’Ia riro ’ei pipi nā te Mesia
Nō te riro ’ei pipi nā te Mesia ’o tē tūtavara’a ïa ’ia tano ti’a tā tātou mau ’ohipa, tā tātou mau peu ’e tō tātou orara’a i ni’a i tō te Fa’aora.
I roto i tā’u iho tuatāpapara’a i te mau pāpa’ira’a mo’a, ’ua fa’ahiahia vau i te fa’afāriura’a o Saulo nō Tareso, ’o tei mātauhia i muri iho ’o Paulo, mai tei fa’a’itehia i roto i te Bibilia.
E ta’ata itoito Paulo i roto i te mau hāmani-’ino-ra’a i ni’a i te ’Ēkālesia ’e te mau keresetiano. Tera rā nā roto i te mana o te ra’i ’e te tāra’ehara a Iesu Mesia, ’ua taui hope roa ’oia, ’e ’ua riro mai ’ei hō’ē o te mau tāvini rahi a’e a te Atua. Tōna hōho’a o te orara’a ’o te Fa’aora ïa ’o Iesu Mesia.
I roto i te hō’ē o tā Paulo mau ha’api’ira’a i tō Korinetia, ’ua ani ’oia ia rātou ’ia riro ’ei pipi nāna mai iāna iho i riro ’ei pipi nā te Mesia (hi’o 1 Korinetia 11:1 E anira’a pāpū ’e te mana teie nō te ’anotau o Paulo ’e tae mai i teie mahana : Ia riro ’ei pipi nā te Mesia.
’Ua ha’amata vau i te feruri nō ni’a i te aura’a ’ia riro ’ei pipi nā te Mesia. ’E te mea faufa’a roa atu, ’ua ha’amata vau i te uiui, « e nāhea vau i te tāhōho’a iāna ? »
Nō te riro ’ei pipi nā te Mesia ’o tē tūtavara’a ïa ’ia tano ti’a tā tātou mau ’ohipa, tā tātou mau peu ’e tō tātou orara’a i ni’a i tō te Fa’aora. ’O te fāri’ira’a ïa i te mau mea tai’ata ’ore. ’O te rirora’a ïa ’ei pipi mau nā Iesu Mesia.
’Ua tuatāpapa vau i te tahi mau huru o te orara’a o te Fa’aora, ’e ’ua tāpe’a mai au, ’ei tuha’a nō tā’u poro’i i teie mahana, e maha o tōna mau maita’i tā’u e tāmata nei i te tāhōho’a ’e ’o tā’u e fa’a’ite atu ia ’outou.
Te huru mātamua o te Fa’aora ’o tē ha’eha’a ïa. E ta’ata ha’eha’a roa Iesu Mesia i roto i te ao hou teie orara’a. I roto i te ’āpo’ora’a i te ao ra, ’ua ’ite ’e ’ua fa’ati’a ’oia i te hina’aro o te Atua ’ia upo’oti’a i roto i te fa’anahora’a nō te fa’aorara’a a te ta’ata nei. ’Ua parau ’oia, « e te Metua, ’ia ha’apa’ohia tō ’oe hina’aro, ’e nō ’oe te hanahana e a muri noa atu » (Mose 4:2).
’Ua ’ite tātou ē ’ua ha’api’i Iesu Mesia i te ha’eha’a ’e ’ua fa’aha’eha’a ’oia iāna iho nō te fa’ahanahana i tōna Metua.
E mata na tātou i te ora ma te ha’eha’a nō te mea e hōpoi mai te reira i te hau (hi’o Te Ha’api’ira’a Tumu ’e te mau Fafaura’a 19:23). E nā mua te ha’eha’a i te hanahana, ’e e ’āfa’i mai te reira i te maita’i o te Atua i ni’a ia tātou : « ’Ē, ’o ’outou ato’a ho’i e auraro māite ia ’outou iho, ’e ’ia fa’a’ahuhia ’outou i te ha’eha’a : E pāto’i ho’i te Atua i tei te’ote’o, e hōro’a mai rā i te maita’i nō tei ha’eha’a » (1 Petero 5:5). E hōpoi mai te ha’eha’a i te mau pāhonora’a marū. ’O te hotu ïa te reira nō te hō’ē orara’a parauti’a.
