Kōrā, jān Jen Tolman, eban kape

“Juļae 29–O̧kwōj 4: “Reilo̧k n̄an Anij im Mour”

Alma 36–38

Ke Alma eaar lo nana eo ipeļaakin, eaar m̧wilaļ an en̄jake “būrom̧ōj,” “eļap en̄taan,” im “en̄taan in jetōb” (Alma 8:14). “Jero̧wiwi ilubwiljin armej rein,” eaar ba n̄an Rizoram ro, “ej kōmetak aō” (Alma 31:30). Eaar en̄jake juon men ejja āinwōt ālkin an kar ro̧o̧l jān mijen eo an n̄an armej RiZoram ro—eaar lale bwe “būruōn armej ro eaar jino kanooj pen, im bwe raar jino n̄an inepata kōnke jejjet eo an naan eo, būruōn eaar būrom̧ōj otem būrom̧ōj” (Alma 35:15). Ta eo Alma eaar kōm̧m̧ane kōn ta eo eaar loe im en̄jake? Eaar jab m̧ōkaj an ebweer ak jab kōjatdikdik kōn jekjek eo an laļ in. Ijello̧kin, “eaar kōm̧m̧an bwe ļōm̧aro nejin ren kuktok ippān doon” im katakin er “men ko rej an weeppān” (Alma 35:16). Alma eaar katakin er bwe “ejjeļo̧k bar juon iaļ ak wāween eo armej emaron̄ mour, ijello̧kun wōt ilo im kōn Kraist. … Lo, E ej naan in m̧ool eo im weeppān” (Alma 38:9).

Ļōmnak ko n̄an Ekkatak ilo M̧weeo im ilo Kabun̄

Alma 36; 38:5–6

Imaron̄ ļotak ilo Anij.

Jet iaad enaaj wōr ad en̄jake ko rekabwilōn̄lōn̄ āinwōt an Alma kar oktak. Ak aolep raikuj “ļotak ilo Anij,” ekkā an waļo̧k jidik kōn jidik (Alma 36:23; 38:6). Ilo am̧ riiti Alma 36, ļōmņak kōn ta meļeļein ļotak ilo Anij. N̄an waanjon̄ak, ilo wāween bar ļotak ilo Anij, elmen am̧ en̄jake kōn jerawiwi? kōn Jisōs Kraist? Elmen an ļotak ilo Anij jelet ta eo kwoj kōm̧m̧ane n̄an uwaake make likjab ko am̧? Ta oktak ko jet rej waļo̧k ilo am̧ tōmak im jerbal? Ļōmņake elmen am̧ en̄jake oktak kein.

Bar lale Mosaia 5:7; 27:25–26; Alma 5:14; 22:15; Hilamōn 3:35; “Alma the Younger Is Converted unto the Lord” (video), Gospel Ļāibrāre.

Alma 36:12–24; 38:8–9

Jisōs Kraist eaar bōkļo̧k būrom̧ōj kōn m̧ōņōņō.

Jet iien armej remijak in ukweļo̧k kōnke rej lo ukweļo̧k āinwōt n̄e kaje ekōmetak kōn jerawiwi. Ta eo kwoj ļōmņak Alma en kar ba kake? N̄an lale, kwomaron̄ keidi elmen kar mour eo an Alma m̧okta jen an kar ukweļo̧k (lale Alma 36:6–17) jen kōmeļeļe eo an make ālkin an kar ukweļo̧k (lale eoon 18–27). Ekkar n̄an Alma Alma 36:17–18, elmen an Alma kar bōk jeorļo̧k bōd?

Bar lale Matthew S. Holland, “Mennin Letok eo Eaiboojoj an Nejin,” Liaona, Nov. 2020, 45–47.

Alma 37

Jeje ko rekwojarjar rekar kōjparoki “kōn juon un emālōtlōt.”

Ļōmņak kōn menin bwilōn̄ im kōjeraam̧m̧an bwe en wōr jeje ko rekwojarjar raan kein! Ilo am̧ riiti Alma 37, pukot kōjeraam̧m̧an ko me rej itok ilo an wōr jeje ko rekwojarjar (lale, n̄an waanjon̄ak, eoon 7–10, 18–19, 44–45).

