’Aita ānei e rā’au i Gileada ?
E ’ere te mana fa’aora a te Fa’aora i tōna noa ’aravihi nō te fa’aora i tō tātou tino, terā rā penei a’e te mea faufa’a roa, ’o tōna ïa ’aravihi ’ia fa’aora i tō tātou ’ā’au.
Tau taime ri’i i muri a’e tā’u misiōni, e pīahi ā vau i te fare ha’api’ira’a tuatoru nō Brigham Young, ’ua fāri’i au i te niuniu a tō’u metua tāne. ’Ua fa’a’ite mai ’oia iā’u ē, ’ua ’itehia e ma’i māriri ’ai ta’ata nō te rama tōna ’e noa atu ē ’aita ’oia e fana’o ’ia ora maita’i mai, ’ua fa’aoti ’oia ’ia fa’a’ora iāna ’e ’ia ho’i fa’ahou i tāna ’ohipa i mātarohia. ʼUa riro te reira niuniu ʼei mana’ona’ora’a nō’u. ’Ua riro na ho’i tō’u pāpā ’ei ’episekōpo, ’ei hoa, ’e ’ei a’o nō’u. ’A hi’o ai tō’u māmā, tō’u mau taea’e ’e mau tuahine, ’e ’o vau iho nei, e au ra ē tē fa’arumaruma ra tō mātou ’ananahi. Tē tāvini ra tō’u teina ’o Dave i tāna misiōni i New York ’e tei roto ato’a ’oia, nā te ātea i teie mau tupura’a fifi o te ’utuāfare.
Tē nā ’ō ra te mau taote tāpū i terā tau ē, e tāpū nō te tāmata i te fa’aiti mai i te ’ū’anara’a o te ma’i māriri ’aita’ata. ’Ua ha’apae mau tō’u ’utuāfare i te mā’a, ’e ’ua pure nō te hō’ē temeio. ’Ua fāri’i au ē ’ua nava’i tō mātou fa’aro’o ’ia nehenehe tō’u metua tāne ’ia fa’aorahia. Nā mua a’e noa te tāpūra’a, ’ua hōro’a tō’u taea’e Norm ’e ’o vau iho nei i te hō’ē ha’amaita’ira’a i tō’u pāpā. Mā tē fa’aro’o hope tei roa’a ia mātou, ’ua pure mātou ’ia fa’aorahia ’oia.
E rave te tāpūra’a e rave rahi hora, i muri mai rā ma’a taime iti, ’ua haere mai te taote i te piha tīa’ira’a e fārerei i tō mātou ’utuāfare. Parau mai nei ’oia ē, ’a ha’amata ai rātou i te tāpū, ’ua ’itehia ia rātou ē ’ua parare roa te ma’i i roto i te tino tā’āto’a o tō’u metua tāne. ’Ia au i tā rātou hi’ora’a, e ora noa tō’u metua tāne tau ’āva’e iti noa. ’Ua ’āehuehu roa mātou.
I te arara’a mai tō’u metua tāne, ’ua hina’aro ’oi’oi ’oia e ’ite ē ’ua manuia ānei te tāpūra’a. ’Ua fa’a’ite atu mātou i te parau ’āpī pe’ape’a.
’Ua tāmau noa mātou i te ha’apae i te mā’a, ’e ’ua pure nō te hō’ē temeio. ’A fifi ’oi’oi noa ai tōna ea, ’ua ha’amata mātou i te pure ’ia fa’a’itihia tōna māuiui. I te pae hope’a, ’a haere noa ai ’oia i te ’inora’a, ’ua ani mātou i te Fatu ’ia rave ’oi’oi atu iāna. Mai tei tōhuhia e te taote, ma’a ’āva’e noa iho i muri mai, ’ua pohe tō’u metua tāne.
E rave rahi here ’e te aupurura’a tei nini’ihia mai i ni’a i tō mātou utuāfare nā roto mai i te mau melo o te pāroita ’e te mau hoa. ’Ua ravehia te ’ōro’a hunara’a nehenehe mau ’o tei fa’ahanahana i te orara’a o tō’u metua tāne. I te roara’a o te tau, teie rā, ’e ’ua ’ite mātou i te ’oto nō te mo’era’a tō’u metua tāne, ’ua ha’amata vau i te uiui te mana’o nō te aha ’aita tō’u pāpā i ora mai. ’Ua uiui au iā’u iho, ’aita paha tō’u fa’aro’o i nāva’i. Nō te aha te tahi mau ’utuāfare ’ua fāri’i i te temeio, e ’aita rā tō mātou ? ’Ua ha’api’i mai au i roto i tā’u misiōni, ’ia fāriu atu i te mau pāpa’ira’a mo’a nō te mau pāhonora’a, ’e nō reira ’ua ha’amata vau i te tuatāpapa te mau pāpa’ira’a mo’a.
