Tē pure nei au ’ia fa’a’ohipa ’oia ia tātou
E fa’atupu te mau tauto’ora’a ha’iha’i ’āmui i te hō’ē ’ohipa rahi, ma te fa’a’ite i te mau mea e rave rahi tā tātou tāta’itahi e rave ’ei pipi nā Iesu Mesia.
E tāpa’o ha’amāuruuru teie faraoa monamona hāmanihia i te pāte filo ’e te huero pistache. Hāmanihia e te ’utuāfare Kadado tei fatu e toru fare hāmanira’a faraoa i Damaseko, Siria e rave rahi matahiti. I te tupura’a te tama’i, ’aita te mā’a ’e te mau tauiha’a e tae fa’ahou mai i tō rātou tuha’a ’oire. ’Ua ha’amata te ’utuāfare Kadado i te pohe i te po’ia. I te taime fifi mau ’ua ha’amata te Latter-Day Saint Charities [te fa’anahora’a tauturu a te feiā mo’a nō te mau mahana hope’a nei] ’e te tahi mau rave ’ohipa itoito i Rahma Worldwide [Rahma nā te ao nei], i te hōro’a i te mā’a ve’ave’a i te mau mahana ato’a, ’e te ū nā te mau tamari’i na’ina’i. I muri a’e i te hō’ē tau fifi, ’ua ha’amata fa’ahou ā te ’utuāfare i te orara’a i roto i te hō’ē fenua ’āpī—’oia ato’a tā rātou tunura’a faraoa.
’Aita i maoro a’enei, ’ua tae mai te hō’ē ’āfata faraoa monamona i te pū ’ohipa a te ’Ēkālesia ’e te poro’i i muri nei : « Nō te roara’a hau i te piti ’āva’e, ’ua ti’a ia mātou ’ia fāri’i i te mā’a nō roto mai i te piha tunura’a mā’a a Rahma–Latter-day Saint [Charities]. ’Āhiri ’aita te reira, ’ua pohe ïa mātou i te po’ia. ’A fāri’i mai i teie […] tao’a iti nō tā’u faretoa ’ei tāpa’o ha’amāuruuru. Tē ani nei au i te Atua manahope ’ia ha’amaita’i ia ’outou […] i roto i te mau mea ato’a tā ’outou e rave ».1
E faraoa monamona nō te māuruuru ’e te ha’amana’ora’a. ’Ua fa’ata’ehia mai te reira nā ’outou. I te feiā ato’a tei pure i muri a’e i te hi’ora’a i te hō’ē ’ā’amu i roto i te parau ’āpī, i te feiā ato’a tei hōro’a i tō rātou taime i te mau taime fifi mau, ’aore rā tei hōro’a i te mau ō moni i te ’āfata moni a te ’ohipa tōtauturu ta’ata ; ma te ti’aturi ē, e fa’atupu te reira i te maita’i—māuruuru.
Hōpoi’a hanahana nō te ’atu’atura’a i te feiā veve
Tei raro a’e te ’Ēkālesia a Iesu Mesia i te fa’auera’a hanahana ’ia ’atu’atu i te feiā veve.2 ’O te hō’ē ïa o te mau pou o te ’ohipa nō te fa’aorara’a ’e te fa’ateiteira’a.3 « E te vai maita’i noa ra rātou, ’aita rātou i tu’u ’ē atu i tei taha’a, ’e tei po’ia, ’e tei po’iha, ’e tei pohe i te ma’i, ’e tei ’ore i ha’amaita’ihia ra ; ’e ’aita rātou i tu’u i tō rātou ’ā’au i ni’a i te tao’a ; ’e tē hōro’a noa ra rātou i te ta’ata ato’a ra, i te ta’ata pa’ari ’e te ta’ata ’āpī ato’a ho’i, i te tītī ’e te ti’amā, i te tāne ’e te vahine, i te feiā i roto i te ’ēkalesia ’e tei rāpae ho’i i te ’ēkalesia, ’aore a rātou e ha’apa’ora’a i te huru o te ta’ata i ’ere i te maita’i ra ».4
Tē pāhono nei te ’Ēkālesia i teie tītaura’a nā roto i te mau rāve’a rau, ’oia ato’a :
-
Te aupurura’a tā tātou e rave nei nā roto i te Sōtaiete Tauturu, te mau pupu autahu’ara’a, ’e te mau piha ha’api’ira’a ;
-
te ha’apaera’a mā’a ’e te fa’a’ohipara’a i te mau ō ha’apaera’a mā’a ;
-
te fa’a’apu ’e te tāpunura’a te mā’a ;
-
te mau pū fāri’ira’a nō te mau tītīhoria ;
-
te torora’a i te rima i te feiā mau ’āuri ;
-
te mau tauto’ora’a nō te ’ohipa tōtauturu ta’ata ;
-
’e te fa’anahora’a ’āfa’ifa’i JustServe, ’ia roa’a te reira, ’o tē fa’atū’ati nei i te feiā hōro’a i te rima nō te mau rāve’a tāvinira’a.
