riro mai ïa ’ei mau pīahi itoito, ’ia utuhi ia tātou iho i roto i te mau pāpa’ira’a mo’a nō tē māramarama maita’i atu ā i te misiōni ’e te tāvinira’a a te Mesia. (Hi’o « ’Ua ti’afa’ahou te Mesia ; e fa’anu’u te fa’aro’o iāna ra i te mau mou’a », Liahona, Mē 2021, 103.)
Tē ha’api’i nei tātou i roto i te Buka a Moromona ē ’ua riro te mau pāpa’ira’a mo’a ’ei tuha’a faufa’a roa nō te ’utuāfare o Lehi—nō reira ïa i ho’i roa ai Nephi ’e tōna mau taea’e i Ierusalema ’ia noa’a mai te mau ’api veo (hi’o 1 Nephi 3–4).
Tē heheu mai nei te mau pāpa’ira’a mo’a i te hina’aro o te Atua nō tātou, mai te Liahona ato’a nō Nephi ’e tōna metua tāne. I muri a’e tōna ’ōfatira’a i tāna fana, ’ua hina’aro Nephi ’ia ’ite i hea ’ōna e haere nō te roa’a mai te mā’a. ’Ua hi’o tōna metua tāne ’o Lehi i te Liahona ’e ’ua ’ite ’oia i te mau mea i pāpa’ihia. ’Ua ’ite ’o Nephi ē e tere nā nira ’ia au i te fa’aro’o, ’e te itoito, ’e tāna tāu’ara’a i te reira ra. ’Ua ’ite ato’a ’oia i te tahi pāpa’ira’a tei tai’o-’ōhie-hia ’e tei fa’a’ite mai ho’i ia rātou i te mau ’ē’a o te Fatu ra. ’Ua ’ite ’oia ē, nā roto i te mau rāve’a iti e fa’atupu ai te Fatu i te mau mea rarahi. ’Ua ha’apa’o atu ra ’oia i te mau arata’ira’a i fa’a’itehia mai i ni’a iho i te Liahona ra. ’Ua haere atu ra ’o Nephi i ni’a i te mou’a ’e ’ua roa’a mai iāna te mā’a nō tōna mau fēti’i, ’o tei māuiui nō te ’erera’a i te reira. (Hi’o 1 Nephi 16:23–31.)
Mai te mea rā ē iā’u nei, e pīahi ha’apa’o ’o Nephi i te mau pāpa’ira’a mo’a. Tē tai’o nei tātou ē ’ua pōpou ’o Nephi i te mau pāpa’ira’a mo’a, ’ua feruri hōhonu ’oia i roto i tōna ’ā’au, ’e ’ua pāpa’i ’oia i te reira nō te ha’api’ira’a ’e nō te maita’i o tāna mau tamari’i (hi’o 2 Nephi 4:15–16).
’Ua parau te peresideni Russell M. Nelson :
« ’Ia haere tātou ‘i mua ma te rave i te fa’a’amu’a i te parau a te Mesia, ’e ma te fa’aitoito ē tae noa atu i te hope’a ra […] e fāri’i [tātou] i te ora mure ’ore’ [2 Nephi 31:20].
« Rave i te fa’a’amu’a ’ua hau atu i te tāmata-noa-ra’a. Rave i te fa’a’amu’a, ’o te ’amu-monamona-ra’a ïa. E ’amu monamona tātou i te mau pāpa’ira’a mo’a ’ia tuatāpapa tātou i te reira nā roto i te vārua au nō te ’ite ’e te ha’apa’o maita’i. ’Ia rave tātou i te fa’a’amu’a i te parau a te Mesia, « ’ei ni’a [roa te reira] i te papa ta’ata ra i te ’ā’au’ [2 Korinetia 3:3]. E riro mai te reira ’ei tuha’a tāmau nō tō tātou nātura » (« Living by Scriptural Guidance », Liahona, Tēnuare 2001, 21).
E aha te mau mea tā tātou e rave ’ia pōpou ana’e tātou i te mau pāpa’ira’a mo’a ?