’Ua ha’api’i Elder Dale G. Renlund :
« Te ta’ata e haere ma te ha’eha’a i te aro o te Atua, e ha’amana’o ïa ’oia i te mea tā te Metua i te ao ra ’e Iesu Mesia i rave nō rātou ».
« E ha’a tātou ma te tura i mua i te Atua nā roto i te haerera’a ma te ha’eha’a i piha’i iho iāna » (« Rave i te parauti’a, ’e ’ia hina’aro ho’i i te aroha, ’e te haere ma te ha’eha’a i te aro o tō Atua », Liahona, Novema 2020, 111, 109).
Te piti o te huru o te Fa’aora o te itoito ïa. ’Ia feruri ana’e au ia Iesu Mesia i te 12ra’a o tōna matahiti, i te pārahira’a i roto i te hiero o te Atua i rotopū i te mau ’orometua nō te ture ’e te ha’api’ira’a ia rātou i te mau mea hanahana, ’ua ’ite mai au ē, ’ua fāri’i a’ena ’oia i tōna ’āpīra’a i te hō’ē huru maita’i o te itoito, hō’ē itoito ta’a ’ē. Noa atu ē tē tīa’i nei paha te rahira’a ’ia ’ite atu i teie tamaiti ’āpī ’ia ha’api’ihia e te mau ’orometua o te ture, ’ua ha’api’i atu ’oia ia rātou « ’ua fa’aro’o rātou iāna ’e ’ua ui iāna i te mau uira’a » (Īritira’a a Iosepha Semita, Luka 2:46i roto [i roto Luka 2:46, nota raro c]).
’Ua tāvini māua i te hō’ē misiōni rave tāmau i te Misiōni nō Mbuji-Mayi i te repūpirita Manahune nō Congo mai te matahiti 2016 e tae atu i te matahiti 2019. Te rāve’a nō te rātere i roto i te misiōni mai te hō’ē vāhi i te tahi atu vāhi nā te purūmu ïa. ’Ua tupu te hō’ē ’ohipa māere i roto i taua tufa’a fenua ra, ’ua haere mai te feiā ’eiā ’e te mau mauiha’a tipi i ni’a i te purūmu ’e ’ua ha’ataupupu i te tere o te rāterera’a.
E pae misiōnare e haere ra mai te hō’ē vāhi e tae atu i te tahi atu vāhi nō te hō’ē tāuiuira’a ’o tei ro’ohia i teie mau ha’ataupupura’a. Nā mua a’e, ’ua tupu ato’a te reira ’ohipa i ni’a ia mātou i te tahi taime, ’ua ha’amata mātou i te mata’u nō tō mātou ora ’e tō mātou pā’āto’a pārurura’a, e tae roa e fa’atai’ā i te rātere atu nā ni’a i teie mau pūrumu nō te haere e fārerei i te mau misiōnare ’e nō te fa’atupu i te mau ’āmuira’a ārea. ’Aita mātou i ’ite te taime e hope ai te reira ’ohipa. ’Ua pāpa’i au i te hō’ē parau fa’a’ite, ’ua hāpono atu i te Peresidenira’a Ārea, ’e ’ua fa’a’ite i tō mātou mana’o pe’ape’a nō te tāmaura’a i te rātere, i te mea ē ’o te purūmu ana’e te ’ē’a e tae atu ai i tō mātou mau misiōnare ra.