Ilo Alma 37:38–47, Alma ej keidi “naan eo an Kraist” n̄an Liaona eo. Ilo am̧ kejōkļo̧kjeņ kōn keidi in, ļōmņak kōn wāween ko kwar en̄jake rekabwilōn̄lōn̄ im kajoor in katak ko an Kraist “raan n̄an raan” (Alma 37:40).

Bar lale D. Todd Christofferson, “The Blessing of Scripture,” Liahona, May 2010, 32–35; “As I Search the Holy Scriptures,” Hymns, no. 277; “Alma Testifies to His Son Helaman” (video), Gospel Library.

Jeje ko rekwojarjar rej katakin kōj ewi wāween ļoor Anij.

Alma 37:1–14

“Jān men ko reddik im reļam waan men ko reļļap rej kūrm̧ool.”

Jet iien jemaron̄ en̄jake āinwōt inepata ko ad rekanooj in ļap im kapokpok jon̄an uwaak ko rej aikuj in kilep im kapokpok barāinwōt. Ak ejjab aolep iien jekjek eo an Irooj in. Ilo am̧ riiti Alma 37:1–14, ļōmņake ta eo ej im̧we eok kōn elmen An kōm̧m̧an jerbal eo An. Innām kwomaron̄ ļōmņake im je wāween ko kwoj loi ilo pedped ko ilo mour eo am̧.

N̄e kwoj tin kwaļo̧k kōn pedped in n̄an juon, ta waanjon̄ak ko jān peļakid ak men ko ilo mour in me kwomaron̄ kōjerbale n̄an kōmeļeļeiki? Kwomaron̄ bar ekkatak ennaan eo an Būreejtōn Dallin H. Oaks “Men ko Reddik im Relam Waan,” (Liaona,Māe 2018, 89–92).

Ta jet iaan men ko reddik im reļam waan me rej kepaakļo̧k eok n̄an Jemedwōj Ilan̄ im Jisōs Kraist?

Ekkā, an kāālet ko ad “reddik im relam waan” kōm̧m̧an eļap oktak ilo mour ko ad. Ļōmņak in kāālet juon unin kōnono jān N̄an Kōkajoorļo̧k Jodikdik ro: Juon Tōļ n̄an Kōm̧m̧ani Kāālet ko im kajjitōk ippam̧ make āinwōt kein: Elmen an kāālet ko aō jelet eō im armej ro ipeļaakū? Ta oktak ko reddik im reļam waan imaron̄ kōm̧m̧ani me renaaj tōlļo̧k n̄an aenōm̧m̧an im m̧ōņōņō eo eļap?

Bar lale Michael A. Dunn, “Juon Bōjjāān Em̧m̧anļo̧k,” Liaona, Okt. 2021, 106–8; Unin Kōnono ko kōn gospel in “Agency,” Gospel Ļāibrāre .

Men ko reddik im reļam waan. Āinwōt men ko jet rellōn̄ ilo mour in, kwaļo̧k gospel im ekkatak remaron̄ in kōm̧m̧an ilo kōm̧m̧an ko reddik im reļam waan. N̄an waanjon̄ak, elmen kōjerbal jidik jo̧o̧ļ im jidik iij n̄an kwaļo̧k kajoor eo an men ko reddik im relam waan? (lale Matu 5:13; 13:33).

Alma 37:35–37

“Kapilōk ippān Irooj.”

Ilo Alma 37:35–37, lale kūr eo an Alma n̄an ļōm̧aro nejin Hilamōn. Ewi iaan kūr kein kwoj en̄jake im̧we n̄an jerbali? N̄an waanjon̄ak, kwomaron̄ ļōmņake ta meļeļein “kapilōk ippān Irooj” (eoon 37). Elmen am̧ kajjieon̄ kōm̧m̧ane menin? Elmen An kar tōl eok n̄an em̧m̧an?

Alma 38

Kwaļo̧k naan in kam̧ool eo aō kōn Jisōs Kraist emaron̄ kōkajoorļok ro ij iakwe er.

