Ruo Taujin Ritariņae ro Rem̧m̧an Ded, jān Arnold Friberg

O̧kwōj 19–25: “Rōļo̧k kōn Kajoor eo Eaiboojoj An”

Alma 53–63

N̄an keidi jarin ritariņae ro an riLeman ro, “jarin tariņae eo edik” an Hilamōn (Alma 56:33) in likao ro rem̧m̧an ded reban kar mour. Ijello̧kin an iiet oraer, ritariņae ro an Hilamōn “kar aolepāer … kanooj inono,” im “rejjan̄in kar tariņae” (Alma 56:46–47). Ilo jet wāween ko, jekjek eo aer maron̄ kar jeļā kake n̄an kōj me jet iien en̄jake iiet oran ak tōrjān jon̄an ilo pata eo ad ilo raan-ko āliktata ņae Setan im kajoor ko an nana ilo laļ in.

Bōtaab jarin tariņae eo an Hilamōn eaar wōr jet men ko rōļe ie ioon RiLeman ro me ejjab kōn oran ko ak kapeel an jarin tariņae. Raar kāālet Hilamōn, juon rikanaan, n̄an tōl er (lale Alma 53:19); “raar ekkatak jān ro jineer, bwe eļan̄n̄e reban pere, Anij enaaj lo̧mo̧o̧ren er” (Alma 56:47); im raar “tōmak otem tōmak ilo men ko kar katakin er.” Kōn tōmak eo aer, kar kōjparok er kōn “kajoor in Anij ekabwilōn̄lōn̄.” (Alma 57:26). Kōn menin n̄an jelm̧ae tariņae an mour in, jemaron̄ bōk peran. Ritariņae ro an Hilamōn rej katakin kōj bwe “eaar [wōr] juon Anij ejim̧we, im jabdewōt eo ej jab pere, bwe renaaj rōļo̧k kōn kajoor eo eaiboojoj An” (Alma 57:26).

Ļōmnak ko n̄an Ekkatak ilo M̧weeo im ilo Kabun̄

Alma 53:10–22; 56:43–49, 55–56; 57:20–27; 58:39–40

Bōk tōmak ilo Anij ejipan̄ eō anjo̧ ioon mijak.

N̄e en kar jab tōmak eo aer, ritariņae ro reddik rem̧m̧an ded an Hilamōn en kar wōr unin aer mijak. Ak kōn wōt tōmak eo aer, eaar ļap unin bwe ren peran. Ilo am̧ riit kōn er ilo Alma 53–58, pukot men ko me ejipan̄ eok jelm̧ae mijak ko am̧ kōn tōmak ilo Kraist. Ļōmņak in lale eoon kein: Alma 53:10–22; 56:43–49, 55–56; 57:20–27; im 58:39–40. Tābōļ in emaron̄ jipan̄ eok je ta eo kwoj loe.

Paoktokin ritariņae ro reddik an Hilamōn:
Unin an tōmak eo aer kajoor ilo Kraist:
Ta eo raar kōm̧m̧ane n̄an kōjerbal tōmak ilo Kraist:
Elmen an Anij kar kōjeraam̧m̧an er:

N̄an anjo̧ ioon jetōbin tariņae ko ad make, jej bar aikuji kajoor eo an Jisōs Kraist. Elmen am̧ maron̄ bōk An kajoor? Pukot uwaak ko ilo ennaan eo an Būreejtōn Russell M. Nelson “Bōktok Kajoor eo an Jisōs Kraist ilo Mour ko Ad” (Liaona, Eprōļ 2017). Kwomaron̄ keidi kapilōk eo an ippān men ko me ritariņae ro an Hilamōn rekar kōm̧m̧ani.

Ālkin ekkatake men kein, ļōmņak kōn tariņae ko am̧ make ilo jetōb. Je ta eo kar im̧we eok n̄an kōjerbal am̧ tōmak ilo Jisōs Kraist.

Bar lale Neil L. Andersen, “Wounded,” Liaona, Okt. 2018, 83–86; “True to the Faith,” Hymns, no. 254; “Drawing upon the Power of God in Our Lives” (video), Gospel Library; Gospel Topics, “Faith in Jesus Christ,” Gospel Library.