’Ei pāhonora’a, ’ua pāpa’i mai ’o Kevin Hamilton, tō mātou Peresideni Ārea nō ’Afirita Apato’a Hiti’a o te rā iā’u ē, « tā’u a’o ’o tē rave maita’i atu ā mai te noa’a ia ’outou. ’Ia vai te pa’ari ’e ’a pure. ’Eiaha e tu’u ma te ’ite ’ore i tā ’outou mau misiōnare ’aore rā ia ’outou iho i roto i te ’ati, ’a haere hō’ē ā taime rā i mua ma te fa’aro’o. ‘E ’ere ho’i i te ’ā’au taiā tā te Atua i hōro’a mai nō tātou ; i te ’ā’au itoito rā, ’e te aroha ’e te ha’apa’o maita’i’ (2 Timoteo 1:7) ».
’Ua ha’apūai rahi teie a’o ia mātou ’e ’ua fa’ati’a ia mātou ’ia tāmau noa i te tere ’e ’ia tāvini ma te itoito e tae noa atu i te hope’a o tā māua misiōni, nō te mea ’ua fa’aro’o mātou i te arata’ira’a a te Metua i te ao ra nā roto i teie pāpa’iraa mo’a.
I roto i te pāpa’ira’a mo’a nō teie ’anotau, tē tai’o nei tātou i te mau parau fa’auru a te peropheta Iosepha Semita e fa’a’ite nei i te fa’aitoitora’a a te Fatu ia tātou : « E te mau taea’e, e’ita ānei tātou e tāmau noa i roto i taua ’ohipa rahi ra ? ’A haere i mua e ’eiaha rā ia haere i muri. ’A rohi, e a’u mau taea’e ; ’a haere ā, ’a haere ā ē tae noa atu i te taime e upo’oti’a ai ra ! » (Te Ha’api’ira’a Tumu ’e te mau Fafaura’a 128:22).
’Ia itoito na tātou nō te rave i te maita’i noa atu e ’ere i te mea tuiro’o—te itoito nō te pāruru i tō tātou fa’aro’o ’e nō te rave nā roto i te fa’aro’o. E fa’aitoito na tātou i te tātarahapa i te mau mahana ato’a, te itoito nō te fāri’i i te hina’aro o te Atua ’e ’ia ha’apa’o i tāna mau fa’auera’a. E fa’aitoito na tātou i te ora ma te parauti’a ’e ’ia rave i te mea e tītauhia ia tātou i roto i tā tātou mau hōpoi’a e rave rahi ’e tō tātou mau ti’ara’a.
Te toru o te huru o te Fa’aora ’o tē fa’a’orera’a hara ïa. I te roara’a o tāna tau tāvinira’a i te tāhuti nei, ’ua pāruru te Fa’aora i te hō’ē vahine fa’aturi ’eiaha ’ia pēhīhia i te ’ōfa’i. ’Ua parau ’oia iāna ’ia « haere, ’eiaha rā ’ia hara fa’ahou » (Ioane 8:11). Nā te reira i arata’i iāna i te tātarahapa ’e i te fa’a’orera’a hara, mai tā te mau pāpa’ira’a mo’a e parau nei, « ’ua fa’ahanahana te vahine i te Atua mai taua taime ra ’e ’ua ti’aturi i tōna ra i’oa » (’Īritira’a a Iosepha Semita, Ioane 8:11 [i roto Ioane 8:11, nota raro c]).
I roto i te hō’ē purera’a Noela i te ’āva’e Tītema 2018 ra, ’ua parau tō tātou peresideni here Russell M. Nelson nō ni’a e maha hōro’a tā tātou i fāri’i nō ’ō mai i te Fa’aora ra. ’Ua parau ’oia ē te hō’ē hōro’a tā te Fa’aora e pūpū nei ’o te ’aravihi ïa ’ia fa’a’ore i te hara :
« Nā roto i tāna tāra’ehara hope ’ore, e nehenehe tā ’outou e fa’a’ore i te hara a te feiā tei hāmani ’ino mai ia ’outou ’e ’o te ’ore roa e fāri’i i te hōpoi’a nō tā rātou hāmani ’ino ia ’outou.