E mau rāve’a ana’e teie, fa’anahohia nā roto i te autahu’ara’a, e fa’atupu te mau tauto’ora’a ha’iha’i ’āmui i te hō’ē ’ohipa rahi, ma te fa’a’ite i te mau mea e rave rahi tā tātou tāta’itahi e rave ’ei pipi nā Iesu Mesia.
Tei te mau peropheta te ti’a’aura’a i te fenua tā’āto’a.
E hōpoi’a nā te mau peropheta te fenua tā’āto’a, ’eiaha noa nō te mau melo o te ’Ēkālesia. ’Ia au i tō’u iho ’itera’a, e nehenehe tā’u e fa’a’ite ē, tē amo pāpū nei te Peresidenira’a Mātāmua iho ’e ma te ha’apa’o maita’i i teie hōpoi’a. ’A rahi noa ai te mau hina’aro, ’ua fa’aue mai te Peresidenira’a Mātāmua ia mātou ’ia fa’arahi pāpū i tā tātou ’ohipa tōtauturu i te ta’ata. Tē ha’apa’o nei rātou i te mau hina’aro rahi a’e ’e i te mau tuha’a ha’iha’i roa.
’Aita i maoro a’e nei, ’ua hōpoi atu mātou i mua ia rātou i te hō’ē ’ahu pāruru nō te ’ohipa rapa’āura’a, tei nirahia e Behive Clothing nō te mau fare ma’i, nō te fa’a’ohipa i te roara’a o te ma’i pee. ’Ei taote rapa’au ma’i, ’ua ’ana’anatae roa te peresideni Russell M. Nelson. ’Aita ’oia i hina’aro e hi’o noa. ’Ua hina’aro ’oia e tāmata roa—e hi’o i te mau fatira’a rima ’e te roa ’e te huru nō te tā’amura’a i muri i te tua. I muri a’e, ’ua parau mai ’oia ia mātou ma te ’oto i roto i te reo, « ’ia fārerei ana’e ’outou i te ta’ata i roto i tā ’outou fa’auera’a ’ohipa, ’a ha’amāuruuru ia rātou nō tā rātou ha’apaera’a mā’a, tā rātou mau ō, ’e tā rātou mau aupurura’a i te i’oa o te Fatu ».
Parau fa’a’ite nō te ’ohipa tōtauturu ta’ata
I raro a’e i te fa’aterera’a a te peresideni Nelson, e fa’ata’a atu vau ia ’outou e mea nāhea Te ’Ēkālesia a Iesu Mesia i te Feiā Mo’a i te mau Mahana Hope’a nei ’ia pāhono i te mau mata’i rorofa’i, i te mau ’āueuera’a fenua, i te rāterera’a o te mau tītīhoria—e tae noa atu i te ma’i pe’e—mauruuru nō te maita’i o te feiā mo’a i te mau mahana hope’a nei ’e i te mau hoa e rave rahi. Hau i te 1 500 ’ōpuara’a tauturu nō te TOVI-19 tei riro ’ei ’ōpuara’a tauturu tumu a te ’Ēkālesia i te roara’a o nā 18 ’āva’e i ma’iri a’e nei, ’ua pāhono ato’a rā te ’Ēkālesia i nā 933 rahira’a ’ati nātura ’e te mau fifi o te mau tītīhoria i roto e 108 fenua. ’Aita rā te mau nūmera e fa’a’ite ra i te mau mea ato’a. E fa’a’ite atu vau ia ’outou e maha hi’ora’a poto nō te fa’ahōho’a i te fāito na’ina’i roa a’e o te ’ohipa e ravehia nei.