E rahi atu ā tō tātou hia’ai nō te rirora’a ’ei tuha’a nō te ha’aputuputura’a o ’Īserā’ela i nā pae e piti o te pāruru. E ani tātou i tō tātou ’utuāfare ’e tō tātou mau hoa ’ia fa’aro’o i te mau misiōnare, ma te au ’e mai terā noa. E vai ti’amā noa tātou ’e e mau tātou i te hō’ē parau fa’ati’a mana nō te hiero nō te haere pinepine i te hiero mai te mea e nehenehe. E tūtava tātou i te ’imi, i te fa’aineine ’e i te ’āfa’i i te i’oa o tō tātou mau tupuna i te hiero. E ha’apa’o maita’i tātou i te fa’aturara’a i te mahana Sābati, ma te haere i te purera’a i te mau sābati ato’a nō te fa’a’āpī i tā tātou mau fafaura’a i mua i te Fatu i te ravera’a i te ’ōro’a mo’a ma te ti’amā. E fa’aoti tātou e fa’aea noa i ni’a i te ’ē’a nō te fafaura’a, ma te ora mai te au i te mau parau ato’a e nā roto mai i te vaha o te Atua (hi’o Te Ha’api’ira’a Tumu ’e te mau Fafaura’a 84:44).
E aha te aura’a nō ’outou ’ia poupou i te mau mea a te Fatu ?
Te pōpoura’a i te mau pāpa’ira’a mo’a ’ua hau atu ïa i te po’iara’a ’e te po’ihara’a i te ’ite. ’Ua fāri’i ’o Nephi i te ’oa’oa rahi i roto i tōna orara’a. Terā rā, ’ua fa’aruru ato’a ’oia i te mau fifi ’e te ’oto (hi’o 2 Nephi 4:12–13). « ’Āre’a rā, » ’ua parau ’oia, « ’ua ’ite au iāna tā’u i ti’aturi » (2 Nephi 4:19). ’A tutāpapa ai tātou i te mau pāpa’ira’a mo’a, e māramarama maita’i atu ā ïa tātou i te fa’anahora’a a te Atua nō te fa’aorara’a ’e te fa’ateiteira’a, ’e e ti’aturi tātou i te mau fafaura’a ’o tāna i parau ia tātou i roto i te mau pāpa’ira’a mo’a, ’e nā roto ato’a i te mau fafaura’a ’e te mau ha’amaita’ira’a a te mau peropheta nō teie ’anotau.
I te hō’ē avatea, ’ua tītau-manihini-hia māua tā’u vahine i te fare o te hō’ē hoa. ’Aita tā rāua tamāroa hitu matahiti, ’o Davida, i fa’aro’o a’e nei i te ’ā’amu nō Davida ’e nō Golia i roto i te Bibilia, ’e ’ua hina’aro ’oia e fa’aro’o i te reira. ’A ha’amata ai au i te fa’ati’a i te ’ā’amu, ’ua putapū ’oia i te ravera’a a Davida, nā roto i tōna fa’aro’o ’e te i’oa o te Atua nō ’Īserā’ela, ’ua ha’apēpē ’e ’ua taparahi pohe ’oia i te Philiseti i te hō’ē ma’a ’e te ’ōfa’i, ’aita e ’o’e i te rima (hi’o 1 Samuela 17).
’Ua hi’o mai ’oia iā’u ma tōna mata ’ere’ere ’ara’ara maita’i, ’e ’ua ui pāpū mai ra : « ’O vai te Atua ? » ’Ua fa’ata’a atu vau iāna ē ’o te Atua tō tātou Metua i te ao ra ’e e ha’api’i tātou i te parau nōna i roto i te mau pāpa’iraa mo’a.
I muri iho ’ua ui mai ra ’oia : « E aha te mau pāpa’iraa mo’a ? » ’Ua parau vau iāna ē, e parau nā te Atua te mau pāpa’ira’a mo’a ’e e ’ite ’oia i te mau ’ā’amu nehenehe i roto i te reira ’o tē tauturu iāna ’ia ’ite maita’i a’e i te Atua. ’Ua ani au i tōna metua vahine ’ia fa’a’ohipa i te Bibilia e vai ra i roto i tō rātou fare ’e ’eiaha e vaiiho ia Davida ’ia haere e ta’oto ma te ’ore e tai’o iāna i te tā’āto’ara’a o te ’ā’amu. ’Ua ’oa’oa roa ’oia i te fa’aro’ora’a i te reira. Te mau pāpa’ira’a ’e tō tātou ’ite nō ni’a i te Atua, e mau hōro’a ïa—e mau hōro’a ho’i pinepine roa tātou i te tāu’a ’ore. Poihere ana’e i teie mau ha’amaita’ira’a.
I tō’u ’āpīra’a i roto i te misiōni, ’ua hi’o vau ē ’ua taui te orara’a o te mau ta’ata e rave rahi nā roto i tā māua ha’api’ira’a i te mau pāpa’ira’a mo’a. ’Ua ’ite au i tō te reira mana ’e te huru te reira e nehenehe e taui i tō tātou orara’a. Te ta’ata tāta’itahi tā mātou i ha’api’i i te ’evanelia i fa’aho’i-fa’ahou-hia mai, e ta’ata ta’a ’ē ïa ma tōna mau hina’aro ta’a ’ē. ’Ua arata’i te mau pāpa’ira’a mo’a—’oia ïa, te mau parau tohu i pāpa’ihia e te mau peropheta mo’a—ia rātou i te fa’aro’o i te Fatu ’e i te tātarahapa ’e i te fa’ahuru-’ē-ra’a i tō rātou ’ā’au.