« E mea ’ōhie ’ia fa’a’ore i te hara a te ta’ata e tītau ra i tā ’outou fa’a’orera’a hara ma te ’ā’au tae ’e te ha’eha’a. Tera rā e hōro’a mai te Fa’aora ia ’outou i te ’aravihi nō te fa’a’ore i te hapa a te hō’ē ta’ata tei fa’a’ino ia ’outou nā roto i te mau huru ravera’a ato’a » (« Maha hōro’a tā Iesu Mesia i pūpū mai nā ’outou » [Purera’a Noela nā te Peresidenira’a Mātāmua, 2 nō Tītema 2018], broadcasts.ChurchofJesusChrist.org).
E fa’a’ore na tātou i te hapa a te tahi ’e te tahi ma te ’ā’au tae mau nō te fāri’i i te fa’a’orera’a hara a te Metua. E fa’ati’amā te fa’a’orera’a hapa ia tātou ’e e fa’ati’amā ho’i ia tātou nō te ’amu i te ’ōro’a mo’a i te mau sābati ato’a. E tītauhia te fa’a’orera’a hapa nō tātou nō te riro ’ei pipi mau nā Iesu Mesia.
Te maha o te huru o te Fa’aora ’o tē tusia ïa. E tuha’a te reira nō te ’evanelia a Iesu Mesia. ’Ua rave te Fa’aora i te tusia hope o tōna ora nō tātou ’ia fa’aorahia tātou. Ma te ’ite i te māuiui o te tūsia, ’ua ani ’oia i tōna Metua ’ia ’īriti ’ē atu i te ’āu’a, ’ua haere rā ’oia i te hope’a o te tūsia mure ’ore. Teie te tāra’ehara a Iesu Mesia.
Teie tā te peresideni M. Russell Ballard i ha’api’i : « Te tūsia ’o [te] fa’a’itera’a ïa i te here mau. E nehenehe e fāitohia te tēteri o tō tātou here nō te Fatu, nō te ’evanelia, ’e nō tō tātou mau ta’ata tupu nā ni’a i te mea tā tātou e hina’aro e fa’atusia nō rātou » (« The Blessings of Sacrifice », Ensign, Mē 1992, 76).
E nehenehe tā tātou e fa’atūsia i tō tātou taime nō te aupuru, nō te tāvini ia vetahi ’ē, nō te rave i te maita’i, nō te rave i te ’ohipa ’ā’amu ’utuāfare, ’e nō te rave maita’i i tō tātou pi’ira’a i roto i te ’Ēkālesia.
E nehenehe tātou e hōro’a i tā tātou faufa’a moni nā roto i te ’aufaura’a i te tuha’a ’ahuru, te mau ō ha’apaera’a mā’a, ’e te tahi atu mau hōro’a nō te patu i te bāsileia o te Atua i ni’a i te fenua nei. E tītau tātou i te fa’atūsiara’a nō te ha’apa’o i te mau fafaura’a tā tātou i rave ’e te Fa’aora.
Tē pure nei au ē, ’a pe’e ai tātou ia Iesu Mesia ’e ’a tāipu mai ai i te mau ha’amaita’ira’a o tōna tāra’ehara, e riro hau mai tātou i te ha’eha’a atu ā, e rahi atu ā tō tātou itoito, e fa’a’ore rahi atu ā tātou i te hapa, ’e e fa’atūsia rahi atu ā nō tōna bāsileia.
Tē fa’a’ite pāpū nei au ē, tē ora nei tō tātou Metua i te ao ra ’e ’ua mātau roa ’oia ia tātou tāta’itahi, ē ’o Iesu te Mesia, ’o te peresideni Russell M. Nelson te peropheta a te Atua i teie mahana. Tē fa’a’ite pāpū nei au ē, Te ’Ēkālesia a Iesu Mesia i te Feiā Mo’a i te mau Mahana Hope’a Nei ’o te bāsileia ia o te Atua i ni’a i te fenua nei ’e e parau mau te buka a Moromona. Nā roto i te i’oa o Iesu Mesia, tō tātou Fa’aora, ’āmene.