Tamuera are te I-Reimwanaite i aon te O, iroun Arnold Friberg

Tebetembwa 9–15: “Rongorongo aika a Raraoi Aika Kakorakora te Kimwareirei”

Ereman 13–16

Te moan tai are e kataia Tamuera te Reimwanaite n tibwaua “te rongorongo ae raoiroi” i Taraemera (Ereman 13:7), e aki butimwaeaki ao e karenakoaki irouia Nibwaite aika a matoatoa nanoia. Titebo ma a tia ni katea te oo ae matoatoa ni katobibia nanoia are e tukiia man karekean ana rongorongo Tamuera. Tamuera e ataa kakawakin te rongorongo are e na tibwauaia ao ni kaota te onimaki man irakin ana tua te Atua “bwa e na riai ni manga oki, ao n taetae ni burabeti” (Ereman 13:3). N aron Tamuera, ti bane ni kaitara ma te oo ngke ti “katauraoa kawain te Uea” (Ereman 14:9) ao ni kekeiaki n ira Ana burabeti. Ao n aron Tamuera, ti kaota naba ara kakoaua iroun Iesu Kristo, “ae e na bon roko,” ao e kaoiia ni kabane bwa a na “onimakina arana” (Ereman 13:6; 14:13). Ti aki ni kabane aika a na kakauongo, ao n te tai ae waekoa e na bon kaitaraira. Ma ake a kakoaua te rongorongo aio ma te onimaki inanon Kristo a kunea bwa bon “rongorongo aika a raraoi aika uota te kimwareirei ae korakora” (Ereman 16:14).

Iango ibukin Reiakinana n te Mweenga ao n te Taromauri

Ereman 13

Te Uea e anga kauring rinanoia Ana burabeti.

Inanon koroboki aika tabu, burabeti n tabetai a kabotauaki ma uaatiman iaon te oo ke taua aika a anga kauring n taian kaangaanga (taraa Itaia 62:6; Etekiera 33:1–7). Ngkai ko kamatebwaia ana taeka Tamuera inanon Ereman 13, iangoia bwa e kanga n riki bwa te uatiman ibukim. Tera ae e taekinna ae ko taku bwa e irekereke nakon boong aikai? (taraa verses 8, 21–22, 26–29, 31, and 38). Te katoto, tera ae reirei Tamuera ibukin te rairannano? iaon te nanorinano ao kaubwai? iaon ukeran te kimwareirei “ni karaoan ae buakaka”?

Ko kona naba n kakaei rongorongo man te maungatabu ibukin kauring aekan aio are e anga te Uea rinanoia burabeti ni boong aikai. Tera ae ko namakinna bwa ko kaungaaki ni karaoi inanon kauring aikai?

Taraa aron tein waakina. Te baeten bon te baire ke te bwai ni katooto ae kona ni kabonganaaki bwa te kairi ibukin kakoroan nanon te mwakuri. Inanon koroboki aika tabu, ti karekei baeten ae a kaotia bwa e kanga te Uea ni kakoroi nanon Ana mwakuri, n aron kanakoaia Ana toro bwa a na kauringiia ana aomata.

Ngkai ti kakauongo nakoia burabeti, a na kaeinetiira nakon Iesu Kristo

Ereman 13–15

E kaoai te Uea bwa N na rairannano.

Ana kauring Tamuera ibukin ana motikitaeka te Atua angiin te tai e airi ma te kakao nakon te rairannano. Kakaei kakao aikai rinanon Ereman 13–15 (taraa riki Ereman 13:6–11; 14:15–19; 15:7–8). Tera ae ko reiakinna man kiibu aikai ibukin ana babaire te Atua? Tabeman aomata a taraa te rairannano bwa te katuaa ae korakora—te bwai ae e na totokoaki. Ni bon am iango, e kanga Tamuera n tangiriia Nibwaite bwa ana noora te rairannano?

Bwa e aonga n nano am kamatebwai, ko kona n wareka ana rongorongo Beretitenti Russell M. Nelson “Ti Kona ni Karaoa ae Tamaroa Riki” (Riaona, Meei 2019, 67). E kanga n kabwaranakoa te rairannano? Tera kakabwaia man te rairannano ae e itiaki ae ko kunei n ana rongorongo? Ko kona naba n kakaei bwaai aika onoti are e kaoira te burabeti bwa tina bitii. Tera ae e tuangko te Tamnei ae e Raoiroi ae kona riai n bitia? Iangoia bwa kona korei kaotioti ake a roko iroum.

E kanga n okoro te rairannano ma tii bitakin anuam? E aera kai e kakawaki bwa kona butimwaea ana kakao te Atua nakon te rairannano? Ngkai ko iangoa aio, iangoa aneneakin ke ongoraeakinan te anene n taromauri ae e katerea te kakao aio, n aron “How Gentle God’s Commands” (Anene n Taromauri, no. 125).

Taraa naba “E na Buokiko Iesu Kristo,” Ibukin Kakorakoraaia Kairake: Te Kairi ibukin Aia Rinerine, 6–9; “Repentance: A Joyful Choice,” “Principles of Peace: Repentance” (videos), Gospel Library; Gospel Topics “Rairannano,” Gospel Library.

Ereman 14; 16:13–23

Te Atua e kanakoi kanikina ma kamimi bwa e na kakoaua ibukin bungiakin ao maten te Tia Kamaiu.

Inanon Ereman 14, Tamuera e kabwarabwara bukina ngkai te Uea e katauraoi kanikinaean bungiakin ao maten te Tia Kamaiu bwa aonga aomata “n ata … rokona” ao “ni kakoaua arana” (Ereman 14:12). Ngkana ko kamatebwaia Ereman 14, mwannanoi kanikinaa ni bungiakin te Tia Kamaiu n kiibu 1–8 ao kanikinaa ni Matena n kiibu 20–28. Bukin tera n am iango kanikinaa aikai a riki bwa kawai aika a nakoraoi ni kakoauaan bungiakin ao maten Iesu Kristo?