Raar Jab Pere, jān Joseph Brickey

Alma 58:1–12, 31–37; 61

Rikaļoor ro an Jisōs Kraist ejjab pidodo aer kōnana.

Jim̧or Hilamōn im Peoran eaar wōr aer un ko rem̧m̧an n̄an kōnana. Hilamōn eaar jab bōk ebwe jipan̄ n̄an jarin tariņae ko an, im Peoran kar bōd in ņa ruwōn jān Moronai kōn an dāpij jipan̄ (lale Alma 58:4–9, 31–32; 60). Ta eo ej kabwilōn̄ eok kōn uwaak ko aer ilo Alma 58:1–12, 31–37 im Alma 61 Jen baj en̄jake eo am̧ etke raar uwaak rot in?

Elder David A. Bednar ekar kalikkare “Wōj eo eļaptata im waanjon̄ak ko eļap meļeļeier an ineem̧m̧an rej pād ilo mour eo an Rilo̧mo̧o̧r eo Make” (“Ineem̧m̧an im Ettā Bōro,” Liaona, Māe 2018, 32). Ļōmņak kōn wāween an Rilo̧mo̧o̧r kar kwaļo̧k ettā. Lale n̄an waanjon̄ak, Matu 27:11–26; Luk 22:41–42; Jon 13:4–17. Elmen am̧ maron̄ ļoor waanjon̄ok eo An?

Alma 60:7–14

Ewōr juon aō eddo n̄an ļōn̄aj ro ipeļaakū.

Moronai ekar je bwe Anij enaaj likūt eddo ioon Peoran eļan̄n̄e ejeļā bwe ej kowaane aikuj ko an ritariņae ro an Rinipai ro. Ta eo kwoj katak jān Alma 60:7–14 n̄an kea kōn armej ro rej pād ilo aikuj? Ta eo jemaron̄ kōm̧m̧ane n̄an ekkōl kake n̄an tōpar aikuj ko an ro jet?

Alma 62:39–51

N̄e ij ettā, apan̄ ko an mour in remaron̄ ukōt būruwō n̄an Anij.

Likūt juon lep amej im juon piteto ilo juon dān bwil n̄an jipan̄ eok ļōmņak elmen am̧ maron̄ kāālet “pidodo” ak “pen” jen apan̄ ko am̧. Ilo an lep eo im piteto eo kōmat, katak Alma 62:39–51, im keememej elmen an armej ro kar m̧weiir kōn jerbal in karejar eo an Hilamōn ālkin tariņae eo aer ippān riLeman ro. Innām kwomaron̄ keidi menin elmen aer kar m̧weiir kōn katak ko an ium̧win 13 iiō ko m̧oktaļo̧k Alma 45:20–24). Elmen an kar jelet riNipai ro kōn ejja kaen̄tanaan in? N̄e lep eo im piteto eo relukkuun in mat, katipdikdiki lep eo im m̧wijit piteto eo. Elmen an dān bwil eo jelet oktak ko aer? Ta eo kwoj katak kōn elmen ad maron̄ kāālet n̄an dipuk kean̄tanaan? Elmen am̧ maron̄ oktakļo̧k n̄an Anij ilo kean̄tanaan ko am̧?

Kwaļo̧k jān en̄jake ko ilo m̧weeo. N̄e kwoj katakin juon kūlaaj ilo Kabun̄ in, kajjitōk ippān ro uwaan kūlaaj eo n̄an kwaļo̧k ta eo raar ekkatak ilo m̧weeo. N̄an waanjon̄ak, lale ta eo raar ekkatak kōn kean̄tanaan ko im ettā jān kōmatte lep im piteto ko.

N̄an ļōmņak ko reļļapļo̧k, lale ennaan eo an allōn̄ in ilo Liaona im N̄an Kōkajoorļo̧k Jodikdik ro māākjiin.

Ļōmņak ko n̄an Katakin Ajri ro

Alma 53:20–21; 56:47–48

Imaron̄ in tiljek n̄an Anij āinwōt ritariņae ro rem̧m̧an ded an Hilamōn.

