E ’imira’a ha’apa’o maita’i fa’a’utu’ahia
Tē ani manihini nei au ia tātou pā’āto’a ’ia fa’arahi tāmau noa i tō tātou fa’aro’o i te Mesia, ’o tē tāmau nei i te taui i te orara’a o te feiā ato’a e ’imi ra iāna.
Mai te ’ōmuara’a o te matahiti 1846, e rave rahi tauatini pionie, te tāne, te vahine ’e te tamari’i tei haere i te pae tō’o’a o te rā i Ziona. Nā tō rātou fa’aro’o i fa’aara i tō rātou itoito fāito ’ore. Nō te tahi pae, ’aita taua tere ra i hope nō te mea ’ua pohe rātou i roto i te tere. ’Ua fārerei te tahi pae i te mau ’ati rahi, ’ua haere noa rātou i mua ma te fa’aro’o.
Maoti rātou, e rave rahi u’i i muri mai, i fāna’o ai tō’u ’utuāfare i te mau ha’amaita’ira’a o te ’evanelia mau a Iesu Mesia.
Mai te tahi atu taure’are’a, tā’u e paraparau atu nō ni’a iāna i muri iho, e 14 matahiti tō’u i ha’amata ai au i te uiui te mana’o nō ni’a i te ha’apa’ora’a ’e tō’u fa’aro’o. ’Ua haere au i te purera’a a te tahi atu fa’aro’o tāpiri mai i tō’u nohora’a, terā rā ’ua tupu te hina’aro i roto iā’u ’ia haere e māta’ita’i i te mau ’ēkalesia rau.
I te hō’ē avatea, ’ua ’ite atu vau e piti nā taure’are’a pereue ’ere’ere ’e te ’ahu ’uo’uo tē tomo atu ra i roto i te fare o tō’u ta’ata tāpiri mai. E mea ta’a ’ē—teie nā taure’are’a.
I te po’ipo’i a’e, ’ua fārerei atu vau i tō’u ta’ata tāpiri mai, ’o Leonor Lopez, ’e ’ua ui atu vau nō ni’a i taua nā taure’are’a ra. ’Ua parau mai Leonor ē, e misiōnare rāua nō Te ’Ēkālesia a Iesu Mesia i te Feiā Mo’a i te mau Mahana Hope’a Nei. ’Ua parau mai ’oia iā’u ma te ’oa’oa ē, ’ua bāpetizohia tōna ’utuāfare i roto i te ’Ēkālesia hō’ē matahiti nā mua atu. Nō tōna ’itera’a i tō’u ’ana’anatae, ’ua ani mai Leonor iā’u ’ia fārerei i te mau misiōnare ’e ’ia ha’api’i rahi atu nō ni’a i te ’Ēkālesia.
E piti mahana i muri iho, ’ua ’āmui atu vau i te ’utuāfare Lopez nō te fārerei i te mau misiōnare. ’Ua fa’a’ite mai ra rāua i tō rāua i’oa, ’o John Messerly nō Ogden, i Utaha, ’e ’o Christopher Osorio nō Walnut Creek, i Califonia. E’ita roa atu rāua e mo’ehia iā’u.
Nō mea ē e 14 noa tō’u matahiti, ’ua tītau te taea’e Messerly ’ia haere mātou i pīha’i iho i tō’u fare ’ia ’ite tō’u metua vahine i te mea tā rāua e ha’api’i ra iā’u. I reira, ’ua fa’ata’a marū noa rāua ē, ’ua haere mai rāua e fa’a’ite i te hō’ē parau poro’i nō ni’a ia Iesu Mesia ’e ’ua ani iāna i te parau fa’ati’a ’ia ha’api’i iā’u. ’Ua fa’ati’a māmā ’e ’ua ’āmui ato’a mai ’a ha’api’i ai rāua iā’u.
’Ua ani nā misiōnare nā mua ia Leonor ’ia fa’aoti mai i te hō’ē pure. ’Ua putapū roa vau nō te mea e ’ere tāna pure i te mea fa’ahiti noa i te mau parau i tāmau-’ā’au-hia, e mana’o rā nō roto mai i tōna ’ā’au. ’Ua ’ite au ē, ’ua paraparau mau ’oia i tōna Metua i te ao ra.