Tauturu nō te TOVI i ’Āfirita apatoa
’Ahuru ma ona matahiti tō Dieke Mphuti, nō Welkom, i ’Afirita apato’a. ’Ua pohe tōna nā metua e rave rahi matahiti i ma’iri, toe noa mai ’oia ana’e iho nō te ha’apa’o i tōna nā e toru taea’e ’e tuahine. E ’ohipa fifi roa nōna ’ia ’imi i te mā’a, e mea fifi roa atu rā i te itira’a mai te mā’a, ’e te tupura’a mai te ’ōpanipanira’a nō te TOVI. Pinepine rātou i te po’ia, maoti rā te ’ā’au hōro’a o te feiā tāpiri mai i ō rātou.
I te hō’ē mahana maita’i nō ’Ātete 2020, ’ua māere ’o Dieke i te pātōtōra’a i ni’a i tōna ’ōpani. ’Ua ’īriti ’oia i te ’ōpani, ’ite atu ra e piti ta’ata ’e’ē—hō’ē, e ti’a nō te ’Ēkālesia nō te piha tōro’a o te ārea i Johannesburg, ’e te tahi, e ti’a fa’atere nō te Tuha’a nō te Fa’ahotura’a Tōtiare nō ’Āfirita apato’a.
’Ua ’āpiti teie nā tā’atira’a nō te hōpoi i te mā’a i te mau ’utuāfare fifi. ’Ua tupu te hau rahi i roto ia Dieke i tōna ’itera’a i te ha’aputura’a tō popa’ā ’e te tahi atu mau mā’a tumu tei aufauhia i te moni tauturu a te ’Ēkālesia. Nā teie mau mea e tauturu i te pāturura’a i tōna ’utuāfare nō te mau hepetoma e rave rahi tae roa atu i te taime e ha’amata ai te fa’anahora’a tauturu a te fa’aterera’a hau nōna.
’Ua riro te ’ā’amu o Dieke ’ei hō’ē o te mau rahira’a tauatini ’itera’a mai teie te huru ’ati a’e te ao nei, i te roara’a nō te TOVI maoti tā ’outou mau ō ha’amo’ahia.
Tauturu afghan i Ramstein
’Ua ’ite tātou pā’āto’a i te mau hōho’a ’āpī i roto i te mau parau ’āpī—e rave rahi tauatini tītīhoria nō te fenua Afghanistan. E rave rahi tei tae mai i ni’a i te mau taura’a manureva ’aore rā i te tahi atu mau vāhi i Quatar, i te fenua Marite, i Helemani, ’e i te fenua Paniōra, nō te tahi ma’a taime hou ’a tere roa atu ai i tō rātou tāpaera’a hope’a. E hina’aro rū tō rātou ’e ’ua pāhono te ’Ēkālesia ma te hōro’a i te tauiha’a ’e te rima tauturu. I te taura’a manureva nō Ramstein i Helemani, ’ua hōro’a te ’Ēkālesia i te mau pāhi’i, te ū nā te tamari’i, te mā’a, ’e te tīa’a.