’Ua fa’a’ī te mau pāpa’ira’a mo’a ia rātou i te ’oa’oa i te fāri’ira’a rātou i te fa’aurura’a, te arata’ira’a, te tāmāhanahanara’a, te pūai, ’e te mau pāhonora’a i tō rātou mau hina’aro. E rave rahi o rātou ’o tei fa’aoti e rave i te mau tauira’a i roto i tō rātou orara’a ’e ’o tei ha’amata i te ha’apa’o i te mau fa’auera’a a te Atua.
Tē fa’aitoito mai nei ’o Nephi ia tātou ’ia pōpou i te parau a te Mesia, inaha ho’i, e fa’a’ite te parau a te Mesia ia tātou i te mau mea tā tātou e rave (hi’o 2 Nephi 32:3).
Tē ani nei au ia ’outou ’ia hāmani i te hō’ē tāpura tāmau nō te tuatāpapara’a i te mau pāpa’ira’a mo’a. E rāve’a rahi te Mai, pe’e mai nō tātou nō te ha’api’i ’e nō te ’apo mai i te ’evanelia, ma te fa’ahōhonu i tō tātou fa’afāriura’a ia Iesu Mesia, ’e ma te tauturu ia tātou ’ia riro mai iāna te huru. ’Ia tuatāpapa tātou i te ’evanelia, ’aita tātou e ’imi noa nei i te mau ha’amāramaramara’a ’āpī, tē ’imi nei rā tātou ’ia riro mai ’ei « ta’ata ’āpī » (hi’o 2 Korinetia 5:17).
E arata’i te Vārua Maita’i ia tātou i te parau mau ma te fa’a’ite pāpū ia tātou i terā parau mau (hi’o Ioane 16:13). E tūrama ’oia i tō tātou ferurira’a, e fa’a’āpī i tā tātou i māramarama, ’e e ha’aputapū ho’i i tō tātou ’ā’au nā roto i te heheura’a nō ’ō mai i te Atua ra, te puna nō te tā’āto’ara’a o te parau mau. E tāmā te Vārua Maita’i i tō tātou ’ā’au. E fa’auru ’oia i roto ia tātou i te hia’ai ’ia ora mai te au i te parau mau, ’e e muhumuhu mai ’oia i te mau rāve’a nō te rave i te reira. « Nā te Vārua Maita’i ra […] e ha’api’i mai ia ’outou i te mau mea ato’a » (Ioane 14:26).
Nō ni’a i te mau parau tāna i heheu i te peropheta Iosepha Semita, ’ua parau tō tātou Fa’aora ē :
« E ’ere ho’i teie nei mau parau nā te mau ta’ata, e ’ere ato’a nā te hō’ē noa atu ta’ata ; nō ’ō mai rā iā’u […]
« ’O tō’u ho’i reo teie e parau atu nei i te reira ia ’outou na ; ’e tē hōro’ahia atu nei te reira e tō’u Vārua ia ’outou […]
« Nō reira, e ti’a ia ’outou ’ia fa’a’ite atu ē, ’ua fa’aro’o ’outou i tō’u nei reo, ’e ’ua ’ite ho’i i tā’u mau parau » (Te Ha’api’ira’a Tumu ’e te mau Fafaura’a 18:34–36).
E mea ti’a ia tātou ’ia ’imi i te hoara’a o te Vārua Maita’i. E mea ti’a i teie fā ’ia fa’atere i tā tātou mau fa’aotira’a ’e ’ia arata’i ho’i i tō tātou mau mana’o ’e tā tātou mau ’ohipa. E mea ti’a ia tātou ’ia ’imi i te mau mea ato’a ’o tē fa’aitoito i te fa’aurura’a a te Vārua ’e ’o tē pāto’i i te mau mea ato’a ’o tē fa’ahahi ’ē atu i taua fa’aurura’a ra.
Tē faʼaʼite pāpū nei au ē ’o Iesu Mesia te Tamaiti here a tō tātou Metua i te ao ra. ’Ua here au i tō’u Fa’aora. ’Ua māuruuru roa vau nō tāna mau pāpa’ira’a mo’a ’e nō tāna mau peropheta ora. ’O te peresideni Nelson tāna peropheta. I te i’oa o Iesu Mesia, ’āmene.