’Ua paraparau mai nā misiōnare ia mātou nō ni’a ia Iesu Mesia. ’Ua fa’a’ite mai rāua i te hō’ē hōho’a nōna, ’e ’ua māere roa vau nō te mea e hōho’a nō te Mesia ora tei ti’afa’ahou.
’Ua tāmau noa rāua, i te ha’api’ira’a ia māua e mea nāhea tō Iesu fa’ati’ara’a i tāna ’Ēkālesia i mūta’a iho ra, ’o ’oia te upo’o fa’atere ’āpitihia mai e nā ’ahuru ma piti ’āpōsetolo. ’Ua ha’api’i rāua ia māua nō ni’a i te tāivara’a—e mea nāhea te parau mau ’e te mana o te Mesia i te ’īriti-’ē-ra’a-hia i te fenua nei, i muri a’e i te pohera’a o tāna mau ’āpōsetolo.
’Ua parau mai rāua ia māua nō ni’a i te hō’ē tamaiti 14 matahiti o Iosepha Semita te i’oa, ’o tei haere e hi’o e rave rahi ’Ēkālesia i te ’ōmuara’a o te mau matahiti 1800 nō te ’imi i te parau mau. ’A tere noa ai te tau, ’ua rahi roa atu te tapitapira’a te mana’o o Iosepha. I muri a’e i tōna tai’ora’a i roto i te Bibilia ē, e nehenehe tātou « e ani i te Atua »1 i te pa’ari, ’ua fa’a’ohipa o Iosepha i te fa’aro’o, ’e ’ua haere i roto i te hō’ē uru rā’au nō te pure ’e nō te ani tei hea te ’ēkālesia tāna e ’āmui atu.
’Ua tai’o te hō’ē o te mau misiōnare i te ’ā’amu o Iosepha nō te ’ohipa tei tupu ’a pure ai oia :
« ’Ua ’ite atu ra vau i te pou māramarama i te faʼaʼatiraʼa i ni’a noa a’e i tō’u upoʼo, ’ua hau atu ho’i tō te reira māramarama i tō te mahana, ’e ’ua pou mai ra te reira i ni’a iho iā’u.
« … I te ma’irira’a taua māramarama ra i ni’a iho iā’u, ’ua ’ite atu ra vau e piti ta’ata, tō rāua teatea ’e te hanahana ’a ti’a noa ai rāua i ni’a a’e iā’u i roto i te reva ra, e ’ore roa ïa e ti’a ’ia fa’aauhia i te hō’ē noa atu mea. ’Ua parau mai ra te hō’ē o rāua iā’u, ma te fa’atoro atu i tōna rima i ni’a i te tahi, ’e ma te fa’ahiti i tō’u i’oa, i te nā-’ō-ra’a mai ē—’O tā’u Tamaiti here teie ’A fa’aro’o iāna ! »2
I roto i taua ha’api’ira’a ra, ’ua ha’apāpū mai te Vārua iā’u e rave rahi mau parau mau.
’A tahi, e fa’aro’o te Atua i te mau pure ’ā’au tae a tāna mau tamari’i ato’a, ’e ’ua matara te ra’i i te mau ta’ata ato’a, ’eiaha i te tahi noa mau ta’ata.
Te piti, te Atua te Metua, Iesu Mesia ’e te Vārua Maita’i, e mau ta’ata ta’a ’ē ïa te tahi ’e te tahi, tei hō’ē i roto i tā rātou ’ōpuara’a « te fa’atupura’a i te tāhuti ’ore ’e te ora mure o te ta’ata nei »3
Te toru, ’ua hāmanihia tātou i te hōho’a o te Atua. E tino i’o ’e te ’ivi tō tō tātou Metua i te ao ra ’e tāna tamaiti o Iesu Mesia mai tō tātou, terā rā, e tino fa’ahanahanahia ’e te maita’i roa, ’e te Vārua Maita’i ra e tino vārua ’oia.4
Te maha, nā roto ia Iosepha Semita, ’ua fa’aho’i fa’ahou mai Iesu Mesia i tāna ’evanelia ’e tāna ’Ēkālesia mau i ni’a i te fenua nei. Te mana autahu’ara’a i hōro’ahia i te mau ’āpōsetolo a te Mesia a 2000 matahiti i teienei, hō’ē ā ïa autahu’ara’a i hōro’ahia ia Iosepha Semita ’e Oliver Cowdery nā Petero, Iakobo ’e Ioane.5
I te hope’a, ’ua fa’aro’o mātou i te parau nō te tahi fa’ahou ’ite nō Iesu Mesia : te Buka a Moromona. Pāpa’ihia e te mau peropheta nō mūta’a iho ra, tē fa’a’ite ra te reira nō ni’a i te mau ta’ata tei ora i te fenua Amerika, nā mua a’e, i te taime ’e i muri iho i te fānaura’a o Iesu. ’Ua ha’api’i mai mātou nā roto mai i te reira e mea nāhea tō rātou ’itera’a, te herera’a ’e te ha’amorira’a i te Mesia, tei fā mai ia rātou ’ei Fa’aora tei ti’afa’ahou.