Kanikina ake a aki rangi ni kamiimi ke ni kaeineti nakoim a kona ni buokiko “n onimaki iaon aran [te Tia Kamaiu].” Tera ae E a tia ni karaoia ae e na kakorakora am onimaki Irouna?

Tera kauring ae anga ibukin kanikinaa n Ereman 16:13–23? Ko na kanga n totokoi kateia aomata aika a kabwarabwaraaki inanon kiibu aikai?

Taraa naba Aramwa 30:43–52; Ronald A. Rasband, “Iroun Divine Design,” Liahona, Nob. 2017, 55–57.

Ereman 15:3

Te boaaki mai iroun te Uea e riki bwa te kanikinaa ibukin Ana tangira.

Ana taeka Tamuera iai inanona takutaku aika matoatoa, ma Ereman 15:3 e anga te nonoori ae onoti iaon te boaaki mairoun te Uea. E kangaa te boaaki mairoun te Atua n riki bwa kaotan Ana tangira? Tera kakoaua ae ko nooria man Ana tangira ao Ana nanoanga te Uea inanon ana taetae ni burabeti ao kauring Tamuera?

Iangoa kamatebwaian ana rongorongo Unimwaane D. Todd Christofferson “As Many as I Love, I Rebuke and Chasten” (Riaona, Meei 2011, 97–100), ni kakaea bukin te boaaki mai karawa. Ningai te tai ae ko a tia n noora te Atua ni mwakuri ni kawai aikai inanon maium?

Ereman 16

Burabeti a kainetai nakon Iesu Kristo.

N Ereman 16, tera ae ko reiakinna mairouia naake a butimwaea ana reirei Tamuera? Tera ae ti reiakinna mairouia naake a totokoia? Iangoia bwa e kanga iirakiia burabeti aika maiu ngkai n tia ni buokiko n kaaniko riki nakon Iesu Kristo.

Ibukin iango riki tabeua, taraa te beeba ni kaongora n te namwakain aio n te Riaona ao Ibukin Kakorakoraia Kairake maekatiin.

Iango ibukin Reiakinaia Ataei

Ereman 13:2–5

E kona n taetae nakoiu te Atua inanou.

• Ko na kanga n reireiniia natim ae te Atua e kona n taetae nakon nanora, n aron are E karaoia nakon Tamuera? Tao ko kona n tuangiia bwa ana kaotii kawai aika a kakaokoro n reitaki n aki kabonganai taeka (n aron katean kaina ke tein ubum). Aio e kona ni kairiira nakon te maroro iaon kawai aika kakaoko are e kona iai Tamara are i Karawa n reitaki nakoira. Bwa mwakoron te maroro, ngkoe ao natim kam kona n taraa tamnein Tamuera te I-Reimwanaite (te tamnei aio bon uoua mwakorona) ao n wareka Ereman 13:2–5 ngkai natim a ongora bwa tera ae taekinna te Atua nakon Tamuera.

• A mwaiti mai buakora—riki ataei—ae a kainanoa te ibuobuoki n kinaa bwa e kanga ao ningai te tai ae e taetae iai nakoira te Atua. Ko kona n tuangiia natim tao te tai ngke e buokiko iai te Tamnei ae Raoiroi n ataia i nanom bwa tera ae tangria te Atua bwa kona karaoia ke n taekinna. Kabwarabwara bwa ko kanga n ataia bwa te Atua e reitaki nakoim. Tao natim a kona naba n tibwaua aia taneiai aika aekan naba ake ko tia n rinanona.

Ereman 14:2–7, 20–25

Burabeti a reirei taekan Iesu Kristo.

• Te uaia n anenea “Samuel Tells of the Baby Jesus” (Aia Boki n Anene Ataei, 36) tao bon te kawai ae raoiroi bwa kona reiakiniia natim bwa tera ae reiakinna Tamuera iaon Iesu Kristo. Tibwauaan “Mwakoro 40: Tamuera te I-Reimwanaite E Reirei taekan Iesu Kristo” (Karakinan Ana Boki Moomon, 111–13) bon teuana naba. Tera ae e reirei Tamuera ibukin te Tia Kamaiu? Tao ko kona naba n tibwauaia bwa tera ae a reirei iai burabeti n boong aikai Ibukina. A kanga aia taeka n kakorakora ara onimaki Irouna?

Ereman 16:1–6

I kakabwaiaaki ngkana I iriira te burabeti.

• Ko kona n kakorakora ana onimaki natim iroun te burabeti man kaotan katooto irouia aomata ake a kakaonimaki. Tabeua maibuakon aikai a kuneaki inanon Ereman 16:1, 5. Inanon am tai ni wareware, a kona am ataei n teirake ngkana a ongo te bwai are a karaoia aomata ngke a kakoauai ana taeka Tamuera. Ngkanne, inanon am tai n wareka kiibu 2 ao 6, am ataei a kona n tekateka ngkana a ongo te bwai ae a karaoia aomata ngke a aki kakoaua. Ti na kanga ni kaotia bwa ti kakoaua ana taeka te burabeti ae maiu? Tuangiia ataei bwa ko kanga n kakabwaiaaki ngkai ko iira ana reirei te Uea rinanoia Ana burabeti.

Ibukin iango riki tabeua, taraa te beeba ni kaongora n te namwakaina aio n te Rao maekatiin.

Tamuera te Reimwanaite, iroun Lester Yocum.