’Ua ’ite te tahi mau tuahine nō te Sōtaiete Tauturu ē, e rave rahi vahine afghane e fa’a’ohipa ra i te ’ahu o tā rātou tāne nō te tāpo’i i tō rātou upo’o nō te mea, ’ua tūmutuhia tō rātou tāpo’i upo’o i te taime ’āehuehu rahi i te taura’a manureva nō Kaboul. Nā roto i te hō’ē ’ohipa auhoa rahi ta’a ’ē i te pae fa’aro’o ’e i te pae hīro’a tumu, ’ua putuputu te mau tuahine nō te pāroita hō’ē nō Ramstein nō te nira i te mau ’ahu mahometa tumu nō te mau vahine afghane. ’Ua parau te tuahine Bethani Halls, « ’ua fa’aro’o mātou ē, ’ua hina’aro te mau vahine i te ’ahu nō te pure, ’e tē nira nei mātou ’ia nehenehe rātou ’ia [au maita’i] nō te pure ».5
Tauturu i te feiā nō Haiti i muri a’e i te ’āueuera’a fenua
Tē fa’a’ite nei teie hi’ora’a i muri nei ē, ’aita e tītauhia ’ia riro ’ei ta’ata moni ’aore rā ’ei ta’ata ruhiruhiā nō te riro ’ei mauha’a nō te maita’i. Nō te ’āma’a nō Cavaillon i Haiti o Marie « Djadjou » Jacques, 18 matahiti. ’A tupu ai te ’āueuera’a fenua rahi i pīha’i iho i tōna ’oire i te ’āva’e ’Ātete ra, te fare o tōna ’utuāfare te hō’ē o te rahira’a tauatini fare tei haruru i raro. E’ita e nehenehe ’ia feruri i te pe’ape’a rahi ’ia mo’e tō ’outou fare. ’Aita rā i topa i roto i te reira pe’ape’a, ’ua fāriu atu—Djadjou ma te itoito—i rāpae.
Associated Press
’Ua ’ite atu ’oia i te hō’ē ta’ata pa’ari tāpiri mai i tōna fare e rohi ra, ’e ’ua ha’amata i te tauturu iāna. ’Ua tauturu ’oia ia vetahi ’ē ’ia tāmā i te mau pehu. Noa atu tōna rohirohi, ’ua ’āmui atu ’oia i te tahi atu mau melo o te ’Ēkālesia nō te ’ōpere i te mā’a ’e te mau pūtē rā’au tāmā ia vetahi ’ē. ’Ua riro te ’ā’amu o Djadjou ’ei hō’ē o te mau hi’ora’a pūai nō te tāvinira’a i ravehia e te feiā ’āpī pa’ari ’a tūtava ai rātou i te pe’e i te hi’ora’a o Iesu Mesia.
Tauturu i Helemani nō te vaipu’e
Tau hepetoma ri’i noa hou te ’āueuera’a fenua, ’ua hōro’a ato’a te tahi atu pupu feiā ’āpī pa’ari i te hō’ē ā huru tāvinira’a i te tahi atu pae i te moana Atalanetita. ’Ua riro te mau pape pu’e tei ta’iri ia Europa tō’o’a o te rā i te ’āva’e Tiurai ra ’ei pape pu’e ’ino roa a’e i te roara’a o te mau tau.
I te maura’a te pape pu’e, ’ua hi’opo’a a’era te hō’ē ho’o tao’a nō te ’oire tāpiri mai i te ’oire nō ’Ahrweiler, i Helemani, i te mau ’ino ’e ’ua pe’ape’a roa ’oia. ’Ua muhumuhu a’era teie ta’ata ha’eha’a, e katolita ha’apa’o, i te hō’ē pure ’ia tono mai te Atua i te hō’ē ta’ata nō te tauturu iāna. I te po’ipo’i a’e, tē tae mai nei te peresideni Dan Hammon nō te misiōni nō Helemani nō Francfort, i roto i te aroa ’e te hō’ē pupu iti misiōnare ma te ’ahuhia i tō rātou pereue re’are’a rima tauturu. ’Ua tae roa te teitei o te pape i te fāito 3 metera i ni’a i te mau papa’i o te fare ho’o tao’a, ma te vaiiho mai i te vari paruparu me’ume’u. ’Ua ope te feiā tauturu i te vari paruparu, ’ua tātara i te vauvau tahua ’e i te mau papa’i mārō, ’e ’ua ’āpapa i te mau mea ato’a i roto i te aroa purūmu nō te ’ohira’a. ’Ua ’āmui atu teie ho’o tao’a ’oa’oa ia rātou nō te rave i te ’ohipa e rave rahi hora, ma te māere i te mea ē, ’ua tono mai te Fatu i te hō’ē pupu o tōna mau tāvini nō te pāhono i tāna pure—’e i roto noa e 24 hora !6
« Nō reira, tē pure nei au ’ia fa’a’ohipa ’oia ia tātou ».