Tē ha’api’i nei te Faufa’a Tahito nō te tahi fa’ano’ano’a hano’a ’aore rā e mono’i tei fa’a’ohipahia nō te fa’aora i te mau mutumutu ’e tei hāmanihia i te ’aihere nō Gileada. I te tau o te Faufa’a Tahito, ’ua pi’ihia taua mono’i ra te « rā’au nō Gileada ».1 ’Ua ’oto te peropheta Ieremia nō te mau ’ati rahi tāna i ’ite i tōna ra nūna’a ’e ’ua tīa’i noa te fa’aorara’a. I ui atu ’o Ieremia, « ’Aita (ānei) e rā’au i Gileada ; ’aita (ānei) ’o reira e tahu’a ? »2 Nā roto i te tuāparau nihinihi, te pehe, ’e te anoihi, ’ua fa’aau-pinepine-hia te Fa’aora ’o Iesu Mesia i te rā’au nō Gileada nō tōna mana fa’aora fa’ahiahia mau. Mai ia Ieremia, ’ua uiui ato’a vau ē, « ’Aita (ānei) e rā’au i Gileada nō te ’utuāfare Nielson ? »
I roto i te Mareko pene 2 nō te Faufa’a ’Āpī, tei Kaperenaumi te Fa’aora. ’Ua parare te parau nō te mana fa’aora a te Fa’aora na te fenua ato’a, ’e e nūna’a rahi tei rātere atu i Kaperenaumi ’ia fa’aorahia rātou e te Fa’aora. Nō te rahi o te ta’ata tei ’āmui mai nā te hiti o te fare tei reira te Fa’aora, ’aita e vāhi fa’ahou ’ia roa’a iāna i te fāri’i ia rātou pā’āto’a. E maha ta’ata tei amo mai i te hō’ē hāpepa ’ia fa’aorahia ’oia e te Fa’aora. ’Aore i ti’a ia rātou e ha’afātata atu nō te rahi o te ta’ata, ’e nō reira ’ua ’īriti a’e rā rātou i te tāpo’i fare ’e ’ua tu’u atu i raro te hāpepa nō te fārerei i te Fa’aora.
’A tai’o ai au i teie ’ā’amu, ’ua maere au i te parau a te Fa’aora i tē nā-’ō-ra’a atu i teie ta’ata tāna e fārerei nei : « E tā’u tamaiti, ’ua fa’a’orehia tā ’oe mau hara ».3 ’Ua mana’o a’e ra vau ē, ’āhiri ’o vau te hō’ē o nā ta’ata e maha tei amo i teie ta’ata, e parau paha vau i te Fa’aora, « ’ua ’āfa’i mai mātou iāna ’ia fa’aorahia ». Teie paha tā te Fa’aora e pāhono mai, « ’ua fa’aora vau iāna ». Te reira mau ānei te mea tei māramarama-’ore-hia e au—ē te mana fa’aora a te Fa’aora e ere noa i tōna ’aravihi nō te fa’aora i tō tātou tino, tē mea faufa’a roa ra, tōna ’aravihi ’ia fa’aora i tō tātou ’ā’au ’e te mau ’ā’au ’ōfenehia o tō’u ’utuāfare ?
’Ua ha’api’i te Fa’aora i te hō’ē ha’api’ira’a faufa’a roa nā roto i teie ’ohipa i tupu ’a fa’aora ai ’oia i teie ta’ata i te pae tino. ’Ua māramarama roa vau i te mea ē tāna poro’i ’oia ho’i e tāpe’a ’oia i te mata o te feiā tei matapōhia ’e ’ia ’ite rātou. E tāpe’a ’oia i te tari’a o te feiā tei turihia te tari’a ’e ua fa’aro’o rātou. E tāpe’a ’oia i te ’āvae o te feiā tei ’ore e ti’a ’ia haere ’e ’ua haere rātou. E nehenehe ’oia e fa’aora i tō tātou nā mata ’e nā tari’a ’e nā ’āvae, te mea faufa’a roa a’e rā, e nehenehe ’oia e fa’aora i tō tātou ’ā’au ’a tāmā ai ’oia ia tātou i te hara ’e e tauturu ia tātou ’ia fa’aruru i roto i te mau tāmatara’a fifi roa.
