N̄e juon eo jej iakwe eaar kōm̧m̧ane juon bōd eo eļap, emaron̄ in pen n̄an jeļā ekōjkan uwaake. M̧ōttan eo kōn ta eo ekōm̧m̧an bwe Alma 39–42 en kanooj in aorōk ej bwe ej kwaļo̧k ekōjkan an Alma—juon rikaļoor an Jisōs eo eaar juon iien eaar wōr an make jerawiwi ko rekanooj eļļap n̄an ukweļo̧k jāni—eaar kōtōbalbale kain jekjek eo. Koriantōn ļeo nejin Alma ekar kōm̧m̧ane juon jerawiwi eļap, im Alma, ke eaar jeļā n̄an kōm̧m̧ane jerbal in karejar eo an, eaar lōke kajoor in katak eo em̧ool n̄an leļo̧k n̄an ļeo nejin eo eaorōk im rōjan̄ bwe en ukweļo̧k (lale Alma 4:19; 31:5). Ilo jepta kein, jej lale an Alma kijin̄en̄e ilo liaakeļo̧k jerawiwi im an jouj im iakwe n̄an Koriantōn. Im āliktata, jej kile lōke eo an Alma bwe Rilo̧mo̧o̧r “Enaaj itok n̄an bōkļo̧k [jero̧wiwi ko] kajeeded naan ko rem̧m̧an kōn lo̧mo̧o̧r” n̄an ro rej ukweļo̧k (Alma 39:15). Kōn meļeļe eo bwe Koriantōn ilo jem̧ļo̧k in eaar bar ro̧o̧l n̄an jerbal eo an jerbal in karejar eo (lale Alma 49:30) emaron̄ letok n̄an kōj kōjatdikdik n̄an jeorļo̧k bōd im pinmuur n̄e jej pād ilo jorrāān kōņ jerawiwi ko ad make ak jerawiwi ko an ro jet jej iakwe er (lale Alma 42:29).
Bar lale “Alma Counsels His Sons” (video), Gospel Library.
Naan in kapilōk ko an Alma n̄an ļeo nejin Koriantōn ilo Alma 39 ej letok juon eddo eļap n̄an ekkatakkōn nana ko rej waļo̧k jen m̧ōm̧ an kanniōk, ekoba pija nana. Bōlen men eo eļapļo̧k an aorōk, emaron̄ barāinwōt jipan̄ kōj meļeļe menin letok eo an Rilo̧mo̧o̧r kōn jeorļo̧k bōd n̄an kōmour armej ro rej ukweļo̧k. Kajjitōk im m̧akūtkūt kein remaron̄ jipan̄:
Ta likjab ko raar tōlļo̧k Koriantōn n̄an kakkure kien erreeo? (lale Alma 39:2–4, 8–9). Kar ta jekjek in kōm̧m̧an ko an? (lale eoon 5–13). Ta kam̧ool ko ippād ke Koriantōn ekar ukweļo̧k? (lale Alma 42:31; 49:30; 48:18). Ta eo kwoj ekkatak kōn Rilo̧mo̧o̧r jān wāween in?
Riit peij 19–20 in N̄an Kōkajoorļo̧k Jodikdik ro: Juon Tōl n̄an Kōm̧m̧ani Kāālet ko. Innām je make kōmeļeļe ko am̧ kōņ ta in pija nana, etke ekauwōtata, im ta eo kwonaaj kōm̧m̧ane n̄e kwoj ione. (Bar lale Matu 5:27–28 im Katak im Bujen Ko 63:16.)
Elmen am̧ kōmeļeļeik n̄an eo m̧ōttam̧ etke kwoj kāālet n̄an bōbrae pija nana im mour kōn kien erreeo? Ta ļōmņak ko kwomaron̄ kwaļo̧k jān “Ānbwinnim Ekwojarjar” ilo N̄an Kōkajoorļo̧k Jodikdik ro: Juon Tōl n̄an Kōm̧m̧ani Kāālet ko (peij 22–29)?
Ļōmņak in alooje pija in “To Look Upon” (Gospel Library). Kabōjrak pija eo aolep iien n̄e David en kar bar oktak an kāālet. Elmen an kāālet ko an David āinwōt juon n̄an kāālet ko kwoj iooni?