Nō ni’a i te mau tauto’ora’a nō te ’ohipa tōtauturu ta’ata a te ’Ēkālesia, ’ua parau o Jeffrey R. Holland i te hō’ē mahana : « E pāhonohia te mau pure […] i te rahira’a o te taime […] nā te Atua ma te fa’a’ohipa i te tahi atu mau ta’ata. Nō reira, tē pure nei au ’ia fa’a’ohipa ’oia ia tātou. Tē pure nei au ’ia riro tātou ’ei pāhonora’a i te mau pure a te ta’ata ».7
E te mau taea’e ’e te mau tuahine, nā roto i tā ’outou aupurura’a, tā ’outou mau ō, tō ’outou taime, ’e tō ’outou here, ’ua riro ’outou ’ei pāhonora’a i te mau pure e rave rahi. ’E noa atu rā i te reira, e mea rahi roa atu ā te ’ohipa e rave. ’Ei melo bāpetizohia nō te ’Ēkālesia, tei raro a’e tātou i te fafaura’a ’ia ’atu’atu i te feiā nava’i ’ore. ’Aita tā tātou mau tauto’ora’a tāta’itahi e tītau roa i te moni ’aore rā i te mau vāhi ātea ;8 e tītau rā te reira i te arata’ira’a a te Vārua Mo’a ’e te hina’aro mau ’ia parau i te Fatu : « Teie au, o vau tā ’oe e tono ».9
Te matahiti fāri’i a te Fatu
Tē fa’a’ite ra Luka 4 ē, ’ua haere mai ra Iesu i Nazareta, i reira ho’i ’oia i te pa’arira’a mai, ’e ’ua ti’a a’era i roto i te sunago nō te tai’o. E mea fātata ïa i te ’ōmuara’a o tāna tau tāvinira’a i te tāhuti nei, ’e ’ua fa’ahiti a’era ’oia i te hō’ē pāpa’ira’a nō te buka a Isaïa :
« Tei ni’a iho iā’u te Vārua o te Fatu, ’oia i fa’atāhinu mai iā’u ’ei poro haere i te parau maita’i i te ta’ata ri’i, ’ua tono mai ’oia iā’u ’ei fa’aora i te feiā ’ā’au ’oto, ’ei poro haere i te ora nō te tītī, ’e ’ia hi’o fa’ahou te matapō, ’e ’ei tu’u ho’i i te feiā i ha’aparuparuhia ra,
« ’Ei poro haere i te matahiti e ’itehia mai ai e te Fatu ra […]
« Teie nei parau i pāpa’ihia tā ’outou i fa’aro’o iho nei, ’ua tupu ïa i teie nei mahana ».10
Tē fa’a’ite pāpū nei au ē, tē tupu nei te pāpa’ira’a i tō tātou ato’a nei ’anotau. Tē fa’a’ite pāpū nei au ē, ’ua haere mai Iesu Mesia nō te fa’aora i te mau ’ā’au ’oto. E hōro’a tāna ’evanelia i te ’itera’a i te matapō. E poro haere tāna ’Ēkālesia i te ora nō te tītī, ’e tē tauto’o nei tāna mau pipi nā te ao ato’a nei ’ia tu’u i te feiā i ha’aparuparuhia ra.
Tē hina’aro nei au e ’ōpani nā roto i te fa’ahiti-fa’ahou-ra’a i te uira’a tā Iesu i ui atu i tāna ’āpōsetolo o Simona Petero : « Tē rahi na tō ’oe hina’aro iā’u i teie ? »11 Te tumu mau o te ’evanelia tei roto ïa i te huru o tā tātou pāhonora’a i teie uira’a nō tātou iho ’e « ’ia fa’a’amu tātou i [tāna] mau māmoe ».12 Ma te auraro rahi ’e te here ia Iesu Mesia tō tātou Fatu, tē ani nei au ia tātou tāta’itahi ’ia riro ’ei tuha’a nō tāna tāvinira’a fa’ahiahia, ’e tē pure nei au ’ia fa’a’ohipa ’oia ia tātou ». Nā roto i te i’oa mo’a o Iesu Mesia, ’āmene.