N̄e jej riiti naan kein ilo jino in Alma jebta 43—“Im kiiō ij ro̧o̧l n̄an bwebwenato eo kōn tariņae ko ikōtaan riNipai ro im riLeman ro”—ejejjet n̄an kajjitōk etke Mormon eaar kobaik bwebwenato kein kōn tariņae ke eaar jab ļap jikin ioon pileij ko (lale Naan ko an Mormon 1:5). Em̧ool bwe elōn̄ ad tariņae ko ilo raan kein āliktata, bōtaab ewōr aorōkin ilo naan ko an eļapļo̧k jān kōmeļeļe ko kōn kōtōbalbal eo im eo an pata. Naan ko an rej barāinwōt kōpooj kōj n̄an pata eo me “jaar aolep deļo̧n̄e” (Hymns,, no. 250), pata eo jej tariņae kajjojo raan ņae kajoor ko an nana. Pata in ej lukkuun m̧ool in, im ta eo ej waļo̧k jāne ejelet mour ko ad indeeo. Āinwōt riNipai ro, kar im̧we kōj kōn juon —“Ad Anij, ad kabun̄, im anemkwoj, im ad aenōm̧m̧an, kōrā ro pāleed, im ro nejid”—ta eo Moronai eaar ņaetan “jibadbad eo an riKristian ro” (Alma 46:12, 16).
Ilo am̧ riiti Alma 43–52, kile ta eo riNipai ro raar kōm̧m̧ane me ekar kōm̧m̧an aer jeraam̧m̧an (ak jerata). Innām ļōmņake elmen am̧ maron̄ kōjerbal ta eo kwoj katak n̄an jipan̄ eok anjo̧ ioon tariņae ko am̧ ilo jetōb. Je ļōmņak ko am̧ ijin ilaļ:
Alma 43:19: RiNipai ro raar pojak kōn kein tariņae. (Imaron̄ kajjieon̄ kōpooj eō make kōn kein tariņae ko ilo jetōb).
Barāinwōt, lale ta eo kwomaron̄ katak jān kijejeto eo an rikōjdāt ro an riNipai ro. Ļōmņake elmen an Setan maron̄ ko̧kkure eok ilo ejja jekjek kein wōt:
Alma 43:8: Zerahemnah eaar kappukōt n̄an kalluik armej ro an bwe en maron̄ wōr an kajoor ioer. (Setan emaron̄ kapoik eok ilo wāween illu.)
Kwoj ke kōņaan ke kadikļo̧k kajoor eo an rikapo eo ilo mour eo am̧? Juon wāween n̄an ļoor kakkōl eo ilo Alma 48:17 n̄an erom “āinwōt Moronai.” Ļōmņak in kōm̧m̧ane juon laajrak in naan ko me Moronai ej kōmeļeļeiki ilo am̧ riiti Alma 46:11–28; 48:7–17. Ta eo kwoj katak jān Moronai n̄an “jutak pen ilo tōmak eo ilo Kraist”? (Alma 46:27).
Kwomaron̄ bar ekkatak elmen an Moronai kar im̧we ro jet “kōn jibadbad eo an riKristian ro” (lale Alma 46:11–22). Elmen am̧ kōmeļeļeik jibadbad in? Ta eo kwomaron̄ kōm̧m̧ane n̄an jipan̄ bōk kuņaam̧ ie? Elmen am̧ maron̄ im̧we ro jet n̄an bōk kuņaer?
Juon men Moronai ekar kōm̧m̧ane n̄an im̧we ro jet ekar kōm̧m̧ane juon taitōļ in anemkwoj, eo ej kwaļo̧k pedped ko n̄an im̧we riNipai ro (lale eoon 12). Ta pedped ko ritōl ro ad ilo Kabun̄ rej kwaļo̧k ilo tōre in ad? Kwomaron̄ lali ilo N̄an Kōkajoorļo̧k Jodikdik ro: Juon Tōl n̄an Kōm̧m̧ani Kāālet ko (bok jidikdik eo 2022), “Baam̧le Eo: Juon Naan in Kean̄ n̄an Laļ In,” ilo Doulul eo an Jiron̄ ro im Doulul eo an Likao ro unin kōnono ko, ak ennaan ko rekāāl ilo kweilo̧k eo eļap. Kwomaron̄ kōmeļeļeik ta eo rej kwaļo̧k kaki ilo jet iaan ennaan ko n̄an ejaake taitōļ in anemkwoj eo am̧ make—juon men ej kakeememej eok n̄an m̧ool n̄an Rilo̧mo̧o̧r im gospel eo An.
Bar lale Unin Kōnono ko an Gospel in, “Faith in Jesus Christ,” Gospel Library.
Setan ejeļā bwe kojjab m̧ōņōņō n̄an kōm̧m̧ani jerawiwi ko reļļap ak tōmak riab ko reļļap. Kōn menin, ej kōjerbal m̧ōņ ko im kapo ko reddik—jon̄an eo wōt ej maron̄e kwonaaj bōke—n̄an tōlļo̧k eok jān mour in jim̧we eo ejokne.