Bōjrak im kōnono. N̄an alooje juon pija, men̄e kwoj katakin ak katak ippam̧ make, kabōjrak pija eo emakijkij im kajjitōk, “Ta eo ij ekkatak?” Menin emaron̄ bōk ļōmņak ko jān Jetōb Kwojarjar.
Ekar wōr jet an Koriantōn kajjitōk kōn ta eo ej waļo̧k ālkin mej. N̄urbōktak ko an ekōm̧m̧an bwe Alma en kwaļo̧k pedped in katak ko loi ilo Alma 40–41. Ilo am̧ ekkatak, kōm̧m̧ane juon laajrak in m̧ool ko kwoj loi kōn men ko āinwōt laļ eo an jetōb, jerkakpeje, im ekajet. Ļōmņak in riiti jebta kein jān kōm̧m̧an ko an ro jet, āinwōt, Koriantōn, aikuj in ukweļo̧k—ālkin, m̧ool eo kōn kōj aolep.
Imaron̄ kappukot uwaak ko n̄an kajjitōk ko aō kōn tōmak ilo Jisōs Kraist.
Jet iien jemaron̄ ļōmņak bwe rikanaan ro rejeļā uwaak eo n̄an aolep kajjitōk kōn gospel eo. Ak keememej kajjitōk ko raar jab uwaak an Alma ilo jebta 40. Ta eo eaar kōm̧m̧ane n̄an lo uwaak ko? Ta eo eaar kōm̧m̧ane ke eaar ejjeļo̧k uwaak ko ippān? Elmen an waanjon̄ak eo an Alma maron̄ jipan̄ eok?
Pija
kōrā eo ej jar
Jar ej juon wāween jemaron̄ lo uwaak ko n̄an kajjitōk ko kōn gospel in.
Pinmuur eo an Jisōs Kraist ej kōm̧m̧an bwe lo̧mo̧o̧r en maron̄ tōprak.
Koriantōn eaar tōmak bwe kaje eo n̄an jerawiwi ko eaar jab jim̧we (lale Alma 42:1). Ilo Alma 42, elmen an kar Alma kwaļo̧k n̄ūrbōktak eo an? Kwomaron̄ karōk eoon ko ilo jebta in ilo ruo kurup ko: “Anij ej jim̧we” im “Anij ej jouj.” Elmen an Pinmuur eo an Rilo̧mo̧o̧r maron̄ jim̧or jim̧we im jouj? Pukot kobain ļōmņak ko ilo pija eo “The Mediator” (Gospel Ļāibrāre).
Bar lale “How Great the Wisdom and the Love,” Hymns, 195.
N̄an waanjon̄ak, lale ennaan eo an allōn̄ in ilo Liaona im N̄an Kōkajoorļo̧k Jodikdik ro māākjiin.
Waanjon̄ak ko aō remaron̄ tōlļo̧k ro jet n̄an Kraist.
Kapilōk eo an Alma n̄an Koriantōn emaron̄ jipan̄ ajri ro meļeļe aorōk in erom̧ juon waanjon̄ak em̧m̧an. Riit ippān doon Alma 39:1. Ewi wāween an Siblon jatin Koriantōn kwaļo̧k juon waanjon̄ok em̧m̧an? Kajjitōk ippān ajri ro n̄an pukot uwaak ko n̄an kajjitōk in ilo Alma 38:2–4.
Kwomaron̄ bar ikkure juon ikkure me kwe im ajri ro nejum̧ maron̄ bōk kuņaan doon ļoore ak kōm̧m̧ane n̄an doon. Kōjerbal ikkure in n̄an kōmeļeļeik elmen an kōm̧m̧an ko ad maron̄ jipan̄ ro jet kōm̧m̧ani kāālet ko rem̧m̧an. Al ippān doon “I Am like a Star” (Children’s Songbook, 163), im jipan̄ ajri ro ļōmņake wāween ko remaron̄ in juon waanjon̄ak em̧m̧an.