Naan ko an Alma n̄an ļeo eo nejin Shiblon ekar letok juon waanjon̄ak in wāween kōkajoorļo̧k im rōjan̄ ro otemjej jej iakwe er mour kake gospel in. Katak Alma 38 emaron̄ lewaj jet ļōmņak ko n̄an jipan̄ ro uwaan baam̧le eo im ro m̧ōttad lo kajoor ilo Jisōs Kraist. Je ta eo kwoj loe.

N̄an waanjon̄ak, lale ennaan eo an allōn̄ in ilo Liaona im Kōkajoorļo̧k Jodikdik ro māākjiin.

Ļōmņak ko n̄an Katakin Ajri ro

Alma 36:6–24

Ukweļo̧k ej bōktok m̧ōņōņō ilo Jisōs Kraist.

• N̄an jipan̄ ajri ro meļeļe bwe ukweļo̧k ej bōktok m̧ōņōņō, kwomaron̄ leļo̧k n̄an er jidik peba ewōr ie juon mejen m̧ōņōņō ilo turājet eo juon im mejen būrom̧ōj ilo turājet eo juon. Kajjitōk ippāer n̄an ron̄jake ilo am̧ riiti ak kōmeļeļeik Alma 36:13, 17–20 im kotak juon iaan mej ko n̄an kwaļo̧k elmen an kar Alma en̄jake. Ajri ro rōrūttoļo̧k remaron̄ je naan im eoon ko n̄an kōmeļeļeik elmen aer en̄jake. Ta eo ekabūrm̧ōj Alma, im ta eo eaar bōktok n̄an e m̧ōņōņō? Innām kwon kwaļo̧k n̄an er kōn m̧ōņōņō eo kwoj en̄jake n̄e kwoj ukweļo̧k.

Alma 37:6–7

“Jān men ko redik im reļam waan men ko reļļap rej kūrm̧ool.”

• Emaron̄ em̧m̧an ippān ajri ro nejum̧ n̄an pukot men ko reddik im men ko reļļap rej waļo̧k. Aitōm̧ ko āinwōt juon pātere, ak juon kein ikkure me ej kaenōm̧m̧an er emaron̄ in kein waanjon̄ak. Kwomaron̄ riiti Alma 37:6–7 ippān doon im ļōmņak jet men ko reddik im reļam waan me Anij ekōņaan bwe jen kōm̧m̧ani. Ta men ko reļļap remaron̄ waļo̧k n̄e jej pokake men ko reddik ak kien ko reļam waan?

• Ajri ro nejum̧ remaron̄ bar kajjieon̄e men in: jino kanne juon kab in dān, jidik pilil lo̧k jidik. Elmen an menin āinwōt Alma 37:6–7? Innām kwomaron̄ kōnono elmen an men ko reddik im reļam waan, āinwōt riiti jeje ko rekwojarjar kajjojo raan, rej āinwōt jidik pilil lo̧k jidik in dān jen kab eo.

• Jipan̄ ajri ro nejum̧ ļōmņaki wāween ko me rej bōktok men ko reļļap ilo m̧weeo, jikuuļ, ak m̧ōnjar eo. Al eo “‘Give,’ Said the Little Stream” (Children’s Songbook, 236) ebar kōmeļeļeik pedped in.

Alma 37:38–47

Jeje ko rekwojarjar remaron̄ jipan̄ eō kajjojo raan.

• Elmen am̧ maron̄ jipan̄ ajri ro nejum̧ kōļapļo̧k iakwe kōn naan in Anij, āinwōt an kar Alma kōm̧m̧ane n̄an Hilamōn? Kwaļo̧k juon pija in Liaona eo (āinwōt Gospel Art Book, no. 68) ak kajjitōk ippāer n̄an jin̄a ilo iien eo rej kwaļo̧k ta eo rejeļā kake Alma 37:38–47; 1 Nipai 16:10, 28–29). Elmen an jeje ko rekwojarjar āinwōt Liaona eo?

N̄an ļōmņak ko reļļapļo̧k, lale ennaan eo an allōn̄ in ilo eo Jera māākjiin.

Enjeļ eo ej Waļo̧k n̄an Alma im Ļōm̧aro Nejin Mosaia, jān Clark Kelley Price