• Kwomaron̄ kōjerbal elōn̄ kein katak ko im kwaļo̧k bwebwenato ko kōn ritariņae ro an Hilamōn ekoba pija ko ilo laajrak in im “Jebta 34: Helaman and the 2,000 Young Warriors” (Bwebwenato ko an Bok in Mormon, 93–94). Peij in m̧akūtkūt eo an wiik in emaron̄ jipan̄ ajri ro nejum̧ ļōmņaki wāween ko remaron̄ āinwōt ritariņae ro an Hilamōn. Ļōmņak in kwaļo̧k jet iaan m̧wiļ ko an ritariņae ro rem̧m̧an ded jān Alma 53:20–21 bwe ren jinoe. Kwomaron̄ al ippān doon “We’ll Bring the World His Truth” (Children’s Songbook, 172–73).

Alma 56:45–48; 57:21

Imaron̄ tiljek kōn ta eo ro jinō im jema rej katakin ilo jim̧we.

• Ritariņae ro rem̧m̧an ded an Hilamōn raar reilo̧k n̄an tōmak eo an jineer n̄e rej ioon eļap apan̄. Bōlen kwomaron̄ riiti Alma 56:46–48 ippān ajri ro nejum̧ im kajjitōk ippāer n̄an ron̄jake ta eo ro jinen likao ro rein rem̧m̧an ded kar katak jen er. Kwomaron̄ kajjitōk ippāer ta eo raar katak jen jineer im jemeer—ak rūtto ro jet—kōn Rilo̧mo̧o̧r. Etke eaorōk n̄an lukkuun “pokake”? (Alma 57:21).

• Elmen am̧ maron̄—āinwōt ro jinen ritariņae ro rem̧m̧an ded—lukkuun lale bwe ajri ro nejum̧ rej jeļā kōn tōmak eo am̧ ilo Anij? Juon wāween ej n̄an kwaļo̧k elmen an tōmak eo am̧ jelet mour eo am̧. N̄an waanjon̄ak, elmen An kar kōm̧m̧an bwe kwon “anjo̧” n̄e “kwojjab pere”?

Ine in Tōmak, jān Jay Ward

Alma 53:10–18

Imaron̄ kōjparok bujen ko aō ippān Jemedwōj Ilan̄.

• Ajri ro nejum̧ remaron̄ kōnono kōn juon tōre juon armej ekar kōm̧m̧an im kōjparok kallim̧ur eo aer. Elmen aer en̄jake ke rekar kōjparok kallim̧ur eo? Kwomaron̄ riiti Alma 53:10–18 im kajjitōk ippān ajri ro nejum̧ n̄an pukote elmen an Hilamōņ, im armej ro an Ammōn, im armej ro an ļōm̧aro nejin Ammōm kar kōm̧m̧an im kōjparok kallim̧ur ko aer, ak bujen ko. Kwomaron̄ kwaļo̧k elmen an Jemedwōj Ilan̄ kōjeraam̧m̧an eok ilo am̧ kōjparok bujen ko.

Alma 61:3–14

Imaron̄ kālet n̄an jab illu.

Kajjitōk ippān ajri ro nejum̧ n̄an ļōmņake juon iien kar na ruweer kōn juon men rekar jab kōm̧m̧ane. Kajjitōk ippāer elmen an kar waļo̧k n̄an Peoran (lale Alma 60–61; bar lale “Jebta 35: Kapen Moronai im Peora,” Bwebwenato ko an Bok in Mormon, 95–97). N̄an katak kōn wāween an Peoran kar uwaak, bōk kuņaan doon riiti eoon ko jān Alma 61:3–14. Ta eo Peoran ekar kōm̧m̧ane bwe Moronai en kōnanaik e? (lale Alma 61:2–3, 8–9). Ta eo jej ekkatak kōn jeorļo̧k bōd jān waanjon̄ak eo an Rilo̧mo̧o̧r? (lale Luk 23:34).

N̄an ļōmņak ko reļļapļo̧k, lale ennaan eo an allōn̄ in ilo eo Jera māākjin.

Ej M̧ool, Ļo, Aolep rej Pād im Bōnbōn, jān Clark Kelley Price.