Kōn juon ten̄ki ak juon pija in aļ, kwomaron̄ keidi meram eo n̄an kajoor in juon waanjon̄ok em̧m̧an. Kwe im ajri ro nejum̧ maron̄ bar lale pijain an Jisōs kōm̧m̧ani men ko rem̧m̧an im kōnono kōn waanjon̄ak eo Eaar kōm̧m̧ane n̄an kōj. Pija ko “Shine Your Light So Others May See” im “Lessons I Learned as a Boy” emaron̄ jipan̄ ajri ro nejum̧ kōnono elmen an waanjon̄ak eo aer maron̄ tōlļo̧k armej n̄an Kraist.
Kōn Jisōs Kraist, imaron̄ ukweļo̧k n̄e ij kōm̧m̧an bōd.
Ijjello̧kin kōlaajrake men ko pallin jerawiwi, kōmeļeļeik bwe Koriantōn eaar kōm̧m̧ane juon kāālet ebōd. Ta eo jemaron̄ ba n̄an jipan̄ e? Ļōmņak in riiti Alma 39:9 n̄an ajri ro nejum̧, im jipan̄ er meļeļe ta in ukweļo̧k im jeorļo̧k Kam̧ool bwe ukweļo̧k ej jerbal kōn wōt Jisōs Kraist im Pinmuur eo An.
En̄in juon menin katak n̄an kōmeļeļeik m̧ōņōņō eo an ukweļo̧k: Leļo̧k n̄an ajri eo juon men eddo n̄an kotake ilo am̧ kwaļo̧k bwebwenato eo kōn juon eo ekar kōm̧m̧an bōd im kar en̄jake būrom̧ōj. Ba n̄an ajri ro nejum̧ bwe menin ej āinwōt en̄jake ko renana jemaron̄ būki n̄e jej kōm̧m̧ane juon bōd. Bōk men eo eddo jen ajri ro ilo am̧ kam̧ool bwe Jemedwōj Ilan̄ im Jisōs Kraist remaron̄ joļo̧k eddodo eo, en̄jake ko renana im jipan̄ kōj kajim̧we bōd ko ad n̄e jej ukweļo̧k.
Ālkin ad mej, jetōb ko ad renaaj etal n̄an laļ eo an jetōb m̧ae iien Jerkakpeje im Ekajet.
Ekkā ļōmņake ta eo enaaj waļo̧k n̄an kōj ālkin ad mej. Ta eo komaron̄ kōm̧m̧ane n̄an jipan̄ ajri ro nejum̧ lo uwaak ko reim̧we? Kwomaron̄ je mej, laļ eo an jetōb (paradise im kalbuuj), jerkakpeje, im ekajet ioon jidik m̧ōttan peba ko rejenolo̧k. Jipan̄ ajri ro nejum̧ meļeļe ta meļeļein naan kein. Ilo am̧ riit ippān doon Alma 40:6–7, 11–14, 21–23, ajri ro nejum̧ remaron̄ likūt naan ko ilo jim̧we in ekkarrier eo ej waļo̧k ilo eoon kein.
Ajri ro rerūttoļo̧k remaron̄ jeraam̧m̧an n̄an lo uwaak ko n̄an kajjitōk ko jān aer lale Alma 40:6–7, 11–14, 21–23. Ļōmņak n̄an kajjitōk ippān ajri ro nejum̧ kajjitōk ko remaron̄ uwaak ilo eoon kein, āinwōt “Ta eo enaaj waļo̧k n̄an ānbwinnid n̄e inaaj jerkakpeje?” Karuwaineneik er n̄an lale uwaak ko ilo eoon ko rekkar.
Pija
Meri im Jisōs
Mari im Jerkakpeje Irooj, jān Harry Anderson
Ajri ro nejum̧ rejeļā ke juon eo ekar mej? Bōlen kwomaron̄ kōnono jidik kōn armej eo? Kwaļo̧k am̧ naan in kam̧ool bwe juon raan armej eo—im jabdewōt—renaaj jerkakpeje kōn wōt Jisōs Kraist. Eļan̄n̄e kar aikuji, kōjerbal peij in m̧akūtkūt eo an wiik in im kōmeļeļeik ta meļeļein jerkakpeje.
N̄an ļōmņak ko reļļapļo̧k, lale ennaan eo an allōn̄ in ilo eo Jera māākjiin.