I te fāra’a te Fa’aora i te mau ta’ata o te Buka a Moromona i muri mai i tōna ti’afa’ahoura’a, ’ua paraparau fa’ahou ’oia nō tōna mana fa’aora. ’Ua fa’aro’o te ’āti Nephi i tōna reo mai te ra’i mai i te paraura’a ē, « e ’ore ānei ’outou e fāriu mai iā’u i teienei, e tātarahapa ho’i i tā ’outou mau hara, ’e e fa’aro’o mai, ’ia fa’aorahia ’outou e au ra ? »4 I muri iho, ’ua ha’api’i te Faʼaora , « ’aita hoʼi ʼoutou i ʼite ʼo tē ʼore ānei rātou e ho’i mai ’e e tātarahapa, ʼe e haere mai iāʼu ma te ʼāʼau hinaʼaro hōʼē, ’e nāʼu e faʼaora ia rātou ».5 ’Aita te Fa’aora e fa’aau nei i te fa’aorara’a pae tino, i te fa’aorara’a rā i tō rātou vārua.
’Ua ’āfa’i mai Moroni i te hō’ē atu ā ha’amāramaramara’a ma te fa’a’ite mai i te mau parau a tōna metua tāne, ’o Moromona. I muri a’e i te paraura’a nō te mau temeio, ’ua fa’ata’a atu Moromona ē, « ’e ’ua oti ia Iesu te parau ē : ’Ia fa’aro’o ’outou iā’u, e roa’a ia ’outou te mana e rave ai ’outou i tei au iā’u ra ».6 ’Ua ’apo mai au ē, te tumu o tō’u fa’aro’o ’o Iesu Mesia ïa, ’e e ti’a iā’u ’ia fāri’i i te mea e au iāna ’a fa’a’ohipa ai au i te fa’aro’o iāna. Tē māramarama nei au i teienei ē, e tuha’a te pohe o tō’u metua tāne i roto i te fa’anahora’a a te Atua. I teienei, ’ia tu’u ana’e au i tō’u nā rima i ni’a i te upo’o o te tahi ta’ata nō te ha’amaita’i iāna, tei roto ia Iesu Mesia tō’u fa’aro’o, ’e ’ua ta’a maita’i iā’u ē, e ti’a ’e e nehenehe te hō’ē ta’ata e fa’aorahia i te pae tino mai te peu ’ua ti’a i te Mesia.
’Ua riro te tāra’ehara a te Fa’aora, ’o tē ha’afāna’o nei i nā pae e piti ’oia ho’i tāna tāra’ehara ’e tāna mana hōro’a, ’o tē ha’amaita’ira’a hope roa ïa tā Iesu Mesia i pūpū i te tā’āto’ara’a. ’A tātarahapa ai tātou ma te ’ā’au tae, e tāmā te Fa’aora ia tātou i te hara. ’Ia pūpū ana’e tātou i tō tātou hina’aro ’oa’oa i te Metua, noa atu tei roto i te taime fifi mau, e amo te Fa’aora i tā tātou mau zugo ’e e ha’amāmāhia mai te reira.7
Teie rā te ha’api’ira’a rahi roa a’e tā’u i ’apo mai. ’Ua ti’aturi hape vau ē, ’aita te mana fa’aora a te Fa’aora i fa’a’ohipahia nō tō’u ’utuāfare. ’Ia hi’o ana’e vau i muri mā tō’u mata tei ’ī i te pa’ari ’e te ’ite ’aravihi, tē ’ite nei au ē te mana fa’aora a te Fa’aora e ’itehia te reira i roto i te orara’a o te mau melo tāta’itahi o tō’u ’utuāfare. ’Ua rōtahi noa tō’u mana’o i ni’a i te fa’aorara’a o te tino, ē ’aita vau i ’ite i te mau temeio i te tupura’a. ’Ua ha’apūai te Fatu ’e ’ua fa’ateitei i tō’u metua vahine i ni’a a’e i tei māra’a iāna iho i roto i teie tāmatara’a fifi, ’e ’o tei ora mai i te hō’ē orara’a māoro ’e te manuia. E ’umera’a pāpū mau tōna i ni’a i tāna mau tamari’i ’e te mau mo’otua. ’Ua ha’amaita’i te Fatu iā’u ’e tō’u mau taea’e ’e mau tuahine ma te here, te hō’ēra’a, te fa’aro’o ’e te vai-pa’ari-ra’a ’o tei riro ’ei tuha’a faufa’a mau nō tō mātou orara’a ’e tē tāmau noa nei ā i teienei.