’Ua ha’aputapū roa te Vārua i tō’u ’ā’au ’a ha’api’i mai ai au nō te parau a te Fa’aora ia rātou : « Inaha, ’o vau nei, ’o Iesu Mesia, ’o tā te mau peropheta i fa’a’ite mai e tae mai i te ao nei ».6
’Ua hōro’a mai te mau misiōnare i tā māua Buka a Moromona. ’Ua tai’o māua ’e ’ua fāri’i i te anira’a e ’itehia i te pae hope’a o te Buka a Moromona, tei nā ’ō ē :
« ’E ’o teie tā’u a’o ia ’outou na, ’ia ’itea teie nei mau parau ia ’outou, e ui atu i te Atua, i te Metua mure ’ore ra, i te i’oa o Iesu Mesia ē, e parau mau ānei teie mau parau, ’e ’aore ānei ; ’e ’ia ui atu ’outou ma te ’ā’au hina’aro mau, ma te mana’o pāpū, ’e ma te fa’aro’o i te Mesia, nāna ïa e fa’a’ite mai i te parau mau ia ’outou nā roto i te mana o te Vārua Maita’i.
’E nā roto i te mana o te Vārua Maita’i e ’ite ai ’outou i te parau mau i te mau mea ato’a ra ».7
’A 45 matahiti i teienei tō tō’u metua vahine ’e o vau nei ha’api’ira’a mai nō te taime mātāmua i te ’oa’oa ’e te mana ’ia roa’a te fa’aro’o i te Mesia. Nō tō rātou fa’aro’o i te Mesia i fa’a’ite mai ai te ’utuāfare Lopez iā’u i tōna fa’aro’o ’āpī. Nō tō rātou fa’aro’o i te Mesia i fa’aru’e ai teie nā misiōnare e piti i tō rāua ’utuāfare i te fenua Marite nō te ’imi mai i tō’u metua vahine ’e iā’u. Nō te fa’aro’o o teie mau hoa here ato’a tei tanu i roto ia mātou i te hō’ē huero tinapi o te fa’aro’o tei riro mai i teienei ’ei tumu rā’au rahi o te ha’amaita’ira’a mure ’ore.
I te roara’a o teie mau matahiti ha’amaita’ihia, ’ua ’ite tātou, mai tā te peresideni Russell M. Nelson i parau : « Te mau mea maita’i ato’a i roto i te orara’a—te mau ha’amaita’ira’a ato’a e faufa’a mure ’ore—e ha’amata te reira nā roto i te fa’aro’o. Te vaiihora’a i te Atua ’ia upo’oti’a i roto i tō tātou orara’a, e ha’amata te reira nā roto i te fa’aro’o ē, e hina’aro tōna ’ia arata’i ia tātou. E ha’amata te tātarahapara’a mau nā roto i te fa’aro’o ē, e mana tō Iesu Mesia ’ia tāmā, ’ia fa’aora, ’e ’ia ha’apūai ia tātou ».8
Tē ani nei au ia tātou ’ia fa’arahi tāmau noa i tō tātou fa’aro’o i te Mesia, tei taui i te orara’a o tō’u metua vahine here ’e tō’u ’e tē tāmau nei i te taui i te orara’a o te feiā ato’a e ’imi iāna. ’Ua ’ite au ē, ’o Iosepha Semita te peropheta nō te fa’aho’i-fa’ahou-ra’a mai, ’o te peresideni Nelson tō tātou peropheta i teie mahana, ’o Iesu te Mesia ora ’e tō tātou tāra’ehara, ’e tē ora nei tō tātou Metua i te ao ra ’e tē pāhono nei ’oia i te mau pure ato’a a tāna mau tamari’i. Tē fa’a’ite pāpū nei au i teie mau mea i te i’oa mo’a o Iesu Mesia, ’āmene.