Pukot jon̄ak eo ilo Alma 47, im ļōmņake elmen an Setan maron̄ kajjieon̄ in m̧ōņe eok. Ļōmņaki ļōm̧ņak kein jān Elder Robert D. Hales
“Rijeļā m̧oņ eo Amalikaia eaar libūjerjere Leionti n̄an ‘wallaļļo̧k’ im ioone ilo kom̧laļ eo. Ak ke Leionti eaar ilo̧k jān ijo em̧man, kar baijini ‘jidik kōn jidik’ m̧ae iien eaar mej, im jarin tariņae eo an raar pād ilo pein Amalikaia (lale Alma 47). Kōn iakwelel ko im ņa ruwōn ko, jet armej rej kaal kōj n̄an ilo̧k jān ijo em̧m̧an. Ijo em̧m̧an ej ijo meram eo ej. … Ej ijo eaenōm̧m̧an” (“Christian Courage: The Price of Discipleship,” Liaona, No̧b. 2008, 74).
Ta eo kwoj katak jen pija eo “Temptation Fades as We Seek Christ in Every Thought” (Gospel Library) me emaron̄ jipan̄ eok anjo̧ jen kapo?
Men̄e kein tariņae ko an riNipai ro raar penļo̧k, riLeman ro raar bōk elōn̄ jikin ko aer (lale Alma 51:26–27). Elmen an kar waļo̧k? Pukot uwaak ko ilo am̧ riiti jebta kein (lale eļaptata Alma 51:1–12). Ļōmņaki ta kakkōl ko ilo bwebwenato in emaron̄ ekkar n̄an kwe im baam̧le eo am̧.
N̄an waanjon̄ak, lale ennaan eo an allōn̄ in ilo Liaona im N̄an Kōkajoorļo̧k Jodikdik ro māākjiin.
Imaron̄ lo jetōbin kōjparok ilo gospel in an Jisōs Kraist.
Ļōmņak in kōjerbal “Jebta 31: Captain Moroni Defeats Zerahemnah” (Bwebwenato ko an Bok in Mormon, 85–88) n̄an kwaļo̧k n̄an ajri ro nejum̧ kōn tariņae eo ikōtaan riNipai ro im riLeman ro. Ilo am̧ riit kōn kein tariņae ko an riNipai ro ilo Alma 43:19, kwomaron̄ keidi kein tariņae ko me rej kōjparok ānbwinnid kōn men ko Anij eaar litok n̄an kōj n̄an kōjparok jetōb ko ad. Bōlen kwe im ajri ro nejum̧ maron̄ jin̄aik juon pija in juon ajri im likūt juon kein tariņae ilo pija eo aolep men ko ajri eo nejum̧ im emaron̄ ba me rej kōjparok kōj ilo jetōb.
Eoon kein rej kōmeļeļeik tariņae ko an riNipai ro: Alma 48:7–9; 49:1–9; 50:1–6. Ālkin riiti eoon kein ippān doon, ajri ro nejum̧ remaron̄ m̧ōņōņō in kōm̧m̧ane juon jikin ritariņae jen men ko āinwōt jiia im būļankōj. Pija eo “Elder Stevenson on Fortifying Families” (Gospel Ļāibrāre) emaron̄ jipan̄ eok kōnono elmen bōk jetōbin tariņae n̄an m̧weeo im̧ōd.
Ajri ro nejum̧ remaron̄ lale pija ko ilo laajrak in n̄an kwaļo̧k bwebwenatoin taitōļ in anemkwoj eo (lale Alma 46:11–16; “Jebta 32: Kapin Moronai im Taitōl in Anemkwoj eo,” Bwebwenato ko an Bok in Mormon, 89–90). Ta eo Moronai eaar kōņaan bwe riNipai ro ren keememeje? (lale eoon 12)? Etke Jemedwōj Ilan̄ ekōņaan bwe jān keememej? Bōlen ajri ro nejūm̧ remaron̄ ejaake “taitōl in anemkwōj” eo aer make kōn naan ko ak pija ko me renaaj jipan̄ er keememeji.
N̄an katakin ajri ro nejum̧ n̄an “pen ilo tōmak ilo Kraist” āinwōt Moronai (lale Alma 48:13), kwomaron̄ jipan̄ er lale im jibwe juon men eo epen. Ta meļeļein n̄e tōmak ej “pen”? Riit ippān doon Alma 48:11–12 pukot ta eo ekar kōm̧m̧an bwe Moronai en pen ilo tōmak eo an ilo Kraist. Kom̧ maron̄ bar al juon al ippān doon āinwōt “I Will Be Valiant” (Children’s Songbook, 162). Ta eo jemaron̄ kōm̧m̧ane n̄an “pen ilo tōmak ilo Kraist”?
Riit ippān doon eoon ko kar kāāleti jān Alma 47:4–19. Ta eo en kar waļo̧k n̄e Amalikaia en kar jiron̄ Leionti ta eo eaar peeke n̄an kōm̧m̧ane jen jinoin? Ta eo eoon kein rej katakin kōj kōn wāween an Setan kajjieon̄ m̧ōņe kōj?
Jipan̄ ajri ro nejum̧ kōļapļo̧k lōke. Jet ajri remaron̄ jab em̧m̧an aer ekkatak kōn gospel in ippāer make. Juon wāween n̄an kōļapļo̧k lōke eo aer ej n̄an nōbar er n̄e rej bōk kūņaer ilo ekkatak. Ia eo kwomaron̄ būki kakkobaba in ippān m̧akūtkūt ko ilo laajrak in?
N̄an ļōmņak ko reļļapļo̧k, lale ennaan eo an allōn̄ in ilo eo Jera māākjiin.