E aha rā ïa te parau nō tō’u metua tāne ? Mai te feiā ato’a tei tātarahapa, ’ua fa’aorahia ’oia i te pae vārua ’a ’imi ai ’e ’a fāri’i ai i te mau ha’amaita’ira’a e vai ra nō te Tāra’ehara a te Fa’aora. ’Ua fāri’i ’oia i te mātarara’a nō tāna mau hara ’e tē tīa’i nei i teienei i te temeio nō te ti’afa’ahoura’a. ’Ua ha’api’i te ’āpōsetolo Paulo, « mai te ta’ata i hope i te pohe ia Adamu, e hope ato’a i te fa’aorahia i te Mesia ».8 Tē ’ite ra ’outou, i parau na vau i te Fa’aora, « ’ua ’āfa’i mai mātou i tō’u metua tāne ia ’oe na ’ia fa’aorahia », ’e mea māramarama nō’u i teienei ē ’ua fa’aora te Fa’aora iāna. ’Ua fa’a’ohipahia te rā’au o Gileada nō te ’utuāfare Nielson—’eiaha mai tā mātou i mana’o, ma te rāve’a rā hau atu i te faufa’a maita’i ’o tei ha’amaita’i ’e tē tāmau noa ra i te ha’amaita’i i tō mātou orara’a.
I roto i te Ioane pene 6 o te Faufa’a ’Āpī, ’ua fa’atupu te Fa’aora i te tahi temeio tei hau roa i te maita’i. I te tahi noa mā’a i’a ’e te tahi mā’a faraoa,’ua fa’a’amu te Fa’aora i nā ta’ata e 5 000. E rave rahi taime tō’u tai’ora’a i teie ’ā’amu, tē vai ra rā te hō’ē tuha’a o teie ’itera’a i tupu tei mo’ehia iā’u ē ’ua riro i teienei ’ei aura’a maita’i nō’u. I muri a’e i tō te Fa’aora fa’a’āmura’a i nā tino e 5 000, ’ua fa’aue ’oia i tāna mau pipi ’ia ha’aputu mai i te mau hu’ahu’a, tei toe mai e 12 ’ete tei fa’a’īhia. ’Ua feruri au nō te aha te Fa’aora i fa’aue ai ’ia na-reira-hia. Mea māramarama roa nō’u ’ia ’ite ē, tē vai ra hō’ē ha’api’ira’a e roa’a mai nō teie tupura’a ’oia ho’i : ’Ua ti’a iāna i te fa’a’āmu e 5 000 ’e ’ua toe fa’ahou mai. « E au maita’i tō’u aroha i te mau ta’ata ato’a ».9 E nehenehe te mana tāra’ehara ’e te mana fa’aora a te Fa’aora e tāpo’i i te huru o te hara, ’aore rā te tāmatara’a—noa atu te ’ā’ano ’aore rā te fifi—’e te toe fa’ahou noa rā. ’Ua nāva’i tōna aroha.
Ma teie ’ite i roto ia tātou, e nehenehe tātou e nu’u atu i mua ma te fa’aro’o, ’e te ’itera’a ē, ’ia tae mai te mau taime fifi—’e e tae mai iho ā te reira—’aore rā, ’ia tāpo’i ana’e te hara i tō tātou orara’a, e ti’a mai te Fa’aora ma te « ora i roto i tōna nau pererau »,10 ma te tītau-manihini-ra’a mai ia tātou ’ia haere iāna ra.
Tē fa’a’ite nei au i tā’u ’itera’a pāpū ia ’outou nō te rā’au nō Gileada, te Fa’aora ’o Iesu Mesia, tō tātou Tāra’ehara, ’e nō tōna mana fa’aora maere mau. Tē fa’a’ite nei au i tō’u ’itera’a pāpū nō tōna hina’aro mau ’ia fa’aora ia ’outou. I te i’oa o Iesu Mesia